Search form

Login - Register | FOLLOW US ON

Logo of Phnom Penh Post newspaper Phnom Penh Post - កិច្ចសន្យា​របស់​បុគ្គលិក​វិទ្យុ​ អាស៊ីសេរី​ នឹង​ចប់​ចុង​ខែ​នេះ

Content image - Phnom Penh Post
ស្ត្រី​ម្នាក់​កំពុង​អាន​ព័ត៌មាន​របស់​វិទ្យុ​អាស៊ី​សេរី តាម​ទូរស័ព្ទ​ដៃ​កាល​ពី​ម្សិលមិញ។ ហុង មិនា

កិច្ចសន្យា​របស់​បុគ្គលិក​វិទ្យុ​ អាស៊ីសេរី​ នឹង​ចប់​ចុង​ខែ​នេះ

ភ្នំពេញៈ វិទ្យុ​អាស៊ីសេរី​កាលពី​ម្សិលមិញ​បាន​បញ្ជាក់​ថា​កិច្ចសន្យា​បុគ្គលិក​ទាំងអស់​របស់​ខ្លួន​នៅ​ក្នុង​ប្រទេស​កម្ពុជា​នឹង​ផុត​កំណត់​នៅ​ចុង​ខែ​នេះ ហើយ​ប្រតិបត្តិការ​របស់​ខ្លួន​នឹង​បន្ត​នៅ​តែ​ខាង​ក្រៅ​ប្រទេស​ប៉ុណ្ណោះ​។

ប៉ុន្តែ​ទោះបី​យ៉ាង​ណា​ក៏ដោយ ​អ្នក​សារពព័ត៌មាន​មួយ​ចំនួន​តូច​​នៃ​វិទ្យុ​នេះ​បាន​និយាយ​ថា ពួកគេ​នឹង​នៅ​តែ​បន្ត​ធ្វើការ​សម្រាប់​វិទ្យុ​នេះ​ដដែល បើ​ទោះបី​បាន​បិទ​ទ្វារ​ការិយាល័យ​ព័ត៌មាន​របស់​ខ្លួន​នៅ​ទីក្រុង​ភ្នំពេញ​កាលពី​ថ្ងៃ​អង្គារ​ទៅ​ក្តី​។

វិទ្យុ​អាស៊ីសេរី​បាន​ប្រកាស​កាលពី​ថ្ងៃ​អង្គារ​ថា​ខ្លួន​នឹង​ផ្អាក​ប្រតិបត្តិការ​របស់​ខ្លួន នៅ​ក្នុង​ប្រទេស​កម្ពុជា​បន្ទាប់ពី​មាន​ការ​​ព្យាយាម​ឲ្យ​ដោះស្រាយ​បញ្ហា​ពន្ធដារ និង​បញ្ហា​នៃ​ការ​ផ្តល់​អាជ្ញាប័ណ្ណ​ជាមួយ​នឹង​ក្រសួង​ព័ត៌មាន​មិន​បាន​សម្រេច​។

វិទ្យុ​អាស៊ីសេរី​ដែល​បាន​ទទួល​ការ​ឧបត្ថម្ភ​ថវិកា​ពី​សហរដ្ឋ​អាមេរិក​បាន​និយាយ​ថា​ខ្លួន​នឹង​បន្ត​ប្រតិបត្តិការ​របស់​ខ្លួន​ចេញ​ពី​ទីក្រុង​វ៉ាស៊ីនតោន​ឌីស៊ី​។

សេចក្តី​ប្រកាស​នេះ​កើតឡើង​បន្ទាប់ពី​កាសែត Cambodia Daily បាន​បោះពុម្ព​លេខ​ចុងក្រោយ​របស់​ខ្លួន​កាលពី​ថ្ងៃ​ទី​ ៤ ​ខែ​កញ្ញា​កន្លង​ទៅ បន្ទាប់ពី​មាន​ជម្លោះ​អស់​រយៈពេល​ពេញ​មួយ​ខែ​ ជាមួយ​នឹង​រដ្ឋាភិបាល​ទាក់ទង​ទៅ​នឹង​វិក្កយបត្រ​ពន្ធ​ដែល​ត្រូវ​ឲ្យ​បង់​រហូត​ដល់ ៦,៣ លាន ដុល្លារ​។ លើស​ពី​នេះ​ទៀត​ប្រេកង់​វិទ្យុ​ជាង ៣០ ត្រូវ​បាន​បិទ​ដែល​ធ្វើឲ្យ​ប៉ះពាល់​ដល់​ការ​ផ្សាយ​របស់​វិទ្យុ​អាស៊ីសេរី សំឡេង​សហរដ្ឋអាមេរិក​វីអូអេ និង​វិទ្យុ​សំឡេង​ប្រជាធិបតេយ្យ វីអូឌី​។

លោក Rohit Mahajan អ្នក​នាំពាក្យ​របស់​វិទ្យុ​អាស៊ីសេរី​នៅ​សហរដ្ឋ​អាមេរិក បាន​មាន​ប្រសាសន៍​នៅ​ក្នុង​សេចក្តី​ថ្លែងការណ៍​ កាលពី​ថ្ងៃ​អង្គារ​ថា ការិយាល័យ​របស់​ខ្លួន​នឹង​បិទ​ទ្វារ ហើយ​សេចក្តី​រាយការណ៍​នៅក្នុង​ប្រទេស​នឹង​បញ្ឈប់​ដែល​មាន​ន័យ​ថា​កិច្ចសន្យា​បុគ្គលិក​របស់​​ពួកគេ​នឹង​ផុត​កំណត់​នៅ​ចុង​ខែ​នេះ​ហើយ បន្ទាប់មក​នឹង​មិន​មាន​ការ​បន្ត​កិច្ចសន្យា​​តទៅ​ទៀត​នោះ​ទេ​។

លោក​ថ្លែង​ថា​៖ «​យើង​នឹង​មិន​បន្ត​កិច្ចសន្យា​ណា​មួយ​ទេ​។ វិទ្យុ​អាស៊ីសេរី​នឹង​បន្ត​ផ្សាយ​គ្រប​ដណ្តប់​ប្រទេស​កម្ពុជា​ដោយ​ប្រើប្រាស់​បណ្តាញ​​នៃ​ប្រភព​ដែល​គួរ​ឲ្យ​ជឿ​ទុក​ចិត្ត​បាន​នៅ​ក្នុង​ប្រទេស​ដែល​យើង​បាន​កសាង​អស់​រយៈពេល​ជាង ២០ ​ឆ្នាំ​មក​ហើយ យើង​មាន​វត្តមាន​នៅ​ទី​នោះ​»​។

លោក បាន​បន្ថែម​ថា​នេះ​មាន​ន័យ​ថា​វិទ្យុ​នឹង​យក​គំរូ​តាម​ «​សង្គម​ដែល​បិទ​ទ្វារ​ផ្សេង​ទៀត​ដូចជា​ប្រទេស​ឡាវ​» ​ជា​កន្លែង​ដែល​សារព័ត៌មាន​ត្រូវ​បាន​គេ​រាយការណ៍​ទោះបី​ជា​គ្មាន​អ្នក​សារព័ត៌មាន​ក្នុង​ស្រុក​ក៏ដោយ​។

ប៉ុន្តែ​ទោះបី​យ៉ាង​ណា ​បុគ្គលិក​វិទ្យុ​អាស៊ីសេរី​ដែល​ស្នើសុំ​មិន​ឲ្យ​បញ្ចេញ​ឈ្មោះ​បាន​ឲ្យ​ដឹង​ថា​ថ្វីបើ​បិទ​ការិយាល័យ​ព័ត៌មាន​​ក៏ដោយ​ក៏​ពួកគាត់​នៅ​តែ​បន្ត​ធ្វើ​សេចក្តី​រាយការណ៍​ពី​គេហដ្ឋាន​របស់​ខ្លួន​ហើយ​ហាក់​ដូចជា​បង្ហាញ​ថា​ពួកគេ​នឹង​បន្ត​រាយការណ៍​ដល់​ប្រព័ន្ធ​ផ្សព្វផ្សាយ​មួយ​នេះ​។

លោក​ថ្លែង​ថា​៖ «​យើង​បាន​ប្តេជ្ញា​ថា​នឹង​បន្ត​ធ្វើការ​សម្រាប់​អ្វី​ដែល​យើង​ចាត់​ទុក​ថា​ជា​ផលប្រយោជន៍​សម្រាប់​អ្នក​ស្តាប់ ហើយ​យើង​នឹង​បន្ត​ធ្វើ​ការងារ​ប្រកប​ដោយ​វិជ្ជាជីវៈ​»​។

ការ​បញ្ជាក់​ស្រដៀង​គ្នា​នេះ​ដែរ​ក៏​ត្រូវ​បាន​អ្នក​សារព័ត៌មាន​វិទ្យុ​អាស៊ីសេរី​ម្នាក់​ទៀត​អះអាង​កាលពី​ម្សិលមិញ​ដែរ​។

ខណៈ​ដែល​ក្រសួង​សេដ្ឋកិច្ច និង​ហិរញ្ញវត្ថុ​បាន​ស្នើ​ឱ្យ​មាន​វិធានការ​ប្រឆាំង​នឹង​វិទ្យុ​អាស៊ីសេរី និង​វីអូអេ​ចំពោះ​បញ្ហា​ពន្ធដារ និង​បញ្ហា​អាជ្ញាបណ្ណ​នោះ អ្នក​នាំពាក្យ​ក្រសួង​ព័ត៌មាន​លោក​​ អ៊ុក គឹមសេង បាន​ឱ្យ​ដឹង​ថា​ប្រធាន​ការិយាល័យ​វិទ្យុ​អាស៊ីសេរី​លោក​ ជីវីតា បាន​ទៅ​ក្រសួង​កាលពី​ឆ្នាំ​ ២០១៦ ដើម្បី​ធ្វើ​ទម្រង់​ប្រតិបត្តិការ​នៃ​ការ​ផ្សាយ​នៅ​ក្នុង​ប្រទេស​កម្ពុជា ប៉ុន្តែ​បន្ទាប់ពី​នោះ​មក​មិន​បាន​ធ្វើ​ទេ​។

លោក​បញ្ជាក់​ថា​៖ «​គាត់​មិន​បាន​អនុវត្ត [​នីតិវិធី​] ហើយ​ពេល​នេះ​ពួកគេ​បាន​ចោទប្រកាន់​ក្រសួង​។ នៅពេល​ដែល​ពួកគេ​មិន​គោរព​ច្បាប់ នោះ​គ្មាន​ការ​អត់ឱន​នោះ​ទេ​»​។

វិទ្យុ​វីអូអេ​ កាលពី​ម្សិលមិញ​ បាន​និយាយ​ថា​ ខ្លួន​នឹង​បន្ត​ការ​ផ្សព្វផ្សាយ​របស់​ខ្លួន​នៅ​ទូទាំង​ប្រទេស​ដែល​ភាគច្រើន​តាមរយៈ​រលក​ធាតុអាកាស​ខ្លី និង​មធ្យម និង​តាមរយៈ​វេបសាយ (Website) ​របស់​ពួកគេ​ដែល​វា​ស្រដៀង​គ្នា​ទៅ​នឹង​វិទ្យុ​អាស៊ីសេរី​នា​បច្ចុប្បន្ន​ដែរ​។

លោក Michelle Harris ដែល​ជា​មន្ដ្រី​ទំនាក់ទំនង​សាធារណៈ​របស់​វិទ្យុ​វីអូអេ​បាន​ថ្លែង​ថា​៖ «​យើង​បន្ត​ធ្វើការ​លើ​បញ្ហា​បំណុល​ពន្ធ និង​ការ​ចុះ​បញ្ជី​នៅ​ក្នុង​ប្រទេស​កម្ពុជា​»៕ NS

0

Comments

Please, login or register to post a comment