Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​ការងារ​ចង់​ឲ្យ​កម្មករ​បើក​ប្រាក់​ខែ ២ សប្ដាហ៍​ម្ដង​ចៀសវាង​ហានិភ័យ​ ខណៈ​សហជីព​ខ្លះ​សាទរ

Content image - Phnom Penh Post
លោក អ៊ិត សំហេង រដ្ឋមន្ត្រី​ក្រសួង​ការងារ​កាលពី​ម្សិលមិញ។ រូបថត សហការី

ក្រសួង​ការងារ​ចង់​ឲ្យ​កម្មករ​បើក​ប្រាក់​ខែ ២ សប្ដាហ៍​ម្ដង​ចៀសវាង​ហានិភ័យ​ ខណៈ​សហជីព​ខ្លះ​សាទរ

ភ្នំពេញៈ រដ្ឋមន្រ្តី​ក្រសួង​ការងារ​ និង​បណ្តុះ​បណ្តាល​វិជ្ជាជីវៈ​កាលពី​ម្សិលមិញ​បាន​ផ្ដួចផ្តើម​គំនិត​ឲ្យ​ធ្វើ​វិសោធនកម្ម​មាត្រា​មួយ​ចំនួន​នៃ​ច្បាប់​ស្តីពី​ការងារ​ទាក់ទង​នឹង​អត្ថប្រយោជន៍​របស់​និយោជិត​​ដោយ​ជំរុញ​ឲ្យ​និយោជក​បើក​ប្រាក់​ឈ្នួល​ជូន​និយោជិត​កម្មករ​ជា​រៀងរាល់​ពីរ​សប្តាហ៍​ម្តង និង​ប្រាក់​អត្ថប្រយោជន៍​បើក ១ ឆ្នាំ​ម្ដង​ដើម្បី​កាត់​បន្ថយ​ហានិភ័យ​ ​ហើយ​ការ​លើក​ឡើង​​នេះ​បាន​ធ្វើ​ឲ្យ​សហជីព​ខ្លះ​សាទរ​ស្រប​ពេល​ដែល​មាន​ករណី​បិទ​រោងចក្រ​ ឬ​ថៅកែ​ខ្លះ​បាន​បោះបង់​ចោល​មិន​ទទួល​ខុស​ត្រូវ​លើ​និយោជិត​​។

ថ្លែង​ក្នុង​កិច្ចប្រជុំ​បូក​សរុប​ការងារ​ឆ្នាំ​ ២០១៦ ​និង​លើក​ទិសដៅ​សម្រាប់​​ឆ្នាំ​ ២០១៧ ​នេះ រដ្ឋមន្រ្តី​ក្រសួង​ការងារ​លោក​ អ៊ិត​ សំហេង ​បាន​លើក​ឡើង​ថា​លោក​ផ្តើម​គំនិត​ឲ្យ​មាន​វិសោធនកម្ម​មាត្រា​មួយ​ចំនួន​នៃ​ច្បាប់​ស្តីពី​ការងារ​ពាក់ព័ន្ធ​នឹង​ប្រាក់​អត្ថប្រយោជន៍​របស់​កម្មករ​ព្រម​ទាំង​ជំរុញ​ឲ្យ​និយោជក​បើក​ប្រាក់​ឈ្នួល​ឲ្យ​កម្មករ​ជា​រៀងរាល់​ពីរ​សប្តាហ៍​ម្តង​ដើម្បី​កាត់​បន្ថយ​ហានិភ័យ​មួយ​ចំនួន​នៅ​ពេល​រោងចក្រ​បិទ​។

លោក​បាន​ពន្យល់​ថា​៖ «យើង​ចង់​សម្រួល​នីតិវិធី​ពី​ប្រាក់​អត្ថប្រយោជន៍​របស់​កម្មករ​អាច​ថា​ថៅកែ​បើក​ ១ ​ឆ្នាំ​ម្តង​តិចៗ​ដើម្បី​កុំ​​ឲ្យ​ជំពាក់​កម្មករ​ច្រើន​នៅ​ពេល​រោងចក្រ​បិទ​ទ្វារ​ពេល​ក្ស័យធន​ហើយ​កម្មករ​ក៏​មិន​ទាមទារ​តវ៉ា​រឿង​ប្រាក់​អត្ថប្រយោជន៍​ផ្សេងៗ​ដែរ ​ព្រោះ​យើង​ទូទាត់​ទៅ​ពេល​ខ្លះ​ប្រាក់​អត្ថប្រយោជន៍​ច្រើន​ជាង​តម្លៃ​ម៉ាស៊ីន​ទៅ​ទៀត»។

លោក​ថា​កន្លង​មក​ក៏​ដូច​បច្ចុប្បន្ន​មាន​ថៅកែ​រោងចក្រ​ខ្លះ​​រត់​ចោល​កម្មករ​ដោយសារ​ក្ស័យធន​ទប់ទល់​ប្រាក់​ឈ្នួល​មិន​បាន​ ឬ​ក៏​មក​ពី​ប្រាក់​អត្ថប្រយោជន៍​របស់​កម្មករ​ដែល​មាន​ចំនួន​ច្រើន​។

លោក​បាន​បន្ថែម​ថា​ក្នុង​ច្បាប់​ស្តីពី​ការងារ​បាន​តម្រូវ​ឲ្យ​និយោជក​បើក​ប្រាក់​ឈ្នួល​ ២ ​សប្តាហ៍​ម្តង​ តែ​ជាក់ស្តែង​ការ​អនុវត្ត​មិន​ទាន់​បាន​អ៊ីចឹង​យើង​ចង់​ឲ្យ​និយោជក​អនុវត្ត​បើក​ប្រាក់​ឈ្នួល​កម្មករ​​ជា​រៀងរាល់​ពីរ​សប្តាហ៍​ម្តង​ដើម្បី​កាត់​បន្ថយ​ហានិភ័យ​នៅ​ពេល​រោងចក្រ​បិទ​ថៅកែ​រត់​ចោល​យ៉ាង​ណា​ក៏​កម្មករ​បាន​ប្រាក់​ឈ្នួល​ពីរ​សប្តាហ៍​ដែរ។

បើ​តាម​របាយការណ៍​របស់​ក្រសួង​ការងារ​បាន​ឲ្យ​ដឹង​ថា​ក្នុង​ឆ្នាំ​ ២០១៦​ មាន​រោងចក្រ​កាត់ដេរ​បិទ​ទ្វារ​ ១៤១ ​កន្លែង​ និង​បើក​ថ្មី​ចំនួន​ ១៤៩ ​កន្លែង​ ខណៈ​ដែល​ឆ្នាំ​ ២០១៥​ មាន​រោងចក្រ​ចំនួន​ ៧៧ ​បាន​បិទ​ទ្វារ​ និង​បើក​ឡើង​វិញ​ចំនួន​ ៤៣ ​កន្លែង​។

ចំណែក​ចំនួន​កូដកម្ម​មាន​ ២២០ ​ករណី​ស្មើ​នឹង​ចំនួន​កូដករ​សរុប​ ៥៤​៩៧៨ ​នាក់​ បាន​ដោះស្រាយ​សះ​ជា​ចំនួន​ ២១៤ ​ករណី​ មិន​សះ​ជា​ចំនួន​ ៦ ​ករណី​ ខណៈ​ឆ្នាំ​ ២០១៥ ​មាន​ករណី​កូដកម្ម​ ៣៣៦ ​ករណី ។

លោក​ អាត់ ធន់​ ប្រធាន​សម្ព័ន្ធសហជីព​ប្រជាធិបតេយ្យ​កម្មករ​កាត់ដេរ​កម្ពុជា​បាន​ថ្លែង​ថា​សហជីព​សាទរ​ បើ​សិន​មាន​ការ​ធ្វើ​​វិសោធនកម្ម​មាត្រា​មួយ​ចំនួន​ក្នុង​ច្បាប់​ស្តីពី​ការងារ​ដោយ​ផ្តល់​អត្ថប្រយោជន៍​ដល់​និយោជិត​ហើយ​បញ្ហា​ប្រាក់​អត្ថប្រយោជន៍​ជា​បញ្ហា​ដែល​ថៅកែ​ភាគច្រើន​គេចវេះ និង​រត់​បាត់​។

លោក​ថា​៖ «យើង​ជួប​ករណី​ប្រាក់​ឈ្នួល​កម្មករ​មួយ​រោងចក្រ​ទូទាត់​ទៅ​ប្រហែល​ ១០ ​ម៉ឺន​ដុល្លារ​តែ​បូក​សរុប​ប្រាក់​អត្ថប្រយោជន៍​ផ្សេង​អស់​រហូត​ដល់​ ៥ ​លាន​ដុល្លារ​ក៏​មាន​ហើយ​បញ្ហា​នេះ​ថៅកែ​ក៏​មិន​បាន​ដាក់​ប្រាក់​តម្កល់​ក្នុង​រតនាគារ​ជាតិ​ដែរ​គឺ​ក្ស័យធន​រត់​គេច​បាត់»។

ចំណែក​លោក ហ្វា សាលី ប្រធាន​សម្ព័ន្ធ​សហជីព​ជាតិ​បាន​ឲ្យ​ដឹង​ថា​កម្មករ​ខ្លះ​ធ្វើការ​យូរ​ពី​ឆ្នាំ​ ៥ ​ឆ្នាំ​ទៅ​ ១០ ​ឆ្នាំ​អ៊ីចឹង​ប្រាក់​អត្ថប្រយោជន៍​គាត់​ទូទាត់​ទៅ​ច្រើន​។

លោក​ថា៖ «ខ្ញុំ​គិត​ថា​ប្រសិន​បើ​ថៅកែ​រោងចក្រ​តម្កល់​ប្រាក់​នៅ​រតនាគារ​ជាតិ​រដ្ឋ​អាច​ដោះស្រាយ​រឿង​ប្រាក់​ឈ្នួល ​និង​ប្រាក់​អត្ថប្រយោជន៍​ជូន​កម្មករ​បាន​តែ​បច្ចុប្បន្ន​អត់​មាន​។ ​ថៅកែ​រត់​គេច​បន្សល់​តែ​ទឹក​ភ្នែក​កម្មករ»។

ក្រៅពី​នេះ​លោក​ អ៊ិត​ សំហេង ​បាន​លើក​ឡើង​ពី​ការ​រក​អ្នក​ញុះញង់​កម្មករ​ជុងហ្វៃ​ឲ្យ​តវ៉ា​បិទ​ផ្លូវ​ជាតិ​លេខ​ ២ ​ផង​ដែរ​ដោយសារ​លោក​ថា​វា​ធ្វើ​ឲ្យ​ប៉ះពាល់​ដល់​ការ​ធ្វើ​ចរាចរណ៍​ជា​សាធារណៈ​។

លោក​ថា​៖ «ការ​តវ៉ា​បិទ​ផ្លូវ​គឺ​ខុស​ច្បាប់​ រឿង​ព្រហ្មទណ្ឌ​ខ្ញុំ​ឲ្យ​រង្វាន់​បើ​ក្មួយៗ​កម្មករ​រក​អ្នក​ដឹកនាំ​ឲ្យ​មាន​ការ​បិទ​ផ្លូវ​ដើម្បី​មក​ទទួល​ខុស​ត្រូវ​តាម​ច្បាប់»។

ប៉ុន្តែ​កម្មករ​ឈ្មោះ​ ខន ជីវន្ត ​ដែល​បម្រើការ​នៅ​​រោងចក្រ​ជុងហ្វៃ​បាន​ឲ្យ​ដឹង​កាលពី​ម្សិលមិញ​ថា​គ្មាន​អ្នក​ញុះញង់​ទេ​គឺ​កម្មករ​ស្ម័គ្រ​ចិត្ត​ធ្វើ​ដោយ​ខ្លួនឯង ​ព្រោះ​យូរ​ខែ​ហើយ​មិន​ព្រម​ដោះស្រាយ​។

កម្មករ​រូប​នោះ​ថា​៖ «គ្រាន់​តែ​ប្រាក់​ឈ្នួល ​និង​ប្រាក់​អត្ថប្រយោជន៍​កម្មករ​ជាង​ ២០០ ​នាក់​នៅ ជុងហ្វៃ​គឺ​ជិត​ ៥០ ​ម៉ឺន​ដុល្លារ​ បើ​គិត​តាម​ច្បាប់​ស្តីពី​ប្រាក់​អត្ថប្រយោជន៍​ ខណៈ​អ្នក​ខ្លះ​ធ្វើការ​ពី​ ៥ ​ឆ្នាំ​ដល់ ១០ ​ឆ្នាំ​ក៏​មាន​...»៕

0

Comments

Please, login or register to post a comment