Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្មករ​ក្រុមហ៊ុន ខេស៊ីមិន ២០០ នាក់​ធ្វើ​កូដកម្ម

កម្មករ​ក្រុមហ៊ុន ខេស៊ីមិន ២០០ នាក់​ធ្វើ​កូដកម្ម

20140409_04
កម្មករក្រុមហ៊ុនខេស៊ីមិន ធ្វើកូដកម្មមិនធ្វើការម្សិលមិញ រូប សហការី

កំពតៈ កម្មករ​ប្រមាណ​ជាង ២០០ នាក់​ពី​ក្រុមហ៊ុន​ចំនួន ១៩ ដែល​ម៉ៅការ​ផលិត​ស៊ីម៉ងត៍ ឲ្យ​ក្រុមហ៊ុន ខេស៊ីមិន នៅ ខេត្ត​កំពត កាល​ពី​ម្សិលមិញ​បាន​ធ្វើ​កូដកម្ម​នៅ​ក្រៅ​ក្រុមហ៊ុន ទាមទារ​ឲ្យ​ថៅកែ​ដោះស្រាយ​បញ្ហា​ការ​រើស​អើង​ចំពោះ​សហជីព​និង​សុំ​ឲ្យ​មាន​លក្ខខណ្ឌ​ការងារ​មួយ​ចំនួន​ប្រសើរ​ឡើង។

លោក ធី យ៉ាន់ អគ្គ​លេខា​សហព័ន្ធ​សហជីព​កម្មករ​សំណង់​និង​ព្រៃឈើ​បាន​ថ្លែង​ឲ្យ​ដឹង​ថា បញ្ហា​រើស​អើស​សហជីព​និង​បណ្តេញ​សហជីព​កើត​ឡើង​តាំង​តែ​ពី ឆ្នាំ​២០១០ មក​រហូត​មក​ទល់​ពេល​នេះ​ក្រុមហ៊ុន​មិន​បាន​អនុវត្ត​តាម​ក្រុម​ប្រឹក្សា​ធម្មនុញ្ញ និង​តុលាការ​ទេ​ជា​ការ​ធ្វើ​ឲ្យ​កម្មករ​កើត​ទុក្ខ​មិន​សុខ​ចិត្ត និង​ទាមទារ​លក្ខខណ្ឌ​ការងារ​មួយ​ចំនួន​ជា​ពិសេស​ទាមទារ​ដំឡើង​ប្រាក់​ឈ្នួល ១៣០ ដុល្លារ​ក្នុង​មួយ​ខែ។

លោក ឈុន ពៅ និង​លោក ទេព ម៉ៅ ជា​តំណាង​សហព័ន្ធ​សហជីព​កម្មករ​សំណង់​ត្រូវ​ក្រុមហ៊ុន​បណ្តេញ​ចេញ​ចាប់​តាំង​ពី ឆ្នាំ​២០១០ ខណៈ​ក្រុម​ប្រឹក្សា​អាជ្ញា​កណ្តាល​សម្រេច​ឲ្យ​ក្រុមហ៊ុន​ទទួល​ពួក​គេ​ចូល​ធ្វើ​ការ​វិញ​តែ​ក្រុមហ៊ុន​នៅ​តែ​មិន​អនុវត្ត។

លោក​បន្ត​ថា៖ «ពួក​គេ​ទាមទារ​ប្រាំ​ចំណុច​លើ​រឿង​សហជីព​លក្ខខណ្ឌ​ការងារ​ទាមទារ​ប្រាក់​ខែ ១៣០ ដុល្លារ​គោរព​លក្ខខណ្ឌ​ការងារ​មួយ​ចំនួន​ដូចជា ប្រាក់​ឈ្នួល​នៅ​ថ្ងៃ​ឈប់​សម្រាក​និង​មិន​តម្រូវ​ឲ្យ​ស្រ្តី​ធ្វើ​ការ​នៅ​កន្លែង​ខ្ពស់​ជាដើម»។

អ្នក​ស្រី ចាន់ ចាន់ថា អាយុ ៣០​ឆ្នាំ ជា​កម្មករ​ក្រុមហ៊ុន​បាន​ថ្លែង​ថា ខាង​ផ្នែក​កម្មករ​ជា​ស្រ្តី​ទាម​ទារ​ឲ្យ​ក្រុមហ៊ុន​បញ្ឈប់​ឲ្យ​កម្មករ​ជា​ស្រ្តី​ធ្វើ​ការ​នៅ​កន្លែង​ខ្ពស់​និង​មាន​ប្រាក់​ឈ្នួល​នៅ​ពេល​កម្មការិនី​ឈប់​សម្រាក​ឆ្លង​ទន្លេ​ជាដើម។

ចំណែក​ឯ​កម្មករ​ម្នាក់​ទៀត​ឈ្មោះ ប៉ូ នី អាយុ ២៩​ឆ្នាំ បាន និយាយ​ថា ពួក​យើង​ទាមទារ​កុំ​ឲ្យ​ក្រុមហ៊ុន​រើសអើង​ដល់​សហជីព​ក្នុង​ក្រុមហ៊ុន និង​ទាមទារ​ដំឡើង​ប្រាក់​ខែ ១៣០ ដុល្លារ​ក្នុង ១ ខែ។ កម្មករ​រូប​នេះ​បន្ត​ថា «យើង​ធ្វើ​ការ​នៅ​កន្លែង​សំណង់​យើង​ទាមទារ​ឲ្យ​ក្រុមហ៊ុន​អនុវត្ត លក្ខខណ្ឌ​ការងារ​មួយ​ចំនួន​តាម​ច្បាប់ ហើយ​យើង​ត្រូវ​ការ​សហជីព​ក្នុង​ក្រុមហ៊ុន​ដើម្បី​ការពារ​សិទ្ធិ​របស់​ពួក​យើង»។

អ្នក​គ្រប់​គ្រង​ក្រុមហ៊ុន ខេស៊ីមិន មិន​អាច​ស្វែង​រក​ការ​អត្ថាធិប្បាយ​បាន​ទេ​ពី​ម្សិលមិញ។

កូដកម្ម​របស់​កម្មករ​ក្រុមហ៊ុន ខេស៊ីមិន នេះ​កង​កម្លាំង​សមត្ថកិច្ច​បាន​ចុះ​មក​រក្សា​សណ្តាប់ធ្នាប់​ផង​ដែរ តែ​មិន​មាន​អំពើ​ហិង្សា​កើត​ឡើង​ទេ៕

0

Comments

Please, login or register to post a comment