Search form

Login - Register | FOLLOW US ON

Logo of Phnom Penh Post newspaper Phnom Penh Post - គ.ជ.ប ធានា​ឲ្យ​មាន​ភាព​ស្មើ​គ្នា​ សម្រាប់​បក្ស​នយោបាយ​ឃោសនា

Content image - Phnom Penh Post
លោក ហង្ស ពុទ្ធា អ្នក​នាំពាក្យ​ គ.ជ.ប។ ផា លីណា

គ.ជ.ប ធានា​ឲ្យ​មាន​ភាព​ស្មើ​គ្នា​ សម្រាប់​បក្ស​នយោបាយ​ឃោសនា

ភ្នំពេញ: គណៈកម្មាធិការ​ជាតិ​រៀបចំ​ការ​បោះឆ្នោត គ.ជ.ប បាន​រៀបចំ​គោលការណ៍​ចំនួន​បី ដើម្បី​ធានា​ឱ្យ​មាន​ភាព​ស្មើគ្នា​សម្រាប់​គណបក្ស​នយោបាយ​ទាំងអស់​នៅ​ក្នុង​អំឡុង​ពេល​ឃោសនា​បោះឆ្នោត ហើយ​នឹង​អញ្ជើញ​តំណាង​គណបក្ស​ដែល​បាន​ចុះ​ឈ្មោះ​មក​ពិភាក្សា​ពី​គោលនយោបាយ​របស់​ខ្លួន​នៅ​លើ​កញ្ចក់​ទូរទស្សន៍​ជាតិ ទទក ខណៈ​ដែល​តំណាង​គណបក្ស និង​សង្គម​ស៊ីវិល​នៅ​តែ​មើល​ឃើញ​ថា ​ស្ថានីយ​ទូរទស្សន៍ និង​វិទ្យុ​មួយ​ចំនួន​នឹង​មិន​ហ៊ាន​ជួល​ម៉ោង​ផ្សាយ​ឱ្យ​បក្ស​ផ្សេង​ក្រៅពី​បក្ស​កាន់​អំណាច​ឡើយ។

សេចក្តី​ប្រកាស​ព័ត៌មាន​របស់ គជប ចេញ​ផ្សាយ​កាលពី​ថ្ងៃ​ទី ១៨ ខែ​មីនា​បាន​ឱ្យ​ដឹង​ថា​គោលការណ៍​ទាំង​បី​នោះ​រួម​មាន​គោលការណ៍​សម្រាប់​អង្គការ​មិនមែន​រដ្ឋាភិបាល និង​ប្រព័ន្ធ​ផ្សព្វផ្សាយ​ដែល​ចង់​រៀបចំ​កិច្ចពិភាក្សា​អំពី​គោលនយោបាយ​របស់​គណបក្ស​នយោបាយ គោលការណ៍​សម្រាប់​វិទ្យុ និង​ទូរទស្សន៍​សម្រាប់​ផ្សព្វផ្សាយ និង​កម្មវិធី​សមធម៌​សម្រាប់​គណបក្ស។

លោក ហង្ស ពុទ្ធា អ្នក​នាំ​ពាក្យ គ.ជ.ប បាន​ប្រាប់​ភ្នំពេញ​ប៉ុស្តិ៍​បន្ថែម​ទាក់ទង​នឹង​គោលការណ៍​ទាំង​នេះ​ថា​អង្គការ​មិនមែន​រដ្ឋាភិបាល​អាច​មក​ពិភាក្សា​ជាមួយ គ.ជ.ប បាន​ទាក់ទង​នឹង​គោលនយោបាយ​របស់​បក្ស​នីមួយៗ​ និង​លើក​ឡើង​ពី​ការ​ព្រួយបារម្ភ ខណៈ​ដែល គ.ជ.ប នឹង​អញ្ជើញ​តំណាង​គណបក្ស​នយោបាយ​មក​ពិភាក្សា​នៅ​លើ​ទូរទស្សន៍​ជាតិ។

លោក​ថា៖ «ខាង គ.ជ.ប នឹង​រៀបចំ​នូវ​កម្មវិធី​តម្លាភាព​អញ្ជើញ​គណបក្ស​នយោបាយ​ចូល​រួម​ផ្ទាល់​អត្ថាធិប្បាយ​អំពី​គោលការណ៍​របស់​ខ្លួន​នៅ​ពេល​ជាប់​ឆ្នោត​ថា​មាន​គោលការណ៍​យ៉ាង​ណា ហើយ​យើង​ផ្តល់​ពេល​ឱ្យ​គាត់ ១៥ នាទី​សម្រាប់​ផ្សព្វផ្សាយ​គោលនយោបាយ​របស់​ខ្លួន»។

គោលការណ៍​ទាំង​បី​នេះ​នឹង​ចាប់​ផ្តើម​អនុវត្ត​ចាប់​ពី​ថ្ងៃ​ទី ២០ ខែ​ឧសភា ដល់​ថ្ងៃ​ទី ២ ខែ​មិថុនា ឆ្នាំ ២០១៧។ លោក ហង្ស ពុទា្ធ បញ្ជាក់​ថា​គ្រប់​គណបក្ស​ទាំងអស់​អាច​ជួល​ម៉ោង​ផ្សាយ​នៅ​លើ​កញ្ចក់​ទូរទស្សន៍ និង​វិទ្យុ​របស់​ឯកជន​បាន​អាស្រ័យ​ទៅ​លើ​លទ្ធភាព​របស់​គណបក្ស​នីមួយៗ។

លោក​ថា៖ «បើ​គណបក្ស​ណា​គាត់​មាន​លុយ គាត់​អាច​ទៅ​ជួល​ម៉ោង​នៅ​តាម​វិទ្យុ និង​ទូរទស្សន៍​ផ្សាយ​ហើយ​ផ្អែក​ទៅ​លើ​លក្ខខណ្ឌ​ផ្ទាល់​ជាមួយ​ទូរទស្សន៍​តែ គ.ជ.ប មិន​លូក​ដៃ​នៅ​ពេល​ស្ថានីយ​ផ្សាយ​របស់​ឯកជន​មិន​ជួល​ឱ្យ​បក្ស​ណា​ទេ ព្រោះ​ជា​រឿង​របស់​គេ»។

នាយក​អង្គការ NDI ប្រចាំ​កម្ពុជា​លោក ភីតធើ ម៉ានីកាស់ បាន​ថ្លែង​តាមរយៈ គ.ជ.ប ថា៖ «គោលការណ៍​ទាំង​បី​នេះ​ពិតជា​សំខាន់​ណាស់​ដើម្បី​ធានា​អំពី​តម្លាភាព​សម្រាប់​គណបក្ស​នយោបាយ​នីមួយៗ»។

ការ​បោះឆ្នោត​ក្រុម​ប្រឹក្សា​ឃុំ​សង្កាត់​នឹង​ប្រព្រឹត្ត​ទៅ​នៅ​ថ្ងៃ​ទី ៤ ខែ មិថុនា ឆ្នាំ ២០១៧ ហើយ​ការ​ឃោសនា​បោះឆ្នោត​មាន​រយៈពេល ១៤ ថ្ងៃ​តែ​អំឡុង​ពេល ១៤ ថ្ងៃ​នេះ​ច្បាប់​អនុញ្ញាត​ឱ្យ​គ្រប់​គណបក្ស​ទាំង​អស់​ហែ​ក្បួន​តែ ២ ថ្ងៃ​ប៉ុណ្ណោះ។

នាយក​វិទ្យាស្ថាន​កម្ពុជា​សម្រាប់​ការ​សិក្សា​ផ្នែក​សារព័ត៌មាន​លោក មឿន ឈានណារិទ្ធិ ថ្លែង​ថា ​គោលការណ៍​ទាំង​បី​ល្អ​សម្រាប់​ការ​បោះឆ្នោត​ខាង​មុខ ខណៈ​លោក​ព្រួយ​បារម្ភ​ពី​ការ​អនុវត្ត​មិន​មាន​តម្លាភាព។

លោក​ថា៖ «ការ​បង្កើត​ច្បាប់​ទម្លាប់​ល្អ​ហើយ តែ​ការ​អនុវត្ត​ជាក់ស្តែង​តែងតែ​មាន​ការ​ផ្លាស់ប្តួរ»។

លោក​សង្កេត​ឃើញ​ថា ​ប្រព័ន្ធ​ផ្សព្វផ្សាយ​តាមរយៈ​ទូរទស្សន៍ និង​វិទ្យុ​មួយ​ភាគ​ច្រើន​នឹង​មិន​ជួល​ម៉ោង​ផ្សាយ​ដល់​គណបក្ស​ផ្សេង​ក្រៅពី​បក្ស​កាន់​អំណាច​ទេ។

លោក​បាន​បន្ត​ថា៖ «សម្រាប់​ទូរទស្សន៍ និង​វិទ្យុ​ភាគច្រើន​ទោះបី​ឯកជន​ក៏ដោយ​ហាក់​ដូចជា​មាន​ភាព​លម្អៀង និង និន្នាការ​ទៅ​បក្ស​កាន់​អំណាច​ច្រើន​ដែល​ធ្វើ​ឱ្យ​គាត់​មិន​ហ៊ាន​ផ្សព្វផ្សាយ​គោលនយោបាយ​បក្ស​ផ្សេង»។ យ៉ាង​នេះ​ក្តី​លោក​មើល​ឃើញ​ថា​ការ​រៀបចំ​ការ​បោះឆ្នោត​អាណត្តិ​បច្ចុប្បន្ន​ប្រសើរ​ជាង​អាណត្តិ​មុន»។

ភ្នំពេញ​ ប៉ុស្តិ៍ ​មិន​អាច​សុំ​ការ​អត្ថាធិប្បាយ​ពី​អ្នក​នាំពាក្យ​គណបក្ស​ប្រជាជន​កម្ពុជា ​លោក សុខ ឥសាន បាន​ទេ ​កាលពី​ថ្ងៃ​ម្សិលមិញ។

បុគ្គលិក​ផ្នែក​ទីផ្សារ​នៅ​ទូរទស្សន៍​បាយ័ន និង BTV អ្នកស្រី បូ ថ្លែង​ថា​ជា​គោលការណ៍​ទូរទស្សន៍​របស់​ខ្លួន​ជួល​ម៉ោង​ឱ្យ​តែ​កម្មវិធី​កម្សាន្ត និង​កម្មវិធី​កីឡា​ជាដើម​គឺ​មិន​ពាក់ព័ន្ធ​ជាមួយ​នយោបាយ​ទេ។

អ្នកស្រី​ថា៖ «ពាក់ព័ន្ធ​រឿង​នយោបាយ​ខាង​បង​អត់​ធ្វើ​តែ​ម្តង យើង​អត់​ដែល​មាន​គោលការណ៍​ជួល​ម៉ោង​ផ្សាយ​ឱ្យ​ទេ ហើយ​ក៏​នឹង​មិន​មាន​ដែរ​ពាក់ព័ន្ធ​នយោបាយ ក្រុមហ៊ុន​យើង​រក​តែ​រឿង​ពាណិជ្ជកម្ម និង​ធ្វើ​ព័ត៌មាន​ទូទៅ»។

អ្នក​នាំពាក្យ​គណបក្ស​ប្រជាធិបតេយ្យ​មូលដ្ឋាន​ លោក សាម អ៊ីន យល់​ឃើញ​ថា ​គោលការណ៍​ទាំង​បី​នេះ​នឹង​ជួយ​ជំរុញ​ឱ្យ​ដំណើរការ​បោះឆ្នោត​មាន​លក្ខណៈ​ស្មើភាព និង​យុត្តិធម៌​ច្រើន។

តែ​លោក​ថា​គណបក្ស​របស់​លោក​មិន​ទាន់​មាន​លទ្ធភាព​ជួល​ម៉ោង​ផ្សាយ​ពី​គោលនយោបាយ​របស់​ខ្លួន​នៅ​តាម​ទូរទស្សន៍ និង​វិទ្យុ​ឯកជន​ទេ​តែ​នឹង​ធ្វើ​តាម​លទ្ធភាព​ដែល​ខ្លួន​មាន​គឺ​ចុះ​តាម​មូលដ្ឋាន និង​ផ្សព្វផ្សាយ​តាម​ប្រព័ន្ធ​បណ្តាញ​សង្គម​ជាដើម។ បែប​នេះ​ក្តី​លោក​ថា​មើល​ឃើញ​ថា​ជា​ទម្លាប់ ទូរទស្សន៍ និង​វិទ្យុ​ឯកជន​មួយ​ចំនួន​ក៏​មិន​ហ៊ាន​ជួល​ម៉ោង​ឱ្យ​គណបក្ស​ប្រឆាំង​ដែរ។

លោក​ថា៖ «យើង​ធ្លាប់​ដឹង​កន្លង​មក​ហើយ​ថា​ស្ថានីយ​វិទ្យុ និង​ទូរទស្សន៍​មួយ​ចំនួន​ភ័យខ្លាច មិន​ហ៊ាន​ជួល​ឱ្យ​ខាង​គណបក្ស​ផ្សេង​ក្រៅ​ពី​គណបក្ស​កាន់​អំណាច​នេះ​ក៏​ជា​រឿង​បញ្ហា​ប្រឈម​មួយ​ដែល​ធ្លាប់​កើតឡើង ហើយ​លើក​នេះ​យើង​មិន​ទាន់​ដឹង​ថា​ម៉េច​ទេ​តែ​បើ​ល្អ គជប គាត់​ចេញ​ជា​គោលការណ៍​ច្បាស់លាស់​ឱ្យ​ស្ថានីយ​មួយ បើ​អនុញ្ញាត​ជួល​ឱ្យ​គណបក្ស​មួយ​គាត់​ត្រូវ​តែ​ជួល​ឱ្យ​គណបក្ស​ផ្សេង​ទៀត​ក្នុង​តម្លៃ​ស្មើ​គ្នា»។

តែ​សម្រាប់​អនុប្រធាន​គណបក្ស​សង្គ្រោះជាតិ​លោក អេង ឆៃអ៊ាង ថ្លែង​ថា៖ «ខ្ញុំ​មិន​មាន​ជំនឿ​សម្រាប់​ប្រព័ន្ធ​ផ្សព្វផ្សាយ (ទូរទស្សន៍ និង​វិទ្យុ​មួយ​ចំនួន) នៅ​ប្រទេស​កម្ពុជា​ឱ្យ​តែ​មាន​ការ​ប្រកួត​ប្រជែង​បោះឆ្នោត​ម្តងៗ​អត់​មាន​លក្ខណៈ​ស្មើភាព​ទេ ជួន​កាល​យើង​មាន​លុយ​ជួល​គេ​មិន​ជួល​ឱ្យ»។

លោក ឆៃអ៊ាង ថ្លែង​ថា​ គណបក្ស​ប្រឆាំង​នឹង​ប្រើប្រាស់​បណ្តាញ​សង្គម ​ជាពិសេស​ប្រព័ន្ធ​ហ្វេសប៊ុក ​ជា​មធ្យោបាយ​សម្រាប់​ផ្សព្វផ្សាយ​ពី​គោលនយោបាយ​របស់​ខ្លួន៕

0

Comments

Please, login or register to post a comment

ព័ត៌មានពាក់ព័ន្ធ