Search form

Login - Register | FOLLOW US ON

Logo of Phnom Penh Post newspaper Phnom Penh Post - ហេដ្ឋា​រចនា​សម្ព័ន្ធ​ និង​ទីសាធារណៈ​ទីក្រុង ​មាន​សោភ័ណ​ភាព​ស្អាត​ ចាំបាច់​ត្រូវ​មាន​ការ​ចូល​រួម​សហការ​ពី​ប្រជាជន

Content image - Phnom Penh Post
កាក​សំណល់​សំរាម​ជា​ច្រើន​ត្រូវ​បាន​គេ​យក​ទៅ​ចោល​នៅ​ខាង​ក្រោម​ស្ពាន​អាកាស​មួយ​កន្លែង​នៅ​ក្រុង​ភ្នំពេញ។ ហុង មិនា

ហេដ្ឋា​រចនា​សម្ព័ន្ធ​ និង​ទីសាធារណៈ​ទីក្រុង ​មាន​សោភ័ណ​ភាព​ស្អាត​ ចាំបាច់​ត្រូវ​មាន​ការ​ចូល​រួម​សហការ​ពី​ប្រជាជន

កាល​ណា​កំណើន​ប្រជាជន​មាន​ការ​កើន​ឡើង​ច្រើន​តម្រូវ​ការ​របស់​ប្រជាជន​ក្នុង​ការ​ប្រើប្រាស់​ដូច​ជា សំណង់​ផ្ទះ ផ្លូវ​ថ្នល់ ស្ពាន ផ្សារ និង​សេវា​ដឹក​ជញ្ជូន​សាធារណៈ​មួយ​ចំនួន​ជា​តម្រូវ​ការ​ចាំបាច់​សម្រាប់​អ្នក​រស់​នៅ​ទីក្រុង។

ទន្ទឹម​នឹង​កំណើន​ផ្នែក​ប្រជាសាស្ត្រ​ដូច្នេះ ដើម្បី​ឲ្យ​ទីក្រុង​មួយ​ស្អាត​ប្រកប​ដោយ​សោភ័ណភាព​គួរ​មាន​ការ​ចូលរួម​រក្សា​បរិស្ថាន​ពី​ប្រជាជន​ដែល​រស់​នៅ​ក្នុង​ទីក្រុង និង​សង្គម​ទាំង​មូល​។

ការ​ចូលរួម​លើក​កម្ពស់​សណ្តាប់​ធ្នាប់ និង​សោភ័ណ​ភាព​ទីក្រុង​អាច​ជា​កាតព្វ​កិច្ច​មួយ​របស់​រដ្ឋាភិបាល និង​ប្រជា​ពលរដ្ឋ ដើម្បី​ភាព​ស្រស់​ស្អាត​ស្រប​ពេល​ប្រទេស​កំពុង​មាន​ការ​អភិវឌ្ឍ​លើ​វិស័យ​អចលនទ្រព្យ​។

កន្លង​មក​ទោះបី​មាន​ប្រកាស​អំពី​ការ​ផាក​ពិន័យ​ចេញ​ដោយ​អន្តរ​ក្រសួង​ត្រូវ​អនុម័ត ដើម្បី​ជា​ការ​ជំរុញ​ឲ្យ​មាន​ការ​កែប្រែ​ទម្លាប់​ ដល់​ប្រជាជន​មូលដ្ឋាន ដើម្បី​ចូល​រួម​ធ្វើ​ឲ្យ​ទីក្រុង​ដូច​ជា ទម្លាប់​មាន​សណ្តាប់​ធ្នាប់​នៅ​តាម​ទីសាធារណៈការ​ធ្វើ​ចរាចរការ​ចូល​រួម​ថែរក្សា​បរិស្ថាន​ស្អាត​នៅ​ក្នុង​ប្រទេស​ជាដើម​។

តាម​ការ​ប្រកាស​របស់​អន្តរ​ក្រសួង​រវាង​ក្រសួង​សេដ្ឋកិច្ច និង​ក្រសួង​មហាផ្ទៃ ដែល​បាន​ចែង​ក្នុង​ការ​ផាកពិន័យ​ទៅ​លើ​បុគ្គល​ណា​ដែល​ចោល​សំរាម និង​ការ​ចត​យានយន្ត​នៅ​តាម​ទីសាធារណៈ​បាន​អនុវត្ត​នៅ​តាម​កន្លែង​មួយ​ចំនួន​ក្នុង​រាជធានី​។

លោក ម៉េត មាស​ភក្តី អ្នក​នាំ​ពាក្យ​សាលា​រាជធានី​ភ្នំពេញ​បាន​ឲ្យ​ដឹង​ថា​ ៖ «យើង​មាន​បទ​បញ្ជា​ផាកពិន័យ​លើ​ការ​បោះ​សំរាម​ចោល​ពាសវាល​ពាស​កាល​តាម​ទីសាធារណៈ ប៉ុន្តែ​យើង​មិន​ទាន់​មាន​ការ​អនុវត្ត​គ្រប់​ទីកន្លែង​នោះ​ទេ ហើយ​ប្រជាជន​នៅ​មាន​ទម្លាប់​ចោល​សំរាម និង​ចត​យានយន្ត​តាម​ទីសាធារណៈ​ដោយ​គ្មាន​សណ្តាប់​ធ្នាប់​នៅ​ឡើយ»​។

លោក​បន្ត​ថា ទាក់ទង​ទៅ​នឹង​ទីក្រុង​ស្អាត​មួយ​មុខ​នេះ «​យើង​ត្រូវ​ធ្វើ​យុទ្ធនាការ និង​កិច្ច​ការងារ​ជាច្រើន​ដើម្បី​អប់រំ​ផ្សព្វផ្សាយ និង​ចុះ​ផ្ទាល់​» ដើម្បី​លើក​កម្ពស់​ប្រជា​ពល​រដ្ឋ​ឲ្យ​បញ្ឈប់​ការ​ចោល​សំរាម​ក្រៅ​ពី​ធុង​ដាក់​សំរាម​ចេះ​វេច​ខ្ចប់​ឲ្យ​បាន​ត្រឹមត្រូវ​ហើយ​ដាក់​ចូល​ធុង​សំរាម​ឲ្យ​បាន​ត្រឹមត្រូវ។

«​ខ្ញុំ​សូម​អំពាវនាវ​ដល់​ប្រជាជន​ចូល​រួម​ឲ្យ​តម្លៃ​ដល់​បរិស្ថាន ពីព្រោះ​ទីក្រុង​ហាក់បី​ដូចជា​ផ្ទះ​របស់​ពួក​យើង ដូច​ការ​បង្ហាញ​ពី​អត្ត​ចរិត​របស់​ប្រជា​ពលរដ្ឋ​របស់​យើង​ដែរ​។

ប៉ុន្តែ​ទោះបី​យើង​មាន​យន្ត​ការ​ល្អ​យ៉ាង​ណា​ក៏​ដោយ តែ​បើ​បងប្អូន​ប្រជា​ពលរដ្ឋ​មិន​យល់​ដឹង និង​មិន​ចូលរួម​ទេ​នោះ​កិច្ចការ​នោះ​កម្រ​ទទួល​បាន​ជោគជ័យ​ណាស់​»​។ នេះ​បើ​តាម​ប្រសាសន៍​របស់​លោក មាស​ភក្តី​។

Content image - Phnom Penh Post
ធុង​សំរាម​មួយ​ក្នុង​ចំណោម​ជា​ច្រើន ដែល​អាជ្ញាធរ​រាជធានី​បាន​ដាក់​នៅ​តាម​គោល​ដៅ​សំខាន់ៗ។ ហុង មិនា

ប៉ុន្តែ អ្នក​នាំ​ពាក្យ​រូប​នេះ​នៅ​តែ​ទទួល​ស្គាល់​ថា​ ៖ «​យើង​មិន​អាច​ដាក់​សមត្ថកិច្ច​គ្រប់​ទីកន្លែង​សម្រាប់​ធ្វើ​កិច្ចការ​ចាំ​ឃ្លាំ​មើល ហើយ​យើង​ក៏​មិន​អាច​ដាក់​ធុង​សំរាម​គ្រប់​ទីកន្លែង​នោះ​ទេ សំខាន់​ប្រជាជន​ត្រូវ​មាន​កាតព្វកិច្ច​គ្រប់​គ្រងការ​បោះចោល​កាក​សំណល់​ នានា​»​។ ឧទាហរណ៍​ ៖ តាម​សួន​ច្បារ​សុទ្ធ​​តែ​មាន​ធុង​សំរាម ប៉ុន្តែ​ប្រជាជន​មួយ​ចំនួន​មិនបាន​ចូល​រួម​សហការ​រក្សា​បរិស្ថាន​ឡើយ​។

លោក​បាន​បន្ត​ថា​ ៖ «​យើង​បាន​ចូល​រួម​ផ្សព្វផ្សាយ​អនុវត្ត​ផែនការ​អប់រំ ប៉ុន្តែ​យើង​មិន​ទាន់​បាន​អនុវត្ត​ផែនការ​កិច្ច​សន្សា​នៅ​ឡើយ​ទេ​។ បើ​ម្នាក់​បោះចោល​សំរាម​តាម​ផ្លូវ ម្នាក់ទៀត​ចាំ​សម្អាត វា​មិន​អាច​មាន​ប្រសិទ្ធភាព​ឡើយ ដូច្នេះ​គួរ​បោះចោល​ឲ្យ​ស្រេច​នៅ​ក្នុង​ធុងសំរាម​។ ឧទាហរណ៍ នៅ​តាម​ផ្លូវ​ទីលាន​ប្រជាធិបតេយ្យ យើង​បាន​​បោស​សម្អាត និង​រៀបចំ​សណ្តាប់​ធា្នប់ ឲ្យ​ទីក្រុង​កាត់​បន្ថយ​ការ​កកស្ទះ​ចរាចរណ៍ ដែល​អនុវត្ត​នៅ​លើ​ផ្លូវ​១១​ខ្សែ ជា​គំរូ​នៅ​តាម​មូលដ្ឋាន​ដូចជា​ខណ្ឌ​ច្បារ​អំពៅ​»។

កញ្ញា នាក់ ច័ន្ទ​មុនីនាថ ជា​និស្សិត​នៃ​សាកល​វិទ្យាល័យ​មួយ​ក្នុង​រាជធានី​ភ្នំពេញ បាន​ប្រាប់​កាសែត​ភ្នំពេញ​ប៉ុស្តិ៍​អចលន​ទ្រព្យ​ថា តាម​កន្លែង​ទីសាធារណៈ​មួយ​ចំនួន​ដែល​មាន​ការ​សរសេរ​ជា​បម្រាម ឬ​ស្លាក​សញ្ញា​ក៏​នៅ​តែ​មាន​ការ​បោះ​សំរាម​ចោល​ដែរ​ជា​ពិសេស​តាម​មុខ​ផ្ទះ និង​លើ​ស្ពាន​ជាដើម​។

«​ខ្ញុំ​គិត​ថា មាន​តែ​ការ​ផ្សព្វផ្សាយ​ជា​ស្ពត​ពាណិជ្ជកម្ម និង​ការ​ផាកពិន័យ​ទេ​ដែល​អាច​ធ្វើ​ឲ្យ​ប្រជាជន​រស់នៅ​ជុំវិញ​មាន​ការ​ភ្ងាក់រ​ឭក​ខ្លាច​រអា​ពី​ទង្វើ​របស់​ខ្លួន និង​ចាប់​ផ្តើម​សម្អាត​បរិស្ថាន​នៅ​ក្នុង​ទីក្រុង​»។

ឧទាហរណ៍​ប្រជាជន​ដែល​រស់នៅ​ទីក្រុង​មួយ​ចំនួន​មិន​ព្រម​ចំណាយ​ថរិកា​តិច​តួច​ដល់​ក្រុមហ៊ុន​ប្រមូល​សំរាម​ទេ​តែ​បែ​ជា​បោះចោល​សំរាម​ពាស​វាល​ពាស​កាល ដែល​បង្ក​ឲ្យ​ទេសភាព​ទីក្រុង​គ្មាន​សោភ័ណភាព។

កញ្ញា​បន្ត​ថា​ ៖ «​ខ្ញុំ​មាន​អារម្មណ៍​អត់​ល្អ​នៅ​ពេល​ដែល​ប្រព័ន្ធ​ហេដ្ឋា​រចនា​សម្ព័ន្ធ​ក្នុង​ទីក្រុង​ប្រកប​ដោយ​ធូលី និង​កាក​សំណល់ ពីព្រោះ​វា​ហាក់​បី​ដូច​ជា​ទីក្រុង​អានាធិបតេយ្យ​គ្មាន​សណ្តាប់​ធ្នាប់ ដូច្នេះ​អាជ្ញាធរ​ពាក់ព័ន្ធ​គួរ​អនុ​វត្ត​ផែនការ​សម្អាត​ទីក្រុង​។ ទោះបី​ជា​មាន​សំណង់​អគារ​ធំៗ ដូចជា​ស្ពាន​អាកាស ខុន​ដូ ផ្ទះ​ស្អាតៗ បរិស្ថាន​ទីក្រុង​គ្មាន​សោភ័ណភាព​​ក៏​គ្មាន​ន័យ​ដែរ​»​។

កញ្ញា ច័ន្ទ​មុនីនាថ បន្ត​ថា អាជ្ញាធរ និង​អ្នក​ពាក់ព័ន្ធ​ទាំងអស់​គួរ​យក​ចិត្ត​ទុក​ដាក់​អនុវត្ត​ផ្ទាល់​ទៅ​ដល់​ទីតាំង​មូលដ្ឋាន​ក្នុង​ទីក្រុង​ដូច​ជា​ខណ្ឌ​ច្បារ​អំពៅ ដែល​អាជ្ញាធរ​ចុះ​ទៅ​រៀបចំ​នៅ​ទីនោះ​ប្រកប​ដោយ​ប្រសិទ្ធភាព​។

ដើម្បី​បង្កើន​សោភ័ណ​ភាព​ទីក្រុង​ក្នុង​ប្រទេស​កំពុង​អភិវឌ្ឍន៍​នេះ​លោក កាល​វីន ហេង ជា​ប្រជា​ពលរដ្ឋ​រស់នៅ​រាជធានី​ភ្នំពេញ បាន​ប្រាប់​ថា​ ៖ «​តំបន់​ទីប្រជុំជន​ដែល​មាន​ផ្សារ​ជាង ​៣០​ ភាគរយ​បន្ត​ការ​កកស្ទះ​ដោយ​ខ្វះ​នូវ​ចំណត​ដែល​មាន​ស្តង់ដារ ពីព្រោះ​អ្នក​លក់​នៅ​តាម​ចិញ្ចើម​ថ្នល់ ហើយ​អ្នក​ទិញ​ចត​យាន​ជំនិះ​ដោយ​គ្មាន​សណ្តាប់​ធ្នាប់​»​។

លោក​បន្ថែម​ថា នៅ​ពេល​ដែល​តំបន់​មួយ​ក្លាយ​ទៅ​ជា​តំបន់​អភិវឌ្ឍន៍​រួម​មាន​ផ្ទះ​ធំៗ ផ្សារ​ការិយាល័យ​ធ្វើ​ការ សាលារៀន និង​អគារ​មួយ​ចំនួន​ទៀត​ផង​នៅ​ក្នុង​ទីក្រុង​តំបន់​នោះ​នឹង​បាត់បង់​សោភ័ណភាព​ដោយ​សារ​ភាព​អនាធិបតេយ្យ​នៃ​ការ​ប្រើប្រាស់​ខុស​ស្តង់ដារ និង​ភាព​ខ្វះ​សុជីវធម៌​នៅ​ពេល​ធ្វើ​ផ្លូវ​ចរាចរណ៍​តាម​ផ្លូវ។ ដូច្នេះ ការ​រៀបចំ​ចំណត​ឲ្យ​មាន​របៀប​រៀប​រយ​ជា​កាតព្វកិច្ច​ចាំបាច់​ក្នុង​ទីក្រុង​។

កាសែត​ភ្នំពេញ​ប៉ុស្តិ៍​មិន​អាច​ធ្វើ​ការ​ទាក់​ទង​មន្ត្រី​ក្រសួង​បរិស្ថាន​ផ្នែក​នេះ​បាន​ទេ ដោយ​លោក​ពុំ​បាន​លើក​ទូរស័ព្ទ​។

គួរ​បញ្ជាក់​ដែរ​ថា តាម​អនុក្រឹត្យ​របស់​ក្រសួង អ្នក​ដែល​មិន​អនុវត្តតាម​គោលការណ៍​ណែនាំ​ស្តីពី​ការ​បែង​ចែក​កាក​សំណល់ ឬ​បោះចោល​សំរាម ឬ​ដុត​សំរាម នៅ​ទីសាធារណៈ​នឹង​ត្រូវ​ពិន័យ​ពី​១០០០០​ រៀល​ដល់ ២០០,០០០​រៀល (​ប្រហែល ២,៥០ ទៅ៥០ ដុល្លារ​អាមេរិក​)៕

0

Comments

Please, login or register to post a comment

ព័ត៌មានពាក់ព័ន្ធ