Search form

Login - Register | FOLLOW US ON

Logo of Phnom Penh Post newspaper Phnom Penh Post - រាជរដ្ឋាភិបាល និង​អង្គការ​មួយ​ចំនួន​ ​បាន​សម្លឹង​ឃើញ​សម្ទុះ​នៃ​ផ្ទះ​សង្គមកិច្ច

Content image - Phnom Penh Post
កុមារ​តូចៗ​កំពុង​រត់​លេង​នៅ​ក្រោម​ផ្ទះ​របស់​ពួកគេ​នៃ​គម្រោង​សង្គមកិច្ច​របស់​លោក Scott​។រូបថត មួង វណ្ណឌី

រាជរដ្ឋាភិបាល និង​អង្គការ​មួយ​ចំនួន​ ​បាន​សម្លឹង​ឃើញ​សម្ទុះ​នៃ​ផ្ទះ​សង្គមកិច្ច

នៅពេល​ដែល​សំណង់​អគារ​ខុនដូ​ ផ្ទះ​បុរី ផ្ទះ​វីឡា ផ្សារ​ទំនើប និង​អគារ​ជួល​មួយ​ចំនួន​នៅ​តែ​មាន​តម្លៃ​ថ្លៃ រាជរដ្ឋាភិបាល​ និង​ក្រុមហ៊ុន​វិនិយោគ​បាន​ងាក​មក​សហការ​សាងសង់​នូវ​សំណង់​លំនៅឋាន​តម្លៃ​សមរម្យ​សម្រាប់​ប្រជាជន​មាន​ប្រាក់​ចំណូល​មធ្យម និង​ផ្ទះ​សង្គមកិច្ច​សម្រាប់​ប្រជាជន​ដែល​មាន​ចំណូល​តិច​។

នៅ​ក្នុង​ឆ្នាំ​ ២០១៤ ប្រទេស​កម្ពុជា​បាន​អនុម័ត​គោលនយោបាយ​លំនៅឋាន​ជាតិ​ដើម្បី​ជំរុញ​ការ​អភិវឌ្ឍ​លំនៅឋាន ហើយ​ឥឡូវ​នេះ​កំពុង​ធ្វើ​សេចក្តី​ព្រាង​គោលនយោបាយ​លើ​លំនៅឋាន​ដែល​មាន​តម្លៃ​សមរម្យ​ដោយ​សង្ឃឹម​ថា​នឹង​អនុម័ត​នៅ​ដំណាច់​ឆ្នាំ​នេះ​បើ​ទោះបី​អ្នក​អង្កេត​មួយ​ចំនួន​បាន​លើក​ឡើង​ពី​ការ​ព្រួយបារម្ភ​អំពី​គម្រោង​ផែនការ​ដែល​នឹង​ត្រូវ​បញ្ចប់​នាពេល​ខាង​មុខ​ឆាប់ៗ​ក៏ដោយ​។

លោក Scott Neeson ស្ថាបនិក និង​ជា​នាយក​ប្រតិបត្តិ​នៃ​មូលនិធិ​កុមារ​កម្ពុជា (CCF) បាន​ប្រាប់​ភ្នំពេញ​ប៉ុស្តិ៍ អចលនទ្រព្យ​ថា​មូលនិធិ​កុមារ​កម្ពុជា​បាន​ចាប់​ផ្តើម​កម្មវិធី​លំនៅឋាន​ដើម្បី​បំពេញ​តាម​តម្រូវការ​របស់​អ្នក​ដែល​មិន​មាន​លទ្ធភាព​ទិញ​ផ្ទះ​។ អ្នក​ទាំង​នេះ​ភាគច្រើន​ជា​ប្រជាជន​រស់នៅ​ក្នុង​សង្កាត់​ស្ទឹងមានជ័យ​ដែល​មាន​មុខរបរ​ដើរ​រើស​សំរាម ថង់​ប្លាស្ទិក និង​សម្ភារ​ចាស់ៗ​ផ្សេង​ទៀត​។

លោក​បាន​ប្រាប់​ថា​មូលនិធិ​មាន​សំណាង​ក្នុង​ការ​បង្កើត​សមាគម​មួយ​ជាមួយ​អង្គការ World Housing ហើយ​ពួកគេ​បាន​ផ្តល់​មូលនិធិ​ដើម្បី​សាងសង់​លំនៅឋាន​នៅ​ក្នុង​សហគមន៍​នេះ​ដោយ​បំពាក់​នូវ​ប្រព័ន្ធ​លូ​បង្ហូរទឹក បន្ទប់ទឹក​រួម​គ្នា​បណ្តាញ​ខ្សែកាប្លិ៍​ទូរទស្សន៍​។​ល​។

លោក​បន្ត​ថា៖ «​គោលដៅ​របស់​យើង​គឺ​ផ្តល់​អត្ថប្រយោជន៍​ដល់​គ្រួសារ​ដែល​ធ្វើការ​ជាមួយ​យើង​ដើម្បី​ឱ្យ​កូនៗ កុមារៗ​បាន​ចូល​សាលារៀន​ជា​រៀងរាល់​ថ្ងៃ​។ លក្ខខណ្ឌ​មូលដ្ឋាន​សម្រាប់​ការ​ទទួល​បាន​ផ្ទះ​មួយ​គឺ​បញ្ជូន​កូន​ទៅ​សាលារៀន​ជា​ប្រចាំ​ និង​រស់នៅ​ក្នុង​ផ្ទះ​ដោយ​មិន​មាន​ការ​រំលោភ​បំពាន​អារម្មណ៍ ផ្លូវកាយ និង​ផ្លូវភេទ​ដល់​អ្នក​ជិត​ខាង​។ ប្រសិន​បើ​គ្រួសារ​មួយ​អាច​សម្រេច​បាន​នូវ​ចំណុច​នេះ​ពួកគេ​នឹង​អាច​ទទួល​បាន​ផ្ទះ​មួយ​តាម​លក្ខខណ្ឌ​របស់​មូលនិធិ​»​។

ដូច​នៅក្នុង​គម្រោង​លោក Scott បាន​មាន​ប្រសាសន៍​ថា៖ «​យើង​បាន​សាងសង់​ផ្ទះ​ចំនួន ៤៦១ ​ខ្នង​នៅ​ទូទាំង​សហគមន៍​ចំនួន​ ១៩ ​ទីតាំង​។ ផ្ទះ​ប្រហែល ១០០ ​ខ្នង​ស្ថិត​តាម​ខេត្ត ប៉ុន្តែ​ផ្ទះ​ជាង ៣០០ ​ខ្នង​ស្ថិត​នៅ​ក្នុង​ភូមិ​ឬស្សី សង្កាត់​ស្ទឹងមានជ័យ​នា​រាជធានី​ភ្នំពេញ​។

គម្រោង​ផ្ទះ​នៅ​ស្ទឹងមានជ័យ​នេះ​បាន​បង្ហាញ​ពី​ការងារ​ពិតប្រាកដ​នៃ​ចំណង់​ចំណូលចិត្ត និង​ភាព​ស្រឡាញ់​ដែល​រចនា និង​សាងសង់​ដោយ Allan Crellin​។ វា​ជា​កន្លែង​មួយ​ដែល​ក្រុម​គ្រួសារ​អាច​រស់នៅ​ដោយ​មាន​សេចក្តី​ថ្លៃថ្នូរ និង​ទទួល​បាន​អត្ថប្រយោជន៍​នៃ​ការ​ទទួល​បាន​កូន​ទៅ​សាលារៀន និង​មាន​ជីវិត​រស់នៅ​ប្រកប​ដោយ​សុវត្ថិភាព​។

Content image - Phnom Penh Post
ក្រុម​គ្រួសារ​រីករាយ​ជាមួយ​នឹង​ផ្ទះ​នៃ​គម្រោង​របស់​លោក Scott​។ រូបថត មួង វណ្ណឌី

កម្មវិធី​ពិភព​លំនៅឋាន (World Housing program) បាន​បញ្ចប់​នៅ​ដើម​ឆ្នាំ​នេះ​ដោយ​មាន​ការ​បើក​សម្ពោធ​ផ្ទះ​ទី​ ៣៤ នៅ​ក្នុង​ភូមិ​ឫស្សី​។

ផ្ទះ​សង្គមកិច្ច​របស់​លោក Scott គឺជា​ផ្ទះ​សហគមន៍​ដែល​ជួយ​ទាំង​មនុស្ស​ចាស់ មនុស្ស​ពេញ​វ័យ និង​កូន​ក្មេង​ក្នុង​ការ​អប់រំ​ដើម្បី​ចាកចេញ​ពី​ភាព​ក្រីក្រ​។

លោក​បាន​មាន​ប្រសាសន៍​ថា៖ «​យើង​មាន​ចំនួន ៣៦០ ​ផ្ទះ​នៅ​ក្នុង​តំបន់​ស្ទឹងមានជ័យ​ដែល​អាច​ជួយ​បំពេញ​តម្រូវការ​របស់​ក្រុម​គ្រួសារ​នៅ​ទី​នោះ​ដោយសារ​យើង​មិន​ចង់​ឱ្យ​ក្រុម​គ្រួសារ​មាន​វត្តមាន​នៅ​ទី​នោះ​ជា​រៀងរហូត​ទេ ពីព្រោះ​វា​គឺជា​ជំហាន​ឈាន​ទៅ​រក​ឯករាជ្យភាព​ផ្នែក​ហិរញ្ញវត្ថុ​»​។

លំនៅឋាន​សង្គមកិច្ច​មាន​សារៈសំខាន់​ជាពិសេស​នៅ​រាជធានី​ភ្នំពេញ​។ ការ​ធ្វើ​ចំណាកស្រុក​របស់​ប្រជាជន​មកពី​តំបន់​ជនបទ​តែង​មាន​តម្រូវការ​ផ្នែក​លំនៅឋាន​ដែល​មាន​តម្លៃ​ទាប​។

លោក​បាន​បន្ថែម​ថា​ឧទាហរណ៍​ដ៏ល្អ​មួយ​គឺ​អ្វី​ដែល​លោក សៀ រិទ្ធី កំពុង​តែ​ដំណើរការ​ផ្ទះ​មាន​តម្លៃ​សមរម្យ​។ លោក​បន្ត​ថា៖ «​ខ្ញុំ​ជឿជាក់​ថា​នៅ​ទីក្រុង​តាខ្មៅ ផ្ទះ​ដែល​មាន​សុវត្ថិភាព និង​មាន​តម្លៃ​ថោក​ជា​ជម្រើស​ហិរញ្ញវត្ថុ​ដ៏ល្អ​របស់​ប្រជាជន​។ ប្រសិន​បើ​កិច្ចការ​នេះ​អាច​សម្រេច​បាន​សម្រាប់​អ្នក​ដែល​មាន​កម្រិត​ប្រាក់​ចំណូល​មធ្យម​នោះ​វា​ជា​ការ​ប្រសើរ​»​។

ដូច​ដែល​លោក Scott បាន​ពន្យល់​ថា​មូលនិធិ​បាន​សហការ និង​ផ្តល់​នូវ​ភាព​ជា​ម្ចាស់ការ​ដល់​ម្ចាស់​កម្មសិទ្ធ​ផ្ទះ​នៅ​ទី​នេះ​ដើម្បី​ផ្សារភ្ជាប់​សនិ្តសុខ​ក្នុង​សហគមន៍​ដោយ​មិន​មាន​អំពើ​ហិង្សា និង​ល្បែង​ស៊ីសង​។

អ្នកស្រី គីម សូយឿន អាយុ​ ៦៥ ​ឆ្នាំ​ជា​អ្នកភូមិ​ដែល​រស់នៅ​ជាមួយ​នឹង​កូន និង​ចៅ​ក្នុង​គម្រោង​ផ្ទះ​មូលនិធិ​បាន​ប្រាប់​ភ្នំពេញ​ប៉ុស្តិ៍​អចលនទ្រព្យ​ថា​៖ «​លំនៅឋាន​សង្គមកិច្ច​នេះ​គឺ​វា​អស្ចារ្យ​ណាស់​សម្រាប់​ពួកយើង​ព្រោះ​យើង​ក្រីក្រ​ហើយ​ពិបាក​រក​ផ្ទះ​រស់នៅ​ក្នុង​ទីក្រុង​ភ្នំពេញ​»​។

អ្នកស្រី សូយឿន មិន​បាន​ប្រកប​មុខរបរ​អ្វី​ទេ​ប្រាក់​ចំណូល​របស់​គ្រួសារ​ទាំងមូល​គឺ​អាស្រ័យ​លើ​កូនស្រី​ធ្វើការ​រោងចក្រ​។

ចំណែក​អ្នកស្រី វ៉ាន ស្រីនាង អាយុ ៤០​ ​ឆ្នាំ​មាន​មុខរបរ​ជា​អ្នក​រើស​អេតចាយ និង​ជា​អ្នក​ភូមិ​ជាមួយ​គ្នា​ដែល​រស់នៅ​ជាមួយ​គ្រួសារ​ធំ​មួយ​បាន​ប្រាប់​ថា​ផ្ទះ​ក្នុង​គម្រោង​របស់​លោក Scott មិន​ត្រូវ​បង់ថ្លៃ​ជួល​ហើយ​ប្រកប​ដោយ​ផាសុកភាព​ជាង​ផ្ទះ​ដែល​អ្នកស្រី​ធ្លាប់​ជួល​រស់នៅ​។

អ្នកស្រី​បន្ត​ថា៖ «​ខ្ញុំ​រស់នៅ​ក្នុង​ផ្ទះ​នេះ​ជាង​ពីរ​ឆ្នាំ​ហើយ វា​គឺជា​ផ្ទះ​សង្គមកិច្ច​ដ៏ល្អ​មួយ​ដែល​ត្រូវ​នឹង​អ្ន​មាន​ចំណូល​តិចតួច​បំផុត​។ វា​មិន​ត្រឹមតែ​អាច​រស់នៅ​ប៉ុណ្ណោះ​ទេ តែ​មូលនិធិ​នេះ​ក៏​ផ្តល់​ឱកាស​ឱ្យ​កុមារៗ​បាន​ទៅ​សាលារៀន​ផង​ដែរ​»​។

អ្នកស្រី​នាង​និយាយ​ថា​ការ​រស់នៅ​ទី​នេះ​គឺ​មាន​សន្តិភាព​ពីព្រោះ​អង្គការ​តែងតែ​គ្រប់គ្រង​ប្រជាជន​នៅ​ក្នុង​សហគមន៍ «​ខ្ញុំ​សង្ឃឹម​ថា​នឹង​មាន​ផ្ទះ​សង្គមកិច្ច​បន្ថែម​ទៀត​ដើម្បី​បំពេញ​តម្រូវការ​»​។

Content image - Phnom Penh Post
ស្ត្រី​ម្ចាស់​ផ្ទះ​មួយ​កន្លែង​នៃ​គម្រោង​លំនៅឋាន​របស់​លោក Scott​។ រូបថត មួង វណ្ណឌី

លោក David Cole ស្ថាបត្យករ​នៃ​ក្រុម COLE ដែល​បាន​ធ្វើការ​ទាក់ទង​នឹង​លំនៅឋាន​មាន​តម្លៃ​ទាប​បាន​និយាយ​​ថា៖ «​យើង​បាន​ធ្វើការ​ជាមួយ​ទាំង​វិស័យ​ឯកជន​ និង​អង្គការ​ក្រៅ​រដ្ឋាភិបាល​មួយ​ចំនួន​ទាក់ទង​នឹង​ការ​រចនា​សម្រាប់​លំនៅឋាន​មាន​តម្លៃ​សមរម្យ និង​លំនៅឋាន​សង្គមកិច្ច​។ គម្រោង​ទាំង​នេះ​មាន​បំណង​ផ្តល់​លំនៅឋាន​ក្នុង​តម្លៃ​សមរម្យ​ដល់​អ្នក​ដែល​រក​ប្រាក់​ចំណូល​បាន​ ១៦០ ដុល្លារ​ក្នុង​មួយ​ខែ​»​។

ប្រសិន​បើ​គ្រួសារ​មួយ​មាន​អ្នក​រក​ប្រាក់​ចំណូល​ ២ ​នាក់​ការ​បង់​ថ្លៃ​ទិញ​លំនៅឋាន​តម្លៃ​សមរម្យ​អាច​ធ្វើ​បាន​ក្នុង​តម្លៃ​ផ្ទះ​ប្រមាណ​ ២ ​ម៉ឺន​ដុល្លារ​។

លោក David បន្ត​ថា៖ «​ឥឡូវ​យើង​ងាក​ទៅ​រក​វិស័យ​ឯកជន​ដែល​អាច​សាងសង់​ផ្ទះ​ក្នុង​តម្លៃ​ ២ ​ម៉ឺន​ដុល្លារ​ដែល​មាន​ផ្ទៃក្រឡា​ ៣៦ ​ម៉ែត្រការ៉េ​ឡើង​ទៅ ទៅ​តាម​តំបន់​នីមួយៗ​ដែល​ស្រប​ទៅ​តាម​ការ​រចនា​នៃ​ការ​អភិវឌ្ឍ​សម្រាប់​ប្រជាជន​ដែល​មាន​ប្រាក់​ចំណូល​ទាប​»​។

លោក David បាន​កំណត់​អតិថិជន​គោលដៅ​គឺ​អ្នក​ដែល​ធ្វើការ​នៅ​តាម​រោងចក្រ​កាត់ដេរ ឬ​នៅ​តាម​ការដ្ឋាន​សាងសង់ ប៉ុន្តែ​ក៏​បើក​ទូលាយ​ដល់​អ្នក​ដទៃ​ដែរ​។

លោក​បាន​បង្ហើប​ពី​គម្រោង​នេះ​ថា៖ «​ភាគច្រើន​នៃ​ការ​រចនា​របស់​យើង​ចាប់ផ្តើម​នៅ​ទំហំ​ ៣៦ ​ម៉ែត្រការ៉េ​ទៅ​ ៥០ ​ម៉ែត្រការ៉េ​ដោយ​ព្យាយាម​កំណត់​ចំនួន​ត្រឹម​តម្លៃ​ ២ ​ម៉ឺន​ដុល្លារ​»​។

លោក​បន្ត៖ «​យើង​សង្ឃឹម​ថា​វិស័យ​ឯកជន​នឹង​សម្រេច​បាន​នូវ​គម្លាត​នៅ​លើ​ទីផ្សារ​ប្រកប​ដោយ​សុវត្ថិភាព និង​ការ​សហការ​ឲ្យ​បាន​ត្រឹមត្រូវ​ពី​ក្រសួង​ដោយ​មាន​ការ​រៀបចំ​ផែនការ​ដីធ្លី និង​អភិវឌ្ឍន៍​ទីក្រុង​ដើម្បី​ធានា​ថា​ដំណោះស្រាយ​មាន​សុវត្ថិភាព និង​ផ្តល់​ការ​វិនិយោគ​រយៈពេល​វែង​ដល់​គ្រួសារ​ដែល​មាន​ប្រាក់​ចំណូល​ទាប​»​។

លោក​បាន​ប្រាប់​បន្ថែម​ថា​ការ​វិនិយោគ​លើ​អគារ​អចលនទ្រព្យ និង​ផ្ទះ​ដែល​មាន​តម្លៃ​សមរម្យ​បាន​កើនឡើង ប៉ុន្តែ​ម្ចាស់​គម្រោង​នីមួយៗ​គួរ​គិត​ពី​សនិ្តសុខ​របស់​ទីតាំង​។

លោក​បាន​បន្ត​ថា​៖ «​យើង​ចង់​ឃើញ​ការ​អភិវឌ្ឍ​ថ្មីៗ​រួម​ផ្សំ​ពី​បុគ្គល​ម្នាក់ៗ គ្រួសារ​អ្នក​មាន​ជីវភាព​ធូរធារ ប្រជាពលរដ្ឋ​មាន​ចំណូល​កណ្តាល និង​ចំណូល​ទាប​ដើម្បី​បង្កើត​ភាព​ចម្រុះ និង​ជា​សហគមន៍​រស់រវើក​ដែល​ឆ្លុះ​បញ្ចាំង​ពី​ទេសភាព​រាជធានី​ភ្នំពេញ​»៕

Content image - Phnom Penh Post
ទិដ្ឋភាព​ពី​ខាង​ក្រៅ​សហគមន៍​នៃ​គម្រោង​របស់​លោក Scott​។ រូបថត មួង វណ្ណឌី

0

Comments

Please, login or register to post a comment

ព័ត៌មានពាក់ព័ន្ធ