Search form

Login - Register | FOLLOW US ON

Logo of Phnom Penh Post newspaper Phnom Penh Post - សំណង់​បញ្ជរ​ស្នាក់​ការ​នគរបាល​ នៅ​តាម​មហាវិថី​ធំៗ​ក្នុង​រាជធានី

Content image - Phnom Penh Post
ស្នាក់​ការ​នគរបាល (Police Box) ដែល​ទើប​បាន​សាង​សង់​សម្រាប់​នគរបាល​ធ្វើ​ការ​នៅ​តាម​ដង​ផ្លូវ​សំខាន់ៗ។ ហេង ជីវ័ន

សំណង់​បញ្ជរ​ស្នាក់​ការ​នគរបាល​ នៅ​តាម​មហាវិថី​ធំៗ​ក្នុង​រាជធានី

នៅ​ពេល​ដែល​អ្នក​ធ្វើ​ដំណើរ​តាម​មហាវិថី​សុធារស ឬ​មហាវិថី​ព្រះ​នរោត្តម អ្នក​នឹង​ឃើញ​មាន​សំណង់​ទំហំ​តូច​ល្មម​ដែល​មាន​ក្រុម​ប៉ូលីស​ឈរ​ត្រៀបត្រា​នៅ​ក្បែរ​សំណង់​បញ្ជរ​ស្នាក់​ការ​នោះ​។

ប្រជាជន​ជាច្រើន​បាន​ចោទ​ជា​សំណួរ​ថា តើ​សំណង់​ដែល​បាន សរសេរ​ថា «​នគរបាល​ចរាចរណ៍​ផ្លូវ​គោក​» ជា​អ្វី​?

អ្នក​នាំ​ពាក្យ​របស់​សាលា​រាជធានី​ភ្នំពេញ លោក ម៉េត មាស​ភក្តី បាន​ឲ្យ​ដឹង​ថា សំណង់​បញ្ជរ​ស្នាក់ការ​នគរបាល ជា​ការ​គាំទ្រ និង​ផ្តល់​ជូន​ពី​ក្រុមហ៊ុន​ឯកជន សម្រាប់​ជាង​ ១០ ​ទីតាំង នៅ​ក្នុង​រាជធានី​ភ្នំពេញ​។

លោក​បន្ត​ថា នេះ​ជា​ការ​ចូល​រួម​ការងារ​សង្គម​ដើម្បី​សម្រួល​ដល់​នគរបាល​ប៉ូលីស​ចរាចរណ៍ ដែល​តែង​តែ​រក្សា​សន្តិសុខ​សង្គម ហើយ​បញ្ជរ​ស្នាក់ការ​នេះ​ភាគ​ច្រើន​ដាក់​នៅ​តាម​ទីតាំង​ស្តុប​ចរាចរណ៍​ដែល​មាន​ភាព​មមាញឹក និង​លើក​ទឹក​ចិត្ត​បន្ថែម​ទៀត​ទៅ​ដល់​​ការ​សម្រួល​ការងារ​ប្រចាំ​ថ្ងៃ​ដូច​ជា​ការ​ជ្រក​ភ្លៀង ជ្រក​កម្ដៅ​ថ្ងៃ ទៅ​តាម​កាល​វិភាគ​របស់​មន្ត្រី​ប៉ូលីស​តាម​គោល​ដៅ​នីមួយៗ​។

ប៉ុន្តែ​អ្នក​នាំ​ពាក្យ​រូប​នេះ​មិន​អាច​រៀប​រាប់​លម្អិត​អំពី​រចនា​សម្ព័ន្ធ​របស់​ទីស្នាក់ការ​ប៉ូលីស​ចរាចរណ៍ និង​តម្លៃ​អស់​ប៉ុន្មាន​ក្នុង​ការ​សាងសង់​ទីស្នាក់​ការ​ទាំង​ទាំង​នេះ​ បាន​ទេ។

ទោះ​បី​ជា​យ៉ាង​ណា យោង​តាម​អ្នក​តំណាង​របស់​ក្រុមហ៊ុន ISI Steel ប្រចាំ​ប្រទេស​កម្ពុជា លោក​បាន​ប្រាប់​ថា​ ៖ «ក្រុម​ហ៊ុន​បាន​សហការ​ជាមួយ​ស្នងការ​នគរបាល​ជាតិ ដើម្បី​ផ្តល់​ជូន​បញ្ជរ​ស្នាក់​ការ​ចំនួន ១៥​បញ្ជរ​នៅ​ក្នុង​ឆ្នាំ​នេះ​ទៅ​ដល់​មន្ត្រី​ប៉ូលីស​ចរាចរណ៍​នៅ​ក្នុង​រាជធានី​ភ្នំពេញ​»​។

លោក​បាន​ឲ្យ​ដឹង​ថា ក្នុង​បញ្ជរ​នីមួយៗ អាច​ចំណាយ​ប្រាក់​ជាង​១​ពាន់​ដុល្លារ ប៉ុន្តែ​ក្រុមហ៊ុន​មិន​ទាន់​ហ៊ាន​សន្យា​ថា ក្រុម​ហ៊ុន​ធ្វើ​បន្ថែម​ទៀត ឬ​យ៉ាង​ណា​ទេ។

ចំណែក​លោក នៅ ចាន់ថុល ជា​ប្រជាជន​រស់នៅ​ទីក្រុង​ភ្នំពេញ បាន​ប្រាប់​ថា លោក​ទើប​តែ​បាន​ឃើញ​បញ្ជរ​ស្នាក់​ការ​ប៉ូលីល​នេះ​កាលពី​អាទិត្យ​មុន​ទេ​ហើយ​លោក​មិន​បាន​ដឹង​ច្បាស់​ថា បញ្ជរ​ស្នាក់ការ​នេះ​ធ្វើ​ឡើង​ក្នុង​គោល​បំណង​អ្វី​ឡើយ​។

​ប៉ុន្តែ លោក​បន្ត​ថា​ ៖ «​ខ្ញុំ​សង្ឃឹម​ថា ការ​សង់​បញ្ជរ​ស្នាក់ការ​ប៉ូលីស​ចរាចរណ៍​នេះ​អាច​បង្កើន​នូវ​សុវិត្ថិភាព​នៅ​ក្នុង​ទីក្រុង​បន្ថែម​ទៀត​ដល់​ប្រជា​ពលរដ្ឋ​ទូទៅ​»៕

0

Comments

Please, login or register to post a comment

ព័ត៌មានពាក់ព័ន្ធ