Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​ស្រាវជ្រាវ៖ ១​/៥ ​នៃ​ក្រុម​នារី​​បម្រើ​ការ​ក្នុង​ឧស្សាហកម្ម​កម្សាន្ត ធ្លាប់​នឹក​ចង់​ធ្វើ​អត្តឃាត

Content image - Phnom Penh Post
ស្ត្រីបុគ្គលិក​ក្នុង​ភោជនីយដ្ឋាន​មួយ លើក​ស្រាបៀរ​ឲ្យ​ភ្ញៀវ។ ហេង ជីវ័ន

ការ​ស្រាវជ្រាវ៖ ១​/៥ ​នៃ​ក្រុម​នារី​​បម្រើ​ការ​ក្នុង​ឧស្សាហកម្ម​កម្សាន្ត ធ្លាប់​នឹក​ចង់​ធ្វើ​អត្តឃាត

ភ្នំពេញៈ ការ​ស្រាវជ្រាវ​ដែល​ទើប​តែ​នឹង​ត្រូវ​បាន ​បោះ​ពុម្ភ​ផ្សាយ​ កាល​ពី​សប្តាហ៍​មុន បាន​បង្ហាញ​ថា ​ស្ទើរ​តែ​ ១​ ភាគ​ ៥ ​នៃ​ក្រុម​នារី​ដែល​បម្រើ​ការងារ​ក្នុង​ឧស្សាហកម្ម​កម្សាន្ត​ត្រូវ​បាន​រាយការណ៍​ថា ​ធ្លាប់​នឹក​ចង់​ធ្វើ​អត្តឃាត ខណៈ​ដែល​ម្នាក់​នៅ​ក្នុង​ចំនួន​ ១០ ​នាក់​​ធ្លាប់​ប៉នប៉ង​ធ្វើ​អត្តឃាត​ក្នុង​រយៈពេល ៣ ​ខែ ​មុន​ពេល​ដែល​ពួក​គេ​ត្រូវ​បាន​សម្ភាស៍។

អ្នកស្រី​បណ្ឌិត Siyan Yi ដែល​បាន​ដឹក​នាំ​ក្រុម​សិក្សា​ស្រាវជ្រាវ​នេះ​បាន​ឲ្យ​ដឹង​ថា នារី​ដែល​ធ្វើ​ការ​នៅ​ឧស្សាហកម្ម​កម្សាន្ត​ត្រូវ​បាន​កំណត់​រាប់​បញ្ចូល​នូវ​នារី​ដែល​ធ្វើ​ការ​នៅ​ «កន្លែង​កម្សាន្ត​សប្បាយ​នានា រួមមាន​បារ៍ ខារ៉ាអូខេ ភោជនីយដ្ឋាន និង​ក្លិប​រាត្រី​ជាដើម»។

អ្នកស្រី Yi ពន្យល់​ថា​ ឧស្សាហកម្ម​កម្សាន្ត​បាន​រីក​ដុះដាល​យ៉ាង​ខ្លាំង​ បន្ទាប់​ពី​ឆ្នាំ ២០០៨​ នៅ​ពេល​ដែល​ផ្ទះ​បន​ពេស្យាចារ្យ​ជាច្រើន ​នៅ​ក្នុង​ប្រទេស​ត្រូវ​បាន​បិទ។ ​បច្ចុប្បន្ន ទោះ​បី​ជា​ការ​រក​ស៊ី​ផ្លូវភេទ​ភាគច្រើន​ត្រូវ​បាន​ធ្វើ​ឡើង​នៅ​ក្នុង​បារ៍ ឬក្លិប​កម្សាន្ត វា​ពុំ​មែន​មាន​ន័យ​ថា គ្រប់​គ្នា​ដែល​ធ្វើ​ការ​នៅ​ក្នុង​ឧស្សាហកម្ម​កម្សាន្ត​ គឺ​ជា​អ្នក​រកស៊ី​ផ្លូវ​ភេទ​នោះ​ឡើយ។

ក្រុម​ការងារ​របស់​អ្នកស្រី Yi បាន​ធ្វើ​ការ​​សម្ភាស៍​ទៅលើ​នារី​បម្រើ​ការ​ក្នុង​ទី​កន្លែង​កម្សាន្ត​​ចំនួន ៦៥៧ នាក់ នៅ​រាជធានី​ភ្នំពេញ និង​ខេត្ត​សៀមរាប ហើយ​នៅ​ក្នុង​ចំណោម​នោះ ១២៤ នាក់បាន​សារភាព​ថា​ ពួកគេ​បាន​រួម​ភេទ​ជាមួយ​នឹង​អតិថិជន​ជា​ការ​ដោះដូរ​នឹង​ប្រាក់ ឬ​ រង្វាន់​ផ្សេងៗ​ ហើយ ២១ នាក់​បាន​រាយការណ៍​ថា​ អតិថិជន​ទាំង​នោះ​បាន​សុំ​ពុំ​ប្រើ​ស្រោម​អនាម័យ។ ១១៨ នាក់​ធ្លាប់​បាន​​រំលូត​កូន និង ១៤៩ នាក់​មាន​ផ្ទុក​ជម្ងឺ​កាមរោគ។

ការ​សិក្សា​ស្រាវជ្រាវ​នេះ​ក៏​បាន​រក​ឃើញ​ផងដែរ​ពី​ទំនាក់​ទំនង​ទៅ​វិញ​ទៅ​មក​រវាង​ អារម្មណ៍​នៃ​ការ​ភ័យ​ខ្លាច ចំពោះ​ហានិភ័យ​កាន់​តែ​ខ្លាំង​នៃ​ការ​ឆ្លង​មេរោគ​អេដស៍ និង​ការ​កើន​ឡើង​នៃ​ទុក្ខ​កង្វល់​ផ្លូវ​ចិត្ត​របស់​ក្រុម​ស្ត្រី ព្រម​ទាំង​បាន​ឲ្យ​ដឹង​ផងដែរ​ពី​ភស្តុតាង​ដែល​បង្ហាញ​ពី​ទំនាក់​ទំនង​រវាង​សុខភាព​ផ្លូវចិត្ត​មិន​ល្អ​និង​ការ​រក​ស៊ី​ផ្លូវ​ភេទ។

អ្នក​ស្រី គឹម សុផល បុគ្គលិក​ផ្នែក​ផ្សព្វផ្សាយ​របស់​កម្មវិធី SMARTgirl ដែល​ផ្តល់​ការ​ឧបត្ថម្ភ និង​អប់រំ​ទៅ​ដល់​ក្រុម​នារី​ដែល​ធ្វើ​ការ​នៅ​ទី​កន្លែង​កម្សាន្ត ជឿ​ថា កម្រិត​នៃ​ការ​ប៉នប៉ង​ធ្វើ​អត្តឃាត​ខ្ពស់​របស់​ពួកគេ​អាច​នឹង​បណ្តាល​មក​ពី​នារី​ទាំង​នោះ​ត្រូវ​បាន​ភ្ញៀវ​ចាប់​រំលោភ ឬ​ ពុំ​មាន​ប្រាក់​គ្រប់​គ្រាន់​សម្រាប់​ផ្គត់​ផ្គង់​គ្រួសារ។

ការ​សិក្សា​ស្រាវជ្រាវ​របស់​អ្នកស្រី Yi ក៏​បាន​រក​ឃើញ​ដែរ​ថា ពួកគេ​រក​ប្រាក់​ចំណូល​ប្រចាំ​ខែ​ជា​មធ្យម​បាន​ ២២០ ដុល្លារ។

ទោះ​បី​ជា​យ៉ាង​ណា ភាព​តានតឹង​ក្នុង​អារម្មណ៍​នៅ​ក្នុង​ការ​បម្រើ​ការងារ​នៅ​ឧស្សាហកម្ម​កម្សាន្ត មិន​មែន​បណ្តាល​មក​ពី​តែ​វត្តមាន​នៃ​ការ​ផ្តល់​សេវាកម្ម​ផ្លូវ​ភេទ​តែ​មួយ​មុខ​នោះ​ទេ។

ក្រុម​នារី​ធ្វើការ​ក្នុង​កន្លែង​កម្សាន្ត​ចំនួន​​ ១៧០ នាក់​បាន​អះ​អាង​ថា​ ពួកគេ​ត្រូវ​បាន​បង្ខំ​ឲ្យ​ផឹក​ស្រា​នៅ​កន្លែង​ធ្វើការ ដោយ​ជាមធ្យម​ ពួកគេ​ត្រូវ​ស្រវឹង ១៨.៧ ថ្ងៃ​ក្នុង​មួយ​ខែ។

ក្នុង​វ័យ ៥០ ឆ្នាំ កែវ ថា (ឈ្មោះ​អ្នក​ស្រាវជ្រាវ​ដាក់​ឲ្យ) បាន​ធ្វើ​ការ​ក្នុង​វិស័យ​កម្សាន្ត​អស់ ​២០ ឆ្នាំ​មក​ហើយ ដោយ​កាល​ពី​ដំបូង​នាង​ផ្តល់​សេវាកម្ម​ម៉ាស្សាសិច ហើយ​ឥឡូវ​នេះ​ នាង​នៅ​តែ​បម្រើ​សេវា​ស្រើប​ស្រាល​សម្រាប់​អតិថិជន​មួយ​ចំនួន។

នាង​ថា៖ «នៅពេល​ខ្លះ​ ខ្ញុំ​នឹក​ចង់​សម្លាប់​ខ្លួន ក៏ប៉ុន្តែ​រៀងរាល់ពេល​ដែលខ្ញុំ​គិតចង់​ធ្វើ​បែបនេះ ខ្ញុំ​តែ​ងតែ​នឹកឃើញថា​ប្រសិន​ជា​ខ្ញុំ​ស្លាប់​ទៅ តើ​នរណា​នឹង​មើល​ថែ​កូន និង​ឪពុក​ម្តាយ​របស់​ខ្ញុំ?»

បញ្ហា​ទាក់​ទង​នឹង​គ្រួសារ​ គឺជា​ចំណុច​លេចធ្លោ​មួយ​នៅ​ក្នុង​ការ​ស្រាវជ្រា​របស់​អ្នកស្រី Yi។

ជាង​ ១ ភាគ ៣ ​នៃ​ក្រុម​នារី​ដែល​ត្រូវ​បាន​គេ​សិក្សា​បាន​រាយ​ការណ៍​ថា ពួកគេ​ធ្លាប់​ត្រូវ​បាន​គេ​បំពាន​ផ្លូវ​កាយ និង​ពាក្យ​សម្តី កាល​ពី​នៅ​វ័យ​ក្មេង ហើយ ១៩.៥ ភាគរយ​នៃ​ពួកគេ​ធ្លាប់​ត្រូវ​បាន​គេ​បៀត​បៀន​ផ្លូវភេទ។ ក៏​ប៉ុន្តែ ៨៥.៥ ភាគរយ បាន​អះអាងថា ពួកគេ​មាន​អ្នក​ថែរក្សា និង​ការពារ ខណៈ​ដែល ៩០.៣ ភាគរយ​បាន​និយាយ​ថា​ នៅ​ក្រុម​គ្រួសារ​របស់​ពួកគេ​មាន​មនុស្ស​ដែល​ពួកគេ​ស្រលាញ់។

ទាំង កែវ ថា និង​អ្នក​ស្រី​ គឹម សុផល ក៏​ដូចជា​អ្នកស្រី Yi បាន​ទទួល​ស្គាល់​មជ្ឈដ្ឋាន​ការងារ​នៅ​ក្នុង​ឧស្សាហកម្ម​កម្សាន្ត​មាន​ការ​រីក​ចម្រើន​ជាង​មុន​ច្រើន។

អ្នកស្រី Yi ​និយាយ​ថា៖ «មាន​រឿង​ល្អ​ជាច្រើន​ដែល​ត្រូវ​បាន​ធ្វើ​ឡើង ដើម្បី​អន្តរាគមន៍​ក្នុង​កន្លែង​ធ្វើការ។ ក៏ប៉ុន្តែ​ វាអាច​ជា​គំនិត​មួយ​ដ៏​ល្អ ​ប្រសិន​ជា​យើង​ធ្វើ​អ្វី​មួយ ​ដើម្បី​ធ្វើ​ឲ្យ​ស្ថានភាព​កាន់​តែ​ល្អ​ប្រសើរ ដូចជា ការការពារ​ពួកគេ (នារី​ធ្វើ​ការ​ក្នុង​កន្លែង​កម្សាន្ត) ពី​ការ​បង្ខំ​ឲ្យ​ផឹក​ស្រា ផ្តល់​ការ​ប្រឹក្សា និង ការគាំពារ​សិទ្ធិ​របស់​ពួកគេ»៕TN

Jack Davies និង ឡាយ សាមាន

0

Comments

Please, login or register to post a comment

ព័ត៌មានពាក់ព័ន្ធ