Search form

Login - Register | FOLLOW US ON

Logo of Phnom Penh Post newspaper Phnom Penh Post - សំណង់​បុរី​​ មិន​ទាន់​ជា​ជម្រើស​របស់​ប្រជាជន​នៅ​ទីក្រុង ​សៀមរាប

Content image - Phnom Penh Post
សំណង់​លំនៅឋាន​តាប​បែប​បុរី​ថ្មីៗ​មួយ​កន្លែង​នៅ​ក្រុង​សៀមរាប​។ រូបថត មួង វណ្ណឌី

សំណង់​បុរី​​ មិន​ទាន់​ជា​ជម្រើស​របស់​ប្រជាជន​នៅ​ទីក្រុង ​សៀមរាប

រាជធានី​ភ្នំពេញ គឺជា​កន្លែង​ប្រមូល​ផ្តុំ​ទៅ​ដោយ​មនុស្ស​រស់នៅ​ប្រកប​ការងារ និង​ការ​សិក្សា​បន្ទាប់​ពី​នេះ​គឺ​ក្រុង​សៀមរាប​ក៏​ជា​គោលដៅ​សម្រាប់​ប្រជាជន​អ្នក​ទៅ​ប្រកប​អាជីវកម្ម ស្វែងរក​ការងារ និង​មាន​ភ្ញៀវទេសចរ​ទៅ​ស្នាក់នៅ​ច្រើន​បន្ទាប់ពី​ក្រុង​ភ្នំពេញ​។ ប៉ុន្តែ​តម្រូវការ​នៃ​ការ​ប្រើប្រាស់​អចលនទ្រព្យ​ជាពិសេស​សំណង់​ផ្ទះ​បុរី មិន​ទាន់​មាន​ទីផ្សារ​ទូលំ​ទូលាយ​នៅ​ឡើយ​។

តាម​ប្រសាសន៍​របស់​លោកស្រី ខែក លីនិត ជា​អ្នក​អភិវឌ្ឍន៍​ផ្នែក​អចលនទ្រព្យ​នៃ​ក្រុមហ៊ុន ខែក លាង (Khek Leang, Co., Ltd.) នៅ​ក្នុង​ខេត្ត​សៀមរាប​បាន​ប្រាប់​ឲ្យ​ដឹង​ថា​កាលពី​គម្រោង​ទី​ ១ នៃ​អភិវឌ្ឍន៍​ផ្ទះល្វែង​របស់​ក្រុមហ៊ុន​នេះ​គឺ​មាន​ផ្ទះ​ចំនួន ៣០ ​ល្វែង​ដែល​ត្រូវ​បាន​បញ្ចប់​ការ​សាងសង់​សម្រាប់​អ្នក​រស់នៅ​ក្នុង​ក្រុង​សៀមរាប ដោយ​មាន​អតិថិជន​ខ្លះ​ជា​អ្នក​រស់នៅ​ខេត្ត​សៀមរាប និង​ក៏​មាន​ប្រជាជន​ចំណូល​ថ្មី​ពី​បណ្តា​ខេត្ត​ផ្សេងៗ​ផង​ដែរ​។

លោកស្រី​បាន​មាន​ប្រសាសន៍​ថា​ការ​អភិវឌ្ឍ​សំណង់​ផ្ទះ​បុរី​សោមាទេវី​អង្គរ នៅ​លើ​ផ្ទៃដី​ប្រមាណ​ ២ ​ហិកតា​ជា​គម្រោង​ទី​ពីរ​របស់​ក្រុមហ៊ុន​នេះ​ដែល​បាន​ចាប់ផ្តើម​កាលពី​ឆ្នាំ​ ២០១៦ ហើយ​នៅ​ក្នុង​គម្រោង​នេះ​នឹង​មាន​ការ​សាងសង់​ផ្ទះ​រាប់រយ​ល្វែង​។

បច្ចុប្បន្ន​នៅ​ក្រុង​សៀមរាប​ក្រុមហ៊ុន​សាងសង់​ផ្ទះល្វែង​មិន​សូវ​ជា​មាន​ច្រើន​នៅ​ឡើយ​ទេ តែ​ការ​ពុះ​ដីឡូតិ៍​លក់​គឺ​មាន​ច្រើន​។ លោកស្រី​បាន​បង្ហើប​ឲ្យ​ដឹង​ថា៖ «​ទោះបី​ជា​ការ​វិនិយោគ​គម្រោង​ទី​ ២ នេះ​មិន​ទាន់​មាន​ភាព​ពេញនិយម​សម្រាប់​ប្រជាជន​ភាគច្រើន ខណៈ​មាន​ការ​កក់​ពី​ភ្ញៀវ​ក្នុង​ស្រុក​តែ​ប្រមាណ ២០ ​ទៅ​ ៣០ ​ភាគរយ​ប៉ុណ្ណោះ ប៉ុន្តែ​យើង​នៅ​តែ​បន្ត​ការ​សាងសង់​»​។

«​យើង​មិន​អាច​ធ្វើអ្វី​ឲ្យ​លើស​ពី​តម្រូវការ​នោះ​ទេ ពីព្រោះ​យើង​មាន​ដើម​ទុន​កំណត់​ដែរ​ក្នុង​ការ​សាងសង់ ប៉ុន្តែ​យើង​នៅ​តែ​អាច​ឆ្លើយតប​នឹង​តម្រូវការ​របស់​អតិថិជន​ក្នុង​ការ​បន្ត​ការ​សាងសង់​សំណង់​ផ្ទះ​ល្វែង​របស់​យើង​ដែល​មាន​តម្លៃ​ចាប់ពី​ ៩៥០០០ ទៅ ១៣០០០០ ​ដុល្លារ​សម្រាប់​ផ្ទះ​ ១ ​ល្វែង​មាន​ ៣ ​ជាន់​»​។

លោកស្រី​បាន​បន្ថែម​ថា៖ «​ប្រជាជន​មាន​សតិ​អារម្មណ៍​អំឡុងពេល​មាន​ការ​បោះឆ្នោត​ដោយ​ពួកគាត់​មិន​បញ្ចេញ​លុយ​សម្រាប់​ការ​ទិញ​អចលនទ្រព្យ​ទេ​មិន​ថា​នៅ​ភ្នំពេញ ឬ​សៀមរាប​គឺ​ដូច​គ្នា​»​។

ដូច​អ្វី​ដែល​លោកស្រី​បាន​ពន្យល់​ទោះបី​ជា​ប្រជាជន​មាន​ទម្លាប់​រស់នៅ​ជា​លក្ខណៈ​ក្រុម​គ្រួសារ​ក៏ដោយ​ថ្ងៃ​ណា​មួយ​ពួកគាត់​ក៏​ត្រូវ​បំបែក​ការ​រស់នៅ នៅពេល​ដែល​កូនៗ​មាន​គ្រួសារ «​ដូច្នេះ​យើង​បាន​ឃើញ​ពី​តម្រូវការ​» និង​លំហូរ​ចូល​នៃ​អ្នក​ចំណាកស្រុក​ពី​តាម​ខេត្ត​នានា​មក​កាន់​ខេត្ត​សៀមរាប ដោយសារ​មាន​សក្តានុពល​ពី​វិស័យ​ទេសចរណ៍​។

តាមរយៈ​បទពិសោធ​របស់​លោកស្រី​នៅ​ក្នុង​វិស័យ​អចលនទ្រព្យ​ដូចជា​ការ​សាងសង់​សណ្ឋាគារ និង​ផ្ទះ​បុរី​លោកស្រី​បាន​ថ្លែង​ថា​ភ្ញៀវ​ភាគច្រើន​យល់​ពី​ប្រព័ន្ធ​នៃ​ការ​សាងសង់​បុរី ប៉ុន្តែ​ប្រជាជន​នៅ​មាន​កម្រិត​ក្នុង​ការ​គិត​ទាំង​កម្រិត​ជីវភាព និង​កត្តា​ស្ថេរភាព ដើម្បី​ពួកគាត់​អាច​ធ្វើ​ការ​វិនិយោគ​ដោយ​សុវត្ថិភាព​សម្រាប់​ថ្ងៃ​អនាគត​។ ជាទូទៅ​ប្រជាជន​រស់នៅ​ក្នុង​ខេត្ត​សៀមរាប​មិន​ទាន់​មាន​លក្ខណៈ​ទំនើប​ដូច​អ្នក​រស់នៅ​ក្រុង​ភ្នំពេញ​ទេ ហើយ​សៀមរាប​ក៏​ពុំ​ទាន់​មាន​ការ​អភិវឌ្ឍ​ជា​ផ្សារ​ទំនើប​ធំៗ​នៅ​ឡើយ​ដែរ​។

លោកស្រី​បាន​ឲ្យ​ដឹង​ថា៖ «​ភ្ញៀវ​របស់​យើង​មកពី​គ្រប់​ទីកន្លែង​ទាំងអស់​។ ប៉ុន្តែ​ប្រជាជន​នៅ​ក្នុង​ខេត្ត​សៀមរាប​ភាគច្រើន​ពុំ​ទាន់​ធ្វើការ​វិនិយោគ​លើ​អចលនទ្រព្យ​នៅ​ឡើយ ហើយ​ទីផ្សារ​ផ្ទះល្វែង​មិន​ទាន់​មាន​ទីផ្សារ​ធំ​ទូលាយ​នៅ​ឡើយ​»​។

Content image - Phnom Penh Post
ទិដ្ឋភាព​ជាក់ស្តែង​នៃ​លំនៅឋាន​នៅ​ទីក្រុង​សៀមរាប​។ រូបថត មួង វណ្ណឌី

ទោះបី​ជា​រៀងរាល់​ឆ្នាំ​មាន​ការ​កើនឡើង​នៃ​តួលេខ​ភ្ញៀវទេសចរ​ច្រើន​ឡើងៗ​ចូល​ទៅ​កាន់​តំបន់​សៀមរាប​អង្គរ​ក៏ដោយ ក៏​ប្រជាជន​រស់នៅ​ក្នុង​ខេត្ត​សៀមរាប​ភាគច្រើន​មាន​កម្រិត​ជីវភាព​នៅ​ទាប ហើយ​មិន​ទាន់​បាន​គិតគូរ​ពី​ការ​ទិញ​ផ្ទះ​ជា​របៀប​បុរី​នៅ​ឡើយ​ដែរ​។ អតិថិជន​ភាគច្រើន​គឺ​មកពី​ខេត្ត​ដទៃ​ដូចជា​បាត់ដំបង កំពង់ចាម បន្ទាយមានជ័យ និង​អ្នក​សៀមរាប​តិចតួច​។

ស្ថាបនិក និង​ជា​ប្រធាន​គ្រប់គ្រង​ក្រុមហ៊ុន Key Real Estate លោក សន សៀប បាន​លើក​ឡើង​ថា​អ្នក​វិនិយោគ និង​អ្នក​អភិវឌ្ឍន៍​គួរ​សិក្សា​ពី​ទីផ្សារ​ដែល​អាច​ដំណើរការ​ទៅ​បាន​។ កាលណា​អភិវឌ្ឍ​ទៅ​មាន​គេ​ទិញ ឬ​ជួល​គឺ​មាន​ទីផ្សារ​។

ក្នុង​វិស័យ​អចលនទ្រព្យ​បើ​មាន​ការ​សាងសង់​សំណង់​ក៏​ត្រូវ​មើល​ពី​តម្រូវការ​របស់​ទីផ្សារ​ដែរ​។ លោក​បន្ត​ថា៖ «​តាម​ការ​សង្កេត​ឃើញ​របស់​ខ្ញុំ​មិន​ថា​នៅ​សៀមរាប ឬ​ភ្នំពេញ​ទេ ជាធម្មតា​ការ​ផ្គត់ផ្គង់​តែងតែ​មាន​ច្រើន​ជា​តម្រូវការ​។ ឧទាហរណ៍​លក់​អ្វី​ក៏​ដោយ​គឺ​តម្រូវការ​តែង​មាន​តិច​ជាង​ការ​ផ្គត់ផ្គង់ ដូច្នេះ​វា​ធ្វើ​ឲ្យ​អតិថិជន​មាន​ជម្រើស​ល្អ​ទៅ​វិញ​ទេ​»​។

លោក​បន្ត​ថា​បើ​ក្រឡេក​មើល​នៅ​ខេត្ត​សៀមរាប បុរី​មួយ​ចំនួន​ដែល​បាន​សាងសង់​កាលពី​មុន​បាន​លក់​អស់​ប្រកប​ដោយ​ជោគជ័យ​តាំងពី​ឆ្នាំ​ ២០០៨ ​បន្ទាប់ពី​តម្លៃ​អចលនទ្រព្យ​មាន​ការ​កើនឡើង​គឺ​នៅ​សល់​តែ​បុរី​ថ្មីៗ​មួយ​ចំនួន​ទេ ដែល​មាន​ការ​សាងសង់​ជា​បន្តបន្ទាប់​លើស​ពី​តម្រូវការ ឬ​ខុស​ទីតាំង​។

«​ខ្ញុំ​គិត​ថា​ផ្ទះ​បុរី​គឺ​ប្រកប​ដោយ​សោភ័ណភាព​ដែល​មាន​ការ​រៀបចំ​ល្អ​ជាង​ផ្ទះ​មួយៗ​នៅ​ខាង​ក្រៅ និង​មាន​ប្រព័ន្ធ​ការពារ​សុវិត្ថភាព​ល្អ ដូច្នេះ​ការ​រស់នៅ​​ក្នុង​បុរី​មាន​លក្ខណៈ​ប្រសើរ​ហើយ​អាច​ធ្វើឲ្យ​តម្លៃ​អចលនទ្រព្យ​​មាន​តម្លៃ​ខ្ពស់​ជាង​ដែរ​» នេះ​បើ​តាម​សម្តី​របស់​លោក សៀប​។ «​សម្រាប់​អ្នក​ខ្លះ​ដែល​មាន​លទ្ធភាព ពួកគេ​ជ្រើសរើស​យក​ការ​រស់នៅ​ក្នុង​បុរី​ដែល​មាន​ទីតាំង​ល្អ កន្លែង​លក់ដូរ និង​សួន​កម្សាន្ត​ជាដើម​»​។

Content image - Phnom Penh Post
ស្ថានភាព​ផ្លូវ​ថ្នល់​ដែល​ពុំ​ទាន់​អភិវឌ្ឍ​នៅ​ទីក្រុង​សៀមរាប​។ រូបថត មួង វណ្ណឌី

អ្នក​វិនិយោគ និង​អ្នក​អភិវឌ្ឍន៍​ជា​អ្នក​មាន​ថវិកា​ច្រើន និង​មាន​ចំណេះដឹង​ក្នុង​ការ​សាងសង់​សម្រាប់​ឆ្លើយតប​ទៅ​នឹង​តម្រូវការ​របស់​អតិថិជន​។ ថ្វីបើ​ប្រជាជន​នៅ​សៀមរាប​មួយ​ចំនួន​នៅ​មាន​កម្រិត​ជីវភាព​ទាប​ជាង​អ្នក​រស់នៅ​ភ្នំពេញ តែ​វិស័យ​អចលនទ្រព្យ​នៅ​តែ​មាន​សក្តានុពល​។ អ្វី​ដែល​សំខាន់​បំផុត​សម្រាប់​ទីផ្សារ​គឺ​ការ​ជ្រើសរើស​ទីតាំង និង​តម្លៃ​ដែល​អតិថិជន​អាច​ទទួល​យក​បាន​។

តាម​យោបល់​របស់​លោក សុខ លី ជា​ប្រជាជន​រស់នៅ​ខេត្ត​សៀមរាប​បាន​ឲ្យ​ដឹង​ថា៖ «​ខ្ញុំ​ក៏​ចង់​រស់​នៅក្នុង​បុរី​ដែរ ប៉ុន្តែ​ខ្ញុំ​មិន​ទាន់​មាន​សមត្ថភាព​ក្នុង​ការ​ទិញ​ផ្ទះល្វែង ដើម្បី​ស្នាក់នៅ​នោះ​ទេ ពីព្រោះ​ផ្ទះ​មាន​តម្លៃ​លើស​ពី​សមត្ថភាព​របស់​ខ្ញុំ​»​។

លោក​បាន​ប្រាប់​ទាំង​មុខ​ញញឹម​ថា៖ «​នាពេល​អនាគត ខ្ញុំ​នឹង​មាន​ផ្ទះ​មួយ​នៅក្នុង​បុរី ដើម្បី​រស់នៅ​ជាមួយ​ក្រុម​គ្រួសារ​ដោយ​មិន​ភ័យ​ខ្លាច​ពី​ហានិភ័យ​នានា​ឡើយ​»៕

Content image - Phnom Penh Post
គម្រោង​សំណង់​ផ្ទះ​បុរី​មួយ​កន្លែង​នៅ​ក្រុង​សៀមរាប​។ រូបថត មួង វណ្ណឌី

0

Comments

Please, login or register to post a comment

ព័ត៌មានពាក់ព័ន្ធ