Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧកញ៉ា សៀ រិទ្ឋី ចាប់ផ្តើម​វិនិយោគ​គម្រោង ​វីឡា​ប្រណីត​នៅ​តាម​ផ្លូវជាតិ​លេខ​ ១

Content image - Phnom Penh Post
លោក​ឧកញ៉ា សៀ រិទ្ធី អគ្គនាយក​ក្រុមហ៊ុន World Bridge Land​។ រូបថត សហការី

ឧកញ៉ា សៀ រិទ្ឋី ចាប់ផ្តើម​វិនិយោគ​គម្រោង ​វីឡា​ប្រណីត​នៅ​តាម​ផ្លូវជាតិ​លេខ​ ១

ស្រប​ពេល​ដែល​ស្ថានភាព​ទីផ្សារ​កាន់តែ​មាន​លំនឹង និង​បង្ហាញ​ភាព​ល្អ​ប្រសើរ​ឡើង​ក្នុង​នាម​វិនិយោគិន​ដែល​តែងតែ​មាន​សុទិដ្ឋិនិយម​ក្នុង​ការ​អភិវឌ្ឍ​វិស័យ​អចលនទ្រព្យ​លោក​ឧកញ៉ា សៀ រិទ្ឋី បាន​និង​កំពុង​ត្រៀម​ចាប់ផ្តើម​ការ​វិនិយោគ​គម្រោង វីឡា​ប្រណីត​ថ្មី​មួយ​ដែល​ស្ថិត​នៅ​តាម​បណ្តោយ​ផ្លូវ​ជាតិ​លេខ​ ១​។

អគ្គនាយក​ក្រុមហ៊ុន World Bridge Land រូប​នេះ​បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ថ្ងៃ​ចន្ទ​ថា​គម្រោង​ថ្មី​នេះ​នឹង​ចាប់ផ្តើម​សាងសង់​នៅ​លើ​ផ្ទៃដី​ ៣,៦ ​ហិកតា​ដោយ​មាន​ផ្ទះ​សរុប​ចំនួន​ ២០៤ ​ផ្ទះ និង​ចាប់ផ្តើម​ប្រកាស​លក់​នៅ​ចុង​ខែ​កក្កដា​នេះ​ក្នុង​តម្លៃ​ចាប់ពី​ជាង​ ៣០ ​ម៉ឺន​ដុល្លារ​អាមេរិក​ឡើង​ទៅ​។

ស្ថិត​ក្រោម​គម្រោង The Palm និង​កិច្ចសហការ​វិនិយោគរ​វាង​ក្រុមហ៊ុន World Birdge Land ជាមួយ​ក្រុមហ៊ុន Oxley Holding ដែល​មាន​មូលដ្ឋាន​នៅ​ប្រទេស​សិង្ហបុរី​លោក​ឧកញ៉ា​បន្ត​ថា​គម្រោង​នេះ​ជា​គម្រោង​ដែល​មាន​ទស្សនទាន​នៃ​ការ​អភិវឌ្ឍ​ប្លែក​ពី​គេ​ដែល​ក្នុង​ទីតាំង​គម្រោង​នេះ​នឹង​មាន​អាង​ហែល​ទឹក​កន្លែង​ជិះ​កាណូត​អូប័រ សួន​កម្សាន្ត ឆ្នេរ​សិប្បនិម្មិត (man made beach) និង​សេវាកម្ម​ជាច្រើន​ទៀត​។

លោក​បន្ត​ថា៖ «​លោក​អ្នក​ដឹង​ចិត្ត​ខ្ញុំ​ហើយ បើ​ធ្វើ​អ្វី​មួយ​មិន​ជោគជ័យ ខ្ញុំ​មិន​ធ្វើ​នោះ​ទេ​»​។

លោក​បន្ត​ថា៖ «​តំបន់​អភិវឌ្ឍន៍​នេះ​ស្ថិត​នៅ​តាម​បណ្តោយ​ផ្លូវជាតិ​លេខ​ ១ ជា​តំបន់​ល្អ​ប្រសើរ​ណាស់​សម្រាប់​ការ​រស់នៅ បន្ទាប់ពី​ផ្លូវជាតិ​នេះ​បាន​បញ្ចប់​ការ​សាងសង់​»​។

នៅ​ពេល​សួរ​ពី​ទំហំ​នៃ​ការវិនិយោគ​លោក​ឧកញ៉ា សៀ រិទ្ឋី មិន​បញ្ជាក់​ឲ្យ​ដឹង​ទេ ប៉ុន្តែ​លោក​បង្ហើប​ថា​គម្រោង​នេះ​អាច​នឹង​ចំណាយ​ប្រាក់​ជាង​ ៣០ ​លាន​ដុល្លារ​អាមេរិក​។

លោក​ឧកញ៉ា សៀ រិទ្ឋី បាន​ឲ្យ​ដឹង​ថា៖ «​ប្រសិនជា​អតិថិជន​ចង់​ទិញ​លំនៅឋាន​បែប​រីសត​ (resort) ​សូម​រង់​ចាំមើល​គម្រោង​នេះ​ព្រោះ​វា​ជា​គម្រោង​ដែល​មាន​ទស្សនទាន​នៃ​ការ​អភិវឌ្ឍ​បែប​ថ្មី និង​ខុស​ប្លែក​ពី​គេ​»​។

តាម​ប្រសាសន៍​របស់​លោក ច្រឹក សុខនីម អគ្គនាយក​ក្រុមហ៊ុន Century21 Mekong បាន​ថ្លែង​ថា​តំបន់​ផ្លូវជាតិ​លេខ​ ១ ជា​តំបន់​ល្អ​សម្រាប់​ការ​រស់នៅ និង​បាន​ក្លាយ​ជា​តំបន់​ពួក​អភិជន​និយម​ចូលចិត្ត​ច្រើន​។ ជាក់ស្តែង​បុរីប៉េងហួត ដែល​មាន​ទីតាំង​នៅ​តាម​បណ្តោយ​ផ្លួវ​នេះ​គឺ​ប្រមូលផ្តុំ​ដោយ​ក្រុម​អភិជន​រស់នៅ នាពេល​បច្ចុប្បន្ន​នេះ​។ ដូច្នេះ​គម្រោង​ថ្មី​នេះ​នឹង​ទទួល​បាន​ជោគជ័យ​។

លោក​បាន​បន្ថែម​ថា​ហើយ​ប្រសិន​ជា​ផ្ទះ​ក្នុង​គម្រោង The Palm ជា​ប្រភេទ​វីឡា​ទោល​លក់​ក្នុង​តម្លៃ​បែប​នេះ​មិន​ថ្លៃ​នោះ​ទេ ប៉ុន្តែ​ប្រសិន​គម្រោង​នេះ​ជា​ប្រភេទ​វីឡា​ភ្លោះ​ហាក់​ដូចជា​ថ្លៃ​បន្តិច​។

លោក​បាន​បន្ត​ថា៖ «​ការ​លក់​លំនៅឋាន​បាន​ចាប់ផ្តើម​ងើប​ឡើង​វិញ​ហើយ​ដោយ​ទីផ្សារ​កំពុង​មាន​ភាព​អំណោយផល​សម្រាប់​ការ​វិនិយោគ​»​។

ប្រធាន​សមាគម​អ្នក​អភិវឌ្ឍន៍​លំនៅឋាន​កម្ពុជា​លោក​ឧកញ៉ា លី ហួរ បាន​ថ្លែង​ថា​ស្ថានភាព​នៃ​ការ​លក់​បុរី​ចាប់​ផ្តើម​ប្រសើរ​ឡើង​ហើយ​ដោយ​បុរី​ជាច្រើន​បាន​លក់​យ៉ាង​ជោគជ័យ​ក្នុង​រយៈពេល​ខ្លី​ចុង​ក្រោយ​នេះ​ហើយ​តំបន់​ផ្លូវជាតិ​លេខ​ ១ ក៏​ជា​តំបន់​ល្អ​សម្រាប់​អភិវឌ្ឍ​។

លោក​បាន​ប្រាប់​ថា​ការ​វិនិយោគ​បុរី​សម្រាប់​ប្រជាជន​មាន​ជីវភាព​មធ្យម និង​ក្រោម​មធ្យម​លក់​ដាច់​ល្អ ប៉ុន្តែ​បើ​ផ្ទះ​មាន​តម្លៃ​ថ្លៃ​សម្រាប់​អ្នក​មាន​ជីវភាព​ធូរធារ​លក់​បាន ប៉ុន្តែ​ក្នុង​ល្បឿន​យឺតៗ​។

លោក​បន្ត​ថា​៖ «​ការ​លក់​លំនៅឋាន​ល្អ​ឡើង​វិញ​ដោយសារ​ប្រជាពលរដ្ឋ​មាន​ការ​យល់​ដឹង​ច្រើន​ជាង​មុន​ពួកគេ​មិន​បារម្ភ​ពី​ការ​បោះឆ្នោត​ទៀត​ទេ គាត់​ចាស់ទុំ​ហើយ​លែង​ឈ្លោះ​គ្នា លែង​វ៉ៃ​គ្នា​ពេល​ហែ​បក្ស​នេះ​ជា​រឿង​ល្អ​សម្រាប់​ទាំងអស់​គ្នា​»៕

0

Comments

Please, login or register to post a comment

ព័ត៌មានពាក់ព័ន្ធ