.jpg)
ឈើដែលត្រូវបានកាប់បំផ្លាញនៅព្រៃព្រះរកា កាលពីដើមខែកុម្ភៈ។ រូបថត សហការី
ព្រះវិហារៈ តំណាងក្រុមហ៊ុនដួងស្រួច ក្នុងខេត្តព្រះវិហារបានបដិសេធថា ខ្លួនមិនបានប្រមូលឈើពីខាងក្រៅដីសម្បទានសង្គមកិច្ចដូចការចោទប្រកាន់នោះទេ ហើយថាក្រុមហ៊ុនអាចនឹងដាក់ពាក្យសុំប្រមូលឈើដែលនៅសេសសល់រាប់ពាន់ដើមឡើងវិញ ក្រោយពីរដ្ឋាភិបាលបញ្ជាឲ្យបញ្ឈប់សកម្មភាព។
លោក លី ពុទ្ធារ៉ា ដែលតំណាងឲ្យក្រុមហ៊ុនក្នុងខេត្តព្រះវិហារប្រាប់ភ្នំពេញ-ប៉ុស្តិ៍ពីម្សិលមិញ ថាអគ្គនាយកក្រុមហ៊ុនលោក ដួង ស្រួច អាចនឹងដាក់ពាក្យស្នើសុំដើម្បីបន្តសកម្មភាពប្រមូលឈើបង្ហើយនៅក្នុងដីសម្បទានសង្គមកិច្ចទំហំ ១៥៤៥ ហិកតាស្ថិតក្នុងឃុំរំដោះស្រែ ស្រុកជាំក្សាន្ត ដែលក្រុមហ៊ុនបានទទួលសិទ្ធិ។ សំណើនោះអាចនឹងត្រូវដាក់ទៅអាជ្ញាធរខេត្តព្រះវិហារ ហើយសាលាខេត្តក៏អាចនឹងចាត់ចែងបញ្ជូនទៅក្រសួងកសិកម្មដើម្បីពិនិត្យ និងសម្រេច។
លោក ពុទ្ធារ៉ា ថ្លែងថា៖ «ខាងក្រុមហ៊ុនខ្ញុំនៅមានឈើសេសសល់។ អ៊ីចឹងអាចដាក់ជាសំណើសុំ បង្ហើយឈើដែលសេសសល់នៅក្នុងក្រុមហ៊ុន។ ការដាក់ពាក្យគឺដាក់ស្នើពីក្រោមទៅតែខ្ញុំអត់ទាន់ដឹងថានឹងដាក់ពេលណាទេ គឺអាស្រ័យអគ្គនាយកក្រុមហ៊ុន»។ លោកឲ្យដឹងថាឈើដែលនៅសេសសល់គឺមានប្រមាណជា ៣ ទៅ ៤ ប្រភេទផ្សេងៗគ្នា។ ក្នុងនោះមានកូនឈើប្រមាណជា ៤ ទៅ ៥ ពាន់ដើម និងឈើហុបប្រហែលជាង ១០០ ម៉ែត្រគុបជាដើម។
សហគមន៍ អាជ្ញាធរមូលដ្ឋាន អង្គការសង្គមស៊ីវិល និងសារព័ត៌មានជាច្រើនបានរាយការណ៍ចោទប្រកាន់ថាក្រុមហ៊ុន ដួង ស្រួច បានប្រមូលទិញឈើពីក្រៅដីសម្បទានសង្គមកិច្ច។
លោក ទេព សែន មេឃុំរំដោះស្រែក្នុងស្រុជាំក្សាន្តអះអាងពីម្សិលមិញថា បន្ទាប់ពីប្រមូលឈើក្នុងដីសម្បទានសង្គមកិច្ចរួច ក្រុមហ៊ុន ដួង ស្រួច បានបន្តប្រមូលទិញឈើពីខាងក្រៅពីប្រជាពលរដ្ឋមូលដ្ឋាន និងជនចំណាកស្រុកដែលបានលួចកាប់ក្នុងព្រៃសហគមន៍រំដោះស្រែ ១ និងរំដោះស្រែ ២ និងពីព្រៃព្រះរកាកាលពីឆ្នាំ ២០១៦ និង ២០១៧។
លោកមេឃុំបញ្ជាក់ថា៖ «គាត់មិនត្រឹមតែប្រមូលឈើក្នុងដីសម្បទានហ្នឹងទេ [តែ] គាត់ឆ្លៀតឱកាសហ្នឹងទៅទិញឈើនៅខាងក្រៅដីសម្បទាន។ គាត់មិនជួយសហគមន៍ហើយថែមទាំងបង្កបញ្ហាទិញឈើនៅខាងក្រៅចូលមកក្នុងទៀតតាមរយៈការឃុបឃិតគ្នាដែលគាត់ស្គាល់»។
លោកបន្តថាក្នុងចំណោមឈើដែលគេលួចកាប់នោះក៏មានដើមជ័រច្បោះរបស់ប្រជាសហគមន៍ជិត ១ ពាន់ដើមផងដែរ។ លើសពីនោះក្រុមហ៊ុនក៏មិនបានធ្វើការកសាងហេដ្ឋារចនាសម្ព័ន្ធជូនពលរដ្ឋតាមការសន្យាផងដែរ ដូចជាមិនបានសាងសង់មណ្ឌលសុខភាព សាលារៀន ផ្លូវថ្នល់ អណ្តូងទឹក និងប៉ុស្តិ៍រដ្ឋបាលជាដើម។
លោកថ្លែងថា៖ «យើងខ្វះថវិកាសាងសង់ហេដ្ឋារចនាសម្ព័ន្ធ។ កន្លងមកក្រុមហ៊ុន ដួង ស្រួច ធានាថាធ្វើឲ្យ តែដល់ពេលគាត់ប្រមូលឈើក្នុងដីសង្គមកិច្ចហើយក្នុងរយៈពេលប៉ុន្មានឆ្នាំនេះគាត់អត់មានសមិទ្ធផលអីសោះជូនដល់ពលរដ្ឋ។ គាត់អត់ជួយពលរដ្ឋ។ ប្រមូលឈើអស់យករួចខ្លួនហើយធ្វើឲ្យប៉ះពាល់គេទៀត»។
តំណាងក្រុមហ៊ុន លោក ពុទ្ធារ៉ា ឲ្យដឹងថាក្រុមហ៊ុនបានធ្វើសកម្មភាពនៅតំបន់នោះប្រមាណជា ៥ ឆ្នាំ គឺមុនពេលដែលលោកចូលធ្វើការទៅទៀត។ ប៉ុន្តែ លោកបានបដិសេធថា ក្រុមហ៊ុនមិនបានកាប់ និងប្រមូលទិញឈើពីខាងក្រៅដីសម្បទានសង្គមកិច្ចនោះទេ។
លោកអះអាងថា៖ «ខាងខ្ញុំកាប់ឈើក្នុងក្រុមហ៊ុន។ និយាយទៅបញ្ហាហ្នឹងគឺគ្រាន់តែជាពាក្យចោទប្រកាន់ប៉ុណ្ណោះ។ និយាយទៅក្រុមហ៊ុនមិនមានការខុសច្បាប់ទេ»។
ជាង ២ សប្តាហ៍បន្ទាប់ពីក្រសួងកសិកម្មបានសម្រេចបញ្ឈប់ការប្រមូលឈើកាលពីថ្ងៃទី ១១ ខែមករាកន្លងមកមន្ត្រីជំនាញរដ្ឋបាលព្រៃឈើមូលដ្ឋានចំនួន ៦ នាក់បានចុះទៅធ្វើការណែនាំក្រុមហ៊ុនពីខ្លឹមសារនៃការសម្រេចរបស់ក្រសួងនេះ។ តំណាងក្រុមហ៊ុន លោក លី ពុទ្ធារ៉ា ក៏បានចុះហត្ថលេខាដោយសន្យាថានឹងគោរពតាមការសម្រេចនោះដែរ ហើយបើមានការបំពានសេចក្តីសម្រេចបញ្ឈប់នោះ លោកនឹងទទួលខុសត្រូវចំពោះមុខច្បាប់ស្តីពីព្រៃឈើ។
លោក អ៊ុន ចាន់ដា អភិបាលខេត្តព្រះវិហារ និងលោក គោស៊ុំ ប៊ុនសឿត អ្នកនាំពាក្យសាលាខេត្តមិនអាចទាក់ទងសុំការអធិប្បាយបានទេកាលពីថ្ងៃម្សិលមិញ។
ក្រៅពីខេត្តព្រះវិហារ ក្រុមហ៊ុន ដួង ស្រួច ក្នុងឆ្នាំ ២០១៧ ក៏បានទទួលសិទ្ធិពីក្រសួងកសិកម្ម ដើម្បីប្រមូលឈើលើដីសម្បទានសង្គមកិច្ចក្នុងខេត្តស្ទឹងត្រែងចំនួន ១៥០០ ហិកតា និងស្រុកពេជ្រាដា ខេត្តមណ្ឌលគិរីចំនួន ៥១៤៥,៦៨ ហិកតាផងដែរ៕
