Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​ការងារ​កំពុង​ព្រាង​ច្បាប់​ស្ដីពី​ប្រាក់​ឈ្នួល​អប្បបរមា​ថ្មី

Content image - Phnom Penh Post
កម្មករ​ធ្វើការ​តវ៉ា​ទាមទារ​ឡើង​ប្រាក់​ខែ​នៅ​រោងចក្រ​មួយ​ក្នុង​រាជធានី​ភ្នំពេញ​កន្លង​មក​​។ ហុង មិនា

ក្រសួង​ការងារ​កំពុង​ព្រាង​ច្បាប់​ស្ដីពី​ប្រាក់​ឈ្នួល​អប្បបរមា​ថ្មី

ភ្នំពេញៈ ក្រសួង​ការងារ​ និង​បណ្ដុះបណ្ដាល​វិជ្ជាជីវៈ​បាន​ឲ្យ​ដឹង​កាលពី​សប្តាហ៍​មុន​ថា​ខ្លួន​កំពុង​​តែ​ធ្វើ​សេចក្តី​ព្រាង​ច្បាប់​​​ស្តីពី​​ប្រាក់​ឈ្នួល​អប្បបរមា​​ថ្មី​ដែល​គ្របដណ្តប់​​ទៅ​លើ​រាល់​កម្មករ​និយោជិត​ទាំងអស់​​ដែល​ស្ថិត​​នៅ​ក្រោម​​ច្បាប់​ស្តីពី​ការងារ​ជា​សេចក្ដី​ព្រាង​ដែល​ក្រុម​សហជីព​ និង​អ្នក​ជំនាញ​​បាន​ស្វាគមន៍​ប៉ុន្តែ​​នៅ​មាន​មន្ទិល​សង្ស័យ​ថា តើ​​​ច្បាប់​នេះ​នឹង​​ត្រូវ​បាន​អនុវត្ត​ដោយ​រលូន​ឬ​អត់ ?

បើ​តាម​ហ្វេសប៊ុក​របស់​​រដ្ឋមន្រ្តី​ក្រសួង​ការងារ​លោក អ៊ិត សំហេង បាន​ឲ្យ​ដឹង​ថា​សេចក្តី​ព្រាង​ច្បាប់​ថ្មី​នេះ​​នឹង​ត្រូវ​ប្រើ​​ដើម្បី​កំណត់​​ប្រាក់​ឈ្នួល​អប្បបរមា​​សម្រាប់​កម្មករ​និយោជិត​​ដែល​ស្ថិត​នៅ​​​ក្រោម​​ច្បាប់​ស្តីពី​ការងារ​ហើយ​បង្កើត​នូវ​ក្រុមប្រឹក្សា​​ជាតិ​​ស្តីពី​​ប្រាក់​ឈ្នួល​​​​ដើម្បី​​ផ្តល់​អនុសាសន៍​​​សម្រាប់​​ការ​ផ្តល់​ប្រាក់​ខែ​ដល់​កម្មករ​និយោជិត​​​។

ទោះបី​ជា​យ៉ាង​ណា​ក្តី​មិន​មាន​ការ​លើក​ឡើង​​អំពី​ថា​តើ​នៅ​ពេល​ណា​ច្បាប់​នេះ​នឹង​​ត្រូវ​បាន​ព្រាង​ចប់​​​សព្វ​គ្រប់​ឬ​ថា​តើ​នឹង​ត្រូវ​អនុវត្ត​យ៉ាង​ដូចម្ដេច​នោះ​ទេ​។​ បច្ចុប្បន្ន​នេះ​មាន​តែ​កម្មករ​​កាត់ដេរ​សម្លៀក​បំពាក់​ និង​ស្បែក​ជើង​ប៉ុណ្ណោះ​​ដែល​​មាន​សិទ្ធិ​ទទួល​បាន​​ប្រាក់​ឈ្នួល​អប្បបរមា​ចំនួន​ ១៤០ ​ដុល្លារ​ក្នុង​មួយ​ខែ​​ដែល​នឹង​កើនឡើង​ដល់​ ១៥៣ ដុល្លារ​ចាប់ពី​ខែ​មករា​ឆ្នាំ​ ២០១៧​ តទៅ។

អ្នក​នាំ​ពាក្យ​ក្រសួង​ការងារ​លោក ហេង សួរ ​មិន​អាច​ទាក់ទង​សុំ​អត្ថាធិប្បាយ​បាន​ទេ​ កាលពី​ម្សិលមិញ ​ប៉ុន្តែ​លោក​បាន​ថ្លែង​នៅ​ក្នុង​សារ​​មួយ​មក​អ្នក​កាសែត​ថា​ច្បាប់​ថ្មី​​នេះ​នឹង​ត្រូវ​អនុវត្ត​​ដោយ​សន្សឹមៗ​​នៅក្នុង​គ្រប់​វិស័យ​ទាំងអស់​ដោយ​អាស្រ័យ​ទៅ​លើ​​ការ​អភិវឌ្ឍ​សង្គម​ និង​សេដ្ឋកិច្ច​។

លោក សួរ បាន​ថ្លែង​ថា​៖ «​​ខ្ញុំ​ចង់​បញ្ជាក់​ថា​សេចក្តី​ព្រាង​ច្បាប់​នេះ​គឺ​គ្រាន់តែ​ជា​​ការ​ប្រមូល​ផ្តុំ​​នៃ​អ្វី​ដែល​យើង​បាន​​និង​កំពុង​អនុវត្ត​» ។ លោក​បាន​បន្ថែម​ថា​​នីតិវិធី​ប្រាក់​ឈ្នួល​​កំពុង​ត្រូវ​បាន​ដាក់​បញ្ចូល​ទៅ​ក្នុង​ច្បាប់​នេះ​ដើម្បី​ធានា​ឲ្យ​បាន​ប្រាកដ​នូវ​ភាព​ច្បាស់លាស់​ជាង​មុន​។

ប៉ុន្តែ​លោក ហេង សួរ មិន​បាន​បំភ្លឺ​​ថា​តើ​​ស្ថាប័ន​កំណត់​ប្រាក់​ឈ្នួល​​ត្រី​ភាគី​នា​ពេល​បច្ចុប្បន្ន​នឹង​ត្រូវ​​រង​ប៉ះពាល់​យ៉ាង​ដូចម្តេច​ពី​​ក្រុម​ប្រឹក្សា​ជាតិ​ស្តីពី​​​ប្រាក់​ឈ្នួល​​ដែល​ត្រូវ​បាន​ស្នើ​បង្កើត​ឡើង​នោះ​ទេ​។

លោក ម៉ម ឫទ្ធី ប្រធាន​​សហព័ន្ធ​​​​កម្មករ​ទេសចរណ៍​​ និង​សេវា​បាន​ថ្លែង​កាលពី​ម្សិលមិញ​ថា​ការ​កំណត់​ប្រាក់​ឈ្នួល​អប្បបរមា​សម្រាប់​វិស័យ​​​នេះ​ដែល​មាន​កម្មករ​ចំនួន​ប្រមាណ​ ៤០ ​ម៉ឺន​នាក់​​គឺ​ចាំបាច់​ត្រូវ​ការ​ឲ្យ​មាន​ប៉ុន្តែ​លោក​បាន​ចោទ​ជា​សំណួរ​អំពី​​ឆន្ទៈ​របស់​រដ្ឋាភិបាល​​ក្នុង​ការ​​​ដាក់​ឲ្យ​មាន​កាតព្វកិច្ច​ចំពោះ​ការ​អនុវត្ត​។

លោក​បាន​ថ្លែង​ថា៖ «​​ខ្ញុំ​គិត​ថា​កត្តា​ដែល​សំខាន់​បំផុត​ចំពោះ​រឿង​នេះ​គឺ​​ក្រសួង​។ ​ប្រសិន​បើ​ក្រសួង​មាន​ឆន្ទៈ​សម្រេច​ច្បាប់​នេះ​វា​គួរ​តែ​ត្រូវ​អនុវត្ត​»។

ស្រដៀង​គ្នា​ដែរ​ សុខ គីន ដែល​ជា​អ្នក​តំណាង​កម្មករ​បាន​ថ្លែង​ថា​ច្បាប់​នេះ​ត្រូវ​បាន​ព្រាង​ឡើង​ដោយសារ​​ការ​បោះឆ្នោត​នា​ពេល​ខាង​មុខ​ជិត​ចូល​មក​ដល់​ដែល​នេះ​គឺជា​​​​អត្ថប្រយោជន៍​សម្រាប់​ទាំង​កម្មករ​និយោជិត​ និង​រដ្ឋាភិបាល។

ខណៈ​កម្មករ​​សំណង់​​ជា​មធ្យម​ទទួល​បាន​ប្រាក់​ឈ្នួល​​ស្រដៀង​​ ឬ​ច្រើន​ជាង​កម្មករ​កាត់ដេរ​ សុខ គីន បាន​ថ្លែង​ថា​ច្បាប់​ថ្មី​នេះ​​នឹង​ផ្តល់​នូវ​ភាព​ច្បាស់លាស់​ជាង​មុន​​ហើយ​ជួយ​​ឲ្យ​សហជីព​តាមដាន​​ និង​ជំរុញ​ឲ្យ​មាន​​ប្រាក់​ឈ្នួល​អប្បបរមា​​នៅក្នុង​ទូទាំង​វិស័យ​។

លោក William Conklin ​នាយក​ប្រចាំ​ប្រទេស​​សម្រាប់​​មជ្ឈមណ្ឌល​សាមគ្គី​បាន​ថ្លែង​ថា​មិន​មាន​សំណួរ​​ដែល​ប្រាក់​ឈ្នួល​អប្បបរមា​ជាតិ​ត្រូវ​ការ​ឲ្យ​មាន​ប៉ុន្តែ​លោក​បាន​ព្រមាន​កុំ​ឲ្យ​មាន​​​ការ​បង្កើត​រចនាសម្ព័ន្ធ​​​ប្រាក់​ឈ្នួល​ច្រើន​ថ្នាក់​​ដែល​នឹង​ធ្វើ​ឲ្យ​វា​ពិបាក​ក្នុង​ការ​អនុវត្ត​។

លោក​បាន​បន្ត​ថា​៖ «​​ពួកគេ​​ត្រូវ​តែ​ពិនិត្យ​មើល​​វា​​ក្នុង​លក្ខណៈ​អនុវត្ត​ជាក់ស្តែង​។ ​គោលបំណង​គឺ​គួរ​តែ​បង្កើត​ឲ្យ​មាន​រចនាសម្ព័ន្ធ​​ស្មើភាព​ និង​សាមញ្ញ​បំផុត​»៕ PS

0

Comments

Please, login or register to post a comment