Search form

Login - Register | FOLLOW US ON

Logo of Phnom Penh Post newspaper Phnom Penh Post - សំណង់​បេតិភណ្ឌ​នៅ​ខេត្ត​កំពត​ ស្ថិត​ក្នុង​បរិបទ​អភិរក្ស និង​អភិវឌ្ឈ

Content image - Phnom Penh Post
សំណង់​សម័យ​អាណានិគម​នៅ​ក្រុង​កំពត ដែល​ស្ថិត​ក្នុង​សភាព​ចាស់​ទ្រុឌទ្រោម​ខ្វះការ​ថែទាំ។ មួង វណ្ណឌី

សំណង់​បេតិភណ្ឌ​នៅ​ខេត្ត​កំពត​ ស្ថិត​ក្នុង​បរិបទ​អភិរក្ស និង​អភិវឌ្ឈ

ប្រទេស​កម្ពុជា​ជាប្រទេស​ដែល​សម្បូរ​ទៅដោយ​សម្បតិ្ត​ធនធាន​ធម្មជាតិ ស្នាដៃ​ច្នៃប្រឌិត និង​សម្បត្តិ​បេតិកភណ្ឌ​វប្បធម៌​ពី​បុរាណ​ទាំងរូបី និង​អរូបី រួមមាន​ប្រាសាទ​បុរាណ វត្ត​អារាម​ចាស់ៗ អគារ​ឬផ្ទះ​ពីសម័យ​មុន រោងល្ខោន​ពី​បុរាណ សាលតន្រី្ត​បុរាណ និង​របាំ​បុរាណ​ជាដើម ដែល​ជា​សម្បតិ្ត​ទាក់ទាញ​ដល់​វិស័យ​ទេសចរណ៍​នៅ​ក្នុង​ប្រទេស។

យោងតាម​ប្រសាសន៍​របស់​អ្នក​នាំពាក្យ​ក្រសួង​វប្បធម៌ និង​វិចិត្រ​សិល្បៈ លោក ថៃ នរសត្យា បានឲ្យ​ដឹងថា កាលពី​ប៉ុន្មាន​សប្តាហ៍​មុននេះ ក្រសួង​បាន​ធ្វើការ​ចាប់អារម្មណ៍​ចំពោះ​ទីក្រុងបីក្នុង​ខេត្ត​បាត់ដំបង កំពត និង​ក្រចេះ​ដើម្បី​រៀបចំ​ដាក់ឲ្យ​ក្លាយ​ជាទី​ក្រុង​បេតិកភណ្ឌ ដោយសារ​តែ​ទីក្រុង​នៃខេត្ត​ទាំង​នោះ​មាន​សំណង់​អគារ​ចាស់ៗ​សល់​កាលពី​សម័យ​អាណានិគម​ច្រើន។

លោក​បន្ថែម​ថា ទីក្រុង​ទាំងនោះ​មាន​សំណង់​បេតិកភណ្ឌ​រួចទៅ​ហើយ បាន​ន័យថា យើង​ចង់​អភិរក្ស​របស់​ដែលជា​បេតិកភណ្ឌ​នេះទុក​សម្រាប់​មើល ដោយ​រក្សា​រូបរាង​ស្ថាបត្យកម្ម​ដើម ដោយមិន​វាយ​ចោល​ឲ្យបាត់​លក្ខណៈ​ប្រវត្តិសាស្ត្រ ហើយ​វា​ក៏អាច​ក្លាយ​ទៅជា​ទីក្រុង​ទេសចរណ៍​ពីការ​អភិរក្ស​ប្រវត្តិសាស្ត្រ​ដោយ​និរន្តរភាព​នេះ​ដែរ។ និយាយ​ឲ្យ​មែនទែន​ទៅ ប្រទេស​នីមួយៗ សហគមន៍​នីមួយៗ គឺត្រូវ​បង្ហាញ​អំពី​ប្រវត្ថិសាស្ត្រ​របស់គេ​ដែលជា​ចំណែក​មួយ​ក្នុងការ​ទាក់ទាញ​ទេសចរណ៍។

លោក​បាន​ប្រាប់ថា ការ​អភិរក្ស​សំណង់​សម័យ​អាណានិគម​គឺបាន​រាប់​ចូល​ជាសំណង់​បេតិកភណ្ឌ ដូច្នេះ​ជាគោលការណ៍​របស់​ក្រសួង គឺមិន​អនុញ្ញាត​ឲ្យមាន​ការរុះរើ​វាយ​ចោល ឬជួស​ជុល​ដែល​ខុសពី​លក្ខណៈ​ដើម​នោះ​ទេ ប៉ុន្តែ​អាច​ជួសជុល​បាន​នៅពេល​ដែល​ឆ្លង​កាត់​ការត្រួត​ពិនិត្យ​ពី​អង្គភាព​ជំនាញ​របស់​ក្រសួង​វប្បធម៌ ថា​ត្រូវធ្វើ​យ៉ាងណា​ដើម្បី​ថែរក្សា​សំណង់​ចាស់។

Content image - Phnom Penh Post
សំណង់​រោង​ភាពយន្ដ​សម័យ​អាណានិគម​នៅ​ក្រុង​កំពត ស្ថិត​ក្នុង​សភាព​ទ្រុឌទ្រោម។ មួង វណ្ណឌី

បច្ចុប្បន្ន​មាន​សំណង់​បុរាណ​ខ្លះជា​របស់​រដ្ឋ ឯខ្លះ​ទៀត​ជា​របស់​ឯកជន ដែល​មាន​ម្ទាស់​កម្មសិទិ្ធ​តាំងពី​ឆ្នាំ ១៩៨០ រហូត​មក​ដូចជា​សំណង់​ផ្ទះ​តូចៗ​ជាដើម ហើយ​ភាគ​ច្រើន​នៃ​សំណង់​ធំៗ​ជារបស់​រដ្ឋ​កាន់កាប់​ដូចជា​រោងកុន ស្ពាន ផ្សារ វត្ត​អារាម សាលា​ខេត្ត និង​អគារ​មួយ​ចំនួន។

លោក នរ​សត្យា បាន​បន្តថា ៖ «យើង​កំពុង​ខិតខំ​បញ្ទប់​ច្បាប់​នៃ​ការអភិរក្ស​សំណង់​បេតិកភណ្ឌ​នេះ ព្រមទាំង​វប្បធម៌​រូបី​និង​អរូបី​មួយ​ចំនួន​ជា​បន្តបន្ទាប់​ឲ្យបាន​ជោគជ័យ ដោយ​ឆ្លងកាត់​អន្តរ​ក្រសួង គណៈរដ្ឋមន្ត្រី សភា ទើប​យើង​អាចចេញ​ជាច្បាប់​ផ្លូវការ គឺ​មិនមែន​តែ​របស់​រដ្ឋ​នោះទេ ឯកជន​ក៏ត្រូវ​សហការ​ក្នុង​ភារកិច្ទ​ថែរក្សា​សម្បតិ្ត​បេតិកភណ្ឌ​ក្នុង​ច្បាប់​ដែល​បាន​ចែង បើ​ចង់​កែលម្អ ឬ​ជួសជុល​ត្រូវគោរព​តាម​ស្ថាបត្យកម្ម​ពី​បុរាណ»។

លោក​បាន​បន្ថែម​ថា ៖ «កន្លង​មក​យើង​ពិនិត្យ​ឃើញ​ថា មានការ​វាយចោល​ដែល​មិន​ស្រប​នឹង​គោលការណ៍​ឡើយ​ដោយសារ​មាន​ជន​ឆ្លៀត​ឱកាស​ខ្លះបាន​ធ្វើ​នៅ​ពេល​ដែល​ពុំមាន​ច្បាប់​រឹងមាំ​កាល​ពីមុនៗ ហើយ​ប៉ុន្មាន​ឆ្នាំ​ចុង​ក្រោយ​នេះ មិនមាន​បញ្ហា​នេះ​កើត​ឡើង​ទេ ដោយ​មាន​ការ​តឹងរ៊ឹង​លើ​បញ្ហា​នេះ»។

ទោះជា​យ៉ាងណា លោក​នៅតែ​មិនទាន់​អាច​បញ្ជាក់​ច្បាស់​ថា ច្បាប់​ស្តីពី​ការអភិរក្ស និងការ​អភិវឌ្ឈ នឹង​ចេញជា​រូបភាព ១០០ ភាគរយ​នៅ​ពេល​ណា​ទេ បន្ទាប់ពី​បាន​ធ្វើការ​ពិភាក្សា​រវាង​ក្រសួង​នានា។

អ្នក​នាំពាក្យ​រូបនេះ​នៅតែ​សំណូមពរ​ដល់​មហាជន​ថា ៖ «បើ​បងប្អូន​មាន​សំណង់​បុរាណ ចូរ​ថែរក្សា និង​ចាត់​ទុកជា​សម្បត្តិ​បេតិកភណ្ឌ​របស់​ខ្មែរ​យើង ពីព្រោះ​ការវាយ​ចោល​គឺជា​ការ​ខាតបង់ និង​ខុសច្បាប់»។

បើ​យោងតាម​ជនជាតិ​អង់គ្លេស ដែលជា​ម្ចាស់​សណ្ឋាគារ បូកគោ​ឡជ «Bokor Mountain Lodge» នៅ​ខេត្ត​កំពត លោក Andrew Farrell បាន​មាន​ប្រសាសន៍​ថា ៖ «បូកគោ​ឡជ ត្រូវ​បាន​បង្កើត​ឡើង​នៅឆ្នាំ ២០០៣ ដោយ​លោក Eric Makao ដែល​មាន​សញ្ជាតិ​នូវែល​សេឡង់ ហើយ​នៅតែ​បន្ត​ដល់​ថ្ងៃ​នេះ ថាជា​សណ្ឋាគារ​តូច​មួយ​ដែលមាន​ភោជនីយដ្ឋាន​ល្អ​ឥត​ខ្ចោះ»។

លោក​បាន​បញ្ជាក់​ថា សំណង់​របស់​បូកគោ​ឡជ​ត្រូវបាន​កសាង​នៅ​ឆ្នាំ ១៩០៨ និង​ត្រូវបាន​គេ​រាយការណ៍​ថាបាន​ប្រើ​ជាទី​ស្នាក់ការ​កណ្តាល​របស់​ខ្មែរក្រហម​មួយ​រយៈ។ ប៉ុន្តែ «ខ្ញុំបាន​ចាប់​យក​អាជីវ​កម្មនេះ​នៅក្នុង​ឆ្នាំ ២០១៤ ដោយសារ​ខ្ញុំ​ចាប់អារម្មណ៍​លើ​ស្ថាបត្យកម្ម​សំណង់​អគារ​សម័យ​អាណានិគម​ដែល​ស្ថិត​នៅលើ​មាត់​ព្រែក​កំពត​នេះ»។

Content image - Phnom Penh Post
សំណង់​ផ្ទះ​សម័យ​អាណានិគម​នៅ​ក្រុង​កំពត ត្រូវបាន​គេ​ជួសជុល​ធ្វើជា​ភោជនីយដ្ឋាន។ មួង វណ្ណឌី

លោក​បាន​ប្រាប់ថា លោក​រក្សាបាន​នូវ​រូបរាង​ដើម​នៃ​សំណង់​គឺ​ប្រហែល ៩៥ ភាគរយ ដោយ​គ្មាន​ការ​ផ្លាស់ប្តូរ តែ​គ្រាន់​តែ​លាបថ្នាំ​បន្ថែម​បនិ្តច​បន្តួច​តែប៉ុណ្ណោះ ដោយ​ចំណាយ​ថវិកាអស់​រាប់ពាន់​ដុល្លារ លើ​ការជួសជុល​ដោយ​ចង់​រក្សា​ទិដ្ឋភាព​អគារ​អាណានិគម​ដូចមុន។

លើស​ពីនេះ ក្រុង​កំពត ក៏ដូច​រាជធានី​ភ្នំពេញ​ដែលមាន​អគារ​សម័យ​អាណានិគម​ជាច្រើន​បង្ហាញ​ពី​ស្ថាបត្យកម្ម​ល្អៗ​ដើម្បី​អភិរក្ស​នៅក្នុង​ខេត្តកំពត ដូចជា​អគារ​រដ្ឋាភិបាល ស្ពាន ផ្សារ និងវត្ត​អារាម​នានា។

លោក Andrew បាន​បន្ថែម​ទៀត​ថា ៖ «អគារ​សម័យ​អាណានិគម​ទាំងនោះ គឺ​ពិតជា​អស្ចារ្យ»។

ចំណែក សាស្ត្រាចារ្យ​ផ្នែក​ប្រវិត្ថវិទ្យា​នៃ​សាកលវិទ្យាល័យ​ភូមិន្ទ​ភ្នំពេញ លោក វង់ សុធារ៉ា បាន​មាន​ប្រសាសន៍​ថា ៖ «តាម​ប្រវត្តិសាស្ត្រ ទោះ​បីជា​សំណង់​មាន​រូបរាង​ចាស់​ទ្រុឌទ្រោម​យ៉ាងណា​ក៏ដោយ​ត្រូវ​រក្សាទុក និង​ជួសជុល​តាម​លក្ខណៈ​ដើម ដើម្បី​រក្សា​ភាព​ចំណាស់​តាមរយៈ​ប្រវត្តិសាស្ត្រ​ដែលជា​តម្លៃ​មួយ​សម្រាប់​បង្អួត និង​ទាក់ទាញ​ភ្ញៀវទេសចរ​មក​មើល​អំពី​ភាព​បុរាណ»។

លោក​បាន​យល់​ឃើញ​ថា ៖ «ខ្ញុំ​គិតថា ជា​គំនិតល្អ​ដែលមាន​ការ​ថែរក្សា​កែ​លអ្អ​សំណង់​បុរាណ ប៉ុន្តែ​អ្នកជំនាញ​របស់​ក្រសួង​វប្បធម៌ និង​វិចិត្រសិល្បៈ និង​ក្រសួង​ពាក់ព័ន្ធ​គួរជួយ​ពិនិត្យមើល​ផង ពីព្រោះ​ការធ្វើ​បែបនេះ​មាន​គំរូ​ជាច្រើន​នៅ​តាម​បណ្តា​ប្រទេស​នានា ដូចជា​ម៉ាឡេស៊ី ដោយ​ប្រទេស​គេ​មិនមាន​អ្វីថ្មី ​បុរាណ​ណាស់​ណា​ទេ ប៉ុន្តែ​សុទ្ធសឹង​តែ​អគារ​ក្នុង​អំឡុងពេល​សម័យ​អាណានិគម​ដើម្បី​ទាក់ទាញ​ភ្ងៀវ​ទេសចរ»។

បន្ថែម​លើស​ពីនេះ លោក​សាស្ត្រា​ពន្យល់​ថា បើសិន​ជា​ប្រទេស​យើង​អាចធ្វើ​បាន​តាម​អ្នក​បច្ចេកទេស និង​ស្តង់ដារ គឺ​នឹងជួយ​ជំរុញ​វិស័យ​ទេសចរណ៍​ប្រវត្តិសាស្ត្រ​មួយ​ផ្នែក​ដែរ ប៉ុន្តែបើ​យើង​អត់​ថែរក្សា​ទេ គឺ​នាំឲ្យ​បាត់បង់​នូវ​ព្រលឹង​នៃ​ប្រវត្តិសាស្ត្រ​បុរាណ។

លោក​សាស្ត្រាចារ្យ​ផ្តាំ​ថា បើសិនជា​យើង​ចង់​អភិវឌ្ឍ​វិស័យ​ទេសចរណ៍​ដោយ​ប្រើ​ធនធាន​ប្រវត្តិសាស្ត្រ រដ្ឋាភិបាល​គួរ​យកចិត្ត​ទុកដាក់​រឿង​ច្បាប់​អភិរក្ស​សំណង់​ចាស់​ដែល​ចាត់​ទុកជា​បេតិកភណ្ឌ​ឲ្យ​គង់វង្ស​ល្អ ដើម្បី​ធ្វើជា​បេះដូង​នៃការ​ទាក់ទាញ​ភ្ញៀវ​មក​ទស្សនា៕

0

Comments

Please, login or register to post a comment

ព័ត៌មានពាក់ព័ន្ធ