Search form

Login - Register | FOLLOW US ON

Logo of Phnom Penh Post newspaper Phnom Penh Post - កំពូល​ច្រាន​ចោល​បណ្តឹង​លោក មាជ សុវណ្ណារ៉ា

Content image - Phnom Penh Post
លោក មាជ សុវណ្ណារ៉ា ត្រូវ​ឆ្មាំ​ពន្ធនាគារ​នាំ​ចូល​តុលាការ​កំពូល​ពី​ថ្ងៃ​ទី ១៩ តុលា។ ហេង ជីវ័ន

កំពូល​ច្រាន​ចោល​បណ្តឹង​លោក មាជ សុវណ្ណារ៉ា

ភ្នំពេញៈ តុលាការ​កំពូល​កាល​ពី​ថ្ងៃ​ម្សិលមិញ​បាន​ប្រកាស​សាលដីកា​កំបាំង​មុខ​ច្រាន​ចោល​បណ្តឹង​សុំ​ទៅ​ព្យាបាល​ជំងឺ​នៅ​ក្រៅ​ប្រទេស​របស់​លោក មាជ សុវណ្ណារ៉ា ប្រធាន​នាយកដ្ឋាន​ព័ត៌មាន និង​ផ្សព្វផ្សាយ​នៃ​គណបក្ស​សង្គ្រោះ​ជាតិ​បន្ទាប់​ពី​បើក​សវនាការ​ជំនុំជម្រះ​កាលពី​ថ្ងៃ​ទី ១៩ ខែ​តុលា​កន្លង​មក។

ក្នុង​បន្ទប់​សវនាការ​លោកស្រី​ចៅក្រម គឹម សត្ថាវី ប្រធាន​ក្រុម​ប្រឹក្សា​ជំនុំជម្រះ​បាន​អាន​សាលដីកា​ថា​បណ្តឹង​សារទុក្ខ​របស់​ជនជាប់ចោទ​លោក មាជ សុវណា្ណរ៉ា ដែល​ប្តឹង​មក​តុលាការ​កំពូល​សុំ​ទៅ​ព្យាបាល​ជំងឺ​នៅ​ក្រៅ​ប្រទេស​នោះ​គឺ​តុលាការ​កំពូល​សម្រេច​តម្កល់​សាលដីកា​របស់​សាលា​ឧទ្ធរណ៍​នៅ​ដដែល។

លោកស្រី​ថ្លែង​ថា៖ «តុលាការ​ថ្នាក់​ក្រោម​ចេញ​សាលក្រម​ហាមឃាត់​នេះ​ព្រោះ​យល់​ថា​ដើម្បី​ធានា​វត្តមាន​របស់​ជន​ជាប់ចោទ។ ម៉្យាង​វិញ​ទៀត​ លោក សុវណ្ណារ៉ា ត្រូវ​បាន​សាលា​ដំបូង​រាជធានី​ភ្នំពេញ​សម្រេច​ចោទ​ប្រកាន់​ក្នុង​អង្គ​សេចក្តី​រួច​ទៅ​ហើយ​ដែរ​ដូច្នេះ​តុលាការ​កំពូល​យល់​ថា​ការ​សម្រេច​នេះ​ជា​ការ​ត្រឹមត្រូវ​ហើយ។ តុលាការ​កំពូល​តម្កល់​ការ​សម្រេច​របស់​តុលាការ​ថ្នាក់​ក្រោម​នៅ​ដដែល»។

លោក ជួង ជូងី មេធាវី​លោក មាជ សុវណ្ណារ៉ា បាន​ប្រាប់​ក្រុម​អ្នក​សារព័ត៌មាន​នៅ​ក្រៅ​បន្ទប់​សវនាការ​ថា​ការ​សម្រេច​របស់​តុលាការ​កំពូល​ជា​ការ​សម្រេច​សេចក្តី​ចុងក្រោយ​ប៉ុន្តែ​លោក​នឹង​ពិភាក្សា​ជាមួយ​កូនក្តី​លោក​បន្ត​ទៀត​ថា​តើ​គួរ​តវ៉ា​យ៉ាង​ម៉េច​តទៅ​ទៀត។

ពាក់ព័ន្ធ​ដីកា​ហាមឃាត់​នេះ​ដែរ​លោក ជួង ជូងី បញ្ជាក់​ថា៖ «ខ្ញុំ​យល់​ថា​ការ​ដែល​លោក​ មាជ សុវណ្ណារ៉ា ជាប់​ឃុំ​នោះ​គឺ​គាត់​មិន​អាច​ចេញ​ទៅ​ក្រៅ​ប្រទេស​បាត់​ទៅ​ហើយ។ ដូច្នេះ​ខ្ញុំ​យល់​ថា​ការ​ហាម​គាត់​មិន​ឲ្យ​ចាកចេញ​ទៅ​ក្រៅ​ប្រទេស​នោះ​គឺជា​រឿង​មិន​ចាំបាច់​ត្រូវ​ចេញ​សាលដីកា​ហាមឃាត់​គាត់​ទេ»។

កាលពី​បើក​សវនាការ​ទី ១៩ ខែ​តុលា​លោក ជួង ជូងី និង​លោក ហែម សុជាតិ ជា​មេធាវី​ការពារ​សិទ្ធិ​ឲ្យ​លោក សុវណ្ណារ៉ា បាន​ប្រាប់​តុលាការ​ថា​ការ​ចេញ​សាលក្រម​របស់​សាលា​ដំបូង​រាជធានី​ភ្នំពេញ​ហាមឃាត់​កូនក្តី​លោក​ទៅ​ព្យាបាល​នៅ​ក្រៅ​ប្រទេស​ជា​សាលក្រម​ខុស​នីតិវិធី​ច្បាប់​ព្រោះ​នៅ​ពេល​នោះ​តុលាការ​មិន​ទាន់​ចេញ​សាលក្រម​ស្ថាពរ​ទេ។

សាលក្រម​ស្ថាពរ​ចេញ​ថ្ងៃ​ទី ២១ ខែ​កក្កដា​ឆ្នាំ​ ២០១៥ តែ​សាលក្រម​ហាមឃាត់​ទៅ​ព្យាបាល​នៅ​ក្រៅ​ប្រទេស​ចេញ​នៅ​ថ្ងៃ​ទី ២០ ខែ​កក្កដា​ឆ្នាំ ២០១៥ ក្រោយ​ចេញ​សាលក្រម​ស្ថាពរ​មួយ​ថ្ងៃ​ទៅ​វិញ។

លោក មាជសុវណ្ណារ៉ា កាលពី​បើក​សវនាការ​នៅ​ថ្ងៃ​ទី ១៩ ខែ​តុលា​បាន​ថ្លែង​នៅ​ខាង​ក្រៅ​បន្ទប់​សវនាការ​ថា​រឿង​របស់​លោក​វា​ជា​រឿង​នយោបាយ និង​អយុត្តិធម៌។ អ៊ីចឹង​គេ​ត្រូវ​ដោះ​វា​ដោយ​នយោបាយ​ហើយ។

លោក មាជ សុវណ្ណារ៉ា ដែល​មាន​សញ្ជាតិ​ខ្មែរ-អាមេរិក​ត្រូវ​បាន​ដើម​បណ្តឹង​ចំនួន ៤១ នាក់​ប្តឹង​ពាក់ព័ន្ធ​ព្រឹត្តិការណ៍​បាតុកម្ម​នៅ​ទីលាន​ប្រជាធិបតេយ្យ​ស្ពាន​នាគ​ក្នុង​ខណ្ឌ​ដូនពេញ​កាល​ពី​ខែ​កក្កដា​ឆ្នាំ ២០១៤។

សំណុំ​រឿង​នេះ​ត្រូវ​សាលា​ដំបូង​រាជធានី​ភ្នំពេញ​កាល​ពី​ថ្ងៃ​ទី ២០ ខែ​កក្កដា ឆ្នាំ ២០១៥ ប្រកាស​សាលក្រម​ដាក់​គុក ២០ ឆ្នាំ​ពី​បទ «ដឹកនាំ​កុបកម្ម និង​អំពើ​ចូលរួម​ក្នុង​ចលនា​កុបកម្ម​នៅ​ទីលាន​ប្រជាធិប្បតេយ្យ​ក្នុង​សង្កាត់​វត្តភ្នំ​ ខណ្ឌ​ដូនពេញ៕

0

Comments

Please, login or register to post a comment