ទោះ​បី​ជា​ស្ថាប័ន​រដ្ឋសភា និង​រដ្ឋាភិបាល ដែល​ត្រូវ​បាន​បង្កើត​ឡើង​ដោយ​រដ្ឋ សភា​ឯកបក្ស មើល​ទៅ​ហាក់​បី​ដូច​ជា​កំពុង​ដំណើរការ​ធម្មតា អស់​រយៈ​ពេល​ជិត​មួយ​ឆ្នាំ​មក​ហើយ​ក្តី ក៏​ក្រុម​អ្នក​វិភាគ​មើល​ឃើញ​ថា វិបត្តិ​នយោបាយ​ដែល​កំពុង​បន្ត​អូស​បន្លាយ​នេះ ក្រៅ​ពី​ធ្វើ​ឲ្យ​អាម៉ាស់​ដល់​មុខ​មាត់​របស់​ប្រទេស​វា​ក៏​ធ្វើ​ឲ្យ​រាំង​ស្ទះ​ដល់​ដំណើរការ​អភិវឌ្ឍន៍​ប្រទេស​ក្រីក្រ​មួយ​នេះ​ផង​ដែរ។ ជាមួយ​គ្នា​នេះ គណបក្ស​ប្រជាជន ដែល​កាន់​អំណាច​ជាង ៣០​ឆ្នាំ មក​ហើយ អាច​នឹង​ធ្លាក់​ចុះ​ប្រជាប្រិយភាព​កាន់​តែ​ខ្លាំង​ថែម​ទៀត​ដោយ​សារ​តែ​វិបត្តិ​នយោបាយ​ដែល​អាច​ដោះស្រាយ​បាន​នេះ ប្រសិន​បើ​លោក ហ៊ុន សែន មាន​ឆន្ទៈ​ពិត​ប្រាកដ​ចង់​ដោះស្រាយ។