Search form

Login - Register | FOLLOW US ON

Logo of Phnom Penh Post newspaper Phnom Penh Post - អាគារ Gold Tower42 គ្រោង​ចាប់​ផ្តើម​សាងសង់​ទ្បើង​វិញ​នៅ​ដើម​ឆ្នាំ​ក្រោយ?

គម្រោង​អគារ​លំនៅដ្ឋាន និង​ពាណិជ្ជកម្ម Gold Tower42។
គម្រោង​អគារ​លំនៅដ្ឋាន និង​ពាណិជ្ជកម្ម Gold Tower42។

អាគារ Gold Tower42 គ្រោង​ចាប់​ផ្តើម​សាងសង់​ទ្បើង​វិញ​នៅ​ដើម​ឆ្នាំ​ក្រោយ?

អាគារ​លំនៅដ្ឋាន និង​ពាណិជ្ជកម្ម Gold Tower42 ដែល​បាន​​ផ្អាក​ការ​សាងសង់​ទុក​ចោល​រាប់​ឆ្នាំ​មក​ហើយ​គ្រោង​នឹង​ចាប់ផ្តើម​បន្ត​សាងសង់​ទ្បើង​វិញ​នៅ​ខែ​កុម្ភៈ​ឆ្នាំ​ ២០១៦ និង​គ្រោង​បញ្ចប់​ជា​ផ្លូវការ​នៅ​ដើម​ឆ្នាំ​ ២០១៨​។

យោង​តាម​ការ​ផ្សព្វផ្សាយ​តាម​គេហទំព័រ Facebook របស់​ក្រុម​ការងារ​ព័ត៌មាន និង​ប្រតិកម្ម​រហ័ស​នៃ​ក្រសួង​រៀបចំ​ដែនដី​នគរូបនីយកម្ម និង​សំណង់​បាន​ឲ្យ​ដឹង​​កាលពី​ថ្ងៃ​អង្គារ​ថា​លោក CHOI JONG HAE អគ្គនាយក និង​ជា​ប្រធាន​ក្រុម​ប្រឹក្សា​ភិបាល​នៃ​ក្រុមហ៊ុន YONWOO CAMBODIA Co., Ltd. ដែល​ជា​ម្ចាស់​គម្រោង​មជ្ឈមណ្ឌល​ពាណិជ្ជកម្ម Gold Tower42 បាន​ផ្ញើរ​លិខិត​ផ្លូវការ​ជា​លើក​ទី​ ២ មក​កាន់​ក្រសួង​​រៀបចំ​ដែនដី​នគរូបនីយកម្ម និង​សំណង់​ដើម្បី​ស្នើសុំ​បន្ត​សាងសង់​អគារ​នេះ​ទ្បើង​វិញ​នៅ​ក្នុង​ខែ​កុម្ភៈ​ឆ្នាំ​ ២០១៦ ​។

បើ​ទោះ​ជា​យ៉ាង​ណា​ម្ចាស់​គម្រោង​នេះ​ធ្លាប់​បាន​ពន្យា​ពេល​ម្តង​ហើយ​ម្តង​ទៀត​ក្នុង​ការ​ចាប់ផ្តើម​សាងសង់​​អគារ​នេះ​បើ​ទោះ​ជា​ពួកគេ​បាន​ជូន​ដំណឹង​អំពី​ការ​ចាប់ផ្តើម​សាងសង់​គម្រោង​នេះ​ជា​ថ្មី​ជា​ច្រើន​ដង​ក៏ដោយ​។

អគារ Gold Tower42 បាន​ពន្យា​ពេល​សាងសង់​ក្រោយ​ពេល​វិបត្តិ​សេដ្ឋកិច្ច និង​ហិរញ្ញវត្ថុ​សាកល​កាលពី​ឆ្នាំ​ ២០០៨ និង​បាន​ចាប់ផ្តើម​សាងសង់​ទ្បើង​វិញ​នៅ​ឆ្នាំ​ ២០១០ ហើយ​ពន្យា​ពេល​ម្តង​ទៀត​នៅ​ឆ្នាំ​ ២០១១​។

លោក ទ្បៅ ទិព្វសីហា អគ្គនាយករង​នៃ​អគ្គនាយកដ្ឋាន​សំណង់​ក្រសួង​រៀបចំ​ដែនដី​នគរូបនីយកម្ម និង​សំណង់​បាន​ថ្លែង​យ៉ាង​ខ្លី​ថា «​ក្រសួង​ពិត​ជា​បាន​ទទួល​លិខិត​ពី​ក្រុមហ៊ុន​ដែល​ជូន​ដំណឹង​អំពី​ការ​ចាប់ផ្តើម​បន្ត​ការ​សាងសង់​គម្រោង​នេះ​ទ្បើង​វិញ​មែន​»​។

លោក ស៊ឹង ប៊ុណ្ណា អគ្គនាយក​ក្រុមហ៊ុន​ប៊ុណ្ណា​រៀលធី​គ្រុប​បាន​ថ្លែង​ថា​ប្រសិន​ជា​គម្រោង​នេះ​ចាប់ផ្តើម​ទ្បើង​វិញ​យើង​សូម​អបអរសាទរ​សម្រាប់​ទីផ្សារ​កម្ពុជា និង​អបអរសាទរ​ទាំង​រដ្ឋាភិបាល និង​វិស័យ​ឯកជន​ព្រោះ​គម្រោង​នេះ​វា​ជា​ចំណុច​ដែល​ផ្តល់​ផល​ប៉ះពាល់​ទាំង​រូបភាព​សេដ្ឋកិច្ច និង​ការទូត​។

លោក​បន្ត​ថា​ សម្រាប់​កាលៈទេសៈ​នេះ​យើង​មិន​ទាន់​ដឹង​​ថា​ម្ចាស់​គម្រោង​នេះ​នឹង​សាងសង់​បន្ត​ទ្បើង​ទៅ​លើ​បន្ថែម​ទៀត ឬ​ក៏​បញ្ចប់​នៅ​ត្រឹម​កម្ពស់​នេះ​នៅ​ទ្បើយ​ទេ​។​

លោក​បន្ត​ថា «​គាត់​ចាប់​ផ្តើម​ទ្បើង​វិញ​នា​ពេល​នេះ​វា​ជា​ការ​ចាប់ផ្តើម​ត្រូវ​ចំ​ពេលវេលា​ព្រោះ​វា​ជា​ពេល​ដែល​គ្រឿង​សំណង់​កំពុង​ចុះ​ថោក​ដោយសារ​ប្រទេស​ផលិត​សម្ភារៈ​សំណង់​មិន​សូវ​មាន​ការ​សាងសង់​ព្រោះ​ការ​ផ្គត់ផ្គង់​លំនៅឋាន​បាន​​លើស​ពី​តម្រូវការ​»​។

លោក​បន្ត​ថា «​ការ​លក់​គម្រោង​នេះ​ទ្បើង​វិញ​ទាមទារ​ឲ្យ​មាន​ការ​​លួង​ចិត្ត​អតិថិជន​ហើយ​ម្ចាស់​គម្រោង​គួរ​តែ​សាងសង់​ឲ្យ​បាន​សស្រាក់​សស្រាំ​សិន​ទើប​ចាប់ផ្តើម​និយាយ​ពី​ការ​លក់​ជា​ការ​ល្អ​ប៉ុន្តែ​បើ​ចាប់​ផ្តើម​លក់​ពេល​នេះ​មិន​ទាន់​ត្រូវ​ពេលវេលា​នោះ​ទេ​»៕

0

Comments

Please, login or register to post a comment

ព័ត៌មានពាក់ព័ន្ធ