Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្ពុជា​ ស្វែងយល់​ពី​ទម្រង់​នៃ​កិច្ចសន្ទនា​នយោបាយ​នៅ ​អាល្លឺម៉ង់

Content image - Phnom Penh Post
ប្រតិភូ​កម្ពុជា​ដែល​បាន​ទៅ​ទស្សនកិច្ច​សិក្សា​អំពី​កិច្ចសន្ទនា​នយោបាយ​នៅ​ទីក្រុង ប៊ែរឡាំង ប្រទេស​អាល្លឺម៉ង់​កាល​ចុង​ខែ​មីនា​តាម​ការ​អញ្ជើញ​ពី​មូលនិធិ Konrad Andenauer Stiftung។

កម្ពុជា​ ស្វែងយល់​ពី​ទម្រង់​នៃ​កិច្ចសន្ទនា​នយោបាយ​នៅ ​អាល្លឺម៉ង់

ក្រុងប៊ែរឡាំង- អាល្លឺម៉ង់​បាន​ផ្ដល់​គំរូ​នៃ​ទម្រង់​កិច្ចសន្ទនា​នយោបាយ​មួយ​ដល់​បក្ស​កាន់​អំណាច និង​បក្ស​ប្រឆាំង​នៅ​កម្ពុជា​ដោយ​ផ្ដល់​ឱកាស​ឲ្យ​ទៅ​សិក្សា​ស្វែងយល់​ពី​របៀប​សន្ទនា​នយោបាយ​នៅ​ប្រទេស​របស់​ខ្លួន​ហើយ​​សង្ឃឹម​ថា​ទម្រង់​នៃ​ការ​សន្ទនា​នយោបាយ​​នៅ​ប្រទេស​​​នេះ​អាច​ជា​គំរូ​​ល្អ​មួយ​​សម្រាប់​បក្ស​នយោបាយ​ទាំង​ពីរ​ប្រើប្រាស់​ដើម្បី​បន្ធូរបន្ថយ​កម្ដៅ​នយោបាយ​នៅ​មុន និង​ក្រោយ​ព្រឹត្តិការណ៍​បោះឆ្នោត​នាពេល​ឆាប់ៗ​ខាង​មុខ​នេះ។

វោហារស័ព្ទ​ការ​ឃោសនា​​ទាក់ទាញ​អ្នក​គាំទ្រ បទ​អត្ថាធិប្បាយ​នយោបាយ​​នៅ​កម្ពុជា​តែងតែ​​ឡើង​កម្ដៅ​នៅ​​រៀងរាល់​​ព្រឹត្តិការណ៍​បោះឆ្នោត​ម្ដងៗ។

គណបក្ស​ប្រឆាំង​ និង​គណបក្ស​កាន់​អំណាច​តែងតែ​ប្រើប្រាស់​ពាក្យពេចន៍ ជេរ ប្រមាថ​ដាក់​គ្នា​ទៅវិញ​ទៅមក​ជា​ហេតុ​​បង្ក​ឲ្យ​មាន​ជម្លោះ បែកបាក់​​កាន់តែ​ជ្រាលជ្រៅ​​នៅក្នុង​សង្គម។ ព្រឹត្តិការណ៍​បែប​នេះ​ក៏​បាន​កើតឡើង​​រួច​ហើយ​នៅ​សហព័ន្ធ​អាល្លឺម៉ង់​កាលពី​ជាង​ ៦០ ឆ្នាំ​កន្លង​ទៅ​ក្រោយពី​​សង្គ្រាម​​លោក​ទី ១ និង​ទី ២ ​។

អាល្លឺម៉ង់​ធ្លាប់​ត្រូវ​បាន​ពុះ​ខណ្ឌ​ជា​ពីរ​រវាង​​អាល្លឺម៉ង់​ខាង​កើត និង​ខាង​លិច​ដោយ​ជញ្ជាំង​ប៊ែរឡាំង ប៉ុន្ដែ​​ទីបំផុត​ជញ្ជាំង​ប៊ែរឡាំង​ត្រូវ​បាន​រលំ​នៅ​​ចុង​ទសវត្សរ៍​ទី ៨០ ហើយ​​​អាល្លឺម៉ង់​​​ក៏​បាន​រួបរួម​ឡើង​វិញ​ដោយ​បាន​អនុវត្ត​នូវ​លទ្ធិប្រជាធិបតេយ្យ គោរព​សិទ្ធិមនុស្ស គោរព​គោលការណ៍​ពហុបក្ស និង​គោរព​​ការ​បញ្ចេញ​មតិ​របស់​​ពលរដ្ឋ​តាមរយៈ​ប្រព័ន្ធ​​ផ្សព្វផ្សាយ​​ដែល​មាន​​វិជ្ជាជីវៈ។

ទម្រង់​​នៃ​​ការ​សន្ទនា​នយោបាយ​នៅ​​ប្រទេស​​​​អាល្លឺម៉ង់​គឺ​យក​ការ​ស្ដាប់ ការ​​គោរព​​សំឡេង​​ពី​គ្រប់​ភាគី ពិសេស​ការ​​គោរព​សំឡេង​សាធារណជន​ជា​ធំ​។ កត្ដា​នេះ​ហើយ​​ដែល​ជា​ហេតុ​ចម្បង​​​ដែល​នាំ​ឲ្យ​ប្រទេស​​​​អាល្លឺម៉ង់​ក្លាយ​ជា​​ប្រទេស​​អភិវឌ្ឍន៍​ជឿនលឿន​​ក្នុង​កិច្ចការ​សន្ទនា​​​នយោបាយ​ប្រកប​ដោយ​ការ​យោគយល់ និង​រក្សា​​បាន​នូវ​​សុខ​សន្ដិភាព​​។

លោក Rene Gradwohl នាយក​ប្រចាំ​កម្ពុជា​​នៃ​​មូលនិធិ Konrad Adenauer Stiftung (KAS) បាន​មាន​ប្រសាសន៍​ប្រាប់​ភ្នំពេញ​ប៉ុស្ដិ៍​នៅ​ទីក្រុង​ប៊ែរឡាំង​ថា​ក្នុង​​​​បំណង​ជួយ​សម្រួល​​ស្ថានការណ៍​នយោបាយ​​នៅ​កម្ពុជា KAS បាន​អញ្ជើញ​​​ប្រតិភូ​​ខ្មែរ​​មួយ​ក្រុម​មាន​សមាជិក ៨ រូប ទៅ​សិក្សា​ស្វែង​យល់​​អំពី​កិច្ចសន្ទនា​​នយោបាយ​​នៅ​​​សហព័ន្ធ​អាល្លឺម៉ង់​រយៈពេល​មួយ​សប្ដាហ៍​ពី​ថ្ងៃ​​ទី ២៦ មីនា​ដល់​ថ្ងៃ​ទី ០១ មេសា ២០១៧ កន្លង​ទៅ​ដែល​​មាន​​សមាសភាព​ចម្រុះ​ក្នុង​នោះ​មាន​​​​មន្ដ្រី​តំណាង​​កិច្ចការ​សាធារណៈ​របស់​​គណបក្ស ប្រជាជន​​កម្ពុជា (CPP) តំណាង​គណបក្ស​សង្គ្រោះជាតិ (CNRP) ​ក្លិប​​អ្នក​​កាសែត​​​កម្ពុជា​ព្រម​ទាំង​តំណាង​អ្នក​សារព័ត៌មាន​​។

«វា​មាន​សារៈសំខាន់​ខ្លាំង​​ណាស់​​សម្រាប់​ខ្ញុំ​ដែល​បាន​នាំ​មក​ទាំង​តំណាង​រាជរដ្ឋាភិបាល​ទាំង​មន្ដ្រី​នាំពាក្យ​របស់​បក្ស​ប្រឆាំង​ព្រម​ទាំង​អ្នក​សារព័ត៌មាន​បញ្ចូល​ជា​សមាសភាព​ចម្រុះ​សិក្សា​​ជាមួយ​គ្នា​ដើម្បី​ពង្រឹង​គុណភាព​លើ​​កិច្ចសន្ទនា​នយោបាយ​សម្រាប់​​ផលប្រយោជន៍​សាធារណជន​​ទូទៅ។ នេះ​​បើ​តាម​​លោក Rene Gradwohl។

លោក Rene Gradwohl បាន​មាន​ប្រសាសន៍​ថា​គំនិត​មួយ​នៅក្នុង​​កម្មវិធី​ទស្សនកិច្ច​នេះ​អាល្លឺម៉ង់​ចង់​សាកល្បង​​ដឹកនាំ​ប្រតិភូ​កម្ពុជា​សិក្សា​​ប្រព័ន្ធ​កិច្ចសន្ទនា​នយោបាយ​នៅ​​អាល្លឺម៉ង់​ដោយ​ផ្តល់​ឱកាស​ឲ្យ​​សិក្ខាកាម​​ទៅ​​ជួប​សន្ទនា​​ដោយ​ផ្ទាល់​ជាមួយ​អ្នក​ជំនាញ​នៅ​តាម​បណ្ដា​ស្ថាប័ន​​ផ្សេងៗ​នៅ​ទីក្រុង​ប៊ែរឡាំង​​​​​នេះ​ហើយ​នឹង​ត្រូវ​មើល​ថា តើ​វា​អាច​​ឆ្លុះ​បញ្ចាំង​​ពី​​បរិបទ​​នៅ​កម្ពុជា​ដែរ​​ទេ។

លោក Rene បាន​បន្ថែម​ថា​បំណង​​មួយ​ទៀត​នៃ​ដំណើរ​ទស្សនកិច្ច​នេះ​គឺ​ការ​ផ្តល់​ឲ្យ​តួអង្គ​សន្ទនា​នយោបាយ​ផ្សេង​គ្នា​នៅ​កម្ពុជា​ដើម្បី​ជួប​គ្នា។

លោក​បាន​បញ្ជាក់​ថា៖ «មិនមែន​ត្រឹម​តែ​សិក្សា​ជាមួយ​គ្នា​ទេ ប៉ុន្ដែ​គេ​បាន​​ចំណាយ​ពេល​ទំនេរ​ជាមួយ​គ្នា​ទៅ​​បរិភោគ​អាហារ​ថ្ងៃត្រង់​ និង​អាហារ​​ពេល​ល្ងាច​ជាមួយ​គ្នា​ដែល​​នោះ​គឺជា​ឱកាស​បាន​ស្គាល់​គ្នា​ជា​លក្ខណៈ​​បុគ្គល​ដែល​ជាទូទៅ​អាច​កាត់​​បន្ថយ​កម្ដៅ​ក្នុង​ពេល​សន្ទនា។ ​​ប្រសិន​បើ​​ពួកគេ​មិន​ដែល​ជួប​ជជែក​គ្នា ឬ​​ជួប​​គ្នា​សោះ​ពួកគេ​នឹង​ប្រយុទ្ធ​គ្នា​​ដោយ​​ប្រើ​ពាក្យ​ខ្លាំងៗ​តាមរយៈ​បណ្ដាញ​ផ្សព្វផ្សាយ»។

Content image - Phnom Penh Post
លោក ខៀវ សុភ័គ (ឆ្វេង) ថត​ជាមួយ​លោកស្រី មូរ សុខហួរ អ្នក​តំណាងរាស្ដ្រ​បក្ស CNRP ។ រូបថត សហការី

លទ្ធផល​​​វិជ្ជមាន​ពី​ដំណើរ​ទស្សនកិច្ច​សិក្សា​នៅ​ទីក្រុង​ប៊ែរឡាំង​ត្រូវ​​បាន​​​គេ​ឃើញ​ថា​អ្នក​នយោបាយ​ពីរ​រូប​នៅ​បក្ស​​ផ្សេង​គ្នា​ដែល​​ធ្លាប់​មិន​ទុក​ចិត្ត​គ្នា​នៅ​កម្ពុជា​បាន​ប្រែ​ក្លាយ​ជា​មិត្តភក្ដិ​នឹង​គ្នា​ គោរព​គ្នា​ទៅវិញ​ទៅមក​ព្រមទាំង​បាន​កសាង​ទំនុក​ចិត្ត​រវាង​គ្នា​ និង​គ្នា។

លោក Rene Gradwohl បាន​មាន​ប្រសាសន៍​ថា​៖ «ខ្ញុំ​គិត​ថា​ការ​សន្ទនា​​រវាង​អ្នក​ទាំង​ពីរ [លោកស្រី មូរ សុខហួរ​ និង​​លោក ខៀវ សុភ័គ] ហាក់​ដូច​​មន្ទិល​សង្ស័យ​នឹង​គ្នា​នៅ​​គ្រា​​ដំបូង​ពីព្រោះ​ការ​មិន​ទុក​ចិត្ត​គ្នា​ក្នុង​កម្រិត​ខ្ពស់​មួយ។ ដូច​លោក​បាន​ជ្រាប​ស្រាប់​​ហើយ​បុគ្គល​​ទាំង​ពីរ​នាក់​នេះ​មិន​ដែល​​ស្គាល់​គ្នា​ជា​លក្ខណៈ​បុគ្គល​ពី​មុន​មក​ទេ ប៉ុន្ដែ​ពួកគាត់​ធ្លាប់​តែ​ឆ្លើយឆ្លង​គ្នា​តាមរយៈ​បណ្ដាញ​ផ្សព្វផ្សាយ។ ប៉ុន្ដែ​ខ្ញុំ​សប្បាយ​រីករាយ​ខ្លាំង​ណាស់​នៅ​ពេល​ពួកគាត់​​ចាប់​ផ្ដើម​​ជជែក​គ្នា។ ការ​ផ្ដល់​តម្លៃ​ឲ្យ​គ្នា​ទៅវិញ​ទៅមក​លើ​ករណី​​មួយ​ចំនួន​ដែល​ជា​​​ទុន​ក្នុង​ការ​កសាង​ទំនុក​ចិត្ត​រវាង​បុគ្គល និង​បុគ្គល​ក៏​ដូចជា​​ស្ថាប័ន និង​ស្ថាប័ន​ដែរ»​។ នេះ​បើ​តាម​ការ​កត់សម្គាល់​របស់​លោក Rene Gradwohl។

លោក ខៀវ សុភ័គ អ្នក​នាំពាក្យ​របស់​ក្រសួង​មហាផ្ទៃ​ដែល​បាន​ចូលរួម​ដំណើរ​ទស្សនកិច្ច​នោះ និង​ក្នុង​នាម​មន្រី្ត​សាធារណៈ​របស់​រដ្ឋាភិបាល​បាន​​មាន​ប្រសាសន៍​ប្រាប់​ភ្នំពេញ​ប៉ុស្ដិ៍​នៅ​ទីក្រុង​ប៊ែរឡាំង​ថា​ប្រតិភូ​​កម្ពុជា​​ទទួល​បាន​ជោគជ័យ​ដោយ​បាន​ឃើញ​របៀប​សន្ទនា​នយោបាយ​នៅ​អាល្លឺម៉ង់​ប្រកប​ដោយ​ការ​គោរព​គ្នា​ទៅវិញ​ទៅមក។ លោក​ក៏​បាន​សរសើរ​ការ​ប្រើប្រាស់​វោហារស័ព្ទ​របស់​សកម្មជន​បក្ស​ប្រឆាំង​​នៅ​អាល្លឺម៉ង់​ថា​មាន​ភាព​ថ្លៃថ្នូរ ប៉ុន្ដែ​បាន​រិះគន់​វោហារស័ព្ទ​អ្នក​នយោបាយ​​បក្ស​ប្រឆាំង​នៅ​​កម្ពុជា។

លោក សុភ័គ លោក​បាន​ថ្លែង​ថា៖ «[អាល្លឺម៉ង់] ប្រើប្រាស់​ភាសា​ណា​ដែល​នាំ​ឲ្យ​ប្រជាជន​ងាយ​យល់ ប្រជាជន​ចង់​បាន​មិនមែន​ធ្វើការ​សន្យា​មិន​មាន​​ការពិត​​នោះ​ទេ។ ជាទូទៅ​នៅ​ទី​នេះ​គេ​​សន្យា​ជាមួយ​ម្ចាស់​ឆ្នោត​ថា​នឹង​បន្ត​កសាង​ជាតិ​ឲ្យ​រឹត​តែ​ប្រសើរ​ជាង​មុន។ គេ​មិន​បាន​សម្អុយ​បក្ស​​ផ្សេង ឬ​មាន​ចេតនា ប៉ែង​ជើង​ផ្ដួល​​​​គ្នា ឬ​ប្រាប់​ប្រជាជន​ថា​ពេល​​កាន់​អំណាច​នឹង​​ដក​អ្នក​នេះ ទុក​អ្នក​នោះ​ឡើយ»។

លោក បាន​មាន​ប្រសាសន៍​ថា​មេរៀន​មួយ​ដែល​​លោក​​បាន​​រៀន​គឺ​គេ [គណបក្ស​ប្រឆាំង] ​ចង់​បាន​អំណាច​ដែរ តែ​គេ​ចង់​បាន​អំណាច​ក្នុង​បំណង​កសាង​ជាតិ​មិនមែន​ជា​អំណាច​ដើម្បី​ផ្តួលរំលំ​ហើយ​ដើម្បី​ដេញ មិនមែន​អំណាច​ដើម្បី​​ប្រមូល​មក​វិញ​តាម​កំហឹង និង​មហិច្ចតា​របស់​ខ្លួន​ទេ។

លោក​បាន​​ថ្លែង​ថា៖ «ខ្ញុំ​ឃើញ​ថា​នៅ​អាល្លឺម៉ង់​នេះ​ក៏​មាន​បក្ស​ប្រឆាំង​​ដែរ ប៉ុន្ដែ​អ្វី​ដែល​បក្សប្រឆាំង​​នៅ​អាល្លឺម៉ង់​គាត់​ធ្វើ​គឺ​នៅ​ក្នុង​ក្របខ័ណ្ឌ​​លទ្ធិប្រជាធិបតេយ្យ​ពិត​ប្រាកដ។ បក្ស​ប្រឆាំង​​នៅ​អាល្លឺម៉ង់ គេ​មិន​បាន​​ពឹង​ផ្អែក​​ទៅ​លើ​បរទេស​ដាក់​គំនាប​មក​លើ​បក្ស​កាន់​អំណាច​ដូច​បក្ស​ប្រឆាំង​នៅ​កម្ពុជា​ទេ»។ លោក​បាន​បន្ថែម​ថា៖ «យើង​គិត​ថា​បក្ស​ប្រឆាំង​​ណា​​ក៏​ចេះ​សម្អុយ​គេ​ដែរ ក៏​ប៉ុន្តែ​ខុស​ពី​បក្ស​ប្រឆាំង​របស់​យើង ដែល​ចង់​តែ​​លាត​ត្រដាង​ហែក​ទ្រូង​កម្ពុជា​ឲ្យ​បរទេស​ឃើញ»។

Content image - Phnom Penh Post
តំណាងអង្កការ Konrad Andenuaer Stiftung ជួបជាមួយប្រតិភូខ្មែរ។ រូបថត សហការី

ទោះបី​ជា​យ៉ាង​ក៏ដោយ​ទីបំផុត​​អ្នក​នយោបាយ​​​ប្រឆាំង និង​មន្ដ្រី​សាធារណៈ​​របស់​រដ្ឋាភិបាល​កម្ពុជា​ហាក់​បាន​​សន្ទនា​គ្នា​​ប្រកប​ដោយ​ការ​គោរព​គ្នា​ទៅវិញ​ទៅ​មក។ នេះ​បើ​តាម​លោក​ Rene Gradwohl។

លោក​ ខៀវ សុភ័គ ដំបូង​លោក​មាន​ការ​​ស្ទាក់ស្ទើរ​ក្នុង​ការ​សន្ទនា​ជាមួយ​​លោកស្រី មូរ សុខហួរ តំណាងរាស្ត្រ គណបក្ស​សង្គ្រោះ​ជាតិ​តែ​ទី​បំផុត​អ្នក​ទាំង​ពីរ​បាន​សន្ទនា​​ជាមួយ​គ្នា​ដោយ​ក្ដី​សោមនស្ស​រីករាយ។

ឧត្តមសេនីយ៍​ផ្កាយ ៤ រូប​នេះ​បាន​​បញ្ជាក់​ថា៖ «ខ្ញុំ​គិត​ថា​នៅ​ពេល​យើង​​​បរិភោគ​បាយ​​ជាមួយ​គ្នា​ដំបូង​ខ្ញុំ​សឹង​តែ​មិន​ហ៊ាន​និយាយ​រក​គាត់ គាត់​ក៏​សឹង​តែ​មិន​​ហ៊ាន​និយាយ​រក​ខ្ញុំ ក៏​ប៉ុន្ដែ​ធម្មតា​ជាតិសាសន៍​​ខ្មែរ​តែ​មួយ ខ្ញុំ​មាន​ការ​គោរព​គាត់​ក្នុង​នាម​គាត់​ជា​ខ្មែរ។ ​លោក សុភ័គ បាន​បញ្ជាក់​ជំហរ​របស់​លោក​​ថា៖ «ខ្ញុំ​គិត​ថា​វា​គ្មាន​អី​ជា​រនាំង​ក្នុង​ការ​សើច​ដាក់​គ្នា​ទេ ពេល​ណា​យើង​មាន​ពេលវេលា​ជួប​គ្នា យើង​អាច​សើច​ដាក់​គ្នា​បាន។ ការ​សើច​ដាក់​គ្នា​គ្មាន​អ្វី​ខុស​ច្បាប់​ទេ កុំ​ឲ្យ​​តែ​​យើង​ធ្វើ​អ្វី​ខុស​ច្បាប់​ដែល​រដ្ឋាភិបាល​​កម្ពុជា​ហាម»។

អ្នក​នាំពាក្យ​វ័យ ៦៣ ឆ្នាំ ដែល​មាន​បទពិសោធ​ក្នុង​កិច្ចការ​សាធារណៈ​ជាង ២០ ឆ្នាំ​​រូប​នេះ​បាន​ថ្លែង​ថា៖ «យើង​​ត្រូវ​ចាំ​ថា​រាល់​ការ​ជួប​គ្នា​រាល់​ការ​លើក​មតិ​ដែល​ខុស​គ្នា​គឺ​មិនមែន​ជា​​សត្រូវ​នឹង​គ្នា​ទេ នេះ​គឺជា​គោលការណ៍​នៃ​លទ្ធិប្រជាធិបតេយ្យ​មាន​ន័យ​ថា​ម្នាក់​ចង់​សម្លក​កូរ ម្នាក់​ចង់​សម្ល​ប្រហើរ ម្នាក់​ចង់​ឆា​សាច់​គោ ម្នាក់​ទៀត​ចង់​បាន​ទឹក​គ្រឿង...ប៉ុន្ដែ​វា​សុទ្ធតែ​ជា​​អាហារ​ដែល​គ្រប់​គ្នា​ត្រូវ​ការ។ ប្រសិន​បើ​យើង មិន​មាន​លទ្ធភាព​រក​សម្ល​ទាំង​នោះ​ទេ​យើង​​ត្រូវ​ខិតខំ​រួម​គ្នា​ទទួល​ទាន​អាហារ​អ្វី​មួយ​បណ្ដោះអាសន្ន​សិន​ទៅ»។

លោកស្រី មូរ សុខហួរ តំណាងរាស្ត្រ និង​ជា​​អនុប្រធាន​គណបក្ស​សង្គ្រោះ​ជាតិ​ក៏​បាន​ប្រាប់​ភ្នំពេញ​ប៉ុស្ដិ៍​ដែរ​ថា​លោកស្រី​រីករាយ​ដែល​បាន​​សន្ទនា​យ៉ាង​ស្និទ្ធស្នាល​ជាមួយ​មន្ដ្រី​អ្នក​នាំពាក្យ​របស់​ក្រសួង​មហាផ្ទៃ ក្រសួង​ព័ត៌មាន ក្រសួង​បរិស្ថាន និង​ក្រសួង​យុត្តិធម៌។

លោកស្រី សុខហួរ បាន​មាន​ប្រសាសន៍​ថា​អារម្មណ៍​ពេល​មុន និង​ក្រោយ​នៃ​ដំណើរ​ទស្សនកិច្ច​នៅ​អាល្លឺម៉ង់​គឺ​ខុស​គ្នា​ឆ្ងាយ​ណាស់។ ប៉ុន្ដែ​មួយ​សប្ដាហ៍​ជាមួយ​គ្នា​នៅ​ក្រៅ​ប្រទេស​អ្វីៗ​ខុស​ពី​ការ​គិត​របស់​លោកស្រី។

Content image - Phnom Penh Post
លោក ឧត្ដមសេនីយ័ឯក ខៀវ សុភគ្រ (មុខ) លោកស្រី អ្នកតំណាងរាស្ដ្រ គណបក្ស CNRP (កណ្ដាល) និង​ លោក អ៊ុក គឹមសេង អ្នកនាំពាក្យក្រសួងព័ត៏មាន ស្ចែងយល់របៀប​ឃោសនាបោះឆ្នោត នៅទៅស្នាក់ការធំគណបក្ស CUD។

លោកស្រី​ថ្លែង​ថា៖ «ខ្ញុំ​ឃើញ​ថា​យើង​គោរព​គ្នា​ក្នុង​នាម​ជា​ខ្មែរ​និយាយ​​គ្នា​ក្នុង​ភាសា​អ្នក​ប្រជាធិបតេយ្យ។ យើង​មិន​ភ្លេច​ថា​ជំហរ​របស់​យើង​ក្នុង​របៀប​ដឹកនាំ​ប្រទេស​ខុសៗ​គ្នា​យើង​មិន​ភ្លេច​ទេ អាហ្នឹង​ច្បាស់​ណាស់​តែ​​យើង​គោរព​គ្នា»។

អ្នក​តំណាងរាស្ដ្រ​របស់​គណបក្ស​ប្រឆាំង​រូប​នេះ​បាន​ថ្លែង​ថា​លោកស្រី​រំពឹង​​​អស់​រយៈពេល​រាប់​ឆ្នាំ​ហើយ​ដើម្បី​ឲ្យ​មាន​វប្បធម៌​សន្ទនា​បែប​នេះ​ និង​ក្នុង​កម្រិត​នេះ​ឡើង​ទៅ​រហូត​ដល់​កម្រិត​​កំពូល​ដែល​ជា​ការ​សន្ទនា​មាន​អ្នក​សារព័ត៌មាន​ជា​សាក្សី។

លោកស្រី មូរ សុខហួរ និង​នាយឧត្តម​សេនីយ៍ ខៀវ សុភ័គ មិន​ដែល​ស្គាល់​គ្នា ឬ​និយាយ​រក​គ្នា​ពី​មុន​​​ឡើយ។ ប៉ុន្ដែ​ការ​​ជួប​ពិភាក្សា​គ្នា​បុគ្គល​ទាំង​ពីរ​ការ​ចង​ចិត្ត​គ្នា​យ៉ាង​ល្អ គួរ​ឲ្យ​កត់សម្គាល់។

លោកស្រី​បាន​បញ្ជាក់​ថា៖ «ពី​មុន​​មិន​ដែល​ស្គាល់​គាត់​ទេ តែ​ដឹង​ថា​គាត់​ជា​អ្នក​នាំពាក្យ​ក្រសួង​មហាផ្ទៃ​គាត់​និយាយ​​ពាក្យ​ធ្ងន់ៗ​ចំពោះ​សង្គ្រោះ​ជាតិ​គាត់​និយាយ​ពាក្យ​ធ្ងន់ៗ​ចំពោះ មីង [សុខហួរ] ណាស់។ តែ​មីង​គិត​ថា​ថ្ងៃ​ណា​មួយ​ខ្ញុំ​នឹង​ជួប​លោក ខៀវ សុភ័គ ដោយ​ការ​គោរព ខ្ញុំ​យល់​ថា​ប្រហែល​ជា​មិនមែន​ជា​ចិត្ត​របស់​គាត់​ទេ គាត់​និយាយ​តាម​គោលការណ៍​ប៉ុណ្ណោះ»។

លោកស្រី​ថ្លែង​ថា៖ «ក្នុង​រយៈពេល ៥ - ៦ ថ្ងៃ​នេះ យើង​ទៅ Gym ជាមួយ​គ្នា​មួយ​ថ្ងៃ​ញ៉ាំបាយ​បី​ពេល​ជាមួយ​គ្នា ខ្ញុំ​ឃើញ​កាយ​​វិការ និង​ពាក្យ​សម្ដី​របស់​គាត់​ជា​ពាក្យ​សម្ដី​ជា​អ្នក​ចេះដឹង ថ្លៃថ្នូរ គោរព ហើយ​ចិត្ត​គាត់​ស្រឡាញ់​ជាតិ​គាត់​មែន។ គាត់​មាន​ការ​ឈឺចាប់ ឯ​យើង​ក៏​មាន​ការ​ឈឺចាប់​ដែរ»។

បើ​តាម​លោក អ៊ុក គឹមសេង មន្ដ្រី​អ្នក​នាំពាក្យ និង​ជា​អនុរដ្ឋលេខាធិការ​ក្រសួង​ព័ត៌មាន​ដែល​មាន​វត្តមាន​ក្នុង​ដំណើរ​ទស្សនកិច្ច​ដែរ​នោះ​បាន​​ថ្លែង​ថា​លោក​មាន​ការ​ភ្ញាក់ផ្អើល​ចំពោះ​ឥរិយាបថ​របស់​លោកស្រី មូរ សុខហួរ ដែល​រីករាយ រាក់ទាក់ យោគយល់ និង​បាន​ទទួល​ស្គាល់​ការពិត​ថា​គណបក្ស​របស់​លោកស្រី​បាន​ប្រព្រឹត្ត​ខុស​ឆ្គង​ដែល​មិន​គួរ​មាន​មួយ​ចំនួន​នាពេល​កន្លង​មក។

លោក គឹមសេង ថ្លែង​ថា៖ «សម្រាប់​ខ្ញុំ ខ្ញុំ​មិន​ដែល​បាន​ជួប​ប្រាស្រ័យ​ទាក់ទង​​ការងារ​ទោះ​ជា​ឯកជន​ក្ដី ជា​ផ្លូវការ​ក្ដី​ជាមួយ​លោក​ជំទាវ មូរ សុខហួរ ទេ ប៉ុន្ដែ​សម្រាប់​ទស្សនកិច្ច​នៅ​ពេល​នេះ​ខ្ញុំ​មើល​ឃើញ​គាត់ មាន​ការ​​សប្បាយ​រីករាយ​ដោយ​មាន​ឱកាស​​បាន​​ជួប​​ប្រាស្រ័យ​ជាមួយ​មន្ដ្រី​រដ្ឋាភិបាល»។

លោក គឹមសេង បាន​បន្ត​ថា​លោកស្រី មួ សុខហួរ មាន​ជំហរ​ក្នុង​ការ​រៀបចំ​ទំនាក់​ទំនង​ល្អ​ជាមួយ​គ្នា​តាមរយៈ​កិច្ចការ​សាធារណៈ​នេះ​គឺជា​កិច្ចការ​​មួយ​ដ៏ល្អ​ដើម្បី​អាច​បញ្ចៀស​បាន​ប្រសិន​បើ​មាន​ការ​យល់​ច្រឡំ​ណា​មួយ​កើតឡើង៕

0

Comments

Please, login or register to post a comment

ព័ត៌មានពាក់ព័ន្ធ