Search form

Login - Register | FOLLOW US ON

Logo of Phnom Penh Post newspaper Phnom Penh Post - អគារ​ពាណិជ្ជកម្ម​ថៃ ប៊ុនរ៉ុង​ខ្ពស់​ជាង​គេ​នៅ​តំបន់​អាស៊ាន ​ស្ថិត​ក្នុង​ភាព​មិន​ប្រាកដប្រជា

Content image - Phnom Penh Post
គំរូ​នៃ​គម្រោង​មជ្ឈមណ្ឌល​ពាណិជ្ជកម្ម​ថៃ​ប៊ុនរ៉ុង ជា​អគារ​ភ្លោះ​ខ្ពស់​កប់ពពក​ចំនួន​ ២ និង​អគារ​ចំនួន​ ៤ ​ទៀត​នៅ​ព័ទ្ធ​ជំវិញ​ដែល​កំពុង​ធ្វើការ​កែប្រែ​ប្លង់​មេ​ខ្លះៗ​។ រូបថត សហការី

អគារ​ពាណិជ្ជកម្ម​ថៃ ប៊ុនរ៉ុង​ខ្ពស់​ជាង​គេ​នៅ​តំបន់​អាស៊ាន ​ស្ថិត​ក្នុង​ភាព​មិន​ប្រាកដប្រជា

អគារ​ភ្លោះ​មជ្ឈមណ្ឌល​ពាណិជ្ជកម្ម​ថៃ ប៊ុនរ៉ុង ដែល​មាន​កម្ពស់​ចុងក្រោយ​រហូត​ដល់​ ៥៥០ ​ម៉ែត្រ​បាន​ពន្យារពេល​ការ​ចាប់ផ្តើម​ដំណើរការ​សាងសង់​ជាថ្មី​ម្តង​ទៀត​ដែល​ធ្វើឲ្យ​អ្នក​ជំនាញ​នៅ​ក្នុង​វិស័យ​នេះ​កំពុង​ដាក់​ការ​សង្ស័យ​។

លោក​សាស្ត្រាចារ្យ ទួស សាភឿន អ្នក​គ្រប់គ្រង និង​ស្ថាបត្យករ​ចូលរួម​គូ​ប្លង់​គម្រោង​នេះ​បាន​ថ្លែង​ឲ្យ​ដឹង​តាម​បណ្តាញ​ទំនាក់ទំនង​សង្គម Facebook កាលពី​រសៀល​ថ្ងៃ​អង្គារ​ថា​ការ​សាងសង់​អគារ​នេះ​មិន​ទាន់​ចាប់ផ្តើម​នៅ​ឡើយ​ទេ ព្រោះ​យើង​កំពុង​រៀបចំ​ក្រុម​ការងារ​បច្ចេកទេស​ចំនួន ៦ ​ក្រុម​ដើម្បី​កែលម្អ​អគារ​នេះ​ឲ្យ​បាន​កាន់តែ​ល្អ​ថែម​មួយ​កម្រិត​ទៀត​មុន​ពេល​ការ​ចាប់ផ្តើម​សាងសង់​។ លោក​បន្ត​ថា​លក្ខណៈ​ផ្លូវ​ច្បាប់ ប្លង់​បច្ចេកទេស យើង​មាន​អស់​ហើយ​អ្វី​សំខាន់​គឺ​ការងារ​បច្ចេកទេស​ដែល​ត្រូវ​មាន​ការ​កែសម្រួល និង​បាន​បញ្ចប់​ស្ទើរ ១០០ ​ភាគរយ​ហើយ​។

អគារ​មជ្ឈមណ្ឌល​ពាណិជ្ជកម្ម​ថៃ ប៊ុនរ៉ុង កម្ពស់​ ១៣៣ ​ជាន់​នេះ​គ្រោង​សាងសង់​លើ​ផ្ទៃដី​ជិត​ ៦ ​ហិកតា​ស្ថិត​នៅ​តំបន់​​ឌ្រីមលែន​ដ៏​ក្នុង​សង្កាត់​ចតុមុខ ខណ្ឌ​ដូនពេញ​។ លោក​បន្ត​ថា​៖ «​យើង​មិន​មាន​បញ្ហា​ថវិកា​ទេ​យើង​មាន​ថវិកា​គ្រប់គ្រាន់​រួច​ហើយ ដើម្បី​សាងសង់​អគារ​នេះ​»​។

លោក​សាស្ត្រាចារ្យ ទួស សាភឿន បាន​បន្ត​ថា​អគារ​ពាណិជ្ជកម្ម​ដ៏ធំ​នេះ​មាន​បណ្តុំ​ដោយ​សេវាកម្ម​ចម្រុះ​ដែល​មាន​ដូចជា ផ្សារ​ទំនើប អគារ​ការិយាល័យ អាផាត​មិន​កម្រិត​ផ្កាយ​ ៥ អូតែល​កម្រិត​ផ្កាយ​ ៦ ខុនដូ​ប្រណីត មជ្ឈមណ្ឌល​សេវាកម្ម​ហាត់ប្រាណ ស្ទីម ម៉ាស្សា ភោជនីយដ្ឋាន​លំដាប់​អន្តរជាតិ​កន្លែង​គយគន់​ទិដ្ឋភាព​ក្រុង​ភ្នំពេញ​ជាដើម​។

លោក​បន្ត​ថា​ អគារ​នេះ​គ្រោង​ចំណាយ​ថវិកា​សាងសង់​ចំនួន ២១០០ ​លាន​ដុល្លារ និង​គ្រោង​ចំណាយ​ថវិកា​ ៣០០០ ​លាន​ដុល្លារ​ទៀត​សម្រាប់​ធ្វើឲ្យ​អគារ​នេះ​ដំណើរការ​រស់​រវើក​។

លោក​បន្ត​ថា៖ «​នៅ​ពេល​អគារ​នេះ​សាងសង់​ហើយ វា​នឹង​ផ្លាស់ប្តូរ​មុខមាត់​រាជធានី​ភ្នំពេញ​ហើយ​ក្រុមហ៊ុន​អន្តរជាតិ​ល្បីៗ​នឹង​មក​បោះ​ទីតាំង​នៅ​លើ​អគារ​នេះ​ព្រោះ​បច្ចុប្បន្ន​មិន​ទាន់​មាន​ក្រុមហ៊ុន​អន្តរជាតិ​ច្រើន​ចូល​មក​ដាក់​ការិយាល័យ​នៅ​ទីក្រុង​ភ្នំពេញ​នៅ​ឡើយ​ទេ ដោយសារ​បច្ចុប្បន្ន​រាជធានី​ភ្នំពេញ​មិន​ទាន់​មាន​ការិយាល័យ​លំដាប់​អន្តរជាតិ​នៅ​ឡើយ​ទេ​»​។

តាម​ការសិក្សា​របស់​ក្រុមហ៊ុន CBRE Cambodia បាន​រកឃើញ​ថា​បច្ចុប្បន្ន​នៅ​កម្ពុជា​មាន​ក្រុមហ៊ុន​លំដាប់​អន្តរជាតិ​ប្រមាណ​ ៩០ ​ក្រុមហ៊ុន​បាន និង​កំពុង​វិនិយោគ​នៅ​កម្ពុជា​ក្នុង​ចំណោម​ក្រុមហ៊ុន​អន្តរជាតិ​ធំៗ​ទាំង​ ៥០០ ​នៅ​ក្នុង​ពិភពលោក​។

តាម​គម្រោង​អគារ​ពាណិជ្ជកម្ម​កប់​ពពក​នេះ​នឹង​សាងសង់ និង​គ្រប់គ្រង​ដោយ​ក្រុមហ៊ុន​សំណង់ Hsin Chong Construction Group Ltd., និង​សហការ​វិនិយោគ​រវាង​ក្រុមហ៊ុន Thai Boon Rong Group និង​ក្រុមហ៊ុន​អភិវឌ្ឍន៍​អចលនទ្រព្យ​នៅ​ទីក្រុង​ម៉ាកាវ Sun Kian Ip Group​។

អគ្គនាយក​ក្រុមហ៊ុន Ratanaka Realty លោក ងួន ឆាយលាង បាន​ថ្លែង​ថា​តាម​ធម្មតា​អគារ​ធំ​បែប​នេះ​នៅ​ពេល​មាន​ការ​កែប្រែ​ប្លង់​អ្វី​មួយ វា​ជា​រឿង​ធម្មតា​ទេ​ក្នុង​ការ​ពន្យារពេល​សាងសង់ ប៉ុន្តែ​នៅ​ពេល​និយាយ​ពី​ទំនុក​ចិត្ត វា​អាច​មាន​ផល​ប៉ះពាល់​តិចតួច​ជា​រឿង​ធម្មតា​។

លោក​បន្ត​ថា ​អគារ​នេះ​ប្រសិន​ជា​ធ្វើឲ្យ​បាន​ល្អ និង​មាន​ប្លង់​មាន​ភាព​ទាក់ទាញ វា​អាច​ជា Landmark មួយ​សម្រាប់​ក្រុង​ភ្នំពេញ ប៉ុន្តែ​ប្លង់​អគារ​ចាស់​សព្វ​ថ្ងៃ​នេះ វា​ហាក់​ដូចជា​អគារ​ធម្មតា​គ្មាន​អ្វី​ជា​ភាព​ទាក់ទាញ​នោះ​ទេ ហេតុ​នេះ​ការ​ឌីហ្សាញ​អគារ​ឲ្យ​មើល​ទៅ​មាន​ភាព​ទាក់ទាញ និង​បង្ហាញ​ភាព​អស្ចារ្យ​ពិតជា​មាន​សារៈសំខាន់​ណាស់ ដើម្បី​ឲ្យ​វា​ក្លាយ​ជា​មុខមាត់​ថ្មី​មួយ​សម្រាប់​កម្ពុជា​។

លោក​បន្ត​ថា៖ «​សម្រាប់​ខ្ញុំ​អគារ​ខ្ពស់​ ឬ​ទាប វា​មិន​សូវ​សំខាន់​សម្រាប់​ខ្ញុំ​នោះ​ទេ សំខាន់​អគារ​នោះ​ពេល​សាងសង់​ចប់​មាន​សកម្មភាព និង​ផលិតភាព​សេដ្ឋកិច្ច ឬ​អត់​ប៉ុណ្ណោះ​»​។

អ្នក​ឯកទេស​ផ្នែក​នគរូបនីយកម្ម​លោក​បណ្ឌិត វ៉ាន់ វ៉ាត បាន​ថ្លែង​ថា​ក្រសួង​រៀបចំ​ដែនដី នគរូបនីយកម្ម និង​សំណង់​បាន​សិក្សា​ជាយូរ​មក​ហើយ​ពី​បច្ចេកទេស និង​កម្ពស់​អគារ​ដែល​ត្រូវ​សាងសង់​នៅ​កន្លែង​ណា​មួយ ពិសេស​ក្នុង​សង្កាត់​ចតុមុខ​ដែល​មាន​វិមាន​ឯករាជ្យ​មាន​ការ​លើក​ឡើង​ពី​ការ​ហាម​មិន​ឲ្យ​សាងសង់​ខ្ពស់​ជាង​វិមាន​ឯករាជ្យ​ដែល​ជា​និម្មិត​រូប​នៃ​ឯករាជ្យ​ជាតិ​នេះ ប៉ុន្តែ​ជា​លទ្ធផល​គឺ​បច្ចុប្បន្ន​មាន​អគារ​ខ្ពស់ៗ​នៅ​ជុំវិញ​ទីតាំង​នេះ​។

លោក​បន្ត​​ថា៖ «​ធម្មតា​ប្រទេស​របស់​យើង​កំពុង​ត្រូវ​ទាក់ទាញ​អ្នក​វិនិយោគ​ដើម្បី​ជំរុញ​កំណើន​សេដ្ឋកិច្ចជាតិ​ហើយ​រដ្ឋាភិបាល​លើក​ទឹកចិត្ត​ឲ្យ​មាន​ការ​សាងសង់​អគារ​ខ្ពស់​បែប​នេះ​គឺជា​ការ​លើក​មុខមាត់​ប្រទេស​ជាតិ និង​ជា​មោទនភាព​ជាតិ​មួយ​ដើម្បី​បង្ហាញ​ថា​មិនមែន​តែ​ប្រទេស​រីកចម្រើន​ទេ​ទើប​សង់​អគារ​ខ្ពស់​បាន​កម្ពុជា​ក៏​មាន​សមត្ថភាព​សាងសង់​បាន​ខ្ពស់​ផង​ដែរ​»​។

លោក​បន្ត​ថា៖ «​ការ​សាងសង់​អគារ​នេះ​វា​នឹង​ទាក់ទាញ​អ្នក​វិនិយោគ​ក្នុង និង​ក្រៅ​ប្រទេស និង​បង្ហាញ​ពី​បច្ចេកវិទ្យា​ទំនើប​មួយ​ដែល​ខ្មែរ​អាច​ធ្វើ​បាន ប៉ុន្តែ​អ្វី​សំខាន់​អ្នក​វិនិយោគ​ត្រូវ​គិត​ពី​គុណភាព សោភ័ណភាព​ព្រោះ​អគារ​កាន់តែ​ខ្ពស់​ការ​រៀបចំ​គ្រឿង​ផ្គុំ​កាន់​តែ​ល្អ​កាន់តែ​ប្រសើរ​»​។

លោក​បន្ត​ថា៖ «​អ្វី​សំខាន់​គឺ​សុវត្ថិភាព​ទាំង​ពេល​សាងសង់​ពេល​កំពុង​សាងសង់ និង​ពេល​បញ្ចប់​ការ​សាងសង់​»៕

0

Comments

Please, login or register to post a comment

ព័ត៌មានពាក់ព័ន្ធ