Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​សម្រេច​មិន​ជម្លៀស​ពលករ​នៅ​កូរ៉េ​គឺ​ត្រឹម​ត្រូវ

ការ​សម្រេច​មិន​ជម្លៀស​ពលករ​នៅ​កូរ៉េ​គឺ​ត្រឹម​ត្រូវ

130423_05a
ពលការិនីដែលមានបំណងទៅធ្វើការនៅកូរ៉េ តែបានខកខានវិញដោយត្រូវគេបោកប្រាស់ ហេង ជីវ័ន

ព្រៃវែង : ប្រមុខ​រដ្ឋាភិបាល​កម្ពុជា​ប្រកាស​ថា​លោក​បាន​សម្រេច​ចិត្ត​ត្រឹម​ត្រូវ​ក្នុង​ការ​មិន​ធ្វើ​ការ​ជម្លៀស​ពលរដ្ឋ កម្មករ និស្សិត និង​អ្នក​ការទូត​កម្ពុជា​ចេញ​ពី​ប្រទេស​កូរ៉េ​ខាង​ត្បូង​បើ​មិន​ដូច្នោះ​ទេ​កូរ៉េ​នឹង​មិន​បើក​ទី​ផ្សារ​ការងារ​ដល់​កម្ពុជា​តទៅ​ទៀត​ឡើយ​។

នាយក​រដ្ឋ​មន្ត្រី​កម្ពុជា លោក ហ៊ុន សែន​បាន​ថ្លែង​ក្នុង​ពិធី​កាត់​ឫស​សីមា​ឆ្លង​ព្រះ​វិហារ​នៅ​វត្ត​សិរី​ឧត្តម ក្នុង​ឃុំ​ពាម​រោង ស្រុក​ស្វាយ​អន្ទរ ខេត្ត​ព្រៃវែង កាល​ពី​ថ្ងៃ​ទី២២​ខែ​មេសា​ថា ភាព​តាន​តឹង​នៅ​ឧបទ្វីប​កូរ៉េ ក៏​មិន​ទាន់​ដល់​ថ្នាក់​ប្រទេស​កម្ពុជា​ជម្លៀស​ពលរដ្ឋ​ចេញ​ពី​ប្រទេស​កូរ៉េ​ខាង​ត្បូង​ឡើយ​ទោះ​ជា​មាន​ការ​វាយ​ប្រហារ​នៅ​តាម​ប្រព័ន្ធ​បណ្តាញ​សង្គម​ហ្វេសប៊ុក​ថា រដ្ឋាភិបាល​មិន​បាន​គិត​គូរ​ពី​សុខ​ទុក្ខ​ពលរដ្ឋ​ខ្លួន​ក៏​ដោយ​។

នេះ​គឺជា ការ​បញ្ជាក់​ពី​ជំហរ​ជា​លើក​ទីពីរ​និង​ជា​សាធារណៈ​របស់​លោក​នាយក​រដ្ឋ​មន្ត្រី គឺ បន្ទាប់​ពី​កាល​ពី​ថ្ងៃ​ទី១១ មេសា លោក​ក៏​បាន​ថ្លែង​អំពាវនាវ​ពី​ខេត្ត​ព្រៃវែង​ដូច​គ្នា សុំ​ឲ្យ​ពលរដ្ឋ​រស់​នៅ​ប្រទេស​កូរ៉េ​ស្ងប់​ស្ងាត់​រួម​រស់​ជាមួយ​ប្រជាជន​កូរ៉េ​និង​ក្រុម​គ្រួសារ​ដែល​មាន​កូន​ចៅ​បង​ប្អូន​ធ្វើ​ការ​នៅ​កូរ៉េ​ទុក​ចិត្ត​មក​លើ​រាជ​រដ្ឋាភិបាល​ចំពោះ​រាល់​វិធានការ​ដែល​មាន​។

លោក ថ្លែង​ពី​ម្សិលមិញ​ថា៖ «កាល​ពី​ថ្ងៃ១១​មេសា​ខ្ញុំ​អំពាវនាវ​សុំ​ឲ្យ​ស្ងប់​ស្ងាត់​បញ្ហា​ទី១ សង្គ្រាម​នៅ​កូរ៉េ​គឺ​រឿង​នេះ​រាជ​រដ្ឋាភិបាល​យក​ជំហរ​ត្រូវ​។ ...មក​ដល់​ម៉ោង​នេះ​រាជ​រដ្ឋាភិបាល​ធ្វើ​ត្រឹម​ត្រូវ​ឬ​មិន​ត្រឹម​ត្រូវ​? បើ​ពេល​នោះ​យើង​ហ៊ាន​ជម្លៀស​កម្មករ​កម្មការិនី​ដែល​កំពុង​ធ្វើ​ការ​នៅ​កូរ៉េ​ខាង​ត្បូង​ចាក​ចេញ​ពី​ប្រទេស​កូរ៉េ​ខាង​ត្បូង មិន​ចាំ​បាច់​ទៅ​រក​ទី​ផ្សារ​ការងារ​ឲ្យ​ប្រជាជន​នៅ​កូរ៉េ​ខាង​ត្បូង​ទៀត​ទេ​។ បើ​មិន​ទាន់​ដឹង​អី​រត់​ចោល​គេ​ទៅ​ហើយ រឿង​អី​គេ​ឲ្យ​ទៅ​ធ្វើ​ការងារ​!»។

លោក ហ៊ុន សែន​បន្ត​ថា បញ្ហា​គំរាម​ធ្វើ​សង្គ្រាម​ពី​ភាគី​កូរ៉េ​ខាង​ជើង​មក​លើ​កូរ៉េ​ខាង​ត្បូង​នៅ​តែ​មាន​សភាព​តាន​តឹង​ដែល​មន្ត្រី​ស្ថានទូត​កម្ពុជា​នៅ​ទី​នោះ និង​មន្ត្រី​កម្ពុជា​នៅ​ទី​នេះ ត្រូវ​តាម​ដាន​ឲ្យ​ជាប់​ក្តាប់​សភាពការណ៍​ឲ្យ​បាន​ខណៈ​កាល​ពី​ម្សិល​មិញ លោក​បាន​ដឹង​ថា កូរ៉េ​ខាង​ជើង​បាន​ចល័ត​អាវុធ​មីស៊ីល​ខ្លួន​បន្ត​ទៀត​។ ទោះ​យ៉ាង​ណា​លោក​នៅ​តែ​មាន​ជំនឿ​ថា សង្គ្រាម​នៅ​ឧបទី្វប​កូរ៉េ​នឹង​មិន​កើត​ឡើង​ទេ​។

លោក​មាន​ប្រសាសន៍​បន្ត​ថា ៖ «គេ​នៅ​ឯ​នោះ មិន​ទាំង​ខ្លាច​ផង គេ​នៅ​ដើរ​លេង ឯ​ទេសចរ​កូរ៉េ​នៅ​តែ​មក​ស្រុក​ខ្មែរ​។ អ៊ីចឹង​ទេ​ខ្ញុំ​ព្រះ​ករុណា​ខ្ញុំ​សូម​អំពាវនាវ​ឲ្យ​មាន​ការ​ស្ងប់​ស្ងាត់​និង​មេត្តា​កុំ​បារម្ភ​ចំពោះ​បញ្ហា​នេះ​ពីព្រោះ​រាជ​រដ្ឋាភិបាល​បាន​យក​វិធានការ​ជាក់​លាក់​មួយ​រួច​ស្រេច​ទៅ​ហើយ»។

កូរ៉េ​ខាង​ជើង​ត្រូវ បាន​គេ​រាយការណ៍​ថា​បាន​បញ្ជូន​អាវុធ​មីស៊ីល​បន្ថែម​ទៀត​ទៅ​កាន់​សមុទ្រ​ភាគ​ខាង​កើត​កាល​ពី​ថ្ងៃ​អាទិត្យ​ជា​កន្លែង​ដែល​ការ​ប្រុង​ប្រៀប​ចាប់​ផ្តើម​សម្រាប់​ការ​សាក​ល្បង​បាញ់ គ្រាប់​មីស៊ីល​នៅ​ពេល​ដែល​ភាព​តាន​តឹង​នៅ​បន្ត​មាន​រវាង​ឧបទ្វីប​កូរ៉េ។

មន្ត្រី​ក្រសួង​ការងារ​កម្ពុជា​ត្រូវ​បាន​បញ្ជូន​ទៅ​កាន់​ប្រទេស​កូរ៉េ​ខាង​ត្បូង​កាល​ពី​ថ្ងៃ​ទី​១១ មេសា ដើម្បី​ទៅ​ជួប​ពលករ​កម្ពុជា​នៅ​ទី​នោះ​ប្រាប់​ពី​វិធានការ​របស់​រដ្ឋាភិបាល​ក្នុង​ការ​ជម្លៀស​ពលរដ្ឋ​ចេញ​ទៅ​កាន់​តំបន់​មាន​សុវត្ថិភាព​ក្នុង​ករណី​មាន​អាសន្ន​។

លោក ហេង សួរ អគ្គ​នាយក​និង​ជា​ប្រធាន​អង្គភាព​រដ្ឋបាល​និង​ហិរញ្ញវត្ថុ​នៃ​គណៈ​កម្មាធិការ​បណ្តុះ​បណ្តាល​និង​បញ្ជូន​ពលករ​ទៅ​បរទេស​របស់​ក្រសួង​ការងារ​និង​បណ្តុះ​បណ្តាល​វិជ្ជាជីវៈ​ថ្លែង​ប្រាប់​ភ្នំពេញ ប៉ុស្តិ៍ កាល​ពី​ម្សិល​មិញ​ពី​ប្រទេស​កូរ៉េ​ខាង​ត្បូង ទី​ដែល​លោក​ដឹក​នាំ​ប្រតិភូ​ក្រសួង​ការងារ​ចុះ​សួរ​សុខ​ទុក្ខ​ពលករ​ធ្វើការ​នៅ​ទីនោះ​ថា​លោក​បាន​បញ្ចប់​បេសកកម្ម​នៅ​កូរ៉េ​និង​បាន​វិល​ត្រឡប់​មក​ដល់​កម្ពុជា​វិញ កាល​ពី​យប់​ថ្ងៃ​ទី​២២​មេសា​ម្សិល​មិញ​នេះ​។

លោក​ថ្លែង​ប្រាប់​ថា៖ «យើង​បាន​ជួប​ពលករ​ជាង​២ពាន់​នាក់​នៅ​ទីនោះ ហើយ​ពន្យល់​ឲ្យ​គេ​មាន​អារម្មណ៍​នឹង​នរ​ធ្វើ​ការ​ជាមួយ​កម្មករ​កូរ៉េ​ព្រោះ​រដ្ឋាភិបាល​កូរ៉េ​មាន​សមត្ថភាព​គ្រប់គ្រង​និង​ការពារ​ពលរដ្ឋ​គេ និង​ពលរដ្ឋ​ដទៃ​ទៀត​ដែល​ធ្វើការ​នៅ​ទឹក​ដី​គាត់។ រហូត​មក​ទល់​ម៉ោង​នេះ ប្រទេស​កូរ៉េ​ខាង​ត្បូង ក៏​មិន​មាន​ចេញ​សេចក្តី​ថ្លែង​ការណ៍​ណា​មួយ​ឲ្យ​ធ្វើ​ការ​ជម្លៀស​ពលរដ្ឋ​គេ​ចេញ​ដែរ​»៕

0

Comments

Please, login or register to post a comment

ព័ត៌មានពាក់ព័ន្ធ