ភ្នំពេញៈ មន្រ្តីគណបក្សប្រជាធិបតេយ្យមូលដ្ឋានបានគំរាមដកខ្លួនចេញពីការបោះឆ្នោតជាតិនាខែកក្កដា ដោយទាមទារឲ្យមានបរិយាកាសវិជ្ជមានជាងមុនបន្ទាប់ពីមន្រ្តីគណបក្សកាន់អំណាចបានរុះរើស្លាកគណបក្សខ្លួនក្នុងខេត្តបាត់ដំបងនិងរាជធានីភ្នំពេញ។
លោក យ៉ង សាំងកុមារ ប្រធានក្រុមប្រឹក្សាគោលនយោយបាយគណបក្សប្រជាធិបតេយ្យមូលដ្ឋានបានថ្លែងថា៖ «យើងបានប្រកាសជំហររបស់យើងយ៉ាងទូលំទូលាយថាយើងនឹងចូលរួមក្នុងការបោះឆ្នោតខែកក្កដាឆ្នាំ២០១៨ ប៉ុន្តែយើងទាមទារឲ្យមានបរិយាកាសផ្លែផ្កាដែលបំពេញទៅតាមចំណុចទាំងអស់ រួមទាំងការដាក់ស្លាកបដា ការចុះទៅជួបសមាជិក និងសកម្មជន សេរីភាពផ្សព្វផ្សាយព័ត៌មាន ការឃោសនា ការសង្កេតការណ៍ក្នុងស្រុកនិងពីអន្តរជាតិ»។
លោកបានថ្លែងថា៖ «កាលពីពេលថ្មីៗនេះ នៅក្នុងខេត្តបាត់ដំបង ស្លាករបស់យើងត្រូវបានរុះរើដោយអាជ្ញាធរមូលដ្ឋានដោយមិនជម្រាបយើង»។
លោកបានបន្ថែមថា គណបក្សមានបញ្ហាស្រដៀងគ្នានៅក្នុងរាជធានីភ្នំពេញ។
លោកបន្តថា៖ «យើងគិតថា យើងនឹងមិនចូលរួមប្រសិនបើយើងមិនអាចដាក់ស្លាកគណបក្សបាន ហើយស្លាករបស់យើងត្រូវបានរុះរើ...អាជ្ញាធរនៅរាជធានីភ្នំពេញហាក់បីដូចជាមិនសហការឬផ្តល់ឱកាសឲ្យយើងធ្វើសកម្មភាព»។
លោកបន្ថែមថា នៅពេលគណបក្សប្រជាធិបតេយ្យមូលដ្ឋានស្នើសុំការអនុញ្ញាតសម្រាប់សកម្មភាពផ្សេងៗទៅសាលារាជធានី ពួកគេបង្វែរទៅមន្រ្តីផ្សេងៗមិនចេះចប់។
លោក កុមារ បានថ្លែងថា គណបក្សនឹងដាក់ពាក្យបណ្តឹងផ្លូវការទៅក្រសួងមហាផ្ទៃនាសប្តាហ៍នេះ។
គណបក្សប្រឆាំងចម្បងរបស់កម្ពុជា គឺគណបក្សសង្គ្រោះជាតិ ត្រូវបានរំលាយកាលពីខែវិច្ឆិកា ខណៈមានការថ្កោលទោសជាច្រើនពីសហគមន៍អន្តរជាតិ ដែលក្រុមអ្នកឃ្លាំមើលបានហៅកម្ពុជាថា ជាប្រទេស«ដឹកនាំផ្តាច់ការឯកបក្ស»។
អ្នកនាំពាក្យគណបក្សប្រជាជនលោក សុខ ឥសាន បានច្រានចោលការលើកឡើងទាំងនេះ។
លោកបានថ្លែងថា៖ «នៅពេលយើងឮថា គណបក្សនេះនឹងចូលរួមនៅក្នុងការបោះឆ្នោតឆ្នាំ ២០១៨ ខ្ញុំរីករាយ... ប៉ុន្តែឥឡូវនេះ គាត់បានចាប់ផ្តើមផ្លាស់ប្តូរ»។
លោក ឥសាន បានបន្តថា៖ «ប្រសិនបើវាធ្វើតាមគោលការណ៍ និងច្បាប់ស្តីពីគណបក្សនយោបាយ និង នីតិវិធីរបស់ គ.ជ.ប នោះនឹងមិនមានបញ្ហាជាមួយអាជ្ញាធរមូលដ្ឋានទេ»។
លោកបានច្រានចោលចំពោះការលើកឡើងថា ស្លាកគណបក្សត្រូវបានរុះរើដកចេញ។
លោក យឿង សុធារ៉ា មន្រ្តីច្បាប់នៅអង្គការខុមហ្វ្រែល ដែលជាអង្គការឃ្លាំមើលការបោះឆ្នោត បានថ្លែងថា ការបំផ្លាញបដាគឺ«ខុសច្បាប់» និងជា«រូបភាព»អាក្រក់មួយសម្រាប់ភាពស្មើភាពគ្នានៅក្នុងការបោះឆ្នោតនាពេលខាងមុខ។
លោកបានបន្តថា៖ «វាហាក់បីដូចជាការប្រកួតប្រជែងអយុត្តិធម៌បន្តិច» ហើយវាហាក់បីដូចជាខ្វះការគោរពទៅលើគណបក្សប្រជាធិបតេយ្យមូលដ្ឋាន។
លោក សុធារ៉ា បានកត់សម្គាល់ថា ការរុះរើស្លាកគណបក្សគឺជាការបំពានច្បាប់ ដែលហាមប្រាមមិនឲ្យមានការបំផ្លាញទ្រព្យសម្បត្តិឯកជន។
លោកបានបន្តថា៖ «ការអនុវត្តច្បាប់ដោយអាជ្ញាធរត្រូវតែមានលក្ខណៈស្មើភាព»។
អ្នកនាំពាក្យរបស់ គ.ជ.ប. និងសាលារាជធានី បានថ្លែងថា មិនបានដឹងអំពីស្ថានភាពនេះ៕ PS/រាយការណ៍បន្ថែមដោយ Andrew Nachemson