Search form

Login - Register | FOLLOW US ON

Logo of Phnom Penh Post newspaper Phnom Penh Post - លំនៅឋាន​មាន​តម្លៃ​ទាប​នៅ​កម្ពុជា​៖ ការ​ឈាន​ទៅ​មុខ​នៅ​ក្នុង​ទិសដៅ​ដ៏ត្រឹមត្រូវ​មួយ

Content image - Phnom Penh Post
លោក​បណ្ឌិត សុខ ស៊ីផាន់ណា (រូបឆ្វេង) ប្រធាន​ក្រុមហ៊ុន​ «សុខស៊ីផាន់ណា​ និង​សហការី​», លោក​ឧកញ៉ា សៀ រិទ្ធី និង​លោក​ឧកញ៉ា លី ហួរ។ មឿន ញាណ

លំនៅឋាន​មាន​តម្លៃ​ទាប​នៅ​កម្ពុជា​៖ ការ​ឈាន​ទៅ​មុខ​នៅ​ក្នុង​ទិសដៅ​ដ៏ត្រឹមត្រូវ​មួយ

លោកបណ្ឌិត សុខ ស៊ីផាន់ណា មាន​ឋានៈ​ជាច្រើន​ដែល​ភ្ជាប់​ទៅ​នឹង​ឈ្មោះ​របស់​លោក​ដោយ​រាប់​​ចាប់ពី​ដៃគូ​គ្រប់គ្រង​របស់​ក្រុមហ៊ុន​ច្បាប់​ដែល​បាន​ដាក់​ឈ្មោះ​តាម​ឈ្មោះ​របស់​លោក​ផ្ទាល់ «សុខស៊ីផាន់ណា​ និង​សហការី​» រហូត​ដល់​ឋានៈ​របស់​លោក​ក្នុង​នាម​​ជា​ទីប្រឹក្សា​រដ្ឋាភិបាល​កម្ពុជា។

ជា​អតីត​រដ្ឋលេខាធិការ​ក្រសួង​ពាណិជ្ជកម្ម លោក​បាន​បន្សល់​ទុក​ស្នាដៃ​របស់​ខ្លួន​នៅ​ក្នុង​ប្រទេស​ទាំង​ក្នុង​កម្រិត​ជាតិ និង​អន្តរជាតិ​ហើយ​បច្ចុប្បន្ន​នេះ​លោក​កំពុង​តែ​រួម​ចំណែក​ក្នុង​ការ​ជួយ​អ្នក​ដែល​មាន​ប្រាក់​ចំណូល​ទាប​ឲ្យ​ក្លាយ​ជា​ម្ចាស់​ផ្ទះ។

ថ្មីៗ​នេះ​មេធាវី​រូប​នេះ​បាន​ធ្វើ​កិច្ចសហការ​ជាមួយ​ប្រធាន​ក្រុមហ៊ុន World Bridge Land គឺ លោក​ឧកញ៉ា សៀ រិទ្ធី តាមរយៈ​ការ​ចុះហត្ថលេខា​លើ​អនុស្សរណៈ​យោគយល់​គ្នា​ដែល​ទាមទារ​ឲ្យ​ក្រុមហ៊ុន​ច្បាប់​របស់​លោក​ផ្តល់​ជូន​នូវ​សេវាកម្ម​ពិគ្រោះ​យោបល់​ផ្នែក​ច្បាប់ និង​ឯកសារ​ផ្សេង​ទៀត​ទៅ​កាន់​អតិថិជន​មាន​បំណង​ទិញ​គម្រោង​លំនៅឋាន​ដែល​មាន​តម្លៃ​សមរម្យ​របស់​ក្រុមហ៊ុន Worldbridge ស្ថិត​នៅ​ខេត្ត​កណ្តាល បន្ទាប់ពី​ទទួល​បាន​គាំទ្រ​ដោយ​រដ្ឋាភិបាល​។

លោក ស៊ីផាន់ណា បាន​មាន​ប្រសាសន៍​ប្រាប់​កាសែត​ភ្នំពេញ​ប៉ុស្តិ៍ អចលនទ្រព្យ អំពី​ហេតុផល​នៅ​ពី​ក្រោយ​ការ​រួម​ចំណែក​ក្នុង​គម្រោង​នេះ និង​អំពី​ទស្សនៈ​ទៅ​អនាគត​នៃ​លំនៅឋាន​មាន​តម្លៃ​សមរម្យ​នៅ​ក្នុង​ប្រទេស​កម្ពុជា​។

ហេតុ​អ្វី​បាន​ជា​លោក​ចាប់​អារម្មណ៍​ធ្វើ​ជា​ដៃគូ និង​ចូលរួម​នៅ​ក្នុង​គម្រោង​ដែល​មាន​សារសំខាន់​​គឺ​លំនៅឋាន​មាន​តម្លៃ​ទាប​?

សម្រាប់​ក្រុមហ៊ុន​របស់​យើង វា​ជា​ផ្នែក​មួយ​នៃ​ការ​ទទួល​ខុសត្រូវ​សង្គម​នៅ​ក្នុង​អាជីវកម្ម (CSR)។ បើ​និយាយ​ឲ្យ​ពិតប្រាកដ​ទៅ​គម្រោង​ប្រភេទ​នេះ [លំនៅឋាន​ដែល​មាន​តម្លៃ​ទាប​] គឺ​រក​ប្រាក់​ចំណូល​មិន​បាន​ច្រើន​ទេ។ នៅ​ទី​នេះ​យើង​ផ្តោត​សំខាន់​ច្រើន​ជាង​ទៅ​លើ​ការ​ផ្តល់​ព័ត៌មាន​ដល់​អ្នក​ទិញ​ដែល​ចង់​ដឹង​បន្ថែម​ទៀត​អំពី​សិទ្ធិ​ស្របច្បាប់ កាតព្វកិច្ច និង​​ការ​ទទួល​ខុសត្រូវ​របស់​ពួកគេ ដោយសារ​តែ​មិន​មាន​មនុស្ស​ច្រើន​ទេ​ដែល​យល់​ដឹង​ពី​សិទ្ធិ និង​ការ​ទទួល​ខុស​ត្រូវ​របស់​ពួកគេ​។

ពេល​ដែល​និយាយ​អំពី​វិស័យ​អចលនទ្រព្យ វា​មាន​ភាព​ស្មុគស្មាញ​ណាស់ ហើយ​វា​តម្រូវ​ឲ្យ​មាន​ការ​យក​ចិត្ត​ទុក​ដាក់​ច្រើន​។ ពួកគេ​ [​អ្នក​ទិញ​] មិន​ចាំបាច់​ត្រូវការ​មក​ជួប​យើង​ផ្ទាល់​ទេ ប៉ុន្តែ​ប្រសិន​បើ​ពួកគេ​មាន​សំណួរ​ណា​មួយ ពេល​នោះ​ក្រុមហ៊ុន «​សុខស៊ីផាន់ណា និង​សហការី​» នឹង​ចូល​ខ្លួន​មក​ណែនាំ និង​ឆ្លើយតប​នូវ​រាល់​ចម្ងល់ និង​បញ្ហា​ទាំងឡាយ​បាន​។ ចំពោះ​ថ្លៃ​ឈ្នួល​វិញ​គឺ​តិចតួច​បំផុត​ដែល​យើង​នឹង​ទទួល​បាន​​ពី​អ្នក​អភិវឌ្ឍន៍​។

តើ​លោក​ឧកញ៉ា រិទ្ធី ជា​អ្នក​ចូល​ទៅ​ទាក់ទង​លោក​ដើម្បី​កិច្ចសហការ​នេះ​មែន​ទេ​?

បាទ​។ ពួកយើង​ជា​តំណាង​នៃ​គណនី​ធំៗ​មួយ​ចំនួន​របស់​លោក ដូច្នេះ​បើ​និយាយ​រួម​ទៅ​ពួកយើង​ហាក់​ដូចជា​ធ្វើ​ការងារ​នេះ​ដើម្បី​ការ​សង​ជំនួយ​ដែល​លោក​បាន​ផ្តល់​​ពី​មុន​មក​។ យើង​បាន​ទទួល​ប្រាក់​ចំណេញ​មួយ​ចំនួន​នៅ​ក្នុង​គម្រោង​ផ្សេងៗ​ទៀត តែ​មិន​ច្រើន​នោះ​ទេ​។ ឧទាហរណ៍ យើង​ជា​តំណាង​របស់​លោក​ក្នុង The Bridge (​ជា​គម្រោង​លំនៅឋាន Oxley Worldbridge) ហេតុ​នេះ​ហើយ​យើង​រក​បាន​ប្រាក់​កម្រៃ​ខ្លះ​ពី​គម្រោង​នោះ ដូច្នេះ​នេះ​គឺជា​គម្រោង​ដែល​ខ្ញុំ​មិន​គិត​ថា​ខ្លួន​យើង​ផ្ទាល់​នឹង​រក​ប្រាក់​ចំណេញ​បាន​ច្រើន​នោះ​ទេ​។ សម្រាប់​លោក​កិច្ចការ​នេះ​ក៏​ជា​កាតព្វកិច្ច​ពលរដ្ឋ​ផង​ដែរ​។ នេះ​គឺជា​អ្វី​ដែល​នៅ​ចុង​ក្រោយ វា​នឹង​ក្លាយ​ជា​កេរ្តិ៍ឈ្មោះ​ល្អ​មួយ​ដែល​បង្ហាញ​ឲ្យ​ប្រជាជន​ឃើញ​អំពី​ឆន្ទៈ​ខ្ពស់​របស់​ពួកយើង​ក្នុង​នាម​ជា​ក្រុមហ៊ុន​ចេះ​គិតគូរ​ពី​សង្គម​ជាតិ​។

ខ្ញុំ​គិត​ថា​លោក​ (​ឧកញ៉ា រិទ្ធី) ​ជា​មនុស្ស​ដែល​មាន​ចិត្ត​ទូលាយ​ណាស់​។ លោក​តែងតែ​ស្ដាប់​យោបល់ និង​គោរព​ទស្សនៈ​របស់​ខ្ញុំ ហើយ​នេះ​ហើយ​ដែល​ជា​មូលហេតុ​​ធ្វើ​ឲ្យ​ខ្ញុំ​មាន​ភាព​ងាយស្រួល​ក្នុង​ការ​ចាប់​ដៃគូ​ជាមួយ​លោក​។

Content image - Phnom Penh Post
គ្រឿងចក្រ​កំពុង​ចាប់ផ្តើម​ឈូសឆាយ​ទីតាំង​សម្រាប់​សាងសង់​គម្រោង​លំនៅឋាន​មាន​តម្លៃ​ទាប​នៅ​ក្នុង​ខេត្ត​កណ្តាល​កាលពី​ខែ​មករា​កន្លង​មក។ ស្រេង ម៉េងស្រ៊ុន

តើ​លោក​មាន​មតិ​អ្វី​ទៅ​លើ​គម្រោង​ផ្ទះ​ដែល​មាន​តម្លៃ​ទាប​នៅ​​ក្នុង​ប្រទេស​កម្ពុជា​នេះ​? ការ​យល់​ឃើញ​ទូទៅ​មួយ​ដែល​​និយាយ​ថា​វិស័យ​នេះ​មាន​ភាព​យ៉ាប់​ជាង​សមភាគី​នៅ​ក្នុង​តំបន់​របស់​ខ្លួន​។ តើ​លោក​យល់​ស្រប​ជាមួយ​ការ​យល់​ឃើញ​នេះ​ដែរ​ឬ​ទេ​?

នៅ​ពេល​ដែល​យើង​មើល​ទៅ​លើ​ស្ថានភាព​ប្រទេស​កម្ពុជា វា​ពិតជា​មាន​ការ​លំបាក​ក្នុង​ការ​ធ្វើការ​វិភាគ​ប្រៀបធៀប​។ លក្ខខណ្ឌ​គឺ​ខុស​គ្នា​ខ្លាំង​ណាស់​ដោយសារ​កម្ពុជា​បាន​ចាប់​ផ្តើម​ពី​មូលដ្ឋាន​ដែល​ទាប​ជាង​ប្រទេស​ជិត​ខាង​របស់​ខ្លួន​ឆ្ងាយ​។ សម្រាប់​ប្រទេស​ដែល​ទើប​តែ​មាន​សន្តិភាព​ប្រហែល​ពេល ១៦ ទៅ ១៧ ​ឆ្នាំ​នេះ ទីបំផុត​ទីផ្សារ​បាន​ឈរ​នៅ​ក្នុង​ទីតាំង​ដែល​អាច​ឆ្លើយតប​បាន​ហើយ​។

ប្រសិន​បើ​រដ្ឋាភិបាល​មិន​មាន​គោល​នយោបាយ [​លំនៅឋាន​] រដ្ឋាភិបាល​ក៏​មិន​អាច​ផ្លាស់​ទី​ចូល​ក្នុង​គម្រោង​នេះ​ផង​ដែរ ដូច្នេះ​នៅ​ទី​នេះ​វា​ជា​ការ​ចាប់​គ្នា​ជា​ដៃគូ​យ៉ាង​ច្បាស់​ក្រឡែត​ដែល​មាន​ន័យ​ថា​រដ្ឋាភិបាល​បាន​សាងសង់​ឆាក​សម្តែង​រួច​មក​ហើយ​។ មាន​រឿង​ជាច្រើន​ដែល​រដ្ឋាភិបាល​អាច​ជួយ​សម្រួល​ដែល​មាន​សុពលភាព​ក្នុង​ការ​កាត់បន្ថយ​ការ​ចំណាយ [​នៃ​ការ​អភិវឌ្ឍ​លំនៅឋាន​ដែល​មាន​តម្លៃ​ទាប​]​។

អ្នក​ចាំ​តែ​សង្កេត​មើល​ទៅ​កម្ពុជា​គឺជា​សង្គម​មួយ​ដែល​និយម​ចូលចិត្ត​ចម្លង​គ្នា​។ លោក រិទ្ធី ជា​អ្នក​ចាប់ផ្តើម​គំនិត​នេះ ប៉ុន្តែ​ខ្ញុំ​ទុក​ពេល​ឲ្យ​ពីរ​ឆ្នាំ​។ នោះ​នឹង​លេច​ឡើង​នូវ​អ្នក​ចម្លង​ជាច្រើន​ទៀត​។ ហើយ​ពួកគេ​អាច​ចម្លង​បាន​យ៉ាង​ល្អ​។ ខ្ញុំ​ចង់​ឲ្យ​លោក រិទ្ធី ប្រយ័ត្ន ព្រោះ​លោក​ជា​សហគ្រិន​ដែល​មាន​​ចិត្ត​ករុណា​ខ្លាំង​ណាស់​។ ការ​អនុវត្ត CSR នេះ​គឺ​លោក​​តែ​ម្តង​។

យើង​គួរ​តែ​មាន​ការ​ប្រុងប្រយ័ត្ន​ថា​ពួក​អ្នក​ចម្លង​ទាំង​នោះ​មិន​ទទួល​យក​អត្ថប្រយោជន៍ និង​ការ​កេងប្រវ័ញ្ច​លើ​លោក ហេតុនេះ​ហើយ​ដែល​ខ្ញុំ​គិត​ថា​តួនាទី​របស់​ខ្ញុំ​នៅ​ក្នុង​គម្រោង​នេះ​គឺ​មាន​សារសំខាន់​។ វា​ក៏​ជា​ការ​ធ្វើ​ឲ្យ​មាន​ជា​ទំនុក​ចិត្ត​ជាក់លាក់​ផង​ដែរ​។

សាធារណជន​ទោះ​ជា​យ៉ាង​ណា​គួរ​តែ​មាន​ការ​ខិតខំ​ប្រឹងប្រែង​ដើម្បី​យល់​ពី​សិទ្ធិ និង​កាតព្វកិច្ច​របស់​ពួកគេ​។ ប្រសិន​បើ​នរណា​ម្នាក់​​បាន​អះអាង​​ថា​អ្វី​មួយ​ជា​លំនៅឋាន​សាធារណៈ ពួកគេ​គួរ​ដឹង​ថា​ការ​អះអាង​នេះ​ពិត​ដែរ​ឬ​ទេ? តើ​វា​មាន​ការ​អនុម័ត​ពី​ក្រសួង​រៀបចំ​ដែនដី នគរូបនីយកម្ម និង​សំណង់​ដែរ​ឬ​ទេ​? នេះ​ហើយ​ជា​អ្វី​ដែល​សំខាន់​។ វា​មាន​ភាព​សំខាន់​ណាស់​ដែល​ពួកគេ​ដឹង​ថា​គម្រោង​នេះ​ត្រូវ​បាន​រដ្ឋាភិបាល​គាំទ្រ​។ ប្រសិន​បើ​គម្រោង​នេះ​មិន​ត្រូវ​បាន​អនុម័ត​អ្នក​នឹង​មិន​ទទួល​បាន​ផលប្រយោជន៍​នោះ​ទេ។

មនុស្ស​ម្នាក់ៗ​ត្រូវ​ដឹង​ឲ្យ​ប្រាកដ​ថា​ប្រជាជន​មិន​ត្រូវ​បាន​បោក​បញ្ឆោត​ដោយ​ការ​ផ្សាយ​ពាណិជ្ជកម្ម​មិន​ពិត​។ ខ្ញុំ​យល់​ថា​ប្រសិន​បើ​អ្នក​អភិវឌ្ឍន៍​ទាំង​នោះ​ចង់​បាន​ភាព​ស្រប​ច្បាប់ ពួកគេ​គួរតែ​ស្វែងរក​ដៃគូ​ក្នុង​ស្រុក និង​មេធាវី​មួយ​ចំនួន​ដើម្បី​ជួយ​ដល់​ពួកគេ ហើយ​ខ្ញុំ​ប្រាកដ​ចិត្ត​ថា​នឹង​មាន​មនុស្ស​ច្រើន​ណាស់​ដែល​ចង់​ធ្វើ​រឿង​នេះ​ឲ្យ​បាន​ត្រឹមត្រូវ​។

តើ​លោក​គិត​ថា​ស្ថាប័ន​ហិរញ្ញវត្ថុ​បរទេស និង​ក្នុង​ស្រុក​នឹង​មាន​​ការ​ស្ទាក់ស្ទើរ​ក្នុង​ការ​ចូលរួម​នៅក្នុង​គម្រោង​លំនៅឋាន​ដែល​មាន​​តម្លៃ​ទាប​នោះ​ទេ​?

កម្រិត​រំពឹង​ទុក​គឺ​មិន​ខ្ពស់​នោះ​ទេ​។ ហើយ​សម្រាប់​រឿង​បែប​នេះ​ហានិភ័យ​គឺ​មាន​តិចតួច​ណាស់​​នៅក្នុង​បរិបទ​ដែល​មនុស្ស​មាន​ផ្ទះ​រស់នៅ​។ វា​មិនមែន​ដូចជា​ការ​បណ្តាក់ទុន​តាម​ការ​ទស្សន៍ទាយ​ដែល​មាន​លទ្ធភាព​ក្នុង​ការ​ផ្លាស់ប្តូរ​អស់​នោះ​ទេ​។ ផ្ទះ​គឺជា​ដំបូល​សម្រាប់​កូន​របស់​ពួកគេ គ្រួសារ​មួយ​របស់​ពួកគេ​។ ខ្ញុំ​នឹង​លើក​ទឹក​ចិត្ត​គ្រឹះស្ថាន​មីក្រូហិរញ្ញវត្ថុ​ក្នុង​ការ​ចូលរួម​មិនមែន​ធនាគារ​ពាណិជ្ជ​ដោយ​នេះ​គឺ​វា​តូចតាច​បន្តិច​សម្រាប់​ពួកគេ​។ គ្រឹះស្ថាន​មីក្រូហិរញ្ញវត្ថុ​នឹង​មាន​ភាព​ស័ក្តិសម​នឹង​គម្រោង​នេះ​ជាង។

ប៉ុន្តែ​បើ​និយាយ​ទៅ​នៅ​ពេល​ដែល​យើង​គិត​អំពី​ការ​ផ្តល់​ហិរញ្ញប្បទាន យើង​គួរ​តែ​ស្នើ​កុំ​ឲ្យ​អ្នក​ធ្វើ​ហិរញ្ញវត្ថុ​នោះ​ទាញ​យក​ផលប្រយោជន៍​ពី​ប្រជាជន​ក្រីក្រ​ច្រើន​ពេក​។ ដោយសារ​តែ​ហានិភ័យ​មិន​មាន​កម្រិត​ខ្ពស់ ពួកគេ​ក៏​មិន​គួរ​យក​ការ​ប្រាក់​ច្រើន​ពេក​ដែរ។ ប្រសិន​បើ​ពួកគេ [​អ្នក​កាន់កាប់​ហិរញ្ញវត្ថុ​] សម្រេច​ចិត្ត​ក្នុង​ការ​​ចូលរួម​ក្នុង​គម្រោង​លំនៅឋាន​ដែល​មាន​តម្លៃ​សមរម្យ ពួកគេ​ត្រូវ​តែ​ងាក​មក​ជាមួយ​នឹង​ផ្នត់​គំនិត​ដែល​ធ្វើ​ទៅ​ដើម្បី​តែ​ពាណិជ្ជកម្ម​សុទ្ធសាធ​នោះ​ទេ​។ ពួកគេ​គប្បី​គួរ​ចូលរួម​ជាមួយ​នឹង​បេះដូង​។ យើង​មិន​គួរ​បាត់បង់​ប្រាក់​ទេ ប៉ុន្តែ​រក​ឲ្យ​តែ​បង្គ្រប់ៗ​បាន​ហើយ​។ ចំពោះ​ខ្ញុំ​ការ​រក​ប្រាក់​ចំណេញ​គឺ​ល្អ អ្វី​ដែល​អាច​សម្លាប់​យើង​បាន​នោះ​ជា​ភាព​លោភលន់​។ ដូច្នេះ​ប្រសិន​បើ​គ្រឹះស្ថាន​មីក្រូហិរញ្ញវត្ថុ​ដែល​ចូលរួម​​ទៅ​ក្នុង​គម្រោង​លំនៅឋាន​ដែល​មាន​តម្លៃ​សមរម្យ​នេះ​ពួកគេ​គួរ​តែ​ត្រឡប់​មក​ជាមួយ​នឹង​វិធីសាស្ត្រ​ដែល​ពោរពេញ​ដោយ​ឆន្ទៈ​ដ៏​មុតមាំ​មួយ​។

ហេតុអ្វី​បាន​ជា​លំនៅឋាន​ដែល​មាន​តម្លៃ​ទាប​ទើប​តែ​ចាប់​ផ្តើម​អនុវត្ត​ជា​សកម្ម​នៅក្នុង​ប្រទេស​កម្ពុជា​នា​ពេល​ឥឡូវ​នេះ​?

បើ​និយាយ​ពី​ជ្រុង​នៃ​សេដ្ឋកិច្ច​គឺ​តែងតែ​មាន​ការ​រីកសាយ​គំនិត ប៉ុន្តែ​នេះ​ចាំបាច់​ទាល់​តែ​មាន​ថ្ម​មួយ​ដុំ​ធំ​មួយ​ដែល​តម្រូវ​ឲ្យ​បោះ​ចូល​ទៅ​ក្នុង​ទឹក​ជា​លើក​ដំបូង​មុន​ពេល​មាន​ការ​សាយភាយ​។ ខ្ញុំ​គិត​ថា​អ្វី​ដែល​អ្នក​មើល​ឃើញ​នៅ​ក្នុង​រាជធានី​ភ្នំពេញ​នា​ពេល​ឥឡូវ​នេះ​គឺជា​ដុំថ្ម​ធំ​នៅ​ក្នុង​ទឹក​មួយ​នោះ​គឺ​ទើប​តែ​បាន​ចាប់ផ្តើម​ធ្វើ​ឲ្យ​មាន​ការ​​សាយ​ទឹក​។

គម្រោង​លំនៅឋាន​ដែល​មាន​តម្លៃ​សមរម្យ​នេះ​គឺជា​លទ្ធផល​នៃ​ការ​សាងសង់​ដ៏តូច​មួយ​នោះ​។ បួន​ឆ្នាំ​មុន​គម្រោង​សាងសង់​លំនៅឋាន​ដែល​មាន​តម្លៃ​ទាប​នេះ​នឹង​មិន​អាច​ធ្វើ​ទៅ​បាន​ទេ​គឺ​ដោយសារ​តែ​ការ​ចំណាយ​ខ្ពស់​នៃ​ការ​សាងសង់​នេះ​។ ការងារ​ដោយ​ផ្អែក​លើ​កង្វះ​ខាត​បទពិសោធ​នេះ​ក៏​មាន​ផលប៉ះពាល់​ទៅ​នឹង​ការ​ចំណាយ​ដែរ​។ កង្វះ​នៃ​ឧបករណ៍ និង​សម្ភារ​សំណង់​គឺ​មិន​គ្រប់គ្រាន់​។ ដូច្នេះ​អ្វី​ដែល​យើង​មាន​ឥឡូវ​នេះ បន្ទាប់ពី​បួន​ឆ្នាំ​មក​ហើយ​គឺ​ថា​យើង​មាន​សម្ភារ​សំណង់​ច្រើន​លើសលប់ ធនធាន​មនុស្ស​ក៏​មាន មាន​ទាំង​មូលដ្ឋាន​ចំណេះដឹង និង​បច្ចេកវិទ្យា​ទាំងអស់​នេះ​សុទ្ធ​តែ​មាន​មូលដ្ឋាន​លើ​ភាព​រីកចម្រើន​នៃ​វិស័យ​សំណង់។ កត្តា​ទាំងអស់​នេះ​បាន​ពន្យល់​ពី​មូលហេតុ​ដែល​គម្រោង​លំនៅ​ឋាន​មាន​តម្លៃ​សមរម្យ​នេះ​អាច​ធ្វើ​ទៅ​បាន​។ ពេលវេលា​គឺជា​អ្វីៗ​គ្រប់​យ៉ាង​។ ការ​រីក​សាយភាយ​នេះ​អាច​កើតឡើង​មក​បាន​លុះត្រា​តែ​មាន​ថ្ម​មួយ​ដុំ​ធំ​បោះ​ចូល​ទៅ​ក្នុង​ស្រះ​ទឹក​តែ​ប៉ុណ្ណោះ​។

នោះ​ហើយ​ជា​និមិត្តរូប​របស់​យើង​នៃ​ការ​សាងសង់​លំនៅឋាន​ដែល​មាន​តម្លៃ​ទាប​នេះ​។ បើ​សិន​ជា​គ្មាន​ការ​ស្ទុះ​ឡើង​នៃ​វិស័យ​អចលនទ្រព្យ​ [​ក្នុង​រាជធានី​ភ្នំពេញ] ម្ល៉េះ​យើង​មិន​បាច់​គិត​អំពី​លំនៅឋាន​ដែល​មាន​តម្លៃ​ទាប​នោះ​ទេ​។ ពីព្រោះ​បើ​យើង​មើល​ពី​ជ្រុង​នៃ​ហិរញ្ញវត្ថុ​គឺ​មិន​អាច​ធ្វើ​ទៅ​បាន​នោះ​ទេ​។

តើ​លោក​ប្រមើល​មើល​ថា​អនាគត​នៃ​លំនៅឋាន​ដែល​មាន​តម្លៃ​ទាប​នៅ​ក្នុង​ប្រទេស​កម្ពុជា​នឹង​ទៅ​ជា​បែប​ណា​? តើ​លោក​មើល​ឃើញ​អ្នក​អភិវឌ្ឍន៍​ជាច្រើន​ទៀត​ដើរ​នៅ​ក្នុង​គន្លង​របស់​លោក​ដែរ​ឬ​ទេ​?

បាទ ខ្ញុំ​សង្ស័យ​ថា​នឹង​មាន​ការ​ចូល​មក​កាន់តែ​ច្រើន ប៉ុន្តែ​វា​ស្រេច​ទៅ​លើ​សាធារណជន​ក្នុង​ការ​​សម្រេច​ចិត្ត​ថា​ពួកគេ​អាច​ជឿ​ទុក​ចិត្ត​បាន​ឬ​ទេ​? ក្បាច់​មួយ​នេះ​មើល​ពី​របៀប​ក្នុង​ការ​ផ្តល់​នូវ​លំនៅឋាន​ដែល​មាន​គុណភាព​ព្រោះ​អ្នក​មិន​ចង់​បាន​អ្វី​ដែល​រយីករយាក​នោះ​ទេ​។ ដូច្នេះ​បទពិសោធ​នៃ​អ្នក​អភិវឌ្ឍន៍ និង​សមត្ថភាព​របស់​ពួកគេ​ក៏​មាន​សារសំខាន់​ដែរ​។ ភាព​ប្រណីត​គឺ​ទុក​សម្រាប់​ឲ្យ​ខុនដូ ប៉ុន្តែ​សម្រាប់​លំនៅឋាន​សាធារណៈ​អ្វី​ដែល​សំខាន់​នោះ​គឺ​ថា​ដំបូល​នេះ​មិន​លិចធ្លាយ ថ្នាំ​ពណ៌​ជាប់​បាន​យូរ​ហើយ​ជញ្ជាំង​មិន​ប្រេះ​។

អ្វី​ដែល​អ្នក​ធ្វើ​នៅ​ក្នុង​ដំណាក់កាល​ដំបូង​នេះ​គឺ​មាន​សារសំខាន់​ខ្លាំង​ណាស់​។ ហើយ​ក៏​មាន​ឱកាស​សម្រាប់​មេធាវី​កម្ពុជា​ក្មេងៗ​ឈាន​ជើង​ចូលរួម​ចំណែក​ក្នុង​គម្រោង​ផ្សេងៗ​ទៀត​ដែរ​។ ដំបូន្មាន​ផ្នែក​ច្បាប់​គឺជា​ការ​មិន​ស្មុគស្មាញ​ព្រោះ​អ្នក​មិនមែន​កំពុង​​ដោះស្រាយ​ជាមួយ​នឹង​គោល​​គំនិត​ផ្នែក​ច្បាប់​អចលនទ្រព្យ​សម្រាប់​វិនិយោគិន​ដ៏ស្មុគស្មាញ​នោះ​ទេ​។ វា​មាន​លក្ខណៈ​ត្រង់​ច្បាស់លាស់​ហើយ​ងាយ​យល់​។

មេធាវី​កម្ពុជា​ក្មេងៗ​អាច​បំពេញ​​ចន្លោះ​ប្រហោង​បាន​យ៉ាង​ងាយស្រួល​។ ចំពោះ​រូប​ខ្ញុំ​ហាក់បី​ដូចជា​អ្នក​ត្រួសត្រាយ​ផ្លូវ​ម្នាក់​ដែល​បាន​កសាង​ឡើង​នូវ​ឆាក​សម្តែង​មួយ​។ ហើយ​នេះ​គឺជា​អ្វី​ដែល​នឹង​ផ្តល់​ផលប្រយោជន៍​ដល់​មេធាវី​កម្ពុជា​ទាំង​ឡាយ​។ សង្ឃឹម​ថា​សម្រាប់​គម្រោង​នាពេល​​អនាគត ក្រុមហ៊ុន​ក្នុង​ស្រុក​អាច​បំពេញ​ចន្លោះ​នៅ​ទី​នោះ​បាន។ ឧទាហរណ៍​ថា​លោក រិទ្ធី ពង្រីក​កន្លែង​ណា​មួយ​នៅ​ក្នុង​ខេត្ត​បាត់ដំបង​លោក​នឹង​មិន​ត្រូវការ​ខ្ញុំ​ទៀត​នោះ​ទេ​។ ទម្រាំ​ដល់​ពេល​នោះ​ខ្ញុំ​នឹង​បាន​រៀបចំ​ប្រព័ន្ធ​ក្របខ័ណ្ឌ​ច្បាប់ និង​អ្វីៗ​គ្រប់​យ៉ាង​ហើយ​ពេល​នោះ​អាច​ឲ្យ​អ្នក​ណា​ម្នាក់​ផ្សេង​ទៀត​មក​ជំនួស​ខ្ញុំ​បាន​ហើយ​៕

0

Comments

Please, login or register to post a comment

ព័ត៌មានពាក់ព័ន្ធ