Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​ទុក​ពេល ៣ ខែ​ដល់​គ្រូពេទ្យ​ចំពោះ​ការ​បម្រើ​សេវា​សុខាភិបាល

Content image - Phnom Penh Post

ក្រសួង​ទុក​ពេល ៣ ខែ​ដល់​គ្រូពេទ្យ​ចំពោះ​ការ​បម្រើ​សេវា​សុខាភិបាល

ភ្នំពេញៈ ក្រសួង​សុខាភិបាល​​បាន​ប្រកាស​ទុក​ពេល​ ៣ ខែ​ដល់​អ្នក​ប្រកប​វិជ្ជាជីវៈ​សុខាភិបាល​ទាំង​សេវា​សាធារណៈ​​​របស់​​រដ្ឋ និង​ឯកជន​ដើម្បី​រៀបចំ​ប្រព័ន្ធ​កុំព្យូទ័រ​ក្នុង​ការ​​ចេញ​វេជ្ជបញ្ជា ឬ​​លទ្ធផល​ពី​សេវា​អម​វេជ្ជសាស្រ្ត និង​​​​​រក្សា​ទិន្នន័យ​របស់​អ្នក​ជំងឺ​ឲ្យ​បាន​ត្រឹមត្រូវ​បើ​ពុំ​នោះ​ទេ​នឹង​ត្រូវ​ប្រឈម​មុខ​នឹង​ផ្លូវ​ច្បាប់ ឬ​បិទ​​មិន​​ឲ្យ​ដំណើរការ​។

តាម​សារាចរ​ណែនាំ​របស់​ក្រសួង​សុខាភិបាល​កាលពី​ថ្ងៃ​ទី​ ៩ ​មិថុនា​ បាន​ឲ្យ​ដឹង​ថា ​កន្លង​មក​ មាន​អ្នក​ប្រកប​វិជ្ជាជីវៈ​សុខាភិបាល​មួយ​ចំនួន​បាន​អនុវត្ត​តាម​គោលការណ៍​វេជ្ជសាស្ត្រ និង​ក្រម​សីលធម៌​វិជ្ជាជីវៈ​ពេទ្យ​ក្នុង​ការ​ចេញ​វេជ្ជបញ្ជា និង​លទ្ធផល​ពី​មន្ទីរ​ពិសោធន៍ ឬ​សេវា​អម​វេជ្ជសាស្ត្រ​​បាន​ល្អ​ប៉ុន្តែ​នៅ​មាន​មួយ​ចំនួន​មិន​បាន​អនុវត្ត​​​តាម​ទេ។

ដើម្បី​ពង្រឹង​វិស័យ​សុខាភិបាល​ឲ្យ​បាន​កាន់តែ​ប្រសើរ​សារាចរ​ណែនាំ​បាន​តម្រូវ​ឲ្យ​អ្នក​ប្រកប​វិជ្ជាជីវៈ​ពេទ្យ​រដ្ឋ និង​ឯកជន​គោរព​ក្រម​សីលធម៌​វិជ្ជាជីវៈ​​ក្នុង​ការ​ពិនិត្យ​ព្យាបាល​ជំងឺ​ជូន​ប្រជាជន​ការ​ចេញ​វេជ្ជបញ្ជា​របស់​គ្រូពេទ្យ ឬ​លទ្ធផល​ពី​សេវា​អម​គ្លីនិក​ត្រូវ​តែ​ប្រើ​តាម​ប្រព័ន្ធ​​កុំព្យូទ័រ​ដោយ​រក្សា​ទុក​ទិន្នន័យ​នៃ​ការ​ពិនិត្យ និង​ព្យាបាល​របស់​អ្នក​ជំងឺ​ដើម្បី​ធានា​ថា​លទ្ធផល​ដែល​វាយ​ចេញ​ពី​កុំព្យូទ័រ​​អាច​អាន​បាន​​ និង​យក​មក​ប្រើប្រាស់​បាន​ច្បាស់​ដើម្បី​កាត់​បន្ថយ​ហានិភ័យ​​ដែល​អាច​កើត​មាន​បណ្តាល​​មកពី​ភាព​មិន​ច្បាស់​នៃ​ការ​សរសេរ​ដៃ​ដោយ​ខ្ជីខ្ជា និង​មិន​ត្រឹមត្រូវ​តាម​​ក្បួន​វេជ្ជសាស្ត្រ​។

សារាចរ​បាន​បញ្ជាក់​ថា៖ «គ្រប់​វេជ្ជបញ្ជា និង​លទ្ធផល​ហាម​សរសេរ​អក្សរ​កាត់ ឬ​ប្រភេទ​ពណ៌​ឱសថ​ដោយ​មិន​មាន​សរសេរ​ឈ្មោះ​ថ្នាំ​ត្រឹមត្រូវ និង​ត្រូវ​ដាក់​ចំនួន​បរិមាណ និង​កម្រិត​ប្រើ​ឲ្យ​បាន​ច្បាស់​លាស់។ បើ​ចាំបាច់​អាច​ប្រើ​ជា​ភាសា​ខ្មែរ​ជំនួយ​សម្រាប់​​អ្នក​ប្រើប្រាស់​ងាយ​យល់»។

ជាមួយ​គ្នា​នេះ​ក្រសួង​សុខាភិបាល​ក៏​បាន​ណែនាំ​ដល់​អ្នក​​ផ្តល់​ឱសថ​ជូន​អ្នក​ជំងឺ​ត្រូវ​ពិនិត្យ​វេជ្ជបញ្ជា​ឲ្យ​បាន​ហ្មត់ចត់ និង​ត្រូវ​វេចខ្ចប់​​ថ្នាំ​ឲ្យ​ត្រឹមត្រូវ​ហាម​លុប​ស្លាក​សញ្ញា​ឈ្មោះ និង​ថ្ងៃ​ខែ​ផុត​កំណត់​ហើយ​សេវា​សុខាភិបាល​គ្រប់​ប្រភេទ​ត្រូវ​មាន​បទ​បញ្ជាផ្ទៃ​ក្នុង​វេន​យាម​ប្រចាំការ​ ២៤ ​ម៉ោង និង​ត្រូវ​មាន​តារាង​តម្លៃ​ផង​ដែរ។

អ្នក​នាំ​ពាក្យ​លោក លី សូវ៉ាន់ និង​ប្រធាន​នាយកដ្ឋាន​មន្ទីរពេទ្យ​នៃ​ក្រសួង​សុខាភិបាល​មិន​អាច​សុំ​ការ​អធិប្បាយ​បន្ថែម​បាន​ទេ។

អ្នកស្រី ឆាយ មួយគាង ប្រជាពលរដ្ឋ​​រស់នៅ​សង្កាត់​ផ្សារ​ដើមថ្កូវ​ ខណ្ឌ​​​ចំការមន​បាន​គាំទ្រ​ចំពោះ​ចំណាត់​ការ​នេះ​ដោយ​ថ្លែង​​ថា​ការ​ចេញ​​វេជ្ជបញ្ជា​ ឬ​លទ្ធផល​ជំងឺ​​សរសេរ​ដោយ​ដៃ​នោះ​អាច​ភាន់ច្រឡំ​។

អ្នកស្រី​ថា៖ «ពេទ្យ​ខ្លះ​សរសេរ​វេជ្ជបញ្ជា​មក​​អាន​មិន​ដាច់​ហើយ​អ្នក​លក់​ថ្នាំ​មើល​មិន​យល់​ក៏​ចេះ​តែ​ឲ្យ​ថ្នាំ​ណា​មួយ​​ឱសថ​ជា​អាវុធ​មុខ​​ពីរ​បើ​ព្យាបាល​ខុស​វា​ធ្វើ​ឲ្យ​ប៉ះពាល់​ដល់​សុខភាព»។

លោក គឹម ឡេង អ្នក​ចាត់ការ​ទូទៅ​នៃ​មន្ទីរ​សម្រាក​ព្យាបាល និង​សម្ភពវឌ្ឍនៈ​បាន​ស្វាគមន៍​ចំពោះ​សារាចរ​ណែនាំ​របស់​ក្រសួង​ខណៈ​មន្ទីរពេទ្យ​នេះ​ក៏​បាន​ប្រើប្រាស់​ប្រព័ន្ធ​កុំព្យូទ័រ​សម្រាប់​ចេញ​នូវ​វេជ្ជបញ្ជា និង​គ្រប់គ្រង​ទិន្នន័យ​របស់​អ្នក​ជំងឺ។

ការ​ណែនាំ​នេះ​បាន​ធ្វើ​ឡើង​ក្រោយ​ពី​មាន​ការ​រិះគន់​ជា​ហូរហែ​ពី​​សេវា​​ព្យាបាល​កន្លង​មក​ និង​ស្រប​ពេល​ដែល​មាន​អ្នក​ជំងឺ​បាន​ស្លាប់​ជា​បន្ត​បន្ទាប់​ដោយសារ​ការ​ធ្វេស​ប្រហែស​ដូច​ករណី​បុរស​ម្នាក់​បាន​ស្លាប់​ដោយសារ​ការ​​ចាក់​ថ្នាំ​ ២ ម្ជុល​នៅ​គ្លីនិក​ឈ្មោះ ឃឹម រ៉ានី កាលពី​ពេល​ថ្មីៗ​នេះ​ជាដើម៕

0

Comments

Please, login or register to post a comment

ព័ត៌មានពាក់ព័ន្ធ