ក្រុមហ៊ុន​ភេសជ្ជៈ​កម្ពុជា (កូកា-កូឡា​) ជា​ក្រុមហ៊ុន​ទទួល​បាន​អាជ្ញាប័ណ្ណ​ក្នុង​ការ​ផលិត​ពី​ក្រុមហ៊ុន កូកា-កូឡា នៅ​ថ្ងៃ​នេះ​បាន​ធ្វើការ​សម្ពោធ​ជា​ផ្លូវការ​នូវ​រោងចក្រ​របស់​ខ្លួន​នៅ​ភ្នំពេញ​ដែល​ជា​ផ្នែក​មួយ​​នៃ​ការ​ប្រកាស​ពី​មុន​ពី​ការ​វិនិយោគ​នូវ​ចំនួន​​ទឹកប្រាក់ ១០០ ​លាន​ដុល្លារ​អាមេរិក​នៅ​​ក្នុង​ប្រទេស​កម្ពុជា​ចាប់ពី​ឆ្នាំ​ ២០១៥ រហូត​ដល់​​​ឆ្នាំ​ ២០១៨​។ ពិធី​សម្ពោធ​នេះ​ត្រូវ​បាន​ប្រារព្ធ​ឡើង​ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច​អគ្គមហា​សេនាបតី​តេជោ ហ៊ុន សែន នាយករដ្ឋមន្ត្រី​នៃ​ប្រទេស​កម្ពុជា និង​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង​មាន​ការ​ចូលរួម​ពី​ភ្ញៀវ​កិត្តិយស​ប្រហែល ៩០០ ​​នាក់​ដែល​រួមមាន​អាជ្ញាធរ​មូលដ្ឋាន​ដៃគូ​សំខាន់ៗ អតិថិជន និង​និយោជិត​ទាំង​ឡាយ​។