ភ្នំពេញៈ ក្មួយប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ជា ត្រូវបានដំឡើងឋានន្តរស័ក្តិទៅជាឧត្តមសេនីយ៍ឯកក្នុងក្របខ័ណ្ឌមន្ត្រីនគរបាលជាតិ ខណៈអ្នកផ្សេងដែលធ្វើការងារយូរជាងគាត់មានការលំបាកនឹងទទួលបានឋានៈបែបនេះជាអ្វីដែលអ្នករិះគន់ថា ជារឿងធម្មតាសម្រាប់គ្រួសារអ្នកមានអំណាចនៅប្រទេសកម្ពុជា។
យោងតាមព្រះរាជក្រឹត្យដែលឡាយព្រះហស្ដលេខាដោយព្រះមហាក្សត្រនៅថ្ងៃទី ៣០ ខែធ្នូហើយដែលកាសែតភ្នំពេញ-ប៉ុស្តិ៍ទើបទទួលបានកាលពីម្សិលមិញបានបង្ហាញថាលោក ហ៊ុន ជា ត្រូវបានដំឡើងឋានន្តរស័ក្តិទៅថ្នាក់ឧត្តមសេនីយ៍ឯក។
ប៉ុន្តែយ៉ាងណាក៏ដោយបញ្ហានេះត្រូវបានលោក សន ជ័យ ប្រធានអង្គការគណនេយ្យភាពសង្គមបានរិះគន់ដោយលោកបានលើកឡើងថាវាជារឿងធម្មតាសម្រាប់កូនចៅរបស់អ្នកមានអំណាចដែលត្រូវបានដំឡើងឋានន្តរស័ក្តិយ៉ាងឆាប់រហ័ស ខណៈអ្នកដែលគ្មានទំនាក់ទំនងពិបាកនឹងទទួលបានបុណ្យស័ក្ដិលឿនដូចនេះបើទោះណាជាពួកគាត់បានខិតខំបម្រើការងារអស់ពេលយូរក៏ដោយ។
លោកបានបញ្ជាក់ថា៖ «សព្វថ្ងៃនេះប្រព័ន្ធដំឡើងឋានន្តរស័ក្តិគឺធ្វើឡើងតាមរយៈអ្នកដែលមានទំនាក់ទំនងជិតស្និទ្ធជាមួយមនុស្សដូចជា សាច់ញាតិរបស់អ្នកមានអំណាច... ហើយប្រសិនបើគ្មានទំនាក់ទំនងល្អទេនោះពួកគេពិតជាពិបាកក្នុងការស្វែងរកឲ្យមានការដំឡើងឋានន្តរស័ក្តិនេះណាស់»។
ដោយទំនងជាសំដៅដល់អ្នករិះគន់អ្នកនាំពាក្យក្រសួងមហាផ្ទៃលោក ខៀវ សុភ័គ បានឆ្លើយតបកាលពីម្សិលមិញថា៖ «គាត់គឺជាមនុស្សឆ្កួតដែលតែងតែនិយាយខុស...យើងដំឡើងឋានន្តរស័ក្តិ និងផ្តល់ផ្កាយឲ្យអ្នកណាដែលមានស្នាដៃ»។
ស្រដៀងគ្នានឹងការអះអាងរបស់លោក សន ជ័យ ដែរមន្ត្រីនគរបាលនៅរាជធានីភ្នំពេញម្នាក់ដែលបានស្នើសុំមិនឲ្យបញ្ចេញឈ្មោះបានថ្លែងកាលពីម្សិលមិញថាការគ្មានប្រាក់ និងគ្មានទំនាក់ទំនងជាមួយប្រធានស្ថាប័នគឺពិបាកនឹងទទួលបានការដំឡើងឋានន្តរស័ក្ដិណាស់បើទោះមានគុណសម្បត្តិ និងបម្រើការយូរយ៉ាងណាក្ដី។
លោកបានបញ្ជាក់ថា៖ «ខ្ញុំបានធ្វើការតាំងពីឆ្នាំ ១៩៨៥ មក ប៉ុន្តែខ្ញុំនៅត្រឹមថ្នាក់វរសេនីយ៍ទោប៉ុណ្ណោះទាំងនេះគឺដោយសារតែខ្ញុំមិនមានទំនាក់ទំនងគ្រួសារ ឬជាអ្នកមាន ដូច្នេះហើយមេរបស់ខ្ញុំពិបាកដំឡើងឲ្យខ្ញុំណាស់...ប៉ូលិសស្ទើរគ្រប់រូបពិបាកក្នុងការទទួលបានការដំឡើងឋានន្តរស័ក្តិណាស់លុះត្រាតែពួកគេមានទំនាក់ទំនង ឬក៏មានលុយកាក់ឲ្យមេ»។
លោកបានបន្ថែមថា៖ «យើងមិនមានជម្រើសទេហើយយើងក៏មិនអាចតវ៉ាអំពីបញ្ហានេះបានដែរយើងគ្រាន់តែធ្វើតាមបញ្ជារបស់ពួកគេប៉ុណ្ណោះហើយនេះគឺជាបក្ខពួកនិយមដែលមាននៅគ្រប់ទីកន្លែងនៅក្នុងប្រទេសរបស់យើង...ពេលខ្លះយើងត្រូវបានគេស្នើសុំឱ្យចូលរួមវិភាគទានដល់គណបក្សថែមទៀតផង»។
កាលពីខែធ្នូឆ្នាំ ២០១០ លោកនាយករដ្ឋមន្ដ្រីបានអំពាវនាវជាសាធារណៈឱ្យលោក ហ៊ុន ជា វិលត្រឡប់មកផ្ទះវិញ បន្ទាប់ពីបានចោទប្រកាន់គាត់ថាបានបោកប្រាស់ភរិយាគាត់ និងប្រើប្រាស់គ្រឿងញៀន ខណៈដែលក្នុងឆ្នាំ ២០០២ លោក ហ៊ុន ជា និងលោក ហ៊ុន តូ ដែលជាក្មួយប្រុសរបស់លោក ហ៊ុន សែន ម្នាក់ទៀតត្រូវបានទម្លាក់ចោលបទចោទបន្ទាប់ពីមិនមានភ័ស្តុតាងគ្រប់គ្រាន់ទាក់ទងនឹងការបាញ់បណ្តាលឱ្យមានមនុស្ស ២ នាក់រងរបួស៕ NS