Search form

Login - Register | FOLLOW US ON

Logo of Phnom Penh Post newspaper Phnom Penh Post - «អាន​កាសែត» ជា​ពាក្យ​មន្ត្រី​ប្រើ​ពេល​ធ្លាក់​ស័ក្ដិ

Content image - Phnom Penh Post
លោក ស៊ាង ឡុង អតីត​ប្រធាន​នាយកដ្ឋាន​តម្រង់​ទិស​វិជ្ជាជីវៈ​ក្រសួង​អប់រំ​ដែល​រង​ការ​ចោទប្រកាន់​ពី​បទ​បៀតបៀន​រាងកាយ​នៅ​កូរ៉េ​ខាង​ត្បូង។ រូបថត សហការី

«អាន​កាសែត» ជា​ពាក្យ​មន្ត្រី​ប្រើ​ពេល​ធ្លាក់​ស័ក្ដិ

ភ្នំពេញៈ សៀង កុសល «កំពុង​ដេក» នៅ​ពេល​កំពុង​បំពេញ​ការងារ​នេះ​ជា​ការ​ព្រមាន​របស់​រដ្ឋមន្រ្តី​ក្រសួង​មហាផ្ទៃ​លោក ស ខេង កាលពី​ខែ​មេសា​ឆ្នាំ​មុន​បន្ទាប់​ពី​មាន​បទល្មើស​ជាច្រើន​ដូចជា​អំពើ​ប្លន់ ការ​ចាក់​សម្លាប់ និង​បាញ់​ប្រហារ​ផ្សេងៗ​ដែល​កើត​មាន​ឡើង​នៅ​ក្នុង​ខេត្ត​ព្រះសីហនុ។

ជាង ៩ ខែ​បន្ទាប់​ពី​ការ​តែងតាំង​លោក​ជា​ស្នងការ​ខេត្ត​ព្រះសីហនុ​ លោក កុសល ត្រូវ​បាន​ដក​ចេញ​ពី​តំណែង​ហើយ​ត្រូវ​ «ផ្ទេរ​ទៅ​ក្រសួង» និង​ត្រូវ​បាន​តែងតាំង​ជា​អនុប្រធាន​នគរបាល​ទេសចរណ៍។ វាសនា​របស់​លោក​គឺ​ឆ្ងាយ​ចេញ​ពី​ភាព​ពិសេស។

អ្នក​នៅ​ក្នុង​រដ្ឋាភិបាល និង​អ្នក​សង្កេតការណ៍​ផង​ដែរ​បាន​ថ្លែង​ថា​គណបក្ស​ប្រជាជន​កម្ពុជា​ដែល​បាន​កសាង និង​រក្សា​អំណាច​របស់​ខ្លួន​គឺ​មាន​ប្រព័ន្ធ​របស់​ខ្លួន​ក្នុង​ការ​ចាត់​វិធានការ​ចំពោះ​កំហុស។

មន្រ្តី​សាធារណៈ​កម្រ​ត្រូវ​បាន​ដាក់​ទោស​ទណ្ឌ ឬ​បណ្តេញ​ចេញ​ជា​ផ្លូវការ​បើ​ទោះបី​ជា​ពេល​ខ្លះ​មាន​ការ​ចោទប្រកាន់​ធ្ងន់ធ្ងរ​អំពី​ការ​ប្រព្រឹត្ត​ខុស​ភាព​អសមត្ថភាព ឬ​អំពើ​ពុករលួយ​ក៏ដោយ។ អ្នក​ដែល​ធ្វើឲ្យ​ថ្នាក់​លើ​មិន​ពេញ​ចិត្ត​ជា​សាធារណៈ ឬ​ធ្វើ​ឲ្យ​សាធារណជន​មិន​ពេញ​ចិត្ត​នឹង​ត្រូវ​ផ្ទេរ​ទៅ​ស្ថាប័ន​ការិយាធិបតេយ្យ។

អ្នក​សង្កេតការណ៍​ម្នាក់​បាន​ថ្លែង​ថា៖ «ពួកគេ​នឹង​ផ្ទេរ​អ្នក​ទៅ​តំណែង​មួយ​ដែល​អត់​ការងារ​សំខាន់​អ្វី​ធ្វើ​ហើយ​អ្នក​ត្រូវ​តែ​រៀន​មើល​ និង​រង់ចាំ​រហូត​ដល់​អ្នក​មិន​ទៅ​គណបក្ស​ផ្សេង​មិន​ទៅ​ក្រៅ​ និង​មិន​និយាយ​អាក្រក់ ឬ​មិន​សងសឹក​ប្រាកដ​ណាស់​អ្នក​អាច​នឹង​មាន​ឱកាស​នៅ​ពេល​ណា​មួយ​ដើម្បី​ត្រឡប់​ទៅ​វិញ​ហើយ​ត្រូវ​ដាក់​ស្រោម​សំបុត្រ​ឲ្យ​ត្រូវ​មនុស្ស»។

កិច្ចខិតខំ​ប្រឹងប្រែង​របស់​ភ្នំពេញ​ប៉ុស្តិ៍​ក្នុង​ការ​តាមដាន​លោក កុសល ក្នុង​រយៈកាល​ប៉ុន្មាន​សប្តាហ៍​ថ្មីៗ​នេះ​ដើម្បី​ដឹង​អំពី​ការ​ទទួល​ខុស​ត្រូវ​របស់​លោក​ចំពោះ​ការងារ​ថ្មី​ ឬ​ថា​តើ​លោក​នៅ​តំណែង​ការងារ​នោះ​ឬ​អត់​គឺ​មាន​ការ​លំបាក​ខ្លាំង។

មេ​របស់​លោក​ដែល​ជា​ប្រធាន​នាយកដ្ឋាន​នគរបាល​ទេសចរណ៍​លោក សោ ស៊ីយ៉ាន បាន​ថ្លែង​ថា​អតីត​ស្នងការ​រូប​នេះ​នៅ​ធ្វើ​ការងារ​នៅ​ឡើយ​ជា​អនុប្រធាន​ហើយ «ទទួល​ខុសត្រូវ​ខេត្ត​មួយ​ចំនួន»។

ទោះ​យ៉ាង​ណា​នៅ​ពេល​ទាក់ទង​តាម​ទូរស័ព្ទ​កាលពី​ថ្មីៗ​នេះ​លោក កុសល បាន​ថ្លែង​ថា​លោក «ចូល​និវត្តន៍» និង​បាន​ដាក់​ទូរស័ព្ទ​ចុះ។

ទាត់​ខ្យល់​ និង​អាន​កាសែត

ពាក្យ​ពីរ​មាត់​នេះ​គឺ​ប្រើ​សម្រាប់​មន្រ្តី​ដែល​ត្រូវ​បាន​ដក​ពី​តំណែង។ នេះ​បើ​តាម​មន្រ្តី​ក្រសួង​ការពារ​ជាតិ​ដែល​បាន​ប្រាប់​ភ្នំពេញ​ប៉ុស្តិ៍​កាល​ពី​ពេល​ថ្មីៗ​នេះ។ អ្នក​ដែល​ត្រូវ​បាន​ដាក់​ទៅ​ក្នុង​បញ្ជី​ខ្មៅ​គឺ​ត្រូវ​បាន​គេ​និយាយ​ថា​ឲ្យ​ទៅ​ «ទាត់​ខ្យល់» ឬ «អាន​កាសែត»។

ប្រភព​សុំ​មិន​បញ្ចេញ​ឈ្មោះ​បាន​ថ្លែង​ថា៖ «ការ​ធ្វើការ​នៅ​ក្រសួង [ចំពោះ​ពួកគេ] គឺ​ដូចជា​ការ​ទៅ​អាន​កាសែត»។ «អ្នក​ទៅ​ធ្វើការ​ប៉ុន្តែ​អត់​មាន​អ្វី​ធ្វើ​ទេ»។

ក្រសួង​នានា​មាន​បញ្ហា​ជាយូរ​មក​ហើយ​ពាក់ព័ន្ធ​ទៅ​នឹង​ «មន្រ្តី​ខ្មោច»។ លោក​បាន​ប៉ាន់ប្រមាណ​ថា​នៅ​ក្នុង​នាយកដ្ឋាន​របស់​លោក​មាន​មន្រ្តី​ប្រមាណ ២០ ភាគរយ​អាច​ត្រូវ​បាន​ចាត់​ទុក​ថា «មន្រ្តី​សកម្ម»។

លោក​បាន​ថ្លែង​ថា​ដើម្បី​ទទួល​បាន​តំណែង​នៅ​ក្នុង​ក្រសួង​ការពារ​ជាតិ​ភាព​ស្មោះត្រង់​ចំពោះ​មេបញ្ជាការ​គឺ​ត្រូវ​តែ​មាន​ជា​ដាច់ខាត។ ការ​បង្ហាញ​អំពី​ភាព​ស្មោះត្រង់​ហើយ​ជាពិសេស​ការ​ប្រមូល​លុយ​ឲ្យ​មេ​យក​ទៅ​រួម​ចំណែក​ជួយ​បក្ស​គឺជា​វិធី​ល្អ​បំផុត​ក្នុង​ការ​ទទួល​បាន​ការ​ដំឡើង​តំណែង។

ចំពោះ​អ្នក​ដែល​មិន​បង្ហាញ​ភាព​ស្មោះត្រង់​ ឬ​ធ្វើឲ្យ​មេ​មិន​ពេញ​ចិត្ត​គឺ​ត្រូវ​ដាក់​ចូល​ក្នុង​ «បញ្ជី​ខ្មៅ» ហើយ​មិន​ងាយ​ទទួល​បាន​ការ​ដំឡើង​តំណែង​នោះ​ទេ។

ប៉ុន្តែ​មន្រ្តី​ដែល​មាន​ឆន្ទៈ​ល្អ​ដោយ​ធ្វើការ​ស្មោះត្រង់​នឹង​ត្រូវ​គេ​គាប​ជាប់។

លោក​បន្ត​ថា៖ «មាន​ជម្រើស​តែ​ពីរ​គឺ​ស្មោះត្រង់​ជាមួយ​មេបញ្ជាការ​ហើយ​ទទួល​បាន​ការ​ដំឡើង​តំណែង ឬ​មិន​ ហើយ​ទទួល​បាន​គឺ​ការ​ខក​ចិត្ត»។

«អ្នក​ដែល​ខំ​ធ្វើ​ការងារ​ដោយ​ស្មោះត្រង់​តាម​ជំនាញ​ដោយ​មិន​អែបអប ប្រព័ន្ធ​នេះ​នឹង​ប្តូរ​ពួកគេ​ភ្លាម»។

អ្នក​ប្រឹក្សា​យោបល់​ម្នាក់​ដែល​ធ្វើការ​ជាមួយ​រដ្ឋាភិបាល និង​ដែល​មាន​ការ​យល់ដឹង​ទូលំ​ទូលាយ​អំពី​បក្ស​បាន​ថ្លែង​ថា​កត្តា​បី​បាន​ដាក់​បញ្ញត្តិ​មន្រ្តី​គឺ​សមត្ថភាព​របស់​ពួកគេ​ក្នុង​ការ​ធ្វើ​ការងារ​ ការ​រួម​ចំណែក​ទៅ​បក្ស និង​ឥទ្ធិពល​បក្ខពួក​របស់​ពួកគេ​ហើយ​ទី​បី​ចុងក្រោយ​គឺ​សំខាន់​បំផុត»។

អ្នក​ប្រឹក្សា​រូប​នេះ​បាន​បន្ត​ថា៖ «អ្នក​មិន​ត្រូវ​រួម​ចំណែក​ច្រើន​ពេក​ទៅ​បក្ស​ទេ​ប៉ុន្តែ​អ្នក​ពិតជា​ត្រូវ​ធ្វើ​ឲ្យ​មេ​របស់​អ្នក​មាន»។

«នៅ​ពេល​អ្នក​ដាក់​កត្តា​ទាំង​អស់​នេះ​ជាមួយ​គ្នា​អ្នក​អាច​ឃើញ​ហេតុអ្វី​មនុស្ស​អសមត្ថភាព​មួយ​ចំនួន​រក្សា​ការងារ​របស់​ខ្លួន​ហើយ​អ្នក​ដទៃ​ត្រូវ​ទាត់​ចេញ​ដោយ​ស្រួល?»។

មន្រ្តី​ក្រសួង​យុត្តិធម៌​ម្នាក់​បាន​ប្រាប់​ភ្នំពេញ​ប៉ុស្តិ៍​ថា​ការ​សង្ស័យ​ថា​មាន​កំហុស​ប្រហែល​ជា​ការ​គាំទ្រ​គណបក្ស​ប្រឆាំង​ហើយ​អ្នក​អាច​ត្រូវ​ផ្ទេរ។

មន្ត្រី​ដែល​លាក់​អត្តសញ្ញាណ​នោះ​បាន​បញ្ជាក់​ថា៖ «ពេល​ខ្លះ​គេ​ផ្ទេរ​អ្នក​ពី​ទីកន្លែង​មួយ​ទៅ​កន្លែង​មួយ​ផ្សេង​ទៀត​ប៉ុន្តែ​ពេល​ខ្លះ​គាត់​/នាង​នោះ​នឹង​ត្រូវ​បាន​គេ​ដាក់​ឲ្យ​នៅ​ដាច់​ឆ្ងាយ​ពី​កន្លែង​ទទួល​ខុសត្រូវ​ពួក​គាត់»។

«ពួកគាត់​នឹង​ត្រូវ​រុញ​ចេញ​ហើយ​អ្នក​ផ្សេង​នឹង​មក​ជំនួស​តំណែង​នោះ។ ពួកគាត់​នៅ​តែ​មាន​មុខ​តំណែង​នេះ​ដដែល ប៉ុន្តែ​មាន​អ្នក​ផ្សេង​ទៀត​មក​ធ្វើ​វា​ជំនួស​ហើយ​នៅ​ទីបំផុត​គាត់​នឹង​នៅ​ខាង​ក្រៅ។ វា​គឺ​ដូចជា​ការ​ធ្វើ​ទារុណកម្ម​ផ្លូវ​ចិត្ត​យ៉ាង​ដូច្នេះ​ដែរ»។

ប្រព័ន្ធ

លោក Sebastian Strangio អ្នក​និពន្ធ​សៀវភៅ​មួយ​ដែល​មាន​ចំណង​ជើង​ថា Hun Sens Cambodia បាន​ថ្លែង​ថា​ការ​និរទេស​មន្ត្រី​ទៅ «កន្លែង​អសកម្ម» គឺជា​វិធី​របស់​គណបក្ស​ប្រជាជន​ដើម្បី​ធ្វើ​ឱ្យ​មាន​តុល្យភាព​នូវ​កាតព្វកិច្ច​របស់​ខ្លួន​ដែល​ជា​រដ្ឋ​មួយ​ និង​ស្ថិរភាព​គណបក្ស​មួយ។ វា​ផ្ដល់​មក​នូវ​ «វិន័យ​ដែល​មាន​ប្រសិទ្ធភាព» ប៉ុន្តែ​ការ​រក្សា​មន្ត្រី​ទាំង​នោះ​ទុក «នៅ​ក្នុង​ដៃ» ធ្វើឲ្យ​ប្រព័ន្ធ​ផ្ទេរ​ទៅ​កន្លែង​អសកម្ម​នោះ​គ្មាន​រង​ការ​ប៉ះពាល់។

លោក Strangio ថ្លែង​ថា៖ «បរិធាន​បក្ស​ទាំង​មូល​គឺ​ត្រូវ​បាន​បង្កើត​ឡើង​ដោយ​ភាព​ប្រទាក់​ក្រឡា​គ្នា​យ៉ាង​ស្មុគស្មាញ​នៃ​ភាព​អាស្រ័យ​ផ្ទាល់​ខ្លួន​ដែល​ផ្តល់​ឲ្យ​គុណភាព​នយោបាយ​កម្ពុជា​ដូចជា​ហ្គេម​ពស់ និង​ជណ្តើរ»។ «មនុស្ស​ដែល​ឡើង​ដល់​ទីខ្ពស់​ហើយ​ធ្លាក់​មក​វិញ​នោះ​គឺជា​រឿង​សង្ស័យ​មួយ។ មិន​ថា​បុគ្គល​នោះ​ធ្លាក់​មក​វិញ​ឆ្ងាយ​ប៉ុនណា​ជា​ការ​ពិត​ណាស់​គឺ​វា​ពឹង​ផ្អែក​លើ​ការ​ផ្លាស់ប្តូរ​អំណាច​ដែល​មិន​ធ្លាប់​មាន​ក្នុង​ចំណោម និង​រវាង​មេដឹកនាំ​កំពូល។ គ្មាន​បុគ្គល​ណា​ម្នាក់​ដែល​មាន​សុវត្ថិភាព​ទាំង​ស្រុង​នោះ​ទេ»។

មេរៀន​របៀប​នេះ​បាន​រៀន​ដោយ​លោក ទី សុគន្ធ រួច​ហើយ​នៅ​ពេល​ដែល​គាត់​ត្រូវ​បាន​ដក​ចេញ​ពី​តំណែង​ជា​អគ្គនាយក​រដ្ឋបាល​ព្រៃឈើ​នៅ​ឆ្នាំ ២០១០ ចំ​ពេល​ដែល​លោក​ ហ៊ុន សែន រិះគន់​ចំពោះ​ភាព​បរាជ័យ​ដែល​មិន​អាច​បញ្ឈប់​ការ​កាប់​បំផ្លាញ​ព្រៃឈើ​ខុស​ច្បាប់​បាន។

គ្មាន​ការ​បញ្ជាក់​ណា​មួយ​នៅ​ក្នុង​របាយការណ៍​របស់​អង្គការ Global Witness ក្នុង​ឆ្នាំ ២០០៧ ដែល​ពាក់ព័ន្ធ​ជាមួយ​រដ្ឋបាល​ព្រៃឈើ និង​សមាជិក​ក្រុម​គ្រួសារ​របស់​លោក​នាយក​រដ្ឋមន្ត្រី ហ៊ុន សែន ក្នុង​ការ​រត់​ពន្ធ​ឈើ​ខុស​ច្បាប់ និង​បាន​ចោទប្រកាន់​លោក​ សុគន្ធ ហើយ​បន្ទាប់​មក​រដ្ឋមន្ត្រី​ក្រសួង​កសិកម្ម​លោក ច័ន្ទសារុន ពី​ការ​លក់​ការងារ​ជាង ៥០០ កន្លែង​នៅ​ក្នុង​ក្រសួង។ បរាជ័យ​របស់​លោក សុគន្ធ ក៏​បាន​រំឭក​ដល់​សកម្មជន​បរិស្ថាន​ជើង​ចាស់​ម្នាក់​ដែល​មាន​មូលដ្ឋាន​នៅ​កម្ពុជា​ផង​ដែរ​គឺ​លោក Marcus Hardtke ដោយ​បាន​បង្កើត​រូបភាព​ស្រដៀង​គ្នា​ចំពោះ​ការ​ផ្តាច់​ខ្លួន​ចេញ​ពី​ប្រធាន​រដ្ឋបាល​ព្រៃឈើ​របស់​លោក​ សារុន ជាង​មួយ​ទសវត្សរ៍​មុន​បន្ទាប់​មក​គាត់​បាន​ឡើង​តំណែង​រហូត​ក្លាយ​ជា​រដ្ឋមន្ត្រី​មួយ​រូប។

លោក Hardtke បាន​ថ្លែង​ថា៖ «គ្មាន​អ្វី​ផ្លាស់ប្តូរ​ពិតប្រាកដ​នោះ​ទេ» ដោយ​លោក​ហៅថា​វា​ជា​ហ្គេម «លើក​ឡើង​ហើយ​ទម្លាក់​ចុះ»។

និន្នាការ​ស្ថិតស្ថេរ

នា​ប៉ុន្មាន​ខែ​ថ្មីៗ​ចុង​ក្រោយ​នេះ​ក្រុម​មន្ត្រី​មួយ​ចំនួន​បាន​ទទួល​រង​ការ​ស្តីបន្ទោស​ជា​សាធារណៈ​ហើយ​ត្រូវ​បាន​ផ្ទេរ​ចេញ​ដោយ​ស្ងៀមស្ងាត់។

ការ​ចាប់​ដាក់​ពន្ធនាគារ​រយៈពេល​ខ្លី​ដោយ​អាជ្ញាធរ​នៅ​ប្រទេស​កូរ៉េ​ខាង​ត្បូង​លើ​អតីត​ប្រធាន​នាយកដ្ឋាន​តម្រង់​ទិស​វិជ្ជាជីវៈ​ក្រសួង​អប់រំ​លោក គ្រីស៊ាងឡុង ដែល​រង​ការ​ចោទ​ប្រកាន់​ពី​បទ​បៀតបៀន​រាងកាយ​កាលពី​ខែ​ឧសភា​កន្លង​ទៅ​គឺជា​ឧទាហរណ៍​ស្រាប់។

ដោយ​ត្រូវ​បាន​ក្រសួង​ការបរទេស​បង់​ប្រាក់​ពិន័យ​ជំនួស​កាលពី​ខែ​ឧសភា​លោក ស៊ាងឡុង ត្រូវ​បាន​ថ្កោល​ទោស​ជា​សាធារណៈ​ពី​ថ្នាក់​លើ​របស់​លោក​នៅ​ក្នុង​រាជធានី​ភ្នំពេញ។

ប៉ុន្តែ​ការ​ដែល​លោក​ត្រូវ​បាន​គេ​ចោទ​ប្រកាន់​ថា​បាន​បៀតបៀន​រាងកាយ​អ្នក​បកប្រែ​នៅ​ទីក្រុង​សេអ៊ូល​នោះ​គឺ​ច្រើន​សប្តាហ៍​ក្រោយ​មក​ទើប​គេ​បាន​ដឹង។

ប៉ុន្ដែ​គាត់​នៅ​តែ​មាន​ឈ្មោះ​នៅ​ក្នុង​បញ្ជី​បើក​ប្រាក់​ខែ​ជា​សាធារណៈ​ក្នុង​នាម​ជា «មន្ត្រី​រដ្ឋបាល» នេះ​បើ​យោង​តាម​អ្នក​នាំពាក្យ​ក្រសួង​អប់រំ​លោក​ រស់ សាលីន ដែល​បាន​ហៅ​ការ​ផ្លាស់ប្តូរ​នេះ​ថា​ជា "ការ​ផ្តន្ទាទោស​ដ៏ខ្ពស់​បំផុត" ដែល​អាច​ធ្វើ​ឡើង​បាន​ដោយ​ក្រុម​ប្រឹក្សា​វិន័យ​ហើយ​លុះត្រា​តែ​មាន​ការ​ចេញ​សាលក្រម​របស់​តុលាការ។

បន្ទាប់​មក​មាន​ករណី​លោក ឡុង រុក្ខា ដែល​ត្រូវ​បាន​ផ្ទេរ​ក្នុង​ខែ​កញ្ញា​ពី​តំណែង​ចាស់​របស់​លោក​ជា​មេ​នគរបាល​អន្តោប្រវេសន៍​នៅ​ច្រក​ព្រំដែន​អូរយ៉ាដាវ ខេត្ត​រតនគិរី​ទៅ​ទទួល​តំណែង​ថ្មី​នៅ​ការិយាល័យ​នីតិកម្ម​ក្នុង​រាជធានី​ភ្នំពេញ​ដែល​លោក​រង​ការ​ចោទប្រកាន់​ថា​ជាប់​ពាក់ព័ន្ធ​ទៅ​នឹង​ករណី​រុករក​រ៉ែ​ខុស​ច្បាប់។

ដូចជា​ករណី​ស្ដីបន្ទោស និង​ព្បួរ​ការងារ​អតីត​ស្នងការ​ប៉ូលិស​ស្រុក​កំរៀង​លោក ផាន់វណ្ណារ៉ា ដែល​នៅ​ក្នុង​ខែ​មករា​ត្រូវ​បាន​ប្តូរ​ទៅ​កាន់​តួនាទី​ថ្មី​នៅ​ទីស្នាក់ការ​កណ្តាល​ខេត្ត​ចំ​ពេល​ដែល​មាន​កំណើន​បទល្មើស​ទូទាំង​ប្រទេស​កើនឡើង។

មួយ​វិញ​ទៀត​ទោះបី​ជា​គ្រប់​គ្នា​មិន​អាច​រក្សា​ការងារ​នៅ​ការិយាល័យ​បាន​ក្តី​ក៏​ពេល​ខ្លះ​ឋានៈ​គឺ​អាច​គ្រប់គ្រាន់។ នៅ​ពេល​ដែល​មន្ត្រី​ថ្នាក់​ក្រោម​ជាតិ​លោក កុល សំអុល ត្រូវ​បាន​គេ​ជំនួស​តំណែង​ជា​អភិបាល​ខេត្ត​ស្ទឹងត្រែង​របស់​លោក​កាលពី​ខែ​ធ្នូ​ឆ្នាំ​មុន​គឺ​គាត់​ត្រូវ​បាន​តែងតាំង​ជា​ទីប្រឹក្សា​រដ្ឋាភិបាល។

នៅក្នុង​ពិធី​ផ្លាស់ប្តូរ​តំណែង​ចៅហ្វាយ​ខេត្ត​នោះ​លោក សខេង គឺ​ត្រង់​ជាង​អ្នក​នៅ​ក្រោម​គាត់​ដោយ​បាន​លើក​ឡើង​ពី​អាយុកាល​ចូល​និវត្តន៍​ពី​សេវាកម្ម​ស៊ីវិល​គឺ​នៅ​អាយុ ៦០ ឆ្នាំ (លោក សំអុល អាយុ ៥៨ ឆ្នាំ) ហើយ​ត្រូវ​បាន​រាយការណ៍​ថា​បាន​រិះគន់​ពី​ភាព​អសកម្ម​របស់​លោក សំអុល ជុំវិញ​ការ​ប្រយុទ្ធ​ប្រឆាំង​បទល្មើស​រត់ពន្ធ​ឆ្លង​កាត់​តាម​ព្រំដែន។

នៅ​ពេល​ទាក់ទង​កាល​ពី​សប្ដាហ៍​មុន​អ្នក​នាំ​ពាក្យ​សាលា​ខេត្ត​ស្ទឹងត្រែង​លោក​ ម៉ែន សេង បាន​បដិសេធ​ថា​ចៅហ្វាយ​ចាស់​របស់​គាត់​បាន​បាត់បង់​ការ​ពេញ​ចិត្ត​ដែល​ជា​ការពិត​លោក​ថ្លែង​ថា​គឺ​វា​ផ្ទុយ​ពី​នេះ។

លោក សេង ថា៖ «វា​ជា​ការ​ដំឡើង​ឋានៈ» ទោះបី​ជា​លោក​ទទួល​ស្គាល់​ថា​លោក សំអុល មិន​អាច​ទាក់ទង​បាន​ក្តី​ដោយ​ថ្លែង​ថា​ពេល​នេះ​មិន​មាន «ទំនាក់​ទំនង​ជាមួយ​ក្រសួង»។

ប្រព័ន្ធ​ចាស់ មនុស្ស​ថ្មី

លោកស្រី Caroline Hughes សាស្ត្រាចារ្យ​នៃ​ការ​ដោះស្រាយ​ជម្លោះ និង​សន្តិភាព​នៅ​សាកល​វិទ្យាល័យ Bradford នៅ​ក្នុង​ចក្រភព​អង់គ្លេស​បាន​ថ្លែង​ថា​ទោះបី​ជា​មាន​ប្រសិទ្ធភាព​រយៈពេល​វែង​នៅ​ក្នុង​ការ​គ្រប់គ្រង​សេវា​សាធារណៈ​ខណៈ​ដែល​ការ​បោះឆ្នោត​ខិត​ជិត​ចូល​មក​ដល់​ក្តី​ក៏​គណបក្ស​ប្រជាជន​កម្ពុជា​ជួប​នឹង​បញ្ហា​ប្រឈម​មួយ​ចំនួន​ដែល​កំពុង​កើនឡើង​គឺ​ត្រូវការ​ដោះស្រាយ​ជាមួយ​នឹង​ភាព​តានតឹង​រវាង​ការ​អនុវត្ត​របស់​រដ្ឋ និង​ភក្ដីភាព​របស់​គណបក្ស។

លោកស្រី Hughes បាន​ថ្លែង​ថា​តម្រូវការ​សេវា​សាធារណៈ​ល្អ​ប្រសើរ​គឺ​មាន​កាន់តែ​ច្រើន​ឡើង និង​ការ​កើនឡើង​នៃ​ចំនួន​យុវជន​ជំនាន់​ថ្មី​នៅ​ក្នុង​ជួរ​រដ្ឋាភិបាល​គឺ​វា​មាន​ន័យ​ថា​មន្ត្រី​ដែល​មាន​ប្រសិទ្ធភាព​បំផុត​ជា​ច្រើន​ប្រហែល​មិនមែន​ជា​អ្នក​ស្មោះត្រង់​បំផុត​នោះ​ទេ។

សម្រាប់​គណបក្ស​ដែល​យល់​តែ​ពី​ភាព​ស្មោះត្រង់​នៅ​ក្នុង​លក្ខខណ្ឌ​នៃ​ទំនាក់​ទំនង​ផ្ទាល់​ខ្លួន​ជា​ជាង​ការ​ប្រកាន់​ខ្ជាប់​ទៅ​នឹង​សំណុំ​នៃ​គោលការណ៍​ច្បាប់​នោះ​នឹង​បង្ក​ជា​បញ្ហា​មិន​ខាន។

លោកស្រី Hughes បាន​ថ្លែង​ថា៖ «ប្រសិន​បើ​អ្នក​ចាប់​ផ្តើម​ដេញ​មនុស្ស​ដែល​ស្មោះត្រង់​ចេញ​ពី​ការងារ​របស់​គាត់​នោះ​ប្រព័ន្ធ​ច្បាស់​ជា​ដួលរលំ ។ អ្នក​នឹង​ជួប​បញ្ហា​យ៉ាង​ពិតប្រាកដ​នៅ​ពេល​ដែល​ភាព​ស្មោះត្រង់ និង​ប្រសិទ្ធភាព​នៃ​ការ​អនុវត្ត​ដើរ​ផ្សេង​គ្នា។

ទោះ​ជា​យ៉ាង​ណា​លោក យក់ប៊ុណ្ណា រដ្ឋលេខាធិការ​ក្រសួង​មុខងារ​សាធារណៈ​ដែល​ទទួល​ភារកិច្ច​ដឹកនាំ​កំណែ​ទម្រង់​នៅ​ក្នុង​វិស័យ​នេះ​បាន​ជំទាស់ និង​បាន​អះអាង​ពី​ភាព​ដែល​សម​នឹង​ទទួល​បាន​មិនមែន​មក​ពី​ភាព​ស្មោះត្រង់​ទេ។ វា​គឺជា​រូបិយប័ណ្ណ​ដ៏​មាន​តម្លៃ​បំផុត​នៅ​ក្នុង​វិស័យ​សាធារណៈ។

ចំពោះ​មុខ​តំណែង ​លោក​បាន​និយាយ​ថា​ មិនមែន​ជា​កម្មសិទ្ធិ​របស់​ការិយាល័យ​ជា​អ្នក​ដែល​មាន​សិទ្ធិ​ទទួល​បាន​នោះ​ទេ​រឿង​តែ​មួយ​គត់​គឺ​តាមរយៈ​កម្រិត​ជំនាញ​របស់​ពួកគាត់ និង​អម​ជាមួយ​អត្រា​ប្រាក់​បៀវត្សរ៍។

លោក​ ប៊ុណ្ណា បាន​ថ្លែង​ថា ​វា​អាស្រ័យ​លើ​រដ្ឋាភិបាល «ក្នុង​ការ​សម្រេច​ចិត្ត​ដើម្បី​ផ្លាស់ប្តូរ [មន្ត្រី​រាជការ] ពី​មុខ​តំណែង​មួយ​ទៅ​កាន់​មុខ​តំណែង​មួយ​ផ្សេង​ទៀត​ដោយ​ផ្អែក​ទៅ​លើ​គុណសម្បត្តិ ឬ​ក៏​តម្រូវការ​របស់​សេវា​សាធារណៈ​នោះ»។

លោក​បាន​បញ្ជាក់​ថា​តួយ៉ាង​ដូច​មន្ត្រី​មួយ​ចំនួន​ដែល​ត្រូវ​បាន​ផ្លាស់ប្តូរ​ទៅ​កាន់​មុខ​តំណែង​ផ្សេង​ដែល​មិន​សូវ​សកម្ម​គឺ​វា​គ្រាន់​តែ​ជា​ការ​ឆ្លុះ​បញ្ចាំង​ពី​សមត្ថភាព​របស់​ពួកគាត់​តែ​ប៉ុណ្ណោះ។

លោក​ថ្លែង​ថា៖ «វា​ផ្អែក​ទៅ​លើ​សមត្ថភាព​របស់​អ្នក» «ប្រសិន​បើ​រដ្ឋមន្ត្រី ឬ​នាយក​រដ្ឋមន្ត្រី​វាយតម្លៃ​ឃើញ​ថា​អ្នក​មិន​មាន​សមត្ថភាព​សម្រាប់​មុខ​តំណែង​នេះ​ទេ​នោះ​អ្នក​អាច​ត្រូវ​បាន​គេ​ផ្ទេរ​ទៅ​កន្លែង​ផ្សេង​ដែល​មាន​ការ​ទទួល​ខុស​ត្រូវ​តិច​ជាង»។

លោក ប៊ុណ្ណា បាន​ឱ្យ​ដឹង​ថា​កំណែ​ទម្រង់​ដែល​កំពុង​បន្ត​ធ្វើ​នេះ​គឺ​មាន​គោលបំណង​ដើម្បី​កំណត់​ឲ្យ​កាន់​តែ​ច្បាស់​ពី​ដំណើរការ​តែងតាំង​លក្ខណ​វិនិច្ឆ័យ​ការងារ និង​ការ​ទទួល​ខុសត្រូវ​សម្រាប់​មុខ​តំណែង​នីមួយៗ។

ចំណុច​នេះ​លោក​បាន​បញ្ជាក់​ថា​វា​នឹង​ជួយ​ដើម្បី​ចៀសវាង "ចន្លោះ​ប្រហោង" ដែល​អាច​នាំ​ឱ្យ​មាន «ការ​យល់​ឃើញ» ថា​បញ្ហា​នយោបាយ​គឺជា​កត្តា​កំណត់​នៅ​ពេល​ដែល​មាន​ការ​តែងតាំង ឬ​ផ្លាស់ប្តូរ​មុខ​តំណែង​ណា​មួយ​នោះ។

រដ្ឋ​មួយ បក្ស​មួយ បុគ្គល​មួយ

សម្រាប់​ការ​ធ្វើ​កំណែទម្រង់​ទាំង​អស់​គឺ​ក្នុង​គោល​បំណង​ដើម្បី​បង្កើន​ឲ្យ​មាន​តម្លាភាព​នៅ​ក្នុង​វិស័យ​សាធារណៈ​ហើយ​វា​ច្បាស់​ណាស់​ថា​ពាក្យ​សម្តី​របស់​មនុស្ស​ម្នាក់​គឺជា​ចំណុច​ចុងក្រោយ​នៅ​ពេល​ដែល​វា​ធ្លាក់​មក​ដល់​ការ​សម្រេច​ចិត្ត​របស់​រដ្ឋាភិបាល​រួម​ទាំង​ជោគវាសនា​របស់​បុគ្គលិក​រាប់​ពាន់​នាក់​ផ្សេង​ទៀត។

«ខ្ញុំ​ពិត​ជា​សប្បាយ​រីករាយ និង​អរគុណ​ខ្លាំង​ណាស់​ដែល​សម្តេច [ហ៊ុន សែន] បាន​អភ័យទោស​ឱ្យ​ខ្ញុំ» ឧត្ដម​សេនីយ៍ឯក​ក្រសួង​មហាផ្ទៃ​លោក ម៉ម ស្រ៊ីម វណ្ណា បាន​ថ្លែង​ប្រាប់​ក្រុម​អ្នក​កាសែត​បន្ទាប់​ពី​ត្រូវ​បាន​ដក​ចេញ​ពី​តំណែង​ហើយ​បន្ទាប់​មក​លោក​នាយក​រដ្ឋមន្ត្រី​សម្រេច​មិន​ដក​តំណែង​លោក​វិញ​កាល​ពី​ខែ​កក្កដា​កន្លង​ទៅ​បន្ទាប់​ពី​ប៉ូលិស​ចរាចរណ៍​មួយ​រូប​ហ៊ាន​ផាក​ពិន័យ​រថយន្ត​របស់​គាត់​ដែល​បើកបរ​មិន​គោរព​ភ្លើង​សញ្ញា​ចរាចរណ៍​ហើយ​ករណី​នេះ​បាន​លេច​ឡើង​នៅ​លើ​ប្រព័ន្ធ​ផ្សព្វផ្សាយ​សង្គម​ជាច្រើន។

ដើម្បី​បង្ហាញ​ថា​លោក​មាន​ការ​ទទួល​ខុសត្រូវ​នឹង​ឆ្លើយ​តប​ទៅ​នឹង​ការ​ព្រួយបារម្ភ​របស់​ប្រជាពលរដ្ឋ​លោក​នាយក​រដ្ឋមន្ត្រី ហ៊ុន សែន បាន​ប្រើ​ប្រព័ន្ធ​ហ្វេសប៊ុក​ដើម្បី​ឆ្លើយតប​ទៅ​នឹង​បញ្ហា​ទាំង​នោះ។ វេទិកា​នេះ​បាន​ផ្តល់​ឱ្យ​លោក​នូវ​វិធី​មួយ​ទៀត​ដើម្បី​ផ្សព្វផ្សាយ​នូវ​ការ​សម្រេច​ចិត្ត​ និង​ការ​ផ្លាស់ប្តូរ​គោល​នយោបាយ​ផ្សេងៗ​ជាដើម។

ប៉ុន្តែ​វា​ក៏​បាន​ផ្តល់​ឱកាស​ឱ្យ​ប្រជាពលរដ្ឋ​មើល​ត្រឡប់​មក​វិញ និង​ឃើញ​ពី​ការ​ឆ្លើយតប​ភ្លាមៗ​ និង​រចនាប័ទ្ម​ផ្ទាល់​ខ្លួន​របស់​មេដឹកនាំ​ប្រទេស​ផង​ដែរ។ វិធីសាស្ត្រ​នេះ​ជា​ញឹកញាប់​ជ្រាប​ចូល​ទៅ​ក្នុង​ប្រព័ន្ធ​ដែល​គាត់​ធ្វើ​ជា​អធិបតី។

រឿង​បែប​នេះ​បាន​កើតឡើង​កាល​ពី​ខែ​មុន​នៅ​ពេល​លោក​នាយក​រដ្ឋមន្ត្រី​ទូរស័ព្ទ​ចូល​វិទ្យុ ABC និង​បាន​សម្រេច​ដក​តំណែង​ប្រធាន​មន្ទីរ​សុខាភិបាល​រាជធានី​ភ្នំពេញ​លោក សុខ សុគន្ធ បន្ទាប់​ពី​អាជ្ញាធរ​សុខាភិបាល​ក្រុង​បាន​រឹបអូស​រថយន្ត​សង្គ្រោះ​បន្ទាន់​របស់​វិទ្យុ ABC ដែល​គ្មាន​អាជ្ញាប័ណ្ណ​ដែល​ការ​សម្រេច​នេះ​គឺ​លោក​នាយករដ្ឋមន្រ្តី​មិន​យល់​ស្រប​តាម។

ផ្លាស់ប្តូរ​ទៅ​កាន់​តួនាទី​ថ្មី​នៅ​ក្នុង​ក្រសួង​សុខាភិបាល​លោក សុខ សុគន្ធ បាន​បញ្ជាក់​ច្បាស់​ថា​លោក​គ្រាន់​តែ​ធ្វើ​ការងារ​របស់​លោក​ប៉ុន្តែ​បាន​កត់សម្គាល់​ថា​នៅ​ក្នុង​សេវាកម្ម​ស៊ីវិល​មិនមែន​មាន​តែ​ប៉ុណ្ណឹង​ទេ។ «យើង​ត្រូវ​តែ​គោរព​មេដឹកនាំ​កំពូល​នៅ​ពេល​ដែល​លោក​ចាត់​តាំង​ ឬ​ដំឡើង​ឋានៈ​ឲ្យ​យើង​ទៅ​បំពេញ [តួនាទី​ផ្សេង]»៕NS /PS

0

Comments

Please, login or register to post a comment

ព័ត៌មានពាក់ព័ន្ធ