Search form

Login - Register | FOLLOW US ON

Logo of Phnom Penh Post newspaper Phnom Penh Post - អគារ​ខ្ពស់​មួយ​ចំនួន ​បាន​សាង​សង់​ដល់​ចំណុច​កំពូល​របស់​ខ្លួន ​នៅ​ដំណាច់​ឆ្នាំ​នេះ

Content image - Phnom Penh Post

អគារ​ខ្ពស់​មួយ​ចំនួន ​បាន​សាង​សង់​ដល់​ចំណុច​កំពូល​របស់​ខ្លួន ​នៅ​ដំណាច់​ឆ្នាំ​នេះ

នៅ​ទីក្រុង​ភ្នំពេញ នា​អំឡុងពេល​ដំណាច់​ឆ្នាំ​សកល​ឆ្នាំ​២០១៦​នេះ ជា​ពេល​ដែល​នៅ​តាម​ការិយាល័យ​ធ្វើ​ការ និង​ហាង​លក់​ទំនិញ​នានា បាន​ដាក់​តាំង​ដើម​ឈើ​គ្រិស្តស្មាស់​ដែល​មាន​ចុង​ស្រួច​ខ្ពស់​ឡើង​លើ ខណៈ​នៅ​ក្នុង​លំហរ​នៃ​រាជធានី​បុរាណ​នេះ​ក៏​មាន​អគារ​ខ្ពស់ៗ​បាន​និង​កំពុង​សាងសង់​រួចរាល់​ដល់​ចំណុច​កំពូល​ខ្ពស់​បំផុត​របស់ខ្លួន​រួចរាល់ហើយ​។

ទន្ទឹម​នឹងនោះ​ក៏មាន​គម្រោង​អគារ​ធំៗ​ខ្ពស់ៗ​ជាច្រើន​ទៀត​កំពុងតែ​លូត​ខ្ពស់​ស្ទើរ​ដល់​ចំណុច​កំពូល​របស់​ខ្លួន​ផងដែរ​។

ខាង​ក្រោម​នេះ គឺជា​រូបថត​នៃ​ទិដ្ឋភាព​ ទ្រង់ទ្រាយ​នៃ​អគារ​កប់​ពពក​មួយ​ចំនួន ដែល​យើង​បាន​ថត​ផ្តិត​យក​រូបភាព​ស្ថានភាព​ជាក់ស្តែង​នា​អំឡុង​សប្តាហ៍​ចុង​ក្រោយ​នៃ​ខែធ្នូ និង​ក៏​ជា​សប្តាហ៍​ចុង​ក្រោយ​បំផុត​របស់​ឆ្នាំ​នេះ​ដែរ​។

Content image - Phnom Penh Post

១-អគារ​ដំបូង​នៃ​គម្រោង D.I. Rivera

ស្ថិត​នៅ​ជាប់​នឹង​មាត់​ទន្លេ​បាសាក់​នា​តំបន់​កោះ​ពេជ្រ អគារ​ទី១​នៃ​គម្រោង D.I. Rivera បាន បញ្ចប់​ការ​សាង​សង់​របស់​ខ្លួន​ដល់​ចំណុច​កំពូល ឬ​ភ្ជិត​ព្រំ​នៅ​លើ​ជាន់​ ទី​៣២ រួច​រាល់​ហើយ​។ នៅ​ក្រោម​ដំបូល​នៃ​អគារ​ដ៏​ខ្ពស់​ត្រដែត​មួយ នេះ គឺជា​លំនៅឋាន​ប្រណីត​របស់​មហាជន​ចំនួន​ជាង​៤០០​យូនីត​។

អ្នក​នាង Banh Suly ប្រធាន​ផ្នែក​លក់​នៃ​គម្រោង​នេះ​បាន​ឲ្យ​ដឹង​ថា ​៖ «​ក្រុម​ការងារ​សាងសង់​របស់​ពួក​យើង​ទើប​នឹង​ដោះ​រន្ទា​សំណង់​ចេញ​ពី​អគារ​ទី​១​នោះ កាល​ពី​ពេល​ថ្មីៗ​នេះ​ឯង គឺ​បន្ទាប់​ពី​ការ​សាងសង់​ត្រូវ​បាន​បញ្ចប់​ដល់​កំពូល​របស់​អគារ​»​។

អ្នក​នាង​បន្ត​ថា​៖ «​យើង​បាន​និង​កំពុង​បន្ត​ការ​រៀបចំ​ផ្ទៃ​ខាង​ក្នុង​នៃ​អគារ និង​ដាក់​បញ្ចូល​គ្រឿង​បំពាក់​ផ្សេងៗ​។ បើតាម​ការគ្រោងទុក​យើង​នឹង​បញ្ចប់​ការងារ​នេះ រួច​គ្រោង​​ឲ្យ​ម្ចាស់​យូនីត​នីមួយៗ​ចូល​ទៅ​​រស់​នៅ នៅ​អំឡុង​ខែ​សីហា ឬ​កញ្ញា​ឆ្នាំ​២០១៧ ខាង​មុខ​នេះ​ហើយ​»​៕

Content image - Phnom Penh Post

២-​គម្រោង​កាំកូ​ស៊ីធី (CamKo City)

​នៅ​ភាគ​ពាយព្យ​នៃ​ទីក្រុង​ភ្នំពេញ គម្រោង​បណ្តុំ​អគារ​ធំៗ​ជា​ច្រើន​របស់​កាំកូ​ស៊ីធី ជាពិសេស​អគារ​ថ្មី​ចំនួន​៥​នោះ​ត្រូវបាន​សាងសង់​រួចរាល់​ដល់​ចំណុច​កំពូល​អគារ​នៃ​ជាន់​ទី​១៥​ហើយ។

បើ​តាម​លោក អាន ចាន់នី ប្រធាន​ផ្នែក​លក់​របស់​គម្រោង​កាំកូ​ស៊ីធី បាន​​អះអាង​ថា ក្រុមហ៊ុន​នឹង​ចាប់​ផ្តើម​រៀបចំ​សម្អាត​ទាំង​ខាង​ក្រៅ និង​ផ្នែក​ខាង​ក្នុង​នៅ​ដើម​ឆ្នាំ​២០១៧ ខាង​មុខ​នេះ​។

លោក ចាន់នី បន្តថា​ ៖ «​ក្នុង​ចំណោម​៥​អគារ​នោះ មាន​អគារ​បី​ដែល​សាងសង់​ខ្ពស់​បំផុត​ដល់​ជាន់​ទី​១៥» ជា​ចំណុច​កម្ពស់​ខ្ពស់ បំផុត​នៅ​តំបន់​នោះ​នាពេល​បច្ចុប្បន្ន​នេះ​។ «​គ្រាន់​តែ​នៅ​ក្នុង​អគារ​ខ្ពស់​ទាំងបី​នោះ យើង​មាន​លំនៅ​ឋាន​ប្រណីត​​ខ្នាត​ធំ​ចំនួន​ជាង ៣០០​យូនីត​»​។

លោក​បន្ថែម​ថា ​៖ «​គម្រោង​នេះ​នឹង​កាន់​តែ​មាន​សុពលភាព​ខ្លាំង​ខណៈ​ផ្សារ​ទំនើប Aeon Mall 2 នៅ​ក្បែរ នោះ នឹង​បើក​ដំណើរ​ការ​នៅ​ក្នុង​ឆ្នាំ​២០១៨»​៕

Content image - Phnom Penh Post

៣-​គម្រោង The Bridge

អគារ​ភ្លោះ​ធំៗ​ខ្ពស់​ពីរ​នៅ​ជាប់​គ្នា​នេះ​បាន​សាងសង់​រហូត​ដល់​ជាន់​ទី​៤១​ហើយ នៅ​ក្នុង​សប្តាហ៍​ចុង​ក្រោយ​នៃ​ឆ្នាំ​២០១៦​នេះ វា​គឺជា​គម្រោង The Bridge ដែល ជា​បណ្តុំ​លំនៅឋាន​ដ៏​ល្អ​ប្រណីត​បែប​ខុន​ដូ មាន​ចំនួន​ជាង​មួយ​ពាន់​យូនីត និង​មាន​តម្លៃ​ថ្លៃ​បំផុត​នៅ​កម្ពុជា​។

គម្រោង​នេះ​គឺជា​ការ​វិនិយោគ នៅ​ក្នុង​ទំហំ​ទឹក​ប្រាក់​រហូត​ដល់​៥៨០​លាន​ដុល្លារ​អាមេរិក របស់​ក្រុមហ៊ុន WorldBridge Land ដែល​មាន​លោក​ឧកញ៉ា សៀ រិទ្ធី ប្រធាន​៕​

Content image - Phnom Penh Post

៤-​គម្រោង Casa Meridian

​គម្រោង​លំនៅឋាន Casa Meridian ទំនង​ក្លាយ​ជា​អគារ​ខ្ពស់​ដំបូង​បំផុត​នៅ​តំបន់​កោះ​ពេជ្រ ដែល​នឹង​បើក​ទ្វារ​ឲ្យ​អតិថិជន​ជា​ម្ចាស់​យូនីត​របស់​ខ្លួន​ចូល ទៅ​ស្នាក់​នៅ​នៅ​អំឡុង​ខែ​មេសា ឆ្នាំ​២០១៧ ខាង​មុខ​នេះ​។

អគារ Casa Meridian ដែល​មាន​ចំនួន ៣៣​ជាន់ និង​មាន​កំពស់ ១២២​ម៉ែត្រ​នេះ មាន​លំនៅឋាន​ប្រណីត​ចំនួន​៥១២​យូនីត សម្រាប់​មហាជន​ទូទៅ​។

​បើ​តាម​ការ​ផ្តល់​ព័ត៌មាន​ពី​បុគ្គលិក​របស់​ក្រុមហ៊ុន​នេះ​បាន​ឲ្យ​ដឹង​ថា ​៖ «​យើង​គ្រោង​នឹង​ផ្តល់​យូនីត​របស់ Casa Meridian ដល់​ម្ចាស់​របស់​ខ្លួន​នៅក្នុង​អំឡុង​ខែ​មេសា​ឆ្នាំ​ក្រោយ​» ដើម្បី​អបអរ​សាទរ​ទិវា​បុណ្យ​ចូល​ឆ្នាំថ្មី​ប្រពៃណី​ជាតិ​ខ្មែរ​។

លោក​បន្ត​ថា​ ៖ «​រហូត​មក​ទល់​ពេល​នេះ យើង​នៅ​មាន​សល់​យូនីត​ចំនួន​តិច​តួច​ប៉ុណ្ណោះ សម្រាប់​អតិថិជន​ថ្មី​។ ក្រុម​ការងារ​ផ្នែក​ខាង​ក្នុង​កំពុង​មមាញឹក​រៀបចំ​តុបតែង​លម្អ​ផ្ទៃ​ខាង​ក្នុង​របស់​អគារ គឺ​បន្ទាប់​ពីក្រុម​សាង​សង់​បាន​បញ្ចប់​ការងារ​ដល់​ចំណុច​កំពូល​ព្រំ​តាំងពី​ខែ​ឧសភា កន្លង​មក​»៕

0

Comments

Please, login or register to post a comment