Search form

Login - Register | FOLLOW US ON

Logo of Phnom Penh Post newspaper Phnom Penh Post - សណ្ឋាគារ​ធំៗ​នៅ​រាជធានី​ភ្នំពេញ សៀមរាប និង​ខេត្ត​ព្រះសីហនុ មាន​ជាង ៦៥៨ កន្លែង

សណ្ឋាគារ Toyoko Inn របស់​ជប៉ុន​ដែល​ស្ថិត​នៅ​ជិត​កោះពេជ្រ គ្រោង​នឹង​បើក​ដំណើរ​ការ​នៅ​ក្នុង ឆ្នាំ​២០១៥ ខាង​មុខ។
សណ្ឋាគារ Toyoko Inn របស់​ជប៉ុន​ដែល​ស្ថិត​នៅ​ជិត​កោះពេជ្រ គ្រោង​នឹង​បើក​ដំណើរ​ការ​នៅ​ក្នុង ឆ្នាំ​២០១៥ ខាង​មុខ។ រូបថត ហ៊ឹន ពិសី

សណ្ឋាគារ​ធំៗ​នៅ​រាជធានី​ភ្នំពេញ សៀមរាប និង​ខេត្ត​ព្រះសីហនុ មាន​ជាង ៦៥៨ កន្លែង

យោង​តាម​ការ​សិក្សា​ថ្មី​មួយ​ដែល​ទើប​បាន​បញ្ចប់​កាល​ពី​ពេល​ថ្មីៗ​នេះ​បាន​បង្ហាញ​ថា គិត​ត្រឹម​ដំណាច់​ត្រីមាស ទី៣ ឆ្នាំ​២០១៤ នេះ​នៅ​រាជធានី​ភ្នំពេញ ខេត្ត​ព្រះសីហនុ និង ខេត្ត​សៀមរាប មាន​សណ្ឋាគារ​ចាប់​ពី​លំដាប់​ផ្កាយ ២ ឡើង​ទៅ​សរុប​ជាង​ចំនួន ៦៥៨ កន្លែង។

លោក ហ៊ិន សុជាតិ នាយក​ផ្នែក ប៊ុណ្ណា អចលន​ទ្រព្យ នៃ​ក្រុម​ហ៊ុន ប៊ុណ្ណា រៀលធី គ្រុប បាន​និយាយ​ថា យោង​តាម​ការ​សិក្សា​តាម​ប្រព័ន្ធ Online Booking បាន​បង្ហាញ​ថា គិត​ត្រឹម​ចុង​ត្រីមាស ទី៣ ឆ្នាំ​២០១៤ នេះ​នៅ​រាជធានី​ភ្នំពេញ មាន​សណ្ឋាគារ​សរុប​ចំនួន ២៧៩ ស្មើ​នឹង​បន្ទប់​ស្នាក់​នៅ​ចំនួន ១៣ ២១៣ ខេត្ត​ព្រះសីហនុ មាន​សណ្ឋាគារ​ចំនួន ៧៩ ស្មើ​នឹង​បន្ទប់​ស្នាក់​នៅ​ចំនួន ៣២៤៣ និង ខេត្ត​សៀមរាប មាន​សណ្ឋាគារ​ជាង ៣០០ និង​មាន​បន្ទប់​ស្នាក់​នៅ ១៤៦៩៤។ លោក​បាន​ប្រាប់​ទៀត​ថា អត្រា​ប្រើ​ប្រាស់​បន្ទប់​គិត​ជា​មធ្យម​មាន​ចំនួន ៧៤ ភាគរយ​នៅ​រាជធានី​ភ្នំពេញ ខេត្ត​ព្រះ​សីហនុ មាន​ចំនួន ៧៦ ភាគរយ និង ខេត្ត​សៀមរាប មាន​អត្រា​ប្រើ​ប្រាស់​បន្ទប់​ចំនួន ៧២ ភាគរយ ដោយ​នៅ​រដូវ​សម្បូរ​ភ្ញៀវ​អត្រា​ប្រើ​ប្រាស់​បន្ទប់​បាន​កើន​ឡើង​រហូត​ដល់​ជាង ៩០ ភាគរយ និង​បាន​ធ្លាក់​ចុះ​មក​នៅ​ត្រឹម ៥០ ភាគរយ​ប៉ុណ្ណោះ​នៅ​រដូវ​ដែល​មិន​សូវ​សម្បូរ​ភ្ញៀវ។

របាយ​ការណ៍​នៃ​ការ​សិក្សា​នោះ គឺ​រាប់​បញ្ចូល​តែ​សណ្ឋាគារ​ដែល​កំពុង​បើក​ដំណើរ​ការ​តែ​ប៉ុណ្ណោះ និង​មាន​លំដាប់​ចាប់​ពី​សណ្ឋាគារ​កម្រិត​ផ្កាយ​ពីរ​ទៅ​ដល់​សណ្ឋាគារ​ផ្កាយ​ប្រាំ។ នៅ​រាជធានី​ភ្នំពេញ​ខណ្ឌ​ដែល​មាន​សណ្ឋាគារ​ច្រើន​ជាង​គេ គឺ ខណ្ឌ​ដូនពេញ មាន​សណ្ឋាគារ​ចំនួន ១២៥ ខណ្ឌ​ចំការមន មាន​សណ្ឋាគារ​ចំនួន ៧៧ និង ខណ្ឌ​ទួលគោក មាន​សណ្ឋាគារ​ចំនួន ២៨ ព្រម​ទាំង​មាន​នៅ​តាម​បណ្តា​ខណ្ឌ​មួយ​ចំនួន​ទៀត។

តម្លៃ​បន្ទប់​សណ្ឋាគារ​ក៏​មាន​នៅ​ក្នុង​ការ​សិក្សា​នេះ​ផង​ដែរ ដោយ​នៅ​រាជធានី​ភ្នំពេញ​សណ្ឋាគារ​លំដាប់​ផ្កាយ ៥ មាន​តម្លៃ​ក្នុង ១ យប់​ចន្លោះ​ពី ១២០ ទៅ ២៥០ ដុល្លារ​សម្រាប់​បន្ទប់​ធម្មតា និង​មាន​តម្លៃ​រហូត​ដល់​ជាង ២០០០ ដុល្លារ​ក្នុង​មួយ​បន្ទប់​ដោយ​អាស្រ័យ​លើ​ទំហំ ការ​រចនា និង​ការ​បំពាក់​សម្ភារ​បរិក្ខារ។ រីឯ ខេត្ត​ព្រះសីហនុ សណ្ឋាគារ​ភាគ​ច្រើន​ជា​សណ្ឋាគារ​លំដាប់​ផ្កាយ​បី ដោយ​បន្ទប់​ស្នាក់​នៅ​ជា​ទូទៅ​មាន​តម្លៃ​ចាប់​ពី ៨ ដល់​ជាង ២០ ដុល្លារ និង​បន្ទប់​ពិសេស​មាន​តម្លៃ​ចាប់​ពី ៣៥ ទៅ​ជាង ១៥០ ដុល្លារ។ នៅ ខេត្ត​សៀមរាប មាន​សណ្ឋាគារ​លំដាប់​ផ្កាយ ៥ ចំនួន ២០ ផ្កាយ ៤ មាន​ជាង ៨០ ផ្កាយ ៣ មាន​ចំនួន ១១៨ និង​សណ្ឋាគារ​ផ្កាយ ២ មាន​ជាង ៦០ សណ្ឋាគារ។

លោក សុជាតិ បាន​ប្រសាសន៍​ថា៖ «ប្រទេស​កម្ពុជា​មាន​សក្តានុពល​ខ្លាំង​ក្នុង​ការ​ទាក់​ទាញ​ភ្ញៀវ​ទេសចរ ដោយ​សារ​កម្ពុជា​មាន​ប្រាសាទ​បុរាណ​រាប់​ពាន់ ព្រម​ទាំង​មាន​ឆ្នេរ​សមុទ្រ​ស្រស់​ស្អាត​ដែល​អាច​ទាក់​ទាញ​ភ្ញៀវ​ទេសចរ​បាន​ជា​ច្រើន​ឲ្យ​មក​ទស្សនា​ជា​រៀង​រាល់​ឆ្នាំ។ នៅ​ពេល​មាន​ភ្ញៀវ​ទេសចរ​កើន​ឡើង វិស័យ​សណ្ឋាគារ​ក៏​រីក​ចម្រើន​ខ្លាំង​ផង​ដែរ»។

លោក ហូ វណ្ឌី សហ​ប្រធាន​ក្រុម​ការងារ​រដ្ឋ និង​ឯកជន​ផ្នែក​វិស័យ​ទេសចរណ៍​កម្ពុជា បាន​ប្រាប់​ថា ចាប់​ពី ឆ្នាំ​២០០៨ ដល់ ឆ្នាំ​២០១០ សណ្ឋាគារ​បាន​កើន​ពី ៥​-១៥ ក្នុង​មួយ​ឆ្នាំៗ ប៉ុន្តែ​នា​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​ចំនួន​សណ្ឋាគារ​មាន​កំណើន​តិច​តួច​ប៉ុណ្ណោះ។

លោក​បាន​ថ្លែង​ថា៖ «ទោះ​បី​ជា​ចំនួន​បន្ទប់​សណ្ឋាគារ មាន​លើស​ពី​តម្រូវ​ការ​នៅ​ពេល​ធម្មតា​ក្តី ក៏​ការ​វិនិយោគ​ផ្នែក​សណ្ឋាគារ​នៅ​តែ​មាន​ឱកាស​រក​ប្រាក់​ចំណេញ​បាន​ដដែល ប្រសិន​បើ​អ្នក​វិនិយោគ​ស្គាល់​អំពី​ទីផ្សារ​ច្បាស់​លាស់។ តែ​ទោះ​បី​យ៉ាង​ណា​លោក​ប្រាប់​ថា៖ «ការ​ប្រកួត​ប្រជែង​នា​ពេល​បច្ចុប្បន្ន​នេះ​ហាក់​មិន​សូវ​មាន​ភាព​ស្មើ​ភាព​គ្នា​នោះ​ទេ ជា​ពិសេស​ការ​ដាក់​តម្លៃ​សម្រាប់​ភ្ញៀវ»។

លោក ថោង ខុន រដ្ឋ​មន្ត្រី​ក្រសួង​ទេសចរណ៍ កាល​ពី​ពេល​ថ្មីៗ​នេះ​បាន​អំពាវនាវ​ឲ្យ​អ្នក​វិនិយោគ​ជាតិ និង​អន្តរជាតិ ធ្វើ​ការ​វិនិយោគ​សាង​សង់​សណ្ឋាគារ​ថ្មីៗ​នៅ ខេត្ត​សៀមរាប បន្ថែម​ទៀត ដើម្បី​ឆ្លើយតប​ទៅ​នឹង​ចំនួន​ភ្ញៀវ​ទេសចរ​ដែល​បាន​និង​កំពុង​កើន​ឡើង​នៅ​ក្នុង​ខេត្ត​នេះ ខណៈ​ចំនួន​បន្ទប់​សណ្ឋាគារ​កំពុង​ខ្វះ​ខាត​ស្រប​ពេល​ភ្ញៀវ​ទេសចរ​ចិន​កំពុង​កើន​ឡើង៕

0

Comments

Please, login or register to post a comment