Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​បដិសេធ​ទិន្នន័យ​ពី​ការ​បាត់បង់​ព្រៃឈើ​នៅ​កម្ពុជា

Content image - Phnom Penh Post
ដីព្រៃ​ឈើ​ដែល​ត្រូវ​បាន​កាប់​បំផ្លាញ​នៅ​ក្នុង​ខេត្ត​មណ្ឌលគិរី​កាលពី​ពេល​កន្លង​មក​។ ផា លីណា

ក្រសួង​បដិសេធ​ទិន្នន័យ​ពី​ការ​បាត់បង់​ព្រៃឈើ​នៅ​កម្ពុជា

ភ្នំពេញៈ ក្រសួង​បរិស្ថាន​បាន​បដិសេធ​ចោល​ទិន្នន័យ​ស្តីពី​ការ​បាត់បង់​ព្រៃឈើ​កម្ពុជា​កើនឡើង​ដល់​ប្រមាណ​ជា ២ សែន​ហិកតា​កាលពី​ឆ្នាំ​ ២០១៦ ​ដែល​សាកលវិទ្យាល័យ Maryland នៅ​សហរដ្ឋអាមេរិក​បាន​រកឃើញ​នាពេល​ថ្មីៗ​នេះ ខណៈ​ដែល​មន្ត្រី​ជំនាញ​រដ្ឋបាល​ព្រៃឈើ​ប្រាប់​ថា​ការ​បាត់បង់​គម្រប​ព្រៃឈើ​ ២ ​សែន​ហិកតា​នេះ​គឺជា​ចំនួន​តិច​ជាង​ការ​បាត់បង់​នៅ​បណ្តា​ឆ្នាំ​មុនៗ​។

សាជាថ្មី​ម្តង​ទៀត ​ក្រសួង​បរិស្ថាន​បាន​ច្រានចោល​ទិន្នន័យ​ពី​ការ​បាត់បង់​ព្រៃឈើ និង​ការ​នាំ​ឈើ​ចេញ​ដែល​ត្រូវ​បាន​ស្ថាប័ន​នៅ​សហរដ្ឋអាមេរិក និង អង់គ្លេស​រកឃើញ​។

ក្នុង​នោះ​រួម​មាន​របាយការណ៍​របស់​ទីភ្នាក់ងារ​ស៊ើបអង្កេត​បរិស្ថាន​អន្តរជាតិ (EIA) កាលពី​ខែ​ឧសភា​ស្តីពី​ឈើ​ជាង ៣០ ម៉ឺន​ម៉ែត្រគុប តម្លៃ​រាប់​លាន​ដុល្លារ​លួច​លក់​ទៅ​វៀតណាម​, ទិន្នន័យ​របស់​គយ​វៀតណាម ដែល​អង្គការ Forest Trends បាន​ចេញ​ផ្សាយ​កាលពី​ខែ​សីហា និង​ការ​ច្រានចោល​ចុង​ក្រោយ​គឺ​ទិន្នន័យ​របស់​សាកលវិទ្យាល័យ​ Maryland ដែល​ភ្នំពេញ​ប៉ុស្តិ៍​បាន​ដកស្រង់​យក​មក​ចុះ​ផ្សាយ​កាលពី​ថ្ងៃ​អង្គារ​កន្លង​មក​។

ក្រសួង​បរិស្ថាន​ចេញ​សេចក្តី​ប្រកាស​ព័ត៌មាន​ច្រាន​ចោល​នៅ​ថ្ងៃ​ដដែល​នោះ​ថា​៖ «​របាយការណ៍​របស់​សាកល​វិទ្យាល័យ​ម៉ារីលេន គឺជា​របាយការណ៍​បាត់បង់​គម្រប​ព្រៃឈើ​ជា​សកល​ដោយ​ប្រើប្រាស់​វិធីសាស្ត្រ Gain Loss Approach និង​ប្រើប្រាស់​និយមន័យ​គម្រប​ព្រៃឈើ​ជា​សកល និង​មិន​មាន​ការ​ចុះ​ផ្ទៀងផ្ទាត់​ទិន្នន័យ​នៅ​ទីវាល​ជាក់ស្តែង​ទេ​»​។

ក្រសួង​បាន​បន្ត​ថា​​ ហេតុ​នេះ​ធ្វើឲ្យ​លទ្ធផល​នៃ​របាយការណ៍​មិន​មាន​សុក្រឹតភាព​ជាមួយ​លទ្ធផល​របស់​ក្រុម​ការងារ​បច្ចេកទេស​ថ្នាក់​ជាតិ​ដែល​បាន​ធ្វើ​ជាមួយ​ក្រុម​ការងារ​បច្ចេកទេស​អន្តរជាតិ JICA-CAMREDD FAO (UN-REDD) និង​វិទ្យាស្ថាន​ស្រាវជ្រាវ​ព្រៃឈើ និង​ផលិតផល​ព្រៃឈើ​នៃ​ប្រទេស​ជប៉ុន (FFPRI) ឡើយ​។

ក្រសួង​ក៏​មិន​ភ្លេច​លើក​ឡើង​ផង​ដែរ​ថា​នៅ​ចន្លោះ​ឆ្នាំ ២០១៤ និង ២០១៦ អត្រា​បាត់បង់​គម្រប​ព្រៃឈើ​នៅ​កម្ពុជា​ជា​​មធ្យម​ប្រចាំ​ឆ្នាំ​មាន​ចំនួន ០,៦៧ ភាគរយ​។

កាលពី​ខែ​សីហា ​កន្លង​មក ​ក្រសួង​ក៏​បាន​អះអាង​ផង​ដែរ​ថា​អត្រា​នៃ​ការ​បាត់បង់​គម្រប​ព្រៃឈើ​នៅ​កម្ពុជា​ក្នុង​រយៈពេល ២ ឆ្នាំ​ចុង​ក្រោយ​នេះ​មាន​ការ​ធ្លាក់​ចុះ​គួរ​ឲ្យ​កត់សម្គាល់ ហើយ​លទ្ធផល​បឋម​នៃ​ការ​វាយតម្លៃ​គម្រប​ធនធាន​ព្រៃឈើ​កម្ពុជា​ឆ្នាំ ២០១៦ បាន​បង្ហាញ​ថា​ផ្ទៃដី​គម្រប​ព្រៃឈើ​សរុប​នៅ​កម្ពុជា​មាន​ប្រមាណ​ជា ៤៥,២៦ ភាគរយ​ធៀប​នឹង​ផ្ទៃដី​នៅ​ក្នុង​ប្រទេស​។

ក្នុង​ចំណោម​នោះ​ក៏​រួម​មាន​ឧទ្យានជាតិ​ចំនួន ១២ តំបន់​ដែល​ត្រូវ​បាន​បង្កើតឡើង​។ ក្នុង​នោះ​ឧទ្យាន​ជាតិ​ចំនួន ៧ ត្រូវ​បង្កើត​ឡើង​ដោយ​ព្រះរាជក្រឹត្យ​ចុះ​ថ្ងៃ​ទី ០១ ខែ​វិច្ឆិកា​ឆ្នាំ ១៩៩៣ និង​មាន​ទីតាំង​ចំនួន ៥ តំបន់​ទៀត​ត្រូវ​បាន​បង្កើត​ឡើង​ដោយ​អនុក្រឹត្យ​ក្នុង​ឆ្នាំ ២០១៦ ​។

ឧទ្យាន​ជាតិ​ទាំង ១២ តំបន់​នេះ​គ្រប​ដណ្តប់​លើ​ផ្ទៃដី​សរុប​ ១ ៧២០ ២៦៩,៣៥ ហិកតា​ដែល​ស្មើនឹង ៩,៥ ភាគរយ​នៃ​ផ្ទៃដី​ប្រទេស ដែល​ស្ថិត​ក្នុង​ខេត្ត​កំពង់ស្ពឺ​, កោះកុង​, កំពត​, ពោធិ៍សាត់​, សៀមរាប​, រតនគិរី ព្រះសីហនុ និង​ខេត្ត​ស្ទឹងត្រែង​។

ដោយឡែក​ជំនាញ​រដ្ឋបាល​ព្រៃឈើ​នៃ​ក្រសួង​កសិកម្ម​វិញ​បាន​ឲ្យ​ដឹង​កាលពី​ម្សិលមិញ​ថា​ការ​បាត់បង់​គម្រប​ព្រៃឈើ​ប្រមាណ​ជា ២ សែន​ហិកតា​ក្នុង​ឆ្នាំ ២០១៦ នេះ​គឺជា​ចំនួន​មួយ​ដែល​មាន​ការ​ធ្លាក់​ចុះ បើ​ធៀប​នឹង​បណ្តា​ឆ្នាំ​មុនៗ​។

លោក​ កែវ អូម៉ាលីស្ស អនុប្រធាន និង​ជា​អ្នក​នាំ​ពាក្យ​នៃ​រដ្ឋបាល​ព្រៃឈើ​បាន​ប្រាប់​ថា​នៅ​ចន្លោះ​ឆ្នាំ ២០១០-២០១៤ ព្រៃឈើ​កម្ពុជា​បាន​បាត់​ជាង ៣ សែន​ហិកតា​ជា​មធ្យម​ប្រចាំ​ឆ្នាំ​នីមួយៗ​។ ប៉ុន្តែ​ក្រោយ​មក​ការ​បាត់បង់​បាន​ធ្លាក់​ចុះ​ជា​​បន្តបន្ទាប់​វិញ​ដោយសារ​តែ​រដ្ឋាភិបាល​បាន​បញ្ឈប់​ការ​ផ្តល់​ដី​សម្បទាន​សេដ្ឋកិច្ច​, មាន​ការ​ដាំ​ដើមឈើ​ឡើង​វិញ និង​ដំណាំ​កសិឧស្សាហកម្ម​នៅ​តាម​​ក្រុមហ៊ុន​ដី​សម្បទាន​សេដ្ឋកិច្ច​បាន​ចាប់ផ្តើម​លូតលាស់​ឡើង​វិញ​ផង​ដែរ​។

លោក​ អូម៉ាលីស្ស ​ថ្លែង​ថា​៖ «​ការ​បាត់បង់​ព្រៃឈើ​មាន​ការ​ថយ​ចុះ​។ ការ​បាត់ ២០ ម៉ឺន​ហ្នឹង​ថយ​ហើយ បើ​ធៀប​ទៅ​នឹង​ឆ្នាំ ២០១០-២០១៤ ដែល​មធ្យម​ភាគ​វា​បាត់​ច្រើន​ជាង ២០១៦ ​ដោយសារ​គោលនយោបាយ​បញ្ឈប់​ដី​សម្បទាន​សេដ្ឋកិច្ច​»​។

លោក​ អូម៉ាលីស្ស សង្ឃឹម​ថា​ការ​បាត់បង់​ព្រៃឈើ​នឹង​បន្ត​ធ្លាក់​ចុះ​នៅ​ឆ្នាំ​ក្រោយៗ​ទៀត​៕

0

Comments

Please, login or register to post a comment