Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​សម្រេច​សង្គ្រោះ ឬ​រំលាយ​ CNRP គឺ​ធ្លាក់​លើ​ដៃ​ចៅក្រម​តុលាការ​កំពូល​នៅ​ថ្ងៃ​ស្អែក​នេះ

Content image - Phnom Penh Post
ចរាចរណ៍​ឆ្លង​កាត់​មុខ​ស្ថាប័ន​តុលាការ​កំពូល ក្បែរ​ព្រះ​បរម​រាជ​វាំង កាល​ពី​ខែ​មុន។ ហុង មិនា

ការ​សម្រេច​សង្គ្រោះ ឬ​រំលាយ​ CNRP គឺ​ធ្លាក់​លើ​ដៃ​ចៅក្រម​តុលាការ​កំពូល​នៅ​ថ្ងៃ​ស្អែក​នេះ

ភ្នំពេញៈ ការ​សម្រេច​ដើម្បី​សង្គ្រោះ ឬ​រំលាយ​គណបក្ស​សង្គ្រោះ​ជាតិ​នឹង​ធ្លាក់​លើ​ដៃ​ចៅក្រម​តុលាការ​កំពូល​នៅ​ថ្ងៃ​ស្អែក (ថ្ងៃព្រហស្បតិ៍ ទី ១៦ វិច្ឆិកា) នេះ ខណៈ​ដែល​ចៅក្រម​គឺជា​សមាជិក​នៅ​ក្នុង​គណៈកម្មាធិការ​កំពូល​បំផុត​មួយ​របស់​គណបក្ស​ប្រជាជន​កម្ពុជា និង​ដែល​មាន​ទំនាក់​ទំនង​ជិតស្និទ្ធ​ជាមួយ​លោក​នាយក​រដ្ឋមន្ត្រី ហ៊ុន សែន អស់​រយៈពេល​ជាង​ ៣ ​ទសវត្សរ៍​មក​ហើយ​នោះ​។

ប្រធាន​តុលាការ​កំពូល​លោក ឌិត មន្ទី ដែល​ឈាន​ចូល​ដល់​វ័យ ៧៦ ឆ្នាំ​នៅ​ក្នុង​ថ្ងៃ​នេះ​គឺ​កំពុង​ស្ថិត​នៅក្នុង​គណៈកម្មាធិការ​កណ្តាល​ដ៏មាន​ឥទ្ធិពល​បំផុត​មួយ​របស់​គណបក្ស​ប្រជាជន​កម្ពុជា​ហើយ​ក៏​ជា​ផ្នែក​មួយ​នៃ​ក្រុម​ជំនួយ​ដែល​ត្រូវ​បាន​ជឿ​ទុក​ចិត្ត​បំផុត និង​ជា​អ្នក​ដែល​បាន​អម​ដំណើរ និង​ផ្តល់​ប្រឹក្សា​ដល់​លោក ហ៊ុនសែន​។

នៅ​ក្នុង​រយៈពេល​ ១៩ ឆ្នាំ​ចាប់​តាំងពី​តុលាការ​កំពូល​បាន​ស្ថិត​នៅ​ក្រោម​ការ​ដឹកនាំ​​របស់​លោក មន្ទី ក្រុម​អ្នក​វិភាគ​បាន​និយាយ​ថា តុលាការ​នេះ​បាន​បរាជ័យ​ក្នុង​ការ​បង្ហាញ​ពី​ឯករាជភាព​របស់​ខ្លួន​ចេញ​ពី​លោក​ ហ៊ុន សែន និង​គណបក្ស​ប្រជាជន​ដូចជា​ការ​លើក​ឡើង​អំពី​ករណី​ផ្តន្ទាទោស បទ​បរិហារកេរ្តិ៍​ប្រឆាំង​នឹង​មេដឹកនាំ​គណបក្ស​ប្រឆាំង​គឺ​លោក សម រង្ស៊ី និង​លោកស្រី មូរ សុខហួរ ​ជាដើម​។ ​

លោក យឿង សុធារ៉ា អ្នក​ប្រឹក្សា​ផ្នែក​ច្បាប់ នៅ​អង្គការ​ឃ្លាំ​មើល​ការ​បោះឆ្នោត ខុម ហ្វ្រែល បាន​ថ្លែង​ថា​៖ «​ទស្សនៈ​ជាទូទៅ​មកពី​សាធារណជន និង​សហគមន៍​អន្ដរជាតិ​ចំពោះ​តុលាការ​នេះ​គឺ​ថា ពួកគេ​មិន​បាន​អនុវត្ត​ដោយ​គ្មាន​ភាព​លម្អៀង និង​ឯករាជ្យ​នោះ​ទេ​ជាពិសេស​ទាក់ទង​ទៅ​នឹង​រឿង​នយោបាយ​»​។

លោក​បន្ត​ថា​៖ «​អ្នក​អាច​អះអាង​ខ្លួនឯង​ថា អព្យាក្រឹត ប៉ុន្តែ​ប្រសិន​បើ​សាធារណជន​ដឹង​ថា​អ្នក​ជា​សមាជិក​របស់​គណបក្ស​កាន់​អំណាច​នោះ​សាធារណជន​នឹង​មិន​ទុកចិត្ត​អ្នក​ទេ​»​។

នាយិកា​ប្រតិបតិ្ត​មជ្ឈមណ្ឌល​សិទ្ធិមនុស្ស​កម្ពុជា​លោកស្រី ចក់ សុភាព ថ្លែង​តាម​អ៊ីមែល​ថា​៖ «​អ្នក​អាច​រាប់​បាន​គឺ​តិចតួច​ណាស់​នៃ​ការ​សម្រេច​របស់​តុលាការ​កំពូល​ដែល​បាន​ប្រឆាំង​ទៅ​នឹង​បំណង​ប្រាថ្នា​មេដឹកនាំ​នយោបាយ​របស់​ប្រទេស​...»​។ «​វា​ថែម​ទាំង​ជា​បទល្មើស​ព្រហ្មទណ្ឌ​ថែម​ទៀត​ចំពោះ​ការ​រិះគន់​សេចក្តី​សម្រេច​របស់​តុលាការ​នៅ​ក្នុង​ប្រទេស​កម្ពុជា​ដែល​ធ្វើឱ្យ​ប៉ះពាល់​ដល់​ការ​ពិភាក្សា​ជា​សាធារណៈ​អំពី​លទ្ធភាព​នៃ​ការ​គ្រប់គ្រង​នយោបាយ​លើ​តុលាការ​»​។

លោក មន្ទី ដែល​ក្រុម​អ្នក​ប្រវត្តិសាស្ត្រ និង​ក្រុម​អ្នក​វិភាគ​សុទ្ធ​តែ​បាន​ស្គាល់​ថា ជា​បុគ្គល​មួយ​រូប​ដែល​មាន​លក្ខណៈ​ឯកជន បើ​ទោះបី​ជា​ឋានៈ​ដ៏​មាន​ឥទ្ធិពល​របស់​លោក​នៅ​ក្នុង​តុលាការ​កំពូល​ក្តី​ហើយ​លោក​គឺជា​អតីត​កម្មាភិបាល​រណសិរ្ស​សាមគ្គី​សង្គ្រោះ​ជាតិ​កម្ពុជា​ដែល​បាន​ជួយ​ផ្តួលរំលំ​របប​ប៉ុលពត​នៅ​ឆ្នាំ​ ១៩៧៩​។

Content image - Phnom Penh Post
ក្រាហ្វិក​បង្ហាញ​ពី​ចៅក្រម​ដែល​សម្រេច​ជោគ​វាសនា​គណបក្ស​សង្រ្គោះ​ជាតិ​​ជា​​សមាជិក​ក្នុង​គណៈកម្មាធិការ​កំពូល​បំផុត​មួយ​របស់​គណបក្ស​ប្រជាជន​កម្ពុជា។ រូបថត ភ្នំពេញ ប៉ុស្តិ៍

យោង​តាម​លោក Sebastian Strangio ដែល​ជា​អ្នក​កាសែត និង​ជា​អ្នកនិពន្ធ​សៀវភៅ Hun Sen's Cambodia បាន​ឲ្យ​ដឹង​ថា​បន្ទាប់មក​គាត់​បាន​ក្លាយ​ទៅ​ជា​អនុប្រធាន​របស់​លោក ហ៊ុន សែន នៅ​ក្នុង​ក្រសួង​ការបរទេស​។

លោក Strangio បាន​ថ្លែង​តាមរយៈ​អ៊ីមែល​ថា​៖ «​លោក​ មន្ទី គឺជា​មនុស្ស​ម្នាក់​ក្នុង​ចំណោម​ក្រុម​ជំនួយការ​ដែល​បាន​អម​ដំណើរ​ និង​ផ្តល់​ប្រឹក្សា​ដល់​លោក ហ៊ុន សែន នៅ​ក្នុង​ដំណើរ​ទស្សនកិច្ច​ទៅ​បរទេស​លើក​ដំបូងៗ​ក្នុង​នាម​ជា​រដ្ឋមន្ត្រី​ការបរទេស​ដែល​ភាគច្រើន​បាន​បន្ត​កាន់​តំណែង​ខ្ពស់​នៅ​ក្នុង​រដ្ឋាភិបាល​»​។

នៅ​ក្នុង​ឆ្នាំ​ ១៩៩១ លោក​ មន្ទី គឺជា​មេដឹកនាំ​ម្នាក់​ក្នុង​​ចំណោម​ ៥ ​នាក់​ដែល​បាន​ចូលរួម​ជាមួយ​លោក​នាយក​រដ្ឋមន្ត្រី​នៅ​ទីក្រុង​ប៉ារីស​ដើម្បី​ចុះ​ហត្ថលេខា​លើ​សន្ធិសញ្ញា​សន្តិភាព​ទីក្រុង​ប៉ារីស​រួម​ជាមួយ​សម្តេច នរោត្តម សីហនុ លោក អ៊ឹម ឈុនលឹម លោក​ អៀង មូលី និង លោក​ ខៀវ សំផន​។

លោក មន្ទី ត្រូវ​បាន​តែងតាំង​ជា​ប្រធាន​តុលាការ​កំពូល​នៅ​ក្នុង​ឆ្នាំ​ ១៩៩៨ និង​បាន​កាន់​តំណែង​ចាប់​តាំងពី​ពេល​នោះ​មក ទោះបី​ជា​ច្បាប់​បាន​ចែង​ថា ចៅក្រម​ត្រូវ​ចូលនិវត្តន៍​នៅ​អាយុ ៦០ ឆ្នាំ​ក្តី​។ នៅ​លើ​គេហទំព័រ​របស់​គណបក្ស​ប្រជាជន​ឈ្មោះ​របស់​លោក ឌិត មន្ទី ត្រូវ​បាន​ដាក់​នៅ​លេខ​រៀង​ទី​ ១៥ នៃ​សមាជិក​គណៈកម្មាធិការ​កណ្តាល​ដ៏មាន​ឥទ្ធិពល​របស់​គណបក្ស​។

លោក Strangio ថ្លែង​តាម​អ៊ីមែល​ថា​៖ «​នេះ​គឺជា​ឧទាហរណ៍​ធម្មតា​មួយ​នៃ​ភាព​មិន​ច្បាស់លាស់​របស់​គណបក្ស​ប្រជាជន​អំពី​ព្រំដែន​រវាង​គណបក្ស និង​រដ្ឋ ហើយ​វា​គឺជា​ការ​លុប​បំបាត់​ចោល​នូវ​ព្រំដែន​រវាង​អំណាច​នីតិប្រតិបត្តិ​អំណាច​នីតិប្បញ្ញត្តិ​ និង​អំណាច​តុលាការ​»​។

លោក​​ មន្ទី មិនមែន​ជា​មនុស្ស​តែ​ម្នាក់​នៅ​ក្នុង​តុលាការ​កំពូល​ដែល​មាន​ទំនាក់​ទំនង​ជិតស្និទ្ធ​ជាមួយ​គណបក្ស​កាន់​អំណាច​នោះ​ទេ​។

អនុប្រធាន​តុលាការ​កំពូល លោក ឃឹម ប៉ុណ្ណ ក៏​មាន​នៅក្នុង​បញ្ជី​គណៈកម្មាធិការ​មជ្ឈិមបក្ស​ និង​ក៏​ជា​អតីត​អនុរដ្ឋមន្ត្រី​ក្រសួង​មហាផ្ទៃ​ក្នុង​ទសវត្សរ៍​ទី​ ៩០ ដែរ ខណៈ​ដែល​អនុប្រធាន​ម្នាក់​ទៀត​គឺ​លោក ជីវកេង គឺជា​អតីត​ទីប្រឹក្សា​របស់​លោក​ឧបនាយក​រដ្ឋមន្ត្រី សុខ អាន ដែល​ជា​សម្ព័ន្ធមិត្ត​ដ៏ជិតស្និទ្ធ​បំផុត​មួយ​របស់​លោក ហ៊ុន សែន​។

លោកស្រី​ ជា លាង អគ្គព្រះរាជអាជ្ញា​តុលាការ និង​ជា​សហព្រះរាជអាជ្ញា​ជាតិ​នៅ​សាលាក្តី​ខ្មែរ​ក្រហម​គឺជា​ក្មួយ​ស្រី​របស់​លោក សុខ អាន​។

លោកស្រី​ត្រូវ​បាន​គេ​រិះគន់​ជាទូទៅ​នៅ​ពេល​ប្រឆាំង​ទៅ​នឹង​ការ​នាំ​ខ្សែ​បណ្តាញ​គណបក្ស​ប្រជាជន​មក​កាត់​ទោស​នៅ​សាលាក្តី​ខ្មែរ​ក្រហម​។

មេធាវី​ជាច្រើន​នាក់​ដែល​ភ្នំពេញ​ប៉ុស្តិ៍​បាន​ទាក់ទង​ពួកគេ​សុទ្ធ​តែ​បាន​បដិសេធ​ធ្វើ​អត្ថាធិប្បាយ​សូម្បី​នៅក្នុង​លក្ខខណ្ឌ​អនាមិក​ក្តី​ដោយសារ​ពួកគេ​ភ័យ​ខ្លាច​មាន​ការ​សងសឹក​អំពី​គណបក្ស​កាន់អំណាច​ដោយ​បាន​លើក​ឡើង​អំពី​បរិយាកាស​នយោបាយ​កាន់តែ​ធ្ងន់ធ្ងរ​នៅ​ក្នុង​ប្រទេស​។

អតីត​ព្រះរាជអាជ្ញា​តុលាការ​កំពូល​ម្នាក់​ដែល​បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ឲ្យ​ដឹង​ថា​៖ «​គណបក្ស​សង្គ្រោះជាតិ​មិន​ដែល​ឈ្នះ​ក្តី​នៅ​តុលាការ​នោះ​ទេ​គឺ​រួម​ទាំង​តុលាការ​សាលាដំបូង តុលាការ​សាលាឧទ្ធរណ៍ និង​តុលាការ​កំពូល​ដោយសារ​តែ​បញ្ជា​គឺ​ចេញ​មកពី​អ្នក​នយោបាយ​កំពូលៗ​។ មេដឹកនាំ​វ័យក្មេង​មិន​អាច​ជំទាស់​ពួកគេ​បាន​ទេ​... គណបក្ស​សង្គ្រោះ​ជាតិ​ចាញ់​ជា​រៀងរហូត​»​។ «​តើ​អ្នក​អាច​ធ្វើឱ្យ​ខាង​ខ្លួន​ចាញ់​យ៉ាង​ម៉េច​កើត​? ហើយ​នេះ​វា​ធ្វើ​ឱ្យ​ប៉ះពាល់​ដល់​សេចក្តី​សម្រេច​របស់​ចៅក្រម ១០០ ​ភាគរយ​»​។

មេធាវី​ម្នាក់​ទៀត​ដែល​បដិសេធ​ប្រាប់​ឈ្មោះ​បាន​ថ្លែង​ថា​តុលាការ​កំពូល​ហាក់​មាន​ឯករាជភាព​តិចតួច​ជាង​តុលាការ​ថ្នាក់​ទាប ប៉ុន្តែ​នៅ​តែ​ស្ថិត​នៅ​ក្រោម​ការ​គ្រប់គ្រង​របស់​គណបក្ស​ប្រជាជន​នៅ​ឡើយ​។ ​«​នៅ​ក្នុង​ប្រទេស​កម្ពុជា​វា​ជា​ការ​សន្មត​អំពី​កំហុស​មិនមែន​ជា​ការ​សន្មត​អំពី​ការ​គ្មាន​កំហុស​ទេ​»​។

ក្រុម​អ្នក​ជំនាញ​អន្តរជាតិ​បាន​និយាយ​ថា​ប្រព័ន្ធ​តុលាការ​កម្ពុជា​ក៏​បាត់បង់​នូវ​ការ​ការពារ​ដូចជា​ការ​ការពារ​ថវិកា​ពី​ការ​ជ្រៀតជ្រែក​ពី​អ្នក​ដឹកនាំ​ និង​ការ​ការពារ​សុវត្ថិភាព​សម្រាប់​ដំណើរការ​តែងតាំង​ចៅក្រម​ជាដើម​។ ក្រោម​ការ​កែទម្រង់​ដែល​បាន​អនុម័ត​កាលពី​ឆ្នាំ​ ២០១៤ រដ្ឋមន្ត្រី​ក្រសួង​យុត្តិធម៌ លោក អង្គ វង្សវឌ្ឍានា ដែល​ត្រូវ​បាន​លោក ហ៊ុន សែន ចាត់​តាំង​ឲ្យ​គ្រប់គ្រង​ថវិកា​របស់​តុលាការ និង​ឧត្ដម​ក្រុមប្រឹក្សា​នៃ​អង្គចៅក្រម​ដែល​ជា​អ្នក​ទទួល​ខុសត្រូវ​ក្នុង​ការ​​តែងតាំង​ និង​ពិន័យ​ចៅក្រម​ និង​ព្រះរាជអាជ្ញា​រួម​ទាំង​អ្នក​ដែល​នៅ​តុលាការ​កំពូល​ផង​ដែរ​។

Bjorn Dressel អ្នក​ជំនាញ​ខាង​នយោបាយ និង​ប្រព័ន្ធ​យុត្តិធម៌​ប្រចាំ​អាស៊ី​អាគ្នេយ៍​នៅ​សាកលវិទ្យាល័យ​ជាតិ​អូស្ត្រាលី​បាន​ថ្លែង​ថា​ការ​ខ្វះ​ការ​ការពារ​ស្ថាប័ន​ និង​ការ​ខ្វះ​វប្បធម៌​មិន​លម្អៀង​ធ្វើឲ្យ​ចៅក្រម​ក្នុង​ប្រទេស​កម្ពុជា​ក្លាយ​ជា​«​អាវុធ​នយោបាយ​»​។ «​វា​(​តុលាការ​) ​ក្លាយ​ជា​ឧបករណ៍​មួយ​នៅ​ក្នុង​ដៃ​នៃ​របប​នេះ​ដើម្បី​រក្សា​អំណាច​»​។

«​អ្នក​មិន​ពឹង​ផ្អែក​លើ​ការ​ប្រើប្រាស់​កម្លាំង​នៅក្នុង​អារម្មណ៍​ពិត​មិន​ប្រើ​កងទ័ព ឬ​នគរបាល​។ ពិត​ណាស់​អ្វី​ដែល​អ្នក​កំពុង​ប្រើ​គឺ​ស្ថាប័ន​នយោបាយ​ស្រប​ច្បាប់​ដូចជា​តុលាការ​ដើម្បី​ដើរតួ​ជំនួស​អ្នក​។ វា​ធ្វើឲ្យ​អ្នក​មាន​អារម្មណ៍​ថា​ជា​លក្ខណៈ​ស្រប​ច្បាប់​»​។ «​ភាព​ស្មុគស្មាញ​នៃ​ច្បាប់​គឺ​ខ្សោយ​ណាស់​របប​នេះ​គឺ​រឹង​មិន​ងាយ​កែ​ទេ ហិង្សា​ទៅ​លើ​សមាជិក​គណបក្ស​ប្រឆាំង និង​ការ​រួម​បញ្ចូល​ចៅក្រម និង​អំពើ​ពុករលួយ​កើត​មាន​ច្រើន​គឺជា​បញ្ហា​ដែល​ត្រូវ​ពិភាក្សា​»​។

«​តើ​អាច​បំបែក​វដ្ត​នៃ​អភិបាលកិច្ច​អាក្រក់​យ៉ាង​ដូច​ម្តេច​ទៅ​? នោះ​ជា​សំណួរ​ពិបាក​ឆ្លើយ​»​។

ក្រុម​អ្នក​ជំនាញ​ច្បាប់​ក៏​បាន​រិះគន់​អ្នក​ស៊ើប​អង្កេត និង​តុលាការ​ផង​ដែរ​ចំពោះ​ការ​មិន​អើពើ​ស្ទើរ​រាល់​នីតិវិធី​ច្បាប់​ទាំងអស់​នៅ​ក្នុង​សំណុំ​រឿង​នេះ​ដែល​នឹង​ត្រូវ​កាត់ទោស​ជា​ «​សំណុំ​រឿង​គណបក្ស​នយោបាយ​» ​ជា​ជាង​សំណុំ​រឿង​រដ្ឋប្បវេណី​ ឬ​ព្រហ្មទណ្ឌ​។

លោក សុធារ៉ា បាន​ចោទ​សួរ​ថា តើ​តុលាការ​អាច​ដំណើរការ​សំណុំ​រឿង​រំលាយ​គណបក្ស​សង្គ្រោះ​ជាតិ​យ៉ាង​ម៉េច​ទៅ​ប្រសិន​បើ​មិន​ទាន់​បាន​កំណត់​ជា​មុន​ថា លោក កឹម សុខ ប្រធាន​គណបក្ស​នេះ​មាន​ទោស ឬ​អត់​នៅ​ក្នុង​សំណុំ​រឿង​ផ្សេង​ផ្ទាល់​ខ្លួន​របស់​គាត់​។

លោក កឹម សុខា ដែល​ត្រូវ​បាន​ចោទប្រកាន់​ពី​បទ​ក្បត់ជាតិ​គ្រោង​នឹង​ត្រូវ​សាកសួរ​នៅ​មណ្ឌល​កែប្រែ​ត្រពាំងផ្លុង​ក្នុង​ត្បូងឃ្មុំ​នៅ​ថ្ងៃ​ទី​ ២៤ ខែ​វិច្ឆិកា​។

លោក​ សុធារ៉ា ថ្លែង​ថា​៖ «​ពួកគេ​ត្រូវ​តែ​ដំណើរការ​ជាមួយ​សំណុំ​រឿង​របស់​លោក​ កឹម សុខា ជា​មុន​សិន​ពីព្រោះ លោក កឹម សុខា ទទួល​បន្ទុក​គណបក្ស​សង្គ្រោះ​ជាតិ​»​។ «​ប្រសិន​បើ​តុលាការ​មិន​អាច​រកឃើញ​ថា​គាត់​មាន​ទោស​តើ​អាច​រំលាយ​គណបក្ស​បាន​យ៉ាង​ម៉េច​ទៅ​?»​។

អតីត​ព្រះរាជអាជ្ញា​តុលាការ​កំពូល​ដែល​មិន​បញ្ចេញ​ឈ្មោះ​ក៏​ថ្លែង​ផង​ដែរ​ថា​វា​ផ្ទុយ​នឹង​ច្បាប់​ដែល​កាត់ទោស​នរណា​ម្នាក់​ចំពោះ​សកម្មភាព​ដែល​ធ្វើ​ឡើង​ពី​មុន​ពេល​ច្បាប់​ចូល​ជា​ធរមាន​។

ច្បាប់​ស្តីពី​គណបក្ស​នយោបាយ​ដែល​មាន​លក្ខណៈ​ចម្រូង​ចម្រាស​ដែល​គណបក្ស​សង្គ្រោះ​ជាតិ​ត្រូវ​បាន​ចោទប្រកាន់​ថា​បាន​បំពាន​ច្បាប់​នេះ​ត្រូវ​បាន​អនុម័ត​ក្នុង​ខែ​កក្កដា​បួន​ឆ្នាំ​បន្ទាប់ពី​លោក កឹម សុខា បាន​និយាយ​ថា​បាន​ឃុបឃិត​ជាមួយ​បរទេស​ដើម្បី​ «​ផ្តួលរំលំ​រដ្ឋាភិបាល​» ​នៅ​ក្នុង​វីដេអូ​មួយ​ដែល​ជា​ផ្នែក​សំខាន់​នៃ​ភ័ស្តុតាង​របស់​អយ្យការ​។ តាម​ច្បាប់​ស្តីពី គណបក្ស​នយោបាយ​នៅ​ពេល​សេចក្តី​សម្រេច​របស់​តុលាការ​កំពូល​ត្រូវ​បាន​ធ្វើ​ឡើង មិន​អាច​ប្តឹង​សារទុក្ខ​ប្រឆាំង​បាន​ទេ​។

អតីត​ព្រះរាជអាជ្ញា​រូប​នេះ​បន្ត​ថា​៖ «​តុលាការ​ត្រូវ​តែ​ពិចារណា​ដោយ​យក​ចិត្ត​ទុកដាក់​។ សាលដីកា​របស់​តុលាការ​កំពូល​មិន​អាច​សម្រេច​ជា​រឿង​លេងសើច​នោះ​ទេ​»​។

Kingsley Abbott ទីប្រឹក្សា​ច្បាប់​អន្តរជាតិ​ជាន់​ខ្ពស់​សម្រាប់​អាស៊ី​អាគ្នេយ៍ និង​ជា​សមាជិក​នៃ​គណៈកម្មការ​អ្នក​ច្បាប់​អន្តរជាតិ​បាន​ថ្លែង​ថា​ស្តង់ដារ​អន្តរជាតិ​ស្តីពី​ឯករាជភាព​នៃ​តុលាការ​បាន​ចែង​ថា​ដើម្បី​ការពារ​ឯកភាព​ភាព​ និង​ភាព​មិន​លម្អៀង​នៃ​ចៅក្រម​រាល់​ការ​ពាក់ព័ន្ធ​ និង​សកម្មភាព​នយោបាយ​ទាំងអស់ គួរ​តែ​បញ្ឈប់​នៅ​ពេល​ឡើង​កាន់​តំណែង​នៅ​តុលាការ​។ «​ហេតុ​ដូច្នេះ​តួនាទី​របស់​ប្រធាន​ (​តុលាការ​) ​ជា​សមាជិក​នៃ​គណៈកម្មាធិការ​កណ្តាល​របស់​គណបក្ស​ប្រជាជន​កម្ពុជា និង​គណៈកម្មាធិការ​អចិន្រៃ្តយ៍​គឺជា​ក្តីបារម្ភ​យ៉ាង​ធ្ងន់ធ្ងរ​»​។

លោក​បន្ត​ថា​៖ «​ដោយសារ​តួនាទី​ជាន់​ខ្ពស់​របស់​ប្រធាន​តុលាការ​កំពូល នៅ​ក្នុង​គណបក្ស​កាន់​អំណាច​ច្បាស់​ណាស់​នឹង​មាន​ភាព​លម្អៀង​នៅ​ក្នុង​ដំណើរការ​សម្រេច​ដែល​តុលាការ​កំពូល​នឹង​ធ្វើ​សេចក្តី​សម្រេច​អំពី​ស្ថានភាព​របស់​គណបក្ស​ប្រឆាំង និង​សមាជិក​របស់​គណបក្ស​ប្រឆាំង​។ ហេតុ​ដូច្នេះ​ប្រធាន​តុលាការ​គួរ​តែ​ដក​ខ្លួន​ចេញ​ពី​តួនាទី​ណា​មួយ​ពាក់ព័ន្ធ​នឹង​ករណី​នេះ​ហើយ​ចៅក្រម​ដទៃៗ​ទៀត​ដែល​មាន​តំណែង​ស្រដៀង​គ្នា​នៅ​ក្នុង​គណបក្ស​ប្រជាជន​កម្ពុជា​ក៏​គួរ​ដក​ខ្លួន​ផង​ដែរ​»​។

អ្នក​នាំពាក្យ​តុលាការ​កំពូល​លោក​ នៅ មុនីជោតិ បាន​បដិសេធ​ធ្វើ​អធិប្បាយ ប៉ុន្តែ​អ្នក​នាំពាក្យ​ក្រសួង​យុត្តិធម៌​លោក ជិន ម៉ាលីន បាន​ច្រានចោល​ការ​រិះគន់​នេះ​ថា​ជា​ «​ការ​វិភាគ​គ្មាន​មូលដ្ឋាន​»​។

លោក ម៉ាលីន ថ្លែង​ថា​៖ «​កុំ​គ្រាន់តែ​មើល​ទៅ​លើ​ភាព​ជា​សមាជិក​ [​គណបក្ស​] ​របស់​ពួកគាត់​។ សូម​មើល​ទៅ​លើ​យុទ្ធសាស្ត្រ​របស់​ពួកគាត់​នីតិវិធី សេចក្តី​សម្រេច និង​ថា​តើ​ពួកគាត់​ផ្អែក​លើ​ភ័ស្តុតាង​ឬ​អត់ និង​ទឡ្ហីករណ៍​ឬ​អត់​? អ្នក​វិភាគ​មិន​គួរ​វិភាគ​មុន​ពេល​ស្ថានភាព​ [​បញ្ចប់​នោះ​ទេ​] ពួកគេ​គួរ​វិភាគ​បន្ទាប់ពី​ហេតុការណ៍​ទើប​ច្បាស់​»៕ NS /PS

0

Comments

Please, login or register to post a comment

ព័ត៌មានពាក់ព័ន្ធ