.jpg)
លោក ឌឹម សុវណ្ណារុំ (ឆ្វេង) និងលោក ហង្ស ពុទ្ធា ពេលផ្ដល់សម្ភាសន៍កាលពីម្សិលមិញ។ ហេង ជីវ័ន
ភ្នំពេញៈ គណៈកម្មាធិការជាតិរៀបចំការបោះឆ្នោត ( គ.ជ.ប) កាលពីម្សិលមិញបានប្រកាសរៀបចំបោះពុម្ពសន្លឹកឆ្នោតចំនួន ២៥៩៥០ សន្លឹក ដោយចំណាយថវិកាប្រមាណជិត ២ ម៉ឺនដុល្លារ ដើម្បីត្រៀមបោះឆ្នោតជ្រើសតាំងសមាជិកព្រឹទ្ធសភានីតិកាលទី ៤ ដែលនឹងប្រព្រឹត្តឡើងនៅថ្ងៃទី ២៥ ខែកុម្ភៈ ឆ្នាំនេះ។
លោក ឌឹម សុវណ្ណារុំ អ្នកនាំពាក្យ (គ.ជ.ប) បានថ្លែងថា គ.ជ.ប បានចំណាយទឹកប្រាក់ជិត ២ ម៉ឺនដុល្លារស្មើនឹង ៧៤ លានរៀលសម្រាប់បោះពុម្ពសន្លឹកឆ្នោតសរុបមានចំនួន ២៥៩៥០ សន្លឹកក្នុងនោះសន្លឹកឆ្នោតបម្រុងមាន ៥៣០០ សន្លឹក សន្លឹកឆ្នោតគំរូមាន ១២៥០ សន្លឹក ហើយសន្លឹកឆ្នោតត្រូវបែងចែកតាមភូមិភាគនីមួយៗក្នុងរយៈពេល ៣៦ ម៉ោងមុនការបោះឆ្នោតចូលមកដល់។
លោកបន្ដថាការរៀបចំបោះពុម្ពនេះធ្វើឡើងដោយផ្អែកលើបទបញ្ជា និងនីតិវិធីនៃការបោះឆ្នោតជ្រើសតាំងសមាជិកព្រឹទ្ធសភាប្រការ ៨,២,១ ដែលបានចែងថា ទី ១-គ.ជ.ប ធានាការបោះពុម្ពសន្លឹកឆ្នោតលើក្រដាសស ទី ២-សន្លឹកឆ្នោតនីមួយៗត្រូវមានគល់បញ្ជីលេខរៀង និងលំដាប់តៗគ្នា និងទី ៣- សន្លឹកឆ្នោតនីមួយៗត្រូវមានសញ្ញាសម្គាល់គណបក្ស ឈ្មោះ អក្សរកាត់ និងអក្សរពេញ ឈ្មោះ និង Logo ត្រូវដាក់ទៅតាមលំដាប់ដោយផ្អែកទៅលើការចាប់ឆ្នោត។
លោក ឌឹម សុវណ្ណារុំ បានបញ្ជាក់ថា៖ «អ្វីដែលយើងចង់បង្ហាញនេះក្នុងគោលបំណងចង់ឲ្យមានតម្លាភាពដល់សាធារណជនជូនដល់អង្គបោះឆ្នោតអំពីការងារជាក់ស្ដែងដែល គ.ជ.ប បានធ្វើ។ ការដែល គ.ជ.ប បានធ្វើនេះគឺផ្នែកទៅលើបទបញ្ជា និងនីតិវិធីនៃការបោះឆ្នោតជ្រើសតាំងសមាជិកព្រឹទ្ធសភា»។
លោក ពេជ្រ ស្រស់ ប្រធានគណបក្សយុវជនកម្ពុជាបានលើកឡើងថាលោកមិនបារម្ភពីចំនួនសន្លឹកឆ្នោតទេ ព្រោះ គជប គេមាននីតិវិធីរបស់គេច្បាស់លាស់ ប៉ុន្ដែលោកបារម្ភពីដំណើរការការបោះឆ្នោតព្រោះខ្លាចពេលបោះឆ្នោតអាចមានករណីលួចបន្លំ។ លោកថា៖ «យើងនឹងពង្រឹងការតាមដានបន្ថែមទៀតលើដំណើរការនៃការបោះឆ្នោតនេះ យើងមិនអាចអនុញ្ញាតឲ្យគណបក្សមួយជិះសេះលែងដៃនោះទេ»។
លោក ញេប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចបានប្រាប់ភ្នំពេញប៉ុស្ដិ៍ពីម្សិលមិញថាលោកក៏មិនជំទាស់នឹងការបោះពុម្ពសន្លឹកឆ្នោតនេះដែរ ព្រោះ គ.ជ.ប មានបទពិសោធស្រាប់ទៅហើយ ដោយគណបក្សលោកគ្រាន់តែត្រៀមខ្លួនចូលរួមប្រកួតជាការស្រេច។
លោកថា៖ «អត់អីទេប្អូន យើងត្រៀមតែខ្លួនចូលរួមទៅបានហើយ យើងនឹងមិនជំទាស់នឹងការបោះពុម្ពសន្លឹកឆ្នោតនេះទេ ព្រោះ គ.ជ.ប គេចេះចាត់ចែងហើយ ព្រោះយើងបានជជែកគ្នារួចរាល់អំពីនីតិវិធីនេះ»។
លោក យឿង សុធារ៉ា មន្ត្រីច្បាប់ និងអង្កេតនៃអង្គការខុមហ្វ្រែលយល់ឃើញថាការពិតខុមហ្វ្រែលមិនបានចូលរួមសង្កេតការណ៍បោះឆ្នោតជ្រើសតាំងសមាជិកព្រឹទ្ធសភាទេ ប៉ុន្ដែជាយោបល់លោកថាវាជាការខាតបង់នូវថវិកាជាតិមួយចំណែកតូច ដែល គ.ជ.ប បានបោះសន្លឹកឆ្នោតបម្រុងច្រើនប្រហែលនឹងអង្គបោះឆ្នោត។
លោកថា៖ «វាជាការបោះឆ្នោតអសកលអ្នកចូលរួមបោះឆ្នោតគឺជាអ្នកដែលមានជំនាញ និងជាអ្នកបង្ហាត់បង្រៀនប្រជាពលរដ្ឋអំពីរបៀបបោះឆ្នោត ហើយប្រសិនបើពួកគាត់មិនចេះគូសលើសន្លឹកឆ្នោត វាជារឿងចម្លែក ហើយខ្ញុំមិនជឿថា ពួកគាត់មិនចេះគូសនោះទេ»។
អង្គបោះឆ្នោតសម្រាប់ការចូលរួមបោះឆ្នោតតាមបែបអសកលនេះគឺជាសមាជិកក្រុមប្រឹក្សាឃុំសង្កាត់នៅទូទាំងប្រទេស និងសមាជិករដ្ឋសភាទាំងអស់ជាង ១ ម៉ឺននាក់។ អ្នកជំនាញកិច្ចការបោះឆ្នោតយល់ឃើញថាគេអាចទស្សន៍ទាយទុកមុនបានថា គណបក្សប្រជាជនកម្ពុជាអាចជាបក្សដែលទទួលបានការផ្ដល់សេចក្ដីទុកចិត្តច្រើនជាងគេ ព្រោះការបោះឆ្នោតនេះផ្អែកទៅលើសមាជិកសភា និងក្រុមប្រឹក្សាឃុំសង្កាត់ណាដែលច្រើនជាង។ ប៉ុន្តែលទ្ធផលនេះ គេនៅមិនទាន់អាចស្មានទុកមុនបានថា សំឡេងពិតជានៅស្ថិតស្ថេរឬក៏យ៉ាងណានោះទេ៕
