Search form

Login - Register | FOLLOW US ON

Logo of Phnom Penh Post newspaper Phnom Penh Post - មជ្ឈមណ្ឌល​ពាណិជ្ជកម្ម និង​លំនៅឋាន​ធំ​មួយ​លេច​ឡើង​ លើ​មហាវិថី​សហព័ន្ធ​រុស្ស៊ី

Content image - Phnom Penh Post
គំរូ​នៃ​គម្រោង Star City របស់​ក្រុមហ៊ុន​ថៃ​ប៊ុនរ៉ុង។ រូបថត សហការី

មជ្ឈមណ្ឌល​ពាណិជ្ជកម្ម និង​លំនៅឋាន​ធំ​មួយ​លេច​ឡើង​ លើ​មហាវិថី​សហព័ន្ធ​រុស្ស៊ី

មជ្ឈមណ្ឌល​ពាណិជ្ជកម្ម និង​លំនៅឋាន​ធំ​មួយ​ឈ្មោះ Star City ដែល​វិនិយោគ​​​​ដោយ​ក្រុមហ៊ុន​ថៃ​ប៊ុនរ៉ុង និង​ក្រុមហ៊ុន​ចិន​ស្ថិត​នៅ​តាម​បណ្តោយ​មហាវិថី​សហព័ន្ធ​រុស្ស៊ី​នឹង​ដាក់​ឲ្យ​ដំណើរការ​នៅ​ចុង​ឆ្នាំ​នេះ​។

លោក​សាស្ត្រាចារ្យ ទួស សាភឿន ថ្នាក់​ដឹកនាំ​ជាន់​ខ្ពស់​មួយ​​រូប​នៃ​ក្រុមហ៊ុន​ថៃ ប៊ុនរ៉ុង បាន​ថ្លែង​ឲ្យ​​ដឹង​តាម​ទូរស័ព្ទ​កាលពី​ចុង​សប្តាហ៍​មុន​ថា​មជ្ឈមណ្ឌល​ការិយាល័យ និង​លំនៅឋាន​នេះ​បាន​បញ្ចប់​ការ​សាងសង់​គ្រោង​អគារ​របស់​ខ្លួន​រួច​ហើយ និង​គ្រោង​ដាក់​ឲ្យ​ដំណើរការ​នៅ​ចុង​ឆ្នាំ​នេះ។

លោក​បន្ត​ថា​ គម្រោង​នេះ​មាន​ចំនួន ៧ ​អគារ​មាន​កម្ពស់​សរុប ១២ ​ជាន់ និង​មាន​ផ្ទៃ​ក្រឡា​សរុប ១៩០៨៦៧ ​ម៉ែត្រការ៉េ​ដែល​មាន​សេវាកម្ម​ចម្រុះ​ដូចជា អគារ​ការិយាល័យ​ប្រណីត លំនៅឋាន ភោជនីយដ្ឋាន ហាង​កាហ្វេ និង​មីនីម៉ាត​ជាដើម​។ គម្រោង​នេះ​ស្ថិត​នៅ​ក្នុង​សង្កាត់​ទឹកថ្លា ខណ្ឌ​សែនសុខ រាជធានី​ភ្នំពេញ​។

លោក​បន្ត​ថា​៖ «​មុន​ពេល​ចាប់ផ្តើម​សាងសង់​គម្រោង​នេះ​យើង​បាន​សិក្សា​ពី​ទីតាំង​នេះ​ច្បាស់លាស់​ហើយ​គឺ​តំបន់​នេះ​មិន​មាន​ការ​ផ្គត់ផ្គង់​អគារ​ការិយាល័យ និង​ជា​តំបន់​មាន​តម្រូវការ​អគារ​ការិយាល័យ និង​លំនៅឋាន​ច្រើន​»​។

លោក​បន្ត​ថា​៖ «​គម្រោង​នេះ​នឹង​ទទួល​បាន​ជោគជ័យ​ដោយសារ​វា​ជា​គម្រោង​មជ្ឈមណ្ឌល​​ពាណិជ្ជកម្ម​ចម្រុះ​ដែល​ផ្តល់​ទាំង​កន្លែង​ធ្វើការ និង​ស្នាក់នៅ​រួម​នៅ​ទី​នេះ​»​។

ទោះ​ជា​យ៉ាង​ណា​លោក​មិន​បញ្ជាក់​ឲ្យ​ដឹង​ពី​ទុនវិនិយោគ និង​ក្រុមហ៊ុន​ដៃគូ​ជាមួយ​ក្រុមហ៊ុន ថៃ ប៊ុនរ៉ុង ​នោះ​ទេ​គ្រាន់​តែ​បញ្ជាក់​ថា​គម្រោង​នេះ​ចំណាយ​ទុនវិនិយោគ​រាប់រយ​លាន​ដុល្លារ​ហើយ​វា​ជា​គម្រោង​អគារ​ការិយាល័យ​លំដាប់​ A និង​មាន​ស្តង់ដា​អន្តរជាតិ​ដែល​បាន​សាងសង់​លើ​ផ្ទៃដី ២,០៨ ​ហិកតា​។

លោក​សាស្ត្រាចារ្យ ទួស សាភឿន បាន​បន្ត​ថា​គម្រោង​នេះ​បាន​ប្រើប្រាស់​កញ្ចក់​ពិសេស​ដើម្បី​ការពារ​សំឡេង​រំខាន​របស់​យានយន្ត​ដោយសារ​ផ្លូវ​នេះ​ជា​ផ្លូវ​យុទ្ធសាស្ត្រ​ដែល​គណៈប្រតិភូ​ជាតិ អន្តរជាតិ​ឆ្លង​កាត់​រៀងរាល់​ថ្ងៃ​ដូច្នេះ​ការ​រៀបចំ​ប្រព័ន្ធ​ការពារ​សំឡេង​នឹង​ធ្វើ​ឲ្យ​អគារ​នេះ​មាន​ស្តង់ដារ​អន្តរជាតិ​ពិត​ជា​មាន​សារសំខាន់​ណាស់​ដើម្បី​ធ្វើ​ឲ្យ​គម្រោង​នេះ​មាន​ភាព​ទាក់ទាញ​អ្នក​ទិញ និង​អ្នក​ជួល​បាន​កាន់តែ​ច្រើន​។

លោក​បន្ត​ថា​ការ​ដាក់​ជួល​ ឬ​លក់​គម្រោង​នេះ​មិន​ទាន់​ចាប់ផ្តើម​​នោះ​ទេ​ដោយសារ​យើង​ផ្តោត​លើ​ការ​សាងសង់​ជា​មុន​សិន​មិន​ទាន់​គិតគូរ​ពី​ការ​លក់​នោះ​ទេ​ព្រោះ​យើង​កំពុង​សិក្សា​ពី​ទីផ្សារ​សិន​មុន​ធ្វើការ​សម្រេច​ចិត្ត​ដាក់​តម្លៃ​លក់ និង​ជួល​ដោយ​ធ្វើ​យ៉ាង​ណា​ឲ្យ​តម្លៃ​ដាក់​ចេញ​មាន​ភាព​សមរម្យ និង​អាច​ទទួល​យក​បាន​។

លោក ពឹង សេរី នាយកប្រតិបត្តិ​ក្រុមហ៊ុន Cambodia Angkor Real Estate បាន​ថ្លែង​ថា​ទីផ្សារ​ការិយាល័យ​នៅ​កម្ពុជា​នៅ​មាន​កម្រិត​នៅ​ឡើយ​ទាក់ទង​នឹង​ស្តង់ដារ​របស់​អគារ​ព្រោះ​អគារ​ភាគច្រើន​មាន​បញ្ហា​ចំណត​យានយន្ត​ដូច​នេះ ​ប្រសិន​ជា​អគារ​ការិយាល័យ​មាន​ចំណត​ល្អ មាន​ទីតាំង​ល្អ និង​មាន​ការ​ដាក់​ចេញ​នូវ​​តម្លៃ​ជួល​ល្អ​គម្រោង​នោះ​នឹង​ទទួល​បាន​ជោគជ័យ និង​អាច​ដណ្តើម​ចំណែក​ទីផ្សារ​បាន​។

លោក​បន្ត​ថា​៖ «​គម្រោង​ដែល​មាន​ទុន​គ្រប់គ្រាន់​ដើម្បី​បញ្ចប់​គម្រោង​របស់​ខ្លួន​មិន​មាន​បញ្ហា​ក្នុង​ទីផ្សារ​នោះ​ទេ​ផ្ទុយ​ទៅ​វិញ​​អ្នក​វិនិយោគ​ដែល​រំពឹង​ពី​ការ​លក់​ដើម្បី​យក​ប្រាក់​មក​សាងសង់​នឹង​ប្រឈមមុខ​នឹង​បញ្ហា​»​។

លោក​​បន្ត​ថា​៖ «​អ្នក​វិនិយោគ​គួរ​មាន​ការ​ប្រុងប្រយ័ត្ន​ប្រសិន​ជា​ទុន​​​របស់​ពួកគេ​មិន​គ្រប់គ្រាន់​ហើយ​ពឹង​លុយ​ពី​ធនាគារ​នោះ​»​។

ប្រធាន​សមាគម​អ្នក​វាយ​តម្លៃ និង​ភ្នាក់ងារ​អចលនវត្ថុ​កម្ពុជា​លោក គីម ហ៊ាង បាន​ថ្លែង​ថា​គម្រោង​នេះ​នឹង​ជោគជ័យ​ដោយសារ​អ្នក​វិនិយោគ​មាន​ទឹកប្រាក់​គ្រប់គ្រាន់​ដើម្បី​សាងសង់​គម្រោង​នេះ​ព្រោះ​លោក​សង្កេត​ឃើញ​ថា​ម្ចាស់​គម្រោង​នេះ​គិត​តែ​ពី​សាងសង់​មិន​សង្វាត​លុយ​នោះ​ទេ​។

លោក​បន្ត​ថា ​គម្រោង​ដែល​បញ្ចប់​ការ​សាងសង់ និង​មាន​ទុន​គ្រប់គ្រាន់​មិន​មាន​បញ្ហា​នៅ​ក្នុង​ទីផ្សារ​នោះ​ទេ​គឺ​គម្រោង​បែប​នេះ​ធ្វើ​ឲ្យ​អតិថិជន​មាន​ទំនុក​ចិត្ត​ខ្ពស់​។

លោក​បន្ត​ថា​៖ «​កម្ពុជា​ត្រូវ​ការ​អ្នក​វិនិយោគ​បែប​នេះ​គឺ​ក្រុមហ៊ុន​ដែល​មាន​ទុន​គ្រប់គ្រាន់​ជា​ជាង​​ពឹង​ផ្អែក​លើ​ក្រុមហ៊ុន​ដែល​ពឹង​លើ​ប្រាក់​ពី​អ្នក​ទិញ​ដូច្នេះ​ខ្ញុំ​មាន​ជំនឿ​ចិត្ត​ថា​អ្នក​វិនិយោគ​គម្រោង​​នេះ​នឹង​ទទួល​បាន​ជោគជ័យ​»​។

លោក​បន្ត​ថា​៖ «​គម្រោង​នេះ​ស្ថិត​នៅ​លើ​ផ្លូវ​យុទ្ធសាស្ត្រ​ដ៏សំខាន់​ព្រោះ​គណប្រតិភូ​បរទេស​ទាំងអស់​សុទ្ធតែ​ឆ្លង​កាត់​ផ្លូវ​នេះ​ដូច្នេះ​ការ​សាងសង់​អគារ​ការិយាល័យ​នៅ​លើ​ផ្លូវ​នេះ​ពិតជា​ល្អ​»៕

0

Comments

Please, login or register to post a comment

ព័ត៌មានពាក់ព័ន្ធ