Search form

Login - Register | FOLLOW US ON

Logo of Phnom Penh Post newspaper Phnom Penh Post - សញ្ញាណ​នៃ​ការ​លក់​ខុនដូ​អំឡុង​ពេល​ ៣ ​ខែ​ដើម​ឆ្នាំ​នេះ​ ហាក់​មាន​ភាព​ទ្រឹង

Content image - Phnom Penh Post
សំណង់​អគារ​ខ្ពស់ៗ​ដែល​រះ​ឡើង​នៅ​ទីក្រុង​ភ្នំពេញ ភាគ​ច្រើន​ជា​គម្រោង​លំនៅឋាន​សហកម្ម​សិទ្ធិ (អាផាតមិន និង​ខុនដូ)។ ហុង មិនា

សញ្ញាណ​នៃ​ការ​លក់​ខុនដូ​អំឡុង​ពេល​ ៣ ​ខែ​ដើម​ឆ្នាំ​នេះ​ ហាក់​មាន​ភាព​ទ្រឹង

ទីផ្សារ​ខុនដូ​នៅ​កម្ពុជា ទំនង​ជា​ឈាន​ដល់​ចំណុច​ឆ្អែត​នៅ​ក្នុង​ទីផ្សារ​លំនៅឋាន​ប្រណីត​ខណៈ​ក្រុម​អ្នក​ជំនាញ​អលនទ្រព្យ​នៅ​កម្ពុជា​បាន​ទទួល​ស្គាល់​ថា ការ​លក់​ខុនដូ​នៅ​ក្នុង​ត្រីមាស​ទី​១ នា​ឆ្នាំ​នេះ មាន​ការ​ថមថយ​នូវ​ល្បឿន​យ៉ាង​ខ្លាំង​ធៀប​រយៈពេល​ដូច​គ្នា​កាល​ពី​ឆ្នាំ​មុន​។

ប្រធាន​គ្រប់គ្រង​ទូទៅ​នៃ​ក្រុមហ៊ុន​អេស៊ា​រៀល​អេស្ទេត​លោក ប៉ូ អ៊ាវគង់ បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ថ្ងៃ​ម្សិលមិញ​ថា ប្រសិន​ជា​គិត​រយៈពេល​ដូច​គ្នា​កាលពី​ឆ្នាំ​មុន​ការ​លក់​ខុនដូ​មាន​ការ​ថយ​ចុះ​នូវ​កម្រិត​ល្បឿន​ប្រមាណ ​៣០ ​ភាគរយ ដោយ​សារ​ការ​សាងសង់​លើស​តម្រូវ​ការ​ដែល​ធ្វើ​ឲ្យ​អ្នក​វិនិយោគ​ខុន​ដូ​ថ្មីៗ​បាន​ដាក់​លក់​ក្នុង​តម្លៃ​ទាប​ធៀប​ជាមួយ​នឹង​ខុន​ដូ​ដែល​បាន​សាងសង់​មុនៗ​។

លោក​បន្តថា តម្លៃ​ជាក់ស្តែង​ក្នុង​ទីផ្សារ​ទូទៅ​មិន​ទាន់​ធ្លាក់​ចុះ​ទេ តែ​តម្លៃ​នៃ​ខុនដូ​ដែល​បាន​សាងសង់​ថ្មីៗ​បាន​លក់​ក្នុង​តម្លៃ​ទាប ដែល​ធ្វើ​ឲ្យ​ទីផ្សារ​នេះ​កាន់​តែ​មាន​ភាព​ប្រកួត​ប្រជែង​។

លោក អ៊ាវគង់ បន្ត​ថា ៖ «​ទោះ​ជា​យ៉ាង​ណា​វា​នឹង​មិន​ធ្វើ​ឲ្យ​អគារ​ខុនដូ​មួយ​ចំនួន​ជាប់​គាំង​នោះ​ទេ​តែ​បើ​សិន​ជា​និន្នាការ​នេះ​អូស​បន្លាយ​រយៈពេល​៣ ទៅ​៤​ឆ្នាំ​ទៀត​តម្លៃ​ខុន​ដូ​នឹង​ធ្លាក់​ចុះ​ហើយ​គម្រោង មួយ​ចំនួន​នឹង​ជាប់​គាំង​»​។

លោក គីម ហ៊ាង ប្រធាន​សមាគម​អ្នក​វាយ​តម្លៃ និង​ភ្នាក់ងារ​អចលនវត្ថុ​កម្ពុជា (CVEA) និង​ជា​ម្ចាស់​ក្រុមហ៊ុន​អចលនទ្រព្យ ខ្មែរ រៀល អេស្ទេត បាន​មាន​ប្រសាសន៍​កាលពី​ម្សិលមិញ​ថា ៖ «​ប្រសិន​បើ​យើង​គិត​អំពី​បរិមាណ​នៃ​ការ​លក់​ខុនដូ គឺ​វា​មិន​ថយ​ចុះ​នោះ​ទេ គឺ​វា​ប្រហាក់​ប្រហែល​ឆ្នាំទៅ​ដែរ ហើយ​បើ​វា​ថយ​ចុះ​នោះ​គឺ​តិចតួច​ប៉ុណ្ណោះ​»​។

លោក​បន្ត ថា ៖ «​ប៉ុន្តែ​បើ​យើង​និយាយ​ពី​ចំនួន​នៃ​ការ​លក់​ខុនដូ​ចេញ គឺ​វា​អាច​មាន​ចំនួន​ថយចុះ​មែន​» ព្រោះ​ថា បើ​ប្រៀប​ធៀប​ទៅ​នឹង​ឆ្នាំ​ទៅ​មាន​អ្នក​លក់​ខុន​ដូ​ចំនួន​តែ ១០​ នាក់​ទេ ហើយ​បើ​ម្នាក់ៗ​អាច​លក់​បាន​ជាង​១០​យូនីត នោះ គឺ​សរុប​ទៅ​ជា​ប្រហែល​៥០-៦០​យូនីត​ដែរ «​ប៉ុន្តែ​នៅ​ឆ្នាំនេះ​យើង​ឃើញ​មាន​អ្នក​លក់​កើន​ឡើង​ដល់​ ២០ ​នាក់ ហើយ​ចំនួន​លក់​ខុន​ដូ​បាន​នោះ គឺ​វា​ប្រហាក់​ប្រហែល​ឆ្នាំទៅ​ដែរ ដូច្នេះ​អ្នកលក់​ម្នាក់ៗ គឺ​ប្រាកដ​ជាមាន​កំណើន​យឺតយ៉ាវ​មែន​»​។

លោក​បញ្ជាក់​ថា ៖ «​បើ​និយាយ​ឲ្យ​ងាយ​យល់ គឺថា​ពីមុន​យើង​មាន​អ្នកលក់​នំ​តិច​ទេ ប៉ុន្តែ​ឥឡូវនេះ​ចំនួន​អ្នកលក់​នំ បាន​កើនឡើង​ទ្វេ​រដង ប៉ុន្តែ​ចំនួន​នំ​លក់ដាច់​គឺ​វា​នៅ​ប្រហាក់​គ្នា​ដដែល​ហ្នឹង​»​។

តប​នឹង​សំណួរ​ថា តើ​វា​អាច​ជះឥទ្ធិពល​អាក្រក់​ដល់​វិស័យ​អចល​ទ្រព្យ​កម្ពុជា​ដែរ​ឬ​ទេ​? លោក ហ៊ាង បាន​ឆ្លើយ​ថា ៖ «​សម្រាប់​ដំណើរ​ការ​លក់​ដូរ​ខុន​ដូរ​យឺតយ៉ាវ វា​អាច​នឹង​ប៉ះពាល់​ដល់​ប្រតិបត្តិ​ករ​ណា ដែល​ពួក​គាត់​មាន​ដើម​ទុន​តិច ឬក៏​អ្នកខ្លះ​គាត់​យក​ប្លង់ដី​ទៅ​ដាក់​បញ្ចាំ​នៅ​ធនាគារ ឬក៏​គម្រោង​ខ្លះ​គាត់​សង្ឃឹម​ទៅ​លើ​ការ​ទទួល​បាន​ប្រាក់​ពី​អ្នក​ទិញ​ក្នុង​ពេល​ចាប់ផ្តើម​សាងសង់​ដំបូងៗ​ជាដើម​»​។​

​ទាក់ទង​ទៅ​នឹង​ការ​ថមថយ​វិស័យ​សេដ្ឋកិច្ច​របស់​ប្រទេស​ចិន លោក ហ៊ាង បាន​ផ្តល់​ជាការ​ប្រៀប​ធៀប​ថា ពេលខ្លះ​យើង​ឮ​សូរ​មាន​ព្យុះ​បោក​បក់​ខ្លាំង ឬ​ក៏​រញ្ជួយ​ដី នៅឯ​តាម​កោះ​នៃ​ប្រទេស​ជប៉ុន ហើយ​នាំ​គ្នា​ត្រៀម​បម្រុង​បង្ការ​ទុក​នៅ​ក្នុង​ប្រទេស​កម្ពុជា នោះ​ដូចជា​មិន​សម​ហេតុផល​ទេ​ដឹង​? ទីតាំង​នៅ​ឆ្ងាយ​ពីគ្នា​ណាស់ ដូច​ជា​ពុំ​សម​ហេតុផល​ទេ​។

«​ចំពោះ​ក្រុមហ៊ុន​របស់​ខ្ញុំ ចាប់ពី​ខែមីនា រហូត​មក​ទល់​ពេល​នេះ ពួក​យើង​ទទួល​បាន​ក្រុម​អតិថិជន​មកពី​ប្រទេស​ចិន ជា​ហូរហែ ខ្ញុំ​គិតថា ទាំង​គេ ​(​ភាគី​អតិថិជន​ចិន​)​ ទាំង​យើង ដូច​ជា​អត់​មាន​ផល​ប៉ះពាល់​ដោយ​សារ​ការ​ព្យាករ​សេដ្ឋកិច្ច ​(​ចិន​) ​នោះ​ឡើយ​»​។ នេះ​បើ​តាម​សម្តី​របស់​លោក ហ៊ាង។

​លោក ច្រឹក សុខនីម អគ្គនាយក​ក្រុមហ៊ុន Century21 Mekong បាន​ថ្លែង​ថា ការ​ថយ​ចុះ​នូវ​ល្បឿន​នៃ​ការ​លក់​ខុនដូ​វា​ពាក់ព័ន្ធ​រឿង​ជា​ច្រើន ដូច​ជា ការ​ដំឡើង​អត្រា​ការ​ប្រាក់​ដុល្លារ​របស់​ សហរដ្ឋ​អាមេរិក ការ​ដំឡើង​អត្រា​ការ​ប្រាក់​ឥណទាន​អចលនទ្រព្យ​នៅ​កម្ពុជា ការ​រឹត​បន្តឹង​ឥណទាន​តាម​ធនាគារ​នានា និង​បញ្ហា​សេដ្ឋកិច្ច​សាកល​ក៏បាន​ជះ​ឥទ្ធិពល​ដល់​វិស័យ​នេះ​ផង​ដែរ​។

លោក​បន្ត​ថា បញ្ហា​ខុន​ដូ​ដែល​ប្រឈម​ខ្លាំង​ជាង​គេ​គឺ​ខុនដូ​លំដាប់​ប្រណីត តែ​ខុន​ដូ​សម្រាប់​អ្នក​មាន​ជីវភាព​មធ្យម​ក៏​ថយ​ចុះ​នូវ​ការលក់​ផង​ដែរ​។

លោក​បន្ត​ថា ការ​ជាប់​គាំង​នៃ​ទីផ្សារ​ខុនដូ​នៅ​កម្ពុជា ទំនង​ជា​មិន​អាច​កើត​មាន​ទេ បើ​ទោះ​ជា​ល្បឿន​នៃ​ការ​ទិញ​ថមថយ​ក្តី ប៉ុន្តែ​តម្លៃ​ខុន​ដូ​នឹង​ធ្លាក់​ចុះ​នា​ពេល​អនាគត ប្រសិន​ជា​ស្ថានភាព​ដូច​បច្ចុប្បន្ន​បន្ត​អូស​បន្លាយ​តទៅ​ទៀត​។

​ទោះជា​យ៉ាង​ណា​លោក គុយ វ៉ាត អគ្គនាយក​ក្រុមហ៊ុន VTRUST GROUP បាន​មើល​ឃើញ​ឱកាស​នេះ​ទៅវិញ ដោយ​លោក​បាន​ថ្លែងថា នៅ​ពេល​ការ​ផ្គត់ផ្គង់​ខុន​ដូ​លើស​តម្រូវ​ការ វា​នឹង​ជា​រឿង​ល្អ​សម្រាប់​អ្នក​វិនិយោគ និង​អតិថិជន ដែល​អាច​ទិញ​ខុនដូ​បាន​ក្នុង​តម្លៃ​ទាប និង​មាន​ជម្រើស​ច្រើន​សម្រាប់​អតិថិជន​ទៅ​វិញ ព្រោះ​ពេលនោះ​តម្លៃ​ខុន​ដូ​នឹង​ធ្លាក់​ចុះ ហើយ​អ្នក​ទទួល​បាន​អត្ថប្រយោជន៍​ច្រើន​គឺ​អតិថិជន​។

​ដោយ​ក្រឡេក​មើល​ទៅ​និន្នាការ​ជាស​កល ប្រធាន​សមាគម​អ្នក​វាយ​តម្លៃ និង​ភ្នាក់ងារ​អចលនវត្ថុ​កម្ពុជា លោក គីម ហ៊ាង ក៏បាន​ទទួល​ស្គាល់​ថា ការ​លក់​ខុន​ដូ​នៅ​កម្ពុជា​ពិតជា​មាន​ល្បឿន​យឺត គឺមាន​សភាព​តឹងតែង​ដែរ ប៉ុន្តែ​អ្នកជំនាញ​មួយ​ចំនួន​មិន​ហ៊ាន​និយាយ​ការពិត​ទេ ដែល​វា​អាចធ្វើ​ឲ្យ​ខាតបង់​សម្រាប់​អ្នក​វិនិយោគ ប៉ុន្តែ​វា​ជាការ​ទូទៅ​គឺ​ការលក់​ខុន​ដូ​នា​ពេល​នេះ​ទាំង​នៅ​កម្ពុជា និង​បរទេស​ពិតជា​ថយចុះ​។

​អ្នក​ឧកញ៉ា សៀ រិទ្ធី អគ្គនាយក​ក្រុមហ៊ុន​ហ៊ុន World Bridge Land ដែល​បាន​និង​កំពុង​សហការ​ជាមួយ​ក្រុមហ៊ុន Oxley Holding អភិវឌ្ឍន៍​គម្រោង​ខុនដូ THE BRIDGE, និង​គម្រោង The Peak ក្នុង​តម្លៃ​រាប់រយ​លាន​ដុល្លារ​បាន​ថ្លែង​ថា សម្រាប់​ខុនដូ​របស់​លោក​មិនមាន​បញ្ហា​អ្វី​នោះទេ គឺ​នៅ​តែ​លក់​បាន​ជា​បណ្តើរ និង​មិន​ធ្លាក់​ចុះ​នូវ​ការ​លក់​នោះទេ​បើ​ធៀប​នឹង​ឆ្នាំ​មុន ព្រោះ​ខុន​ដូ​របស់​លោក​ស្ថិត​នៅ​ទីតាំង​ខុស​ពី​ទីតាំង​ខុនដូ​ដទៃ​ទៀត ឬ​ខុនដូ​ដែល​ស្ថិត​នៅ​ជាយក្រុង​ភ្នំពេញ​។​

លោក​បន្ត​ថា ៖ «​តាម​ខ្ញុំ​ដឹង​ការ​លក់​ខុន​ដូ​ឆ្នាំនេះ​ពិតជា​យឺត​ជាង​ឆ្នាំ​មុន ប៉ុន្តែ​មិន​ធ្លាក់​ចុះ​ខ្លាំង​នោះទេ ដូច្នេះ​សម្រាប់​ខ្ញុំ​គិត​ថា វា​មិន​មាន​សញ្ញា​អ្វី​គួរ​ឲ្យ​ព្រួយ​បារម្ភ​នោះ​ទេ​»៕

0

Comments

Please, login or register to post a comment

ព័ត៌មានពាក់ព័ន្ធ