Search form

Login - Register | FOLLOW US ON

Logo of Phnom Penh Post newspaper Phnom Penh Post - YCDC ពង្រាង​គោល​ការណ៍​ថ្មី​សម្រាប់​ប័ណ្ណ​អនុញ្ញាត​សាង​សង់

Content image - Phnom Penh Post
រូប​ភាព​ចំណាំង​ពី​ទឹក​ដោយ​មាន​កម្មករ​សំណង់​កំពុង​បំពេញ​ការងារ​របស់​ខ្លួន​នៅ​ការ​ដ្ឋាន​សំណង់​មួយ​ក្នុង​ក្រុង Yangon។ AUNG MYIN YE ZAW

YCDC ពង្រាង​គោល​ការណ៍​ថ្មី​សម្រាប់​ប័ណ្ណ​អនុញ្ញាត​សាង​សង់

គណៈកម្មាធិការ​អភិវឌ្ឍ​ទីក្រុង Yangon (YCDC) បាន​បញ្ចប់​ការ​ធ្វើ​វិសោធនកម្ម​គោល​ការណ៍​លិខិត​អនុញ្ញាត​សាងសង់ បន្ទាប់​ពី​បាន​បញ្ចប់​ការ​ត្រួត​ពិនិត្យ​ឡើង​វិញ​នូវ​គម្រោង​អគារ​ខ្ពស់ៗ​នៅ​ក្នុង​ទីក្រុង ដែល​ខុស​ពី​គោល​ការណ៍ ហើយ​ត្រូវ​កែ​ប្រែ​ការ​រចនា​របស់​ខ្លួន​។ នេះ​បើ​តាម​សម្តី​របស់​លេខាធិការ​របស់​គណៈ​កម្មធិការ​កាល​ពី​ដើម​សប្តាហ៍​នេះ​។

អ្នក​នាង Daw Hlaing Maw Oo បាន​ឲ្យ​ដឹង​ថា គោលការណ៍​ថ្មី​នេះ​ត្រូវ​បាន​ចែក​រំលែក​ជាមួយ​នឹង​អ្នក​ពាក់ព័ន្ធ​ក្នុង​ឧស្សាហកម្ម​ហើយ​នឹង​ត្រូវ​បាន​ដាក់​ចេញ​ជា​សាធារណៈ​បន្ទាប់​ពី​ត្រូវ​បាន​យល់​ព្រម​ពី​រដ្ឋាភិបាល​តំបន់ Yangon​។

អ្នក​នាង​បាន​បន្ត​ថា​ ៖ «​កាល​ពី​ថ្ងៃទី​៧ ខែ​សីហា ពួក​យើង​បាន​ជួប​ជជែក​គ្នា​ពី​ពង្រាង​គោលការណ៍​ថ្មី​ស្តី​ពី​លិខិត​អនុញ្ញាត​សាងសង់​ជាមួយ​នឹង​សមាគម​ស្ថាបត្យ​ករ​មីយ៉ាន់ម៉ា (AMA) និង​សង្គម​វិស្វករ​មីយ៉ាន់ម៉ា (Myanmar Engineering Society)​។ ពួក​យើង​នឹង​បង្ហាញ​វា​ទៅ​សមាគម​សហគ្រិន​សំណង់​របស់​មីយ៉ាន់ម៉ា (MCEA) មុន​នឹង​ដាក់​បញ្ជូន​ទៅ​រដ្ឋាភិបាល​ក្នុង​តំបន់​។ ប្រសិន​បើ​ពួក​គេ​ទទួល​វា YCDC នឹង​ចាប់​ផ្តើម​អនុវត្ត​»​។

គោល​ការណ៍​សាងសង់​ដែល​មាន​ស្រាប់​ត្រូវ​បាន​ប្រើប្រាស់​ដោយ​មន្ទីរ​វិស្វកម្ម​(​សាងសង់​) ដើម្បី​ផ្តល់​ជា​លិខិត​អនុញ្ញាត​ដល់​វិនិយោគិន​ដែល​នៅ​ក្រោម​រដ្ឋាភិបាល​ចាស់​។

នៅ​ពេល​ដែល​រដ្ឋាភិបាល​បច្ចុប្បន្ន​ចាប់​ផ្តើម​កាន់​អំណាច​កាល​ពី​ខែ​មេសា រដ្ឋាភិបាល​ថ្មី ក៏​បាន​ផ្អាក​ការ​សាងសង់​គម្រោង​អគារ​ខ្ពស់ៗ ដោយ​ទាមទារ​ឲ្យ​មាន​ការ​ត្រួត​ពិនិត្យ​ដើម្បី​ឲ្យ​ដឹង​ថា តើ​វិនិយោគិន​បាន​គោរព​តាម​គោលការណ៍​ដែរ​ឬ​ទេ?

គណៈ​កម្មការ​ត្រួត​ពិនិត្យ​អគារ​សំណង់​ខ្ពស់​របស់ YCDC ក៏បាន​វាយ​តម្លៃ​ទៅ​លើ​ផល​ប៉ះពាល់​របស់​អគារ​ទៅ​លើ​លក្ខណៈ​ចរាចរណ៍ និង​បរិស្ថាន​របស់​ទីក្រុង​ផង​ដែរ។

អ្នក​នាង Daw Hlaing Maw Oo បាន​បន្ថែម​ថា គោល​ការណ៍​ថ្មី​ត្រូវ​ពង្រាង​ឡើង ព្រោះ​គោល​ការណ៍​ដែល​មាន​ស្រាប់​មិន​បាន​ផ្តល់​ជា​ការ​ការពារ​គ្រប់គ្រាន់​នៅ​តំបន់​ទាំង​នេះ​ឡើយ​។

នៅ​ក្រោម​ច្បាប់​របស់ YCDC កាល​ពី​ឆ្នាំ​២០១៣ គណៈកម្មាធិការ​មាន​សិទ្ធិ​អនុម័ត​គោលការណ៍​ថ្មី ប៉ុន្តែ​វា​ទាមទារ​ឲ្យ​មាន​ការ​យល់​ព្រម​ពី​រដ្ឋាភិបាល​តំបន់​របស់​ទីក្រុង Yangon​។

អ្នក​នាង​បន្ត​ថា ​៖ «បន្ថែម​ពី​នេះ​ទៅ​ទៀត ដោយ​ឥឡូវ​នេះ ប្រទេស​នេះ​ជា​ប្រទេស​ប្រជាធិបតេយ្យ យើង​នឹង​បង្ហាញ​វា​ទៅ​សាធារណ​ជន​។ វា​នឹង​ចេញ​ក្នុង​ពេល​ឆាប់ៗ​នេះ​ហើយ​»​។

លោក U San Oo ប្រធាន AMA បាន​ឲ្យ​ដឹង​ថា សមាគម​របស់​លោក​កំពុង​តែ​សហការ​ជាមួយ​នឹង YCDC ដើម្បី​ធ្វើ​វិសោធនកម្ម​គោលការណ៍​នេះ ដែល​ត្រូវ​បាន​ពង្រាង​យោង​ទៅ​តាម​ស្តង់ដារ​អន្តរជាតិ និង​សម្រប​ទៅ​តាម​ស្ថានភាព​របស់ Yangon​។

លោក​បាន​បន្ថែម​ថា​ ៖ «​ពួក​យើង​បាន​បញ្ចប់​ពង្រាង ហើយ​យើង​នឹង​ជជែក​ជាមួយ​នឹង​វិនិយោគិន ហើយ​ចរចា​ជាមួយ​នឹង​ពួក​គេ ដើម្បី​កុំ​ឲ្យ​ពួក​គេ​មាន​បញ្ហា​ជាមួយ​នឹង​គោលការណ៍​ថ្មី​នេះ​។ បន្ទាប់​ពី​នោះ​ពេល​ដែល​រដ្ឋាភិបាល​តំបន់​យល់​ព្រម​លើ​គោលការណ៍​នោះ​ហើយ វា​នឹង​ត្រូវ​បាន​បង្ហាញ​ជា​សាធារណៈ​»។

លោក U Myo Myint សមាជិក​របស់ MCEA បាន​ប្រាប់​ថា លោក​ពុំទាន់​បាន​ដឹង​ពី​គោលការណ៍​ថ្មី​ទាំង​នោះ​ទេ​។

លោក​បន្ត​ថា​ ៖ «​ប្រហែល​ជា​គណៈ​កម្មាធិការ​បាន​ជជែក​ពី​វា​ជា​មួយ​នឹង​ប្រធាន​របស់​យើង​ហើយ​»៕

0

Comments

Please, login or register to post a comment

ព័ត៌មានពាក់ព័ន្ធ