Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​មហាផ្ទៃ​ប្រកាស​សុពលភាព​ក្រុម​ប្រឹក្សាឃុំ សង្កាត់ បក្ស​ពីរ​បន្ត​សហការ

Content image - Phnom Penh Post
លោក លឹម ឡេង (​ឆ្វេង​) នាយករង​រដ្ឋបាល​សាលា​រាជធានី​ភ្នំពេញ​ប្រគល់​ត្រា​ឲ្យ​លោក ស្រី ញាណ​ (​ស្ដាំ​) ​ចៅសង្កាត់​ចាក់អង្រែ​លើ​ថ្មី​។ ផា លីណា

ក្រសួង​មហាផ្ទៃ​ប្រកាស​សុពលភាព​ក្រុម​ប្រឹក្សាឃុំ សង្កាត់ បក្ស​ពីរ​បន្ត​សហការ

ភ្នំពេញ: ក្រសួង​មហាផ្ទៃ​កាលពី​ម្សិលមិញ​បាន​ចាប់ផ្ដើម​ប្រកាស​សុពលភាព​របស់​ក្រុម​ប្រឹក្សា​ឃុំ-សង្កាត់ ក្របខ័ណ្ឌ​ទូទាំង​ប្រទេស​មកពី​គណបក្ស​នយោបាយ​នានា​ដែល​បាន​ជាប់​ឆ្នោត​កាលពី​ខែ​មិថុនា​កន្លង​មក​ដើម្បី​បាន​ចូល​ធ្វើការ​បម្រើ​ជាតិ​តាម​ឆន្ទៈ​នយោបាយ​របស់​ពួកគេ​ដែល​បាន​ដាក់​ចេញ​។

ក្នុង​ចំណោម​នោះ​មាន​ក្រុម​ប្រឹក្សា​ឃុំ​-​សង្កាត់ ចាក់អង្រែ​លើ​ក្នុង​ខណ្ឌ​មានជ័យ រាជធានី​ភ្នំពេញ​ចំនួន​ ១១ ​រូប​មកពី​គណបក្ស​សង្គ្រោះ​ជាតិ​ និង​គណបក្ស​ប្រជាជន​កម្ពុជា​នៅ​ក្នុង​ពិធី​ចូល​កាន់​តំណែង​ជា​ផ្លូវការ​កាលពី​ម្សិលមិញ​បាន​ប្ដេជ្ញា​ថា​នឹង​សហការ​គ្នា​ខិតខំ​បម្រើ​ប្រជាពលរដ្ឋ​ឲ្យ​បាន​ល្អ​ប្រសើរ​ដោយ​មិន​ពុករលួយ និង​ពន្លឿន​ការ​ធ្វើ​លិខិត​ស្នាម​ជូន​ពលរដ្ឋ​ឲ្យ​បាន​ឆាប់​រហ័ស ហើយ​នឹង​អនុវត្ត​គម្រោង​កសាង​ផ្លូវ​បន្ត​ពី​អាណត្តិ​មុន​តទៅ​ទៀត​។

លោកស្រី ញាណ អាយុ​ ៥៧ ​ឆ្នាំ​ចៅ​សង្កាត់​ថ្មី​នៃ​សង្កាត់​ចាក់​អង្រែ​លើ​មកពី​គណបក្ស​សង្គ្រោះ​ជាតិ​បាន​ថ្លែង​ថា​៖ «​ខ្ញុំ​ហាក់​មាន​អារម្មណ៍​រំភើប​ដូច​ថា​ពី​មុន​យើង​គ្រាន់​តែ​ជា​ចៅ (​សង្កាត់​) ​រង​ដល់​ពេល​យើង​មក​ជា​ចៅសង្កាត់​ដូចជា​រំភើប​...​យើង​ត្រូវ​ផ្តល់​សេវា​ទាន់​ចិត្ត​ហើយ​មិន​ពុករលួយ ហើយ​ការពារ​សុវត្ថិភាព​ពលរដ្ឋ​...​ក្នុង​ការងារ​កន្លង​មក​យើង​និយាយ​គ្នា​ធម្មតា យើង​អត់​មាន​ទំនាស់​គ្នា​អី​ទេ យើង​គិត​ថា​យើង​ធ្វើ​កិច្ចសហការ​គ្នា​ដើម្បី​សង្កាត់​យើង​...​យើង​ធ្លាប់​សាមគ្គី​គ្នា​ធ្វើការ​កន្លង​មក អ៊ីចឹង​យើង​សាមគ្គី​ធ្វើការ​បន្ត​ទៀត​»​។

ចំណែក​អតីត​ចៅសង្កាត់​ចាក់អង្រែ​លើ លោក កែវ សាវឿន វ័យ​ ៤៨ ​ឆ្នាំ​មកពី​គណបក្ស​ប្រជាជន​កម្ពុជា​ដែល​ជា​ចៅសង្កាត់​រង​ទី​ ២ បាន​ថ្លែង​ទៅ​កាន់​អ្នក​សារព័ត៌មាន​ឲ្យ​ដឹង​ដែរ​ថា​លោក​នឹង​បន្ត​ធ្វើ​កិច្ចសហការ​ជាមួយ​ចៅសង្កាត់​ថ្មី​ដើម្បី​អភិវឌ្ឍ​សង្កាត់​តទៅ​ទៀត​ហើយ​បាន​អះអាង​ថា​នឹង​សិក្សា​ឡើង​វិញ​ដែរ​ថា​តើ​ការ​ដឹកនាំ​របស់​លោក​មាន​ចំណុច​ខ្វះខាត​អ្វី​ខ្លះ​ដែល​នាំ​ឲ្យ​បាត់បង់​សំឡេង​គាំទ្រ​នៅ​អាណត្តិ​ថ្មី​នេះ​។

លោក សាវឿន ធ្លាប់​ជា​ចៅសង្កាត់​ចាក់​អង្រែ​លើ​នេះ​តាំងពី​ឆ្នាំ​ ១៩៩៨​។

លោក សាវឿន ថ្លែង​ថា​៖ «​ខ្ញុំ​គិត​ថា​វា​ជា​រឿង​ធម្មតា យើង​ធ្លាប់​ធ្វើការ​ជាមួយ​គ្នា​តាំងពី​ឆ្នាំ​ ២០០២ ​មក​...​ជំទប់​ទី​ ១ ជំទប់​ទី​ ២ ​មិន​សំខាន់​ទេ សំខាន់​បម្រើ​សេវា​ជូន​រាស្ត្រ​...​យើង​នឹង​សហការ​គ្នា​ឲ្យ​បាន​ល្អ​ដរាប​ណា​ចៅសង្កាត់​ថ្មី​គេ​ឡើង​មក​គេ​ (​ចង់​) ​សហការ យើង​សហការ បើ​គេ​មិន​សហការ​យើង​ទៅ​សហការ​ម៉េច​គេ​មេ​...​យើង​គ្មាន​អ្វី​ក្រៅ​ពី​យក​ចិត្ត​ទុកដាក់​បម្រើ​សេវា​ជូន​ពលរដ្ឋ​ថែម​ទៀត​...​យើង​ដឹង​ថា​យើង​ថយ​សំឡេង​ហ្នឹង យើង​ក៏​ខិតខំ​ប្រឹង​បម្រើ​សេវា​បន្ត​ទៀត​ឲ្យ​បាន​ល្អ​ទៅ​ទៀត​ប្រជាពលរដ្ឋ​យល់​ចិត្ត​នឹង​បោះ​ឲ្យ​វិញ​»​។

ពលរដ្ឋ​ក្នុង​សង្កាត់​ចាក់អង្រែ​លើ​ម្នាក់​លោក ទេព វិសាល ដែល​បាន​ចូលរួម​ក្នុង​ពិធី​នេះ​ដែរ​បាន​ប្រាប់​ភ្នំពេញ​ប៉ុស្តិ៍​ថា​លោក​នឹង​តាម​ឃ្លាំ​មើល​ការ​អនុវត្ត​ការងារ​របស់​ចៅសង្កាត់​ថ្មី​នេះ​ថា​តើ​គាត់​អាច​ធ្វើ​បាន​តាម​ការ​សន្យា​ឬ​យ៉ាង​ណា​?

លោក​បន្ថែម​ថា​៖ «​ខ្ញុំ​សង្ឃឹម​ថា​ចៅសង្កាត់​ថ្មី​នេះ​នឹង​មាន​ការ​អភិវឌ្ឍ​ក្នុង​ភូមិ​សាស្ត្រ​គាត់​ច្រើន​...​តាម​ការ​សន្យា​របស់​គាត់​មុន​ពេល​បោះឆ្នោត​គាត់​សន្យា​ថា​អភិវឌ្ឍ​ក្នុង​តំបន់​របស់​ខ្ញុំ​ហ្នឹង​ឲ្យ​បាន​ច្រើន​...​ខ្ញុំ​នឹង​ឃ្លាំ​មើល​តាមដាន​សកម្មភាព​របស់​គាត់​ថា​គាត់​ពិត​ជា​បាន​ធ្វើ​ពិត​ឬ​អត់​ទៅ​ថ្ងៃ​ខាង​មុខ​»​។

Content image - Phnom Penh Post
លោក ស្រី ញាណ ចៅសង្កាត់​ចាក់អង្រែ​លើ​ថ្មី​។ ផា លីណា

ដោយឡែក​ចៅ​សង្កាត់​គណបក្ស​សង្គ្រោះ​ជាតិ​ក្នុង​សង្កាត់​ក្តុល ក្រុង​តាខ្មៅ ខេត្ត​កណ្តាល​លោក សន ចំរើន ថ្លែង​ថា​ក្រុម​ប្រឹក្សា​សង្កាត់​ទាំង​ពីរ​គណបក្ស​អាច​ធ្វើការ​ជាមួយ​គ្នា​បាន​ហើយ​ក៏​ត្រូវការ​រៀនសូត្រ​ពី​ចៅសង្កាត់​ចាស់​របស់​គណបក្ស​ប្រជាជន​ផង​ដែរ​។

លោក ចំរើន ថ្លែង​ថា​៖ «​ខ្ញុំ​មិន​បាន​ចាត់ទុក​អ្នក​ណា​ជា​សត្រូវ​ទេ យើង​នៅ​ក្នុង​ឃុំ​សង្កាត់​ទោះបី​យើង​មាន​និន្នាការ​នយោបាយ​ផ្សេង​គ្នា​តែ​យើង​ជា​អ្នកភូមិ​ស្រុក​ជាមួយ​គ្នា យើង​ទៅ​គុំកួន​គ្នា​ធ្វើ​អី យើង​ត្រូវ​នាំ​គ្នា​​កសាង​ភូមិ​ស្រុក​យើង​ឲ្យ​បាន​ល្អ​...​ជាពិសេស​ចៅសង្កាត់​ចាស់​របស់​គណបក្ស​ប្រជាជន​ហ្នឹង​គាត់​មាន​បទពិសោធ​ច្រើន ដូច្នេះ​យើង​មិន​អាច​មើល​រំលង​គាត់​បាន​ទេ​»​។

ពិធី​ប្រកាស​សុពលភាព​ក្រុម​ប្រឹក្សា​ឃុំ សង្កាត់​អាណត្តិ​ថ្មី​បាន​ចាប់ផ្តើម​ពី​ម្សិលមិញ​ក្រោយ​ពី​គណៈកម្មាធិការ​ជាតិ​រៀបចំ​ការ​បោះឆ្នោត​ប្រកាស​លទ្ធផល​បោះឆ្នោត​ជា​ផ្លូវការ​កាលពី​ថ្ងៃ​ទី​ ២៥ ខែ​មិថុនា ឆ្នាំ​ ២០១៧ កន្លង​មក​នេះ​។

អ្នក​នាំពាក្យ​ក្រសួង​មហាផ្ទៃ​លោក ខៀវ សុភ័គ បាន​ថ្លែង​ថា​ក្រសួង​មហាផ្ទៃ​បាន​ប្រគល់​ភារកិច្ច​ដល់​អភិបាល​រាជធានី-ខេត្ត​សម្រាប់​រៀបចំ​ពិធី​ប្រកាស​សុពលភាព​នេះ​។ លោក​ឲ្យ​ដឹង​ថា​តាម​ច្បាប់​គឺ​សុពលភាព​នេះ​នឹង​ត្រូវ​ប្រកាស​ចប់​សព្វ​គ្រប់​យ៉ាង​យូរ​ ១៤ ​ថ្ងៃ​ក្រោយ​ថ្ងៃ​ដែល​​ គ.ជ.ប ប្រកាស​លទ្ធផល​បោះឆ្នោត​ផ្លូវការ​។

លោក​បន្ថែម​ថា​៖ «​តាម​ច្បាប់​គឺ​យើង​ត្រូវ​ធ្វើឲ្យ​ចប់​សព្វ​គ្រប់​ក្រោយ​ ១៤ ​ថ្ងៃ​ក្រោយ​ គ.ជ.ប លោក​ប្រកាស​លទ្ធផល​...​ក្រសួង​លោក​បាន​ប្រគល់​ផ្ទេរ​សិទ្ធិ​ប្រកាស​ហ្នឹង​ទៅ​កាន់​ឯកឧត្តម​ក្រុមប្រឹក្សា​រាជធានី-ខេត្ត​ហើយ​លោក​ចាត់ចែង​» ​។

ក្នុង​ពិធី​ប្រកាស​សុពលភាព​នេះ​អាច​មាន​ការ​ចូលរួម​ជា​អធិបតី​ពី​សំណាក់ អភិបាល​ខេត្ត​ អភិបាលក្រុង ឬ​ក៏​ជា​មន្ត្រី​ជាន់​ខ្ពស់​របស់​សាលា​រាជធានី​ជាដើម​។

ជាក់ស្តែង​នៅ​សង្កាត់​ចាក់អង្រែ​លើ​មាន​នាយក​រង​រដ្ឋបាល​សាលា​រាជធានី​ភ្នំពេញ​លោក លឹម ឡេង ជា​អធិបតី និង​ជា​អ្នក​ប្រគល់​ត្រា​ចៅសង្កាត់​ថ្មី និង​នៅ​សង្កាត់​ក្តុល ក្រុង​តាខ្មៅ ខេត្ត​កណ្តាល​មាន​ការ​ចូលរួម​ពី​អភិបាល​ខេត្ត​លោក ម៉ៅ ភិរុណ និង​នៅ​សង្កាត់​ផ្សារកណ្តាល ក្រុង​ប៉ោយប៉ែត​មាន​ការ​ចូលរួម​ជា​អធិបតី​ដោយ​លោក​អភិបាល​ក្រុង​ ង៉ោ ម៉េងជ្រុន ជាដើម​។

ក្នុង​ពិធី​ដូច​គ្នា​នេះ​ដែរ​ក៏​នៅ​តែ​មាន​បញ្ហា​ខ្លះ​រវាង​ចៅសង្កាត់​ចាស់ និង​ចៅសង្កាត់​ថ្មី​នៅ​សង្កាត់​ផ្សារកណ្តាល​ក្រុង​ប៉ោយប៉ែត​មាន​ការ​មិន​ចុះ​សម្រុង​គ្នា​ក្នុង​ការ​សង់រោង​សម្រាប់​ប្រកាស​សុពលភាព​នេះ​។ ដោយសារ​ចៅសង្កាត់​ថ្មី​មកពី​គណបក្ស​សង្គ្រោះ​ជាតិ​អ្នកស្រី ឃុន ចន្ទី ចង់​ឲ្យ​មាន​ការ​សង់រោង​ទទួល​ពលរដ្ឋ​ដែល​ចង់​ចូលរួម តែ​អ្នកស្រី​ថា​ចៅសង្កាត់​ចាស់​មកពី​គណបក្ស​ប្រជាជន​កម្ពុជា​លោក ជាតិ ហ៊ុល មិន​អនុញ្ញាត​។

ទោះ​យ៉ាង​ណា ​អ្នកស្រី​ថា ​កម្មវិធី​នៅ​តែ​ប្រព្រឹត្ត​ទៅ​ដដែល​ដោយ​កម្មវិធី​រៀបចំ​ក្នុង​អគារ​សាលាសង្កាត់​តែ​ម្តង​។

ទោះបី​មាន​ភាព​រកាំរកូស​តាំងពី​ដើមទី​យ៉ាង​នេះ​ក្តី ក៏​​អ្នកស្រី​យល់​ថា​យើង​ទាំង​ពីរ​នៅ​តែ​អាច​សហការ​គ្នា​បាន​ល្អ​​ដដែល​។ លោក ជាតិ ហ៊ុល មិន​អត្ថាធិប្បាយ​ទេ​ពេល​ទាក់ទង​តាម​ទូរស័ព្ទ​កាលពី​ម្សិលមិញ​ដោយ​ថា​លោក​កំពុង​ជាប់​រវល់​រៀបចំ​ឯកសារ​។

តាម​ច្បាប់​ស្តីពី​ការ​គ្រប់គ្រង​រដ្ឋបាល​ឃុំ សង្កាត់ ត្រង់​មាត្រា​ ១៩ ​ចែង​ថា «​ក្នុង​អំឡុង​ពេល​ ១៤ ​ថ្ងៃ​ក្រោយ​ការ​ប្រកាស​លទ្ធផល​ផ្លូវការ​បោះឆ្នោត​ត្រូវ​ចាត់​ឲ្យ​មាន​ការ​ប្រជុំ​លើក​ដំបូង​នៃ​ក្រុម​ប្រឹក្សាឃុំ សង្កាត់​ក្រោម​​អធិបតីភាព​មន្ត្រី​ណា​ម្នាក់​ដែល​ចាត់​តាំង​ដោយ​រដ្ឋមន្ត្រី​ក្រសួង​មហាផ្ទៃ​ដើម្បី​ប្រកាស​សុពលភាព​ក្រុម​ប្រឹក្សាឃុំ សង្កាត់ មេឃុំ ចៅសង្កាត់ ជំទប់ និង​ចៅសង្កាត់​រង​»៕

0

Comments

Please, login or register to post a comment

ព័ត៌មានពាក់ព័ន្ធ