Search form

Login - Register | FOLLOW US ON

Logo of Phnom Penh Post newspaper Phnom Penh Post - លោក​ឧកញ៉ា​ លី ហួរ​ គ្រោង​វិនិយោគ​សាងសង់​បុរី​នៅ​ទី​រួម​ខេត្ត​ត្បូង​ឃ្មុំ

លោក​ឧកញ៉ា​ លី ហួរ​ គ្រោង​វិនិយោគ​សាងសង់​បុរី​នៅ​ទី​រួម​ខេត្ត​ត្បូង​ឃ្មុំ

លោកឧកញ៉ា លី ហួរ ដែល​ទទួល​បាន​ជោគជ័យ​ក្នុង​ការ​វិនិយោគ​បុរី​នៅ​ទីក្រុង​ភ្នំពេញ គ្រោង​នឹង​បោះ​ជំហាន​ទៅ​កាន់​ខេត្ត​ត្បូង​ឃ្មុំ ដើម្បី​សាងសង់​បុរី​នៅ​ទីក្រុង​ថ្មី​នេះ​នា​ពេល​ខាង​មុខ​នេះ​។

ប្រធាន​សមាគម​អ្នក​អភិវឌ្ឍន៍​លំនៅឋាន​កម្ពុជា និង​ជា​អគ្គនាយក​ក្រុមហ៊ុន លី ហួរ គ្រុប រូបនេះ បាន​ថ្លែង​ឲ្យ​ដឹង​តាម​ទូរស័ព្ទ​កាល​ពី​ព្រឹក​ថ្ងៃ​ច័ន្ទ​ថា រហូត​មក​ទល់​ពេល​នេះ លោក​បាន​ទិញ​ដី​បាន​ប្រមាណ​ ២០០ ​ហិកតា​រួច​ហើយ នៅ​ក្នុង​ទីក្រុង​នៃ​ខេត្ត​ត្បូង​ឃ្មុំ ដែល​ទើប​បំបែក​ចេញ​ពី​ខេត្ត​កំពង់ចាម​នេះ​។

លោក​គ្រោង​វិនិយោគ​លើ​លំនៅដ្ឋាន និង​ផ្សារ​នៅ​ទីក្រុង​ថ្មី​នេះ ប៉ុន្តែ​គម្រោង​ផ្សារ​ប្រហែល​ជា​ផ្អាក ដោយ​សារ​ដី​សម្រាប់​សាង​សង់​ផ្សារ​ដែល​ការ​សាងសង់​ត្រូវ​គោរព​តាម​ប្លង់​មេ​របស់​ក្រុង​ត្រូវ​បាន​អ្នក​មាន​អំណាច​ទិញ​អស់​ហើយ​និង​លក់​ក្នុង​តម្លៃ​ថ្លៃ​ពេក​។

លោក​បន្ត​ថា​ ៖ «​តាម​ពិត​ខ្ញុំ​គ្រោង​ចាប់​ផ្តើម​គម្រោង​សាងសង់​ផ្សារ និង​លំនៅឋាន​យូរ​មក​ហើយ ប៉ុន្តែ​ ដោយ​សារ​មាន​បញ្ហា​ដី ដែល​គេ​ទាមទារ​ចំណេញ​ច្រើន​ពេក ទើប​ខ្ញុំ​ផ្អាក​រហូត​មក​ទល់​ពេល​នេះ​»​។

លោក​បន្ត​ថា​ ៖ «ប៉ុន្តែ​​គម្រោង​សាងសង់​បុរី​នឹង​ចាប់​ផ្តើម​នៅ​ក្រោយ​ការ​បោះឆ្នោត​ជាតិ​ឆ្នាំ​ ២០១៨ ខាង​មុខ​នេះ ហើយ​ការ​សាងសង់​លំនៅឋាន នឹង​ធ្វើ​ឡើង​ជា​ជំហានៗ​តាម​តម្រូវ​ការ​ទីផ្សារ​ជាក់​ស្តែង​»​។

នៅ​ពេល​លើក​ឡើង​ពី​តម្រូវ​ការ និង​ការ​ផ្គត់ផ្គង់ លោក​ឧកញ៉ា លី ហួរ បាន​បញ្ចាក់​ថា វា​មាន​ការ​លំបាក​បន្តិច ដោយ​សារ​ទីក្រុង​ថ្មី​នេះ​មិន​ទាន់​មាន​មនុស្ស​រស់នៅ​ច្រើន ហើយ​នៅ​ទូទាំង​ខេត្ត​មាន​ប្រជា​ពលរដ្ឋ​ជាង​៨០​ម៉ឺន​នាក់​ដែល​​រស់នៅ​រាយប៉ាយ ហើយ​នៅ​ជុំវិញ​តំបន់​នេះ​ក៏​មាន​ផ្សារ​សួង ផ្សារ​ពញាក្រែក និង​ផ្សារ​មេមត់​រួច​ទៅ​ហើយ ហេតុ​នេះ​យើង​នឹង​អភិវឌ្ឍ​សន្សឹមៗ និង​មើល​តាម​ស្ថានភាព​ទីផ្សារ​។

លោក​ឧកញ៉ា​បន្ត​ថា​ ៖ «​អ្វី​ដែល ខ្ញុំ​សំណូមពរ​ឲ្យ​រដ្ឋាភិបាល​លើក​ទឹក​ ចិត្ត នឹង​ធ្វើ​ឡើង​នៅ​ពេល​គម្រោង​នេះ​ចាប់​ផ្តើម ពេល​នេះ​មិន​ទាន់​អាច​និយាយ​បាន​ទេ ដោយ​សារ​គម្រោង​មិន​ទាន់​ជាក់​លាក់​»​។

ក្នុង​ពេល​អញ្ជើញ​ទៅ​សម្ភោធ​ដាក់​ឲ្យ​ដំណើរការ​អគារ​រដ្ឋបាល​សាលា​ខេត្ត​ថ្មី កាល​ពី​ដើម​ខែ​ឧសភា​នេះ លោក ហ៊ុន សែន នាយក​រដ្ឋ​មន្ត្រី​កម្ពុជា បាន​ថ្លែងថា បាន​ជំរុញ​ឲ្យ​មាន​ការ​វិនិយោគ​លំនៅ​ឋាន​តម្លៃ​ទាប​នៅ​ទីក្រុង​ត្បូង​ឃ្មុំ នៃ​ខេត្ត​ត្បូង​ឃ្មុំ​ថ្មី​នេះ​។

លោក​បាន​ថ្លែងថា​ ៖ «​ប្រសិន ជា​ខ្ញុំ​ជា​អ្នក​វិនិយោគ​ខ្ញុំ​នឹង​វិនិយោគ ​លំនៅឋាន​មាន​តម្លៃ​ទាប ដើម្បី​លក់ ឲ្យ​មន្ត្រី​រាជការ និង​ប្រជា​ពលរដ្ឋ​នៅ​ជុំវិញ​តំបន់​នេះ និង​ធ្វើ​ការ​លក់​បង់​រំលស់​រយៈពេល​វែង​»​។

លោក ប្រាជ្ញ ច័ន្ទ អភិបាលខេត្ត​ត្បូង​ឃ្មុំ​បាន​ថ្លែង​ថា លោក​កំពុង​កៀងគរ​អ្នក​វិនិយោគ​មក​វិនិយោគ​នៅ​ក្នុង​ខេត្ត​ថ្មី​នេះ ប៉ុន្តែ​រហូត​មក​ទល់​ពេល​នេះ​មិន​ទាន់​មាន​ក្រុមហ៊ុន​ណា​ចាប់​អារម្មណ៍​នៅ​ឡើយ​ទេ​។

លោក​បន្តថា ឥឡូវ​នេះ​ខេត្ត​មាន​ហេដ្ឋា​រចនា​សម្ព័ន្ឋ មាន​ទឹក​ស្អាត ដែល​អាច​បម្រើ​ឲ្យ​ប្រជា​ពលរដ្ឋ​បាន​៥​ម៉ឺន​នាក់ និង​បណ្តាញ​អគ្គិសនី​គ្រប់គ្រាន់​ហើយ ហេតុ​នេះ​អ្នក​វិនិយោគ​អាច​ចូល​មក​វិនិយោគ​បាន​។

លោក​បន្ត​ថា​ ៖ «​និយាយ​ពី​ការ​លើក​ទឹក​ចិត្ត​អ្នក​វិនិយោគ​បែប​ណា ទាល់​តែ​ពួក​គេ​ចូល​មក​សិន ទើប​អាច​និយាយ​គ្នា​ពី​ការ​សហការ​យ៉ាង​ដូច​ម្តេច​បាន»​។

ប្រធាន​សមាគម​អ្នក​វាយ​តម្លៃ និង​ភ្នាក់ងារ​អចលនវត្ថុ​កម្ពុជា លោក គីម ហ៊ាង បាន​ថ្លែង​ថា ការ​វិនិយោគ​លំនៅឋាន​ឬ​ផ្សារ​ទំនើប​នៅ​ក្នុង​ទីក្រុង​ថ្មី​នេះ ត្រូវ​ចំណាយ​ពេល​វេលា​យូរ​តទៅ​ទៀត ព្រោះ​ទីក្រុង​ថ្មី​នេះ​ស្ថិត​នៅ​កណ្តាល​ព្រៃ​មិន​ទាន់​មាន​មនុស្ស​ចូល​ទៅ​រស់​នៅ​ នៅ​ឡើយ​ទេ ហេតុ​នេះ​ត្រូវ​រង់ចាំ​ពេលវេលា​ពី ៥ ​ទៅ ​១០ ​ឆ្នាំ​ទៀត ប៉ុន្តែ​ប្រសិន​ជា​ចង់​ទាក់ទាញ​អ្នក​វិនិយោគ​ទៅ​វិនិយោគ​នៅ​ទីនោះ​រដ្ឋាភិបាល​ត្រូវ​ផ្តល់​ដី និង​ហេដ្ឋា​រចនា​សម្ព័ន្ឋ​នានា ទើប​អ្នក​វិនិយោគ​​អាច​ទៅ​វិនិយោគ​ផ្ទះ​មាន​តម្លៃ​ចាប់​ពី​ ១០,០០០​ ទៅ​ជាង​ ១ ​ម៉ឺន​ដុល្លារ​ទើប​មាន​អ្នក​ទិញ​។

លោក​បន្តថា​ ៖ «​ប៉ុន្តែ​អ្វី​ជាការ​​បារម្ភ គឺ​ដី​តំបន់​នោះបាន​ហើម​​​រួច​ទៅ​ហើយ​ដោយ​ដី​ទំហំ ៥​ គុណ​ ២០​​ ម៉ែត្រ មាន​តម្លៃ​ចាប់ពី​ ១០,០០០​ ទៅ​ ២០,០០០​ ដុល្លារ ដែល​តាម​ពិត​ដី​ទាំង​នោះ​គួរ​មាន​តម្លៃ​ត្រឹម​ ២០០០​ ដុល្លារ​ប៉ុណ្ណោះ​»៕

0

Comments

Please, login or register to post a comment