Search form

Login - Register | FOLLOW US ON

Logo of Phnom Penh Post newspaper Phnom Penh Post - អ្នក​អភិវឌ្ឍន៍​ខុន​ដូ​ប្រណីត​ សម្រាប់​ទីផ្សារ​អចលនទ្រព្យ​កម្រិត​ខ្ពស់​ ប្រាប់​ថា «​នៅ​តែ​មាន​ហាង​ឆេង​ល្អ​»

Content image - Phnom Penh Post
លោក​ឧកញ៉ា សៀ រិទ្ធី ប្រធាន​ក្រុម​ហ៊ុន WorldBridge Land Cambodia ដែល​ជា​អ្នក​អភិវឌ្ឍន៍​គម្រោង​ខុនដូ​ប្រណីត The Bridge និង​ The Peak។ មឿន ញាណ

អ្នក​អភិវឌ្ឍន៍​ខុន​ដូ​ប្រណីត​ សម្រាប់​ទីផ្សារ​អចលនទ្រព្យ​កម្រិត​ខ្ពស់​ ប្រាប់​ថា «​នៅ​តែ​មាន​ហាង​ឆេង​ល្អ​»

ខណៈ​ពេល​ដែល​កម្រិត​ពពុះ​នៅក្នុង​ទីផ្សារ​អចលនទ្រព្យ​កម្ពុជា កំពុង​លេចចេញ​ជា​សញ្ញា​ពុំសូវ​ល្អខ្លះៗ​នោះលោក​ឧកញ៉ា សៀ រិទ្ធី ជា​សហ​ម្ចាស់​គម្រោង​អភិវឌ្ឍន៍​ខុន​ដូ​ប្រណីត នៅ​រាជធានី​ភ្នំពេញ បានបង្ហាញ​ភាព​វិជ្ជមាន​នៅក្នុង​ទីផ្សារ​កម្រិត​ខ្ពស់​ថា មាន​អតិថិជន​កក់ និង​ទិញ​ជាធម្មតា​ជា​ប្រចាំ​ក្នុង​អំឡុង​ត្រីមាស​ទី​១ ដើម​ឆ្នាំ​នេះ​។ ខាងក្រោម​នេះ​គឺជា​បទសម្ភាស​ដាច់​ដោយ​ឡែក​រវាង​លោក​ឧកញ៉ា សៀ រិទ្ធី ជាមួយ​លោក មឿ​ន ញាណ ការី​និពន្ធ ប៉ុស្តិ៍​អចលនទ្រព្យ កាលពី​រសៀល​ថ្ងៃ​អង្គារ​នា​ដើម​សប្តាហ៍​នេះ​។

រហូត​មក​ដល់​ដំណាក់កាល​ស្ទើរតែ​ឆ្លង​ផុត​ត្រីមាស​ទី​១ ឆ្នាំ​២០១៧​នេះ នៅតែមាន​លេចឮ​ការ​រអ៊ូរទាំ​ខ្លះៗ​ថា ដំណើរ​ការលក់​ផ្ទះ​សម្បែង​ជាទូទៅ​មាន​សភាព​ទ្រឹង ឬក៏​ថមថយ​បរិមាណ​លក់​ចេញ​បាន​តិចជាង​កាលពី​រយៈពេល​ដូចគ្នា​ធៀប​ទៅនឹង​ឆ្នាំមុន​។ តើ​លោក​ឧកញ៉ា​យល់​ឃើញ​យ៉ាង​ណា​ដែរ​ចំពោះ​ស្ថានភាព​បែប​នេះ​?

​ជាទូទៅ​បើ​និយាយ​អំពី​ទីផ្សារ​អចលនទ្រព្យ យើង​គួរ​តែ​បែង​ចែក ឬ​ញែក​វា​ជា​ពីរ​ឲ្យ​ដាច់ពីគ្នា។ គឺ​មួយ​ជា​គម្រោង​សម្រាប់​ទីផ្សារ​ក្នុងស្រុក និង​មួយ​ទៀត​គឺជា​គម្រោង​សម្រាប់​ទីផ្សារសម្រាប់​អ្នក​​ក្រៅប្រទេស​។

ចំពោះ​ទីផ្សារ​ក្នុង​ស្រុក​ទៀតសោតយើង​ក៏​ត្រូវតែ​ញែក​ជា​ពីរ​ផងដែរ ១-​គឺ​ទីផ្សារ​កម្រិត​មធ្យម​ទៅ​កម្រិត​ទាប​ជាង​មធ្យម ដែល​ផ្តោតទៅលើ​អតិថិជន​លោក​មាន​ប្រាក់ចំណូល​លើស​ពី​កម្រិត​មធ្យម​បន្តិច និង​ចុះ​ដល់​អ្នកមាន​ប្រាក់ចំណូល​ទាប​ជាង​មធ្យម​។ និង ​២- គឺ​ទីផ្សារ​កម្រិត​ខ្ពស់ គឺ​សំដៅលើ​អចលនទ្រព្យ​ជា​ខុន​ដូ​ល្អ​ប្រណីតៗ​មាន​តម្លៃ​ខ្ពស់ ហើយ​វា​គឺជា​គោលដៅ​ទីផ្សារ​អតិថិជន​ដែល​ពួកលោក​មាន​កម្រិតជីវភាព​ធូរធា​តែម្តង​។

ដោយ​ឡែក​ចំពោះ​ក្រុមហ៊ុន BridgeLand របស់​លោក​ឧកញ៉ា តើ​មាន​ការ​ប្រឈម​អ្វី​ខ្លះ​ដែរ​ឬ​ប្រែប្រួល​អ្វីខ្លះ​ទេ​?

ចំពោះ​ការ​វិនិយោគ​នៅ​ក្នុង​គម្រោង The Bridge និង The Peak នៃ​ក្រុមហ៊ុន BridgeLand របស់​យើង ដែល​ជា​គម្រោង​សំដៅ​ទៅ​លើ​ទីផ្សារ​កម្រិត​ខ្ពស់ គឺ​សម្រាប់​អតិថិជន​លោក​មាន​ជីវភាព​ធូរធា ដូច្នេះ​យើង​ពុំ​មាន​ជួប​បញ្ហា​ធ្លាក់​ចុះ​នៃ​ចំនួន​លក់​ចេញ​នោះ​ទេ​នៅ​ក្នុង​អំឡុង​ពេល ៣​ខែ​ដើម​ឆ្នាំ​២០១៧​នេះ​។ យើង​ដំណើរការ​លក់​បាន​ជា​ធម្មតា និង​នៅតែមាន​ចំណាប់​អារម្មណ៍​ខ្ពស់។

និយាយ​ឲ្យ​ខ្លី​ទៅ គម្រោង​របស់ BridgeLand នៅ​តែ​ជាទី​ចាប់​អារម្មណ៍​ខ្ពស់​ពី​អតិថិជន ព្រោះ​យើង​បាន​ផ្ចិតផ្ចង់​គម្រោង​របស់​យើង​សម្រាប់​ទីផ្សារ​កម្រិត​ខ្ពស់​ក្នុងស្រុក ជា​ពិសេស​សម្រាប់​អតិថិជន​ដែល​លោក​មាន​កម្រិត​ជីវភាព​ធូរធា​។

ម្យ៉ាងទៀត​ដោយ​សារ​គម្រោង​ទី​១ របស់​យើង គឺ The Bridge បាន​សាងសង់​រួច​រាល់​តាម​កាល​កំណត់​ត្រឹមត្រូវ​ផងដូច្នេះ​ទំនងជា​អតិថិជន​លោក​កាន់​តែ​មាន​ទំនុក​ចិត្ត​ខ្ពស់​ចំពោះ​ក្រុមហ៊ុន​របស់​យើង​បន្ថែម​លើស​ពីនេះ​ទៀត គម្រោង​របស់​យើង​ដែល​មាន​រូបខ្ញុំ​បាទ​ផ្ទាល់​ធ្វើការ​សហការ​វិនិយោគ​ជាមួយ​ដៃគូ​មកពី​សិង្ហ​បុរី និង​គម្រោង​របស់​យើង​ក៏​ស្ថិតនៅលើ​ទីតាំង​ល្អ​។​

ខណៈ​ពេល​ដែល​ការ​បោះ​ឆ្នោត​​ឃុំ-សង្កាត់ បាន​កាន់​តែ​ខិត​ជិត​មកដល់ តើ​លោក​ឧកញ៉ា អាច​ប្រមើល​ឃើញ​អំពី​ទីផ្សារ​អចលនទ្រព្យ​នៅ​កម្ពុជា​នឹង​វិវត្ត​ទៅ​ជា​យ៉ាង​ណា​?

នឹង​ពុំ​មាន​បញ្ហា​អ្វី​ទេ​! ទីផ្សារ​អចលនទ្រព្យ​វា​បន្ត​ដំណើរការ​ដោយ​ភាព​វិជ្ជមាន​ទៅមុខ​ជានិច្ច ព្រោះនេះ​គ្រាន់តែ​ជាការ​បោះឆ្នោត​នៅ​ថ្នាក់​ក្រោម​ជាតិ​តែ​ប៉ុណ្ណោះ វា​អត់​មាន​អ្វី​ប្រែប្រួល​ប្លែក​​នោះ​ទេ​។

បើ​យើង​ពិនិត្យ​ទៅលើ​គម្រោង​វិនិយោគ​ផ្នែក​អចលនទ្រព្យ​ធំៗ គឺ​ចាប់ពី​ទំហំ​ទឹក​ប្រាក់​លើសពី​រយ​លាន​​ឡើង​ទៅ​នៅ​កម្ពុជា គឺ​មាន​ប្រមាណ​៦០​ភាគរយ ជាការ​វិនិយោគ​មកពី​បរទេស ជា​ពិសេស​មក​ពី​ចិន​តែ​ម្តង ហើយ​ភាគច្រើន​នៃ​គម្រោង​របស់​ពួក​គាត់​ទាំងនោះ គឺ​គាត់​បាន​សិក្សា​ទីផ្សារ​យ៉ាង​ច្បាស់​លាស់ និង​កំណត់​គោលដៅ​របស់​ខ្លួន​រួច​ទៅ​ហើយ ពួក​គាត់​ក៏​មាន​ទាំង​អតិថិជន​មក​ពី​បរទេស​នៅ​ក្នុង​ដៃ​សឹងតែ​គ្រប់​តម្រូវការ​តែម្តង​។

Content image - Phnom Penh Post
(គ្រោង​អគារ​ពណ៌​បៃតង) ជា​បណ្តុំ​សំណង់​នៃ​គម្រោង​អភិវឌ្ឍន៍​ខុនដូ​ប្រណីត The Bridge។ មឿន ញាណ

​ឧទាហរណ៍ គ្រាន់តែ​ទីផ្សារ​សម្រាប់​អ្នក​ជំនួញ​ខ្លះៗ​ពី​ប្រទេស​ចិន​តែមួយ​ខេត្ត​តែប៉ុណ្ណោះគឺ​គម្រោង​ទាំងអស់​នៅ​កម្ពុជា​យើង​មិន​អាច​ឆ្លើយ​តប​បាន​ផង​។ ដូច្នេះ​គម្រោង​អភិវឌ្ឍន៍​ទាំងនេះ​កាន់​តែ​ពុំ​មាន​អ្វី​គួរ​ឲ្យ​បារម្ភ​នោះទេ​។

បើ​ពិនិត្យ​លើ​ដំណើរការ​អភិវឌ្ឍ​​ផ្នែក​គម្រោង​សាងសង់​នីមួយៗ វា​ត្រូវការ​រយៈពេល ៣​ទៅ​៥​ឆ្នាំ ទើប​យើង​អាច​បញ្ចប់​គម្រោង​នីមួយៗ​បាន​។ ការសាងសង់​វា​បាន​ចាប់​ផ្តើម​ជា​ច្រើន​ឆ្នាំ​មក​ហើយ ដូច្នេះ​សភាព​រង្វើល​បន្តិច​នៃ​ការ​សម្រុក​នៅ​តាម​ការដ្ឋាន​សាងសង់ ដោយ​ស្ទួន​នឹង​វដ្ត​នៃ​ការ​បោះឆ្នោត​ឃុំ​-​សង្កាត់​ផង​នេះ វា​ពុំ​ចោទ​ជា​បញ្ហា​ឡើយ​។ ម្យ៉ាង​ទៀត​​អ្នក​វិនិយោគ​ក៏​គួរតែ​អាច​យល់​ដឹង​អំពី​ការ​បែងចែក​ការ​អភិវឌ្ឍ​ (category of development according to the markets) របស់ខ្លួន​ឲ្យ​ស្រប​ទៅ​តាម​​ទីផ្សារ​ដែរ​។​

ទន្ទឹម​នឹង​គម្រោង​ជាច្រើន​ដែល​​មាន​នៅក្នុង​ទីផ្សារ​អចលនទ្រព្យ​​នៅ​កម្ពុជា​នាពេល​បច្ចុប្បន្ន​នេះ​ស្រាប់ តើ​លោក​ឧកញ៉ា​មាន​បាន​​ដឹង​ពី​តម្រុយ​អំពី​គម្រោង​វិនិយោគទុន​ថ្មីៗ​ណា​អាច​នឹង​ហក់​ចូលមកក្នុង​ទីផ្សារ​កម្ពុជា​យើង​នាអំឡុង​ពេលនេះ​ទៀត​ឬទេ​?

​ក្នុង​ត្រីមាស​ទី​១​នា​ដើម​ឆ្នាំនេះ បើ​ក្រឡេក​មើល​ឲ្យ​ឆ្ងាយ​ផុតពី​ទីក្រុង​ភ្នំពេញ​យើង​ឃើញ​មាន​គម្រោង​វិនិយោគ​ថ្មីៗ​ពីរ​បី​គម្រោង គេ​បាន​ចាប់​ផ្តើម​បើក​គម្រោង​របស់​ខ្លួន​នៅឯ​ក្រុង​ព្រះសីហនុ ជា​តំបន់​មាត់​​សមុទ្រ​ដ៏​ស្រស់ស្អាត​របស់​កម្ពុជា​​យើង​រួចជាស្រេច​ទៅ​ហើយ។

ក្រុម​អ្នក​វិនិយោគទុន​បរទេស​គេ​មាន​បទពិសោធ​ច្រើន ជា​ពិសេស​ពាណិជ្ជករ​ចិន ពួក​គាត់​ឆ្លាត​ណាស់​។ ពួកគេ​ដឹងថា អតិថិ​ជន​របស់​ខ្លួន​មាន​លំនៅឋាន​ប្រណីត​នៅក្នុង​ទីក្រុង​រួច​ទៅ​ហើយ​ដូច្នេះ​ដើម្បី​បាន​ប្រយោជន៍​កាន់​តែច្រើន​ផង និង​ផ្តល់​ភាព​ងាយ​ស្រួល​ដល់​អតិថិ​ជន​ទាំងនោះ​ផង ក្រុម​អ្នក​វិនិយោគ​ត្រូវតែ​បង្កើត​គម្រោង​ថ្មីៗ​នៅ​តាម​តំបន់​លំហែកាយ​សម្រាប់​ផ្គាប់ចិត្ត​អតិថិជន​របស់​ខ្លួន នោះ​ហើយ​ដែល​ក្រុង​ព្រះ​សីហនុ នឹង​ក្លាយជា​គោលដៅ​នៃ​ទីផ្សារ​អចលន​ទ្រព្យ​គួរ​ឲ្យ​ទាក់ទាញ​នៅ​តំបន់​ឆ្នេរ​កម្ពុជា​!

ទន្ទឹម​នឹង​នេះ​រដ្ឋាភិបាលក៏​បាន​និងកំពុង​ត្រួសត្រាយ​បង្ហាញ​ផ្លូវ​ដល់​ក្រុម​វិនិយោគិន តាមរយៈ​គម្រោង​អភិវឌ្ឍន៍​ហេដ្ឋា​រចនា​សម្ព័ន្ធ​ផ្លូវថ្នល់ ទឹក ភ្លើង និង​បណ្តាញ​ទំនាក់​ទំនង​ផ្សេងៗ​ទៀត​ទៅកាន់​តំបន់​សំខាន់ ដែល​កត្តា​ទាំងនោះ​ហើយ​បានធ្វើ​ឲ្យ​មាន​ចំណាប់​អារម្មណ៍​ខ្ពស់​ពី​អ្នក​វិនិយោគទុន​។​

ជា​ទូទៅ​នៅក្នុង​ឆ្នាំ​២០១៧​នេះ តើ​លោក​យល់​យ៉ាងណា​អំពី​ស្ថានភាព​ទីផ្សារ​អចលនទ្រព្យ​កម្ពុជា​?

ស្ថានភាព​ទីផ្សារ​អចលនទ្រព្យ​របស់​កម្ពុជា​យើង​កំពុង​ធ្វើ​វិវត្ត​ទៅ​មុខ​ជា​វិជ្ជមាន​។ ដូច​ខ្ញុំ​បាន​បញ្ជាក់​ពី​ខាង​ដើម​ហើយ​ថា ដំណើរ​ការ ឬ​វដ្ត​នៃ​ការ​អភិវឌ្ឍ​គម្រោង​សំណង់​ធំៗ​អាច​នឹងត្រូវ​ការ​រយៈ​ពេល​៣-៥​ឆ្នាំ ដូច្នេះ​បើ​គិតពី​រយៈពេល​វែង​បន្តិច​នោះ កម្ពុជា​យើង​កំពុង​មាន​ចរន្ត​និរន្តរ​ភាព​នៅ​ក្នុង​ទីផ្សារ​អចលនទ្រព្យ​របស់​ខ្លួន​។​

តាម​អ្វី​ដែល​ខ្ញុំ​ដឹង នៅ​អំឡុង​ត្រីមាស​ទី​២ ខាង​មុខ​នេះ នឹង​មាន​គម្រោង​វិនិយោគ​ធំៗ​ចំនួន​៣ដែល​មាន​ទឹកប្រាក់​រាប់​រយ​​លាន​ដុល្លារ​ឡើង​ទៅ គម្រោង​ទាំងនេះ​នឹង​ចាប់ផ្តើម​ហក់​ចូល​ទៅក្នុង​ទីផ្សារ​អចលនទ្រព្យ​កម្ពុជា​បន្ថែម​ទៀត​។ ខ្ញុំ​គ្រាន់តែ​បង្ហើប​ថា គម្រោង​​ទី​១ មកពី​ហុងកុង ទី​២ មកពី​ចិន (​ចិនតៃវ៉ាន់​) និង​ទី​៣ ជា​គម្រោង​ចម្រុះ​ចិន និង​ម៉ាឡេស៊ី។ គម្រោង​ពីរ​ក្នុង​ចំណោម​នេះ ក៏មាន​វិនិយោគិន​ក្នុង​ស្រុក​ចូល​រួម​ផង​ដែរ​៕

0

Comments

Please, login or register to post a comment

ព័ត៌មានពាក់ព័ន្ធ