Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រសួង​មហាផ្ទៃ​មិន​ផ្តល់​ទិដ្ឋាការ​ឲ្យ​​អាឡិច ទោះ​មាន​បណ្តឹង​​​តុលាការ

លោក អាឡិច ស្ថាបនិក​ចលនា​មាតា​ធម្មជាតិ​ដែល​រង​បណ្តឹង​នៅ​តុលាការ​ខេត្ត​កោះកុង​។
លោក អាឡិច ស្ថាបនិក​ចលនា​មាតា​ធម្មជាតិ​ដែល​រង​បណ្តឹង​នៅ​តុលាការ​ខេត្ត​កោះកុង​។ រូបថត សហការី

ក្រសួង​មហាផ្ទៃ​មិន​ផ្តល់​ទិដ្ឋាការ​ឲ្យ​​អាឡិច ទោះ​មាន​បណ្តឹង​​​តុលាការ

ភ្នំពេញៈ មន្ត្រី​ជាន់​ខ្ពស់​ក្រសួង​មហាផ្ទៃ​ព្រមាន​ចាត់​វិធានការ​ផ្លូវ​​ច្បាប់​ទៅ​លើ​លោក​ អាឡិច ហ្សង់ដ្រូ ស្ថាបនិក​អង្គការ​ចលនា​​​មាតា​ធម្មជាតិ​បើ​ជនបរទេស​រូប​​នេះ​នៅ​តែ​រឹងរូស​ចូល​មក​កម្ពុជា​ដើម្បី​​តទល់​រឿង​​ក្តី​នៅ​​​សាលា​​ដំបូង​​ខេត្ត​កោះកុង​ដោយ​គ្មាន​ការ​​អនុញ្ញាត​តែ​យ៉ាង​​ណា​មេធាវី​របស់​លោក​ អាឡិច បាន​ដាក់​​ពាក្យ​ប្តឹង​ទៅ​សាលា​ឧទ្ធរណ៍​សុំ​ដីកា​ដំណោះស្រាយ​ក្រោយ​​ពី​ចៅក្រម​ចេញ​ដីកា​បង្គាប់​ឲ្យ​ចាប់​​ខ្លួន​លោក​។

លោក​ អាឡិច ត្រូវ​បាន​រដ្ឋាភិបាល​បណ្តេញ​ចេញ​​ពី​កម្ពុជា​កាលពី​ខែ​កុម្ភៈ​ឆ្នាំ​ ២០១៥ និង​បាន​ដាក់​ឈ្មោះ​​ចូល​ក្នុង​បញ្ជី​ខ្មៅ​ហាម​ចូល​មក​កម្ពុជា​ក្រោយពី​លោក​ចូលរួម​យ៉ាង​សកម្ម​​ប្រឆាំង​នឹង​ការ​ធ្វើ​ទំនប់​វារីអគ្គិសនី​នៅ​តំបន់​អារ៉ែង និង​ការ​បូមខ្សាច់​នៅ​ខេត្ត​កោះកុង។

លោក​ អាឡិច ត្រូវ​បាន​តុលាការ​ខេត្ត​កោះកុង​ចោទប្រកាន់​ពី​បទ «សម​​គំនិត​ក្នុង​អំពើ​គំរាម​កំហែង​​ និង​​ធ្វើឲ្យ​ខូច​ខាត​ដោយ​ភ្ជាប់​នូវ​បញ្ជា​អ្វី​មួយ» ហើយ​​ចេញ​ដីកា​បង្គាប់​​ឲ្យ​​​ចាប់​ខ្លួន​​កាលពី​ថ្ងៃ​ទី​ ១៨ មករា​ក្រោយពី​លោក​ពុំ​បាន​​​ចូល​​បំភ្លឺ​​តាម​ដីកា​កោះ​។

អ្នក​នាំ​ពាក្យ​ក្រសួង​មហាផ្ទៃ​លោក ខៀវ សុភ័គ បាន​ថ្លែង​កាលពី​ថ្ងៃ​ម្សិលមិញ​ថា​បើ​ទោះ​ជា​លោក​ អាឡិច កំពុង​ជាប់​បណ្តឹង​​នៅ​តុលាការ​ប៉ុន្តែ​កម្ពុជា​មិន​អាច​​ផ្តល់​ទិដ្ឋាការ​ឲ្យ​ជនបរទេស​​រូប​នេះ​បាន​ទេ​ព្រោះ​គាត់​ស្ថិត​នៅក្នុង​បញ្ជី​ខ្មៅ​​ដែល​ហាម​ចូល​មក​កម្ពុជា។ លោក​បាន​ព្រមាន​ពី​វិធានការ​​ក្តៅ​បើ​សិន​​​លោក​ អាឡិច នៅ​តែ​រឹងរូស​ចូល​មក​កម្ពុជា​ដោយ​គ្មាន​ការ​អនុញ្ញាត។

លោក​ថា៖ «អាឡិច ជា​មនុស្ស​ដែល​កម្ពុជា​លែង​​ត្រូវការ​ហើយ​ដូច្នេះ​មិន​អាច​ចូល​មក​​កម្ពុជា​​បាន​ទេ។ តុលាការ​អាច​កាត់​ទោស​កំបាំង​​មុខ​បាន​តើ​ចាំបាច់​មាន​មុខ​គេ​ហ្នឹង​​មក​ធ្វើ​អី។ បើ​ហ៊ាន​មក​សាក​មើល​ទៅ​ច្បាប់​គឺ​ច្បាប់»។

លោក​ អាឡិច បាន​ដាក់​ពាក្យ​សុំ​ទិដ្ឋាការ​ទៅ​ក្រសួង​មហាផ្ទៃ​កាលពី​ថ្ងៃ​ទី​ ១៨ មីនា​ដើម្បី​មាន​​​ឱកាស​​ចូល​បំភ្លឺ​ក្នុង​សវនាការ​។

មេធាវី​ការពារ​ក្តី​ឲ្យ​លោក​ អាឡិច គឺ​លោក គង់ ពិសី បាន​ថ្លែង​ថា​លោក​អាឡិច​មាន​បំណង​មក​​បង្ហាញ​ខ្លួន​នៅ​មុខ​តុលាការ​នៅ​ពេល​ដែល​មាន​ដីកា​កោះ​ហៅ​ទៅ​បំភ្លឺ​ប៉ុន្តែ​ច្បាប់​​អន្តោប្រវេសន៍​មិន​អនុញ្ញាត​ឲ្យ​លោក​ចូល​មក​កម្ពុជា​ទេ​ដែល​ករណី​នេះ​ធ្វើឲ្យ​លោក​ អាឡិច ​អាក់ខាន​ក្នុង​ការ​ចូល​តតាំង​​រឿង​ក្តី​នៅ​តុលាការ​។

ទោះ​យ៉ាង​ណា​លោក​ថា​ក្រុម​មេធាវី​​​បាន​​ដាក់​ពាក្យ​​ប្តឹង​ទៅ​សាលា​ឧទ្ធរណ៍​ស្នើសុំ​ដីកា​ដំណោះស្រាយ​ និង​ទម្លាក់​ចោល​ការ​ចោទប្រកាន់​នោះ​ព្រោះ​នីតិវិធី​ស៊ើបសួរ​របស់​​ចៅក្រម​សាលា​ដំបូង​ខេត្ត​មាន​ភាព​មិន​ត្រឹមត្រូវ​ និង​​បាន​ចេញ​ដីកា​បង្គាប់​ឲ្យ​​ចាប់​​ខ្លួន​ទៀត។

លោក​បាន​ថ្លែង​ឲ្យ​ដឹង​ទៀត​ថា៖ «យើង​ឃើញ​​​ថា​ចៅក្រម​បិទ​ការ​ស៊ើបអង្កេត​អត់​ត្រឹម​ត្រូវ​តាម​ផ្លូវ​ច្បាប់​អ៊ីចឹង​យើង​សុំ​ឲ្យ​មាន​ការ​ដោះលែង​ ឬ​ទម្លាក់​ការ​ចោទ​ប្រកាន់​វិញ​ឥឡូវ​កំពុង​រង់ចាំ​​ចំណាត់ការ​របស់​សាលា​ឧទ្ធរណ៍​»។

ក្រោយពី​មាន​ការ​ចាប់​ឃុំ​ខ្លួន​សកម្មជន​ចលនា​​មាតា​ធម្មជាតិ ៣ នាក់​រួម​មាន​លោក​ ទ្រី សុវិគា លោក ​ស៊ុន ម៉ាឡា និង​លោក​ ស៊ីម សំណាង នោះ​ក្រុម​គ្រួសារ​ពួកគេ និង​សង្គម​ស៊ីវិល​ធា្លប់​បាន​​ឲ្យ​ដឹង​ថា​ក្រៅពី​លោក​ អាឡិច តុលាការ​ក៏​បាន​ចោទ​ព្រះសង្ឃ ២ ​អង្គ​ទៀត​​ដែរ​រួមមាន​ព្រះតេជ​គុណ សុខ ចាន់ត្រា ​ព្រះចៅ​អធិការ​វត្ត​អង្គ​គិរី​នៅ​តំបន់​​​អារ៉ែង និង​​ព្រះតេជគុណ ព្រហ្ម ធម្មជាតិ នាយក​ប្រតិបត្តិ​កិត្តិយស​ចលនា​មាតា​ធម្មជាតិ។ ប៉ុន្តែ​លោក​មេធាវី ពិសី បាន​ប្រាប់​ឲ្យ​ដឹង​ថា​ព្រះសង្ឃ​ពីរ​អង្គ​នោះ​ត្រូវ​បាន​ព្រះរាជអាជ្ញា​ទម្លាក់​ចោល​​ការ​​ចោទប្រកាន់​ហើយ។

ចៅក្រម​ស៊ើបសួរ​សាលា​ដំបូង​ខេត្ត​​កោះកុង​លោកស្រី ឈុន ដាវី និង​ចៅក្រម​ជំនុំ​ជម្រះ​លោក មីន មករា មិន​អាច​សុំ​ការ​អធិប្បាយ​បាន​ទេ​កាលពី​ថ្ងៃ​ម្សិលមិញ​។ ព្រះរាជ​អាជ្ញា ប៊ូ ប៊ុនហាង បដិសេធ​ឆ្លើយតប។

ទោះ​យ៉ាង​ណា​លោក​ អាឡិច បាន​​បញ្ជាក់​ថា​លោក​នៅ​តែ​ចង់​មក​កាន់​កម្ពុជា​ដើម្បី​ការពារ​ខ្លួន​ពី​ការ​ចោទប្រកាន់​នេះ៕

0

Comments

Please, login or register to post a comment