ភ្នំពេញៈ គណៈរដ្ឋមន្ត្រី គ្រោងនឹងបើកអង្គប្រជុំពេញអង្គនៅថ្ងៃទី ២ ខែកុម្ភៈ ខាងមុខនេះ ដើម្បីពិភាក្សាលើសេចក្ដីព្រាងច្បាប់ធម្មនុញ្ញ ស្ដីពីវិសោធនកម្មចំនួន ១០ មាត្រា ពាក់ព័ន្ធជាមួយអ្នកបោះឆ្នោត និង ឈរឈ្មោះឲ្យគេបោះឆ្នោត សិទ្ធិបង្កើតសមាគមនិងគណបក្សនយោបាយ ការគោរពរដ្ឋធម្មនុញ្ញ អព្យាក្រឹតភាព សេរីភាពនិងសន្តិសុខផ្ទាល់ខ្លួន សញ្ជាតិ និងមាត្រាខ្លះនៃច្បាប់ស្ដីពីការរៀបចំនិងការប្រព្រឹត្តទៅនៃក្រុមប្រឹក្សាធម្មនុញ្ញ។ យោងតាមលិខិតអញ្ជើញរបស់ទីស្ដីការគណៈរដ្ឋមន្ត្រី។
យោងតាមរបៀបវារៈនៅក្នុងលិខិតអញ្ជើញនោះបានបង្ហាញឲ្យដឹងនូវសេចក្តីព្រាងច្បាប់ធម្មនុញ្ញស្តីពីវិសោធកម្មមាត្រា ២៦ មាត្រា ២៧ ថ្មី មាត្រា ២៨ មាត្រា ៣១ មាត្រា ៣២ មាត្រា ៣៤ ថ្មី មាត្រា ៤២ មាត្រា ៤៩ មាត្រា ៥៣ និង មាត្រា ១១៨ ថ្មី ។
កាលពីខែធ្នូ លោកឧបនាយករដ្ឋមន្ត្រី ស ខេង ប្រធានក្រុមការងារដើម្បីពិនិត្យនិងធ្វើវិសោធនកម្មរដ្ឋធម្មនុញ្ញ បានអះអាងថា ការជំរុញឲ្យមានវិសោធនកម្មរដ្ឋធម្មនុញ្ញដើម្បីបង្ការមិនឲ្យពលរដ្ឋធ្វើសកម្មភាពទាំងឡាយណាដែលប៉ះពាល់ដល់ផលប្រយោជន៍ជាតិនិងដើម្បីឆ្លើយតបទៅនឹងការលើកឡើងរបស់កញ្ញា កឹម មនោវិទ្យាជាកូនស្រីរបស់អតីតមេដឹកនាំបក្សសង្គ្រោះជាតិលោក កឹម សុខា ដែលកំពុងជាប់ឃុំ។
ក្រោយពីការចាប់ខ្លួនលោកកឹមសុខាទាក់ទងនឹងការចោទប្រកាន់ពីបទ«ក្បត់ជាតិ»និងការរំលាយគណបក្សប្រឆាំងរួចមកកូនស្រីលោក កឹម សុខា គឺកញ្ញា កឹម មនោវិទ្យា បានអំពាវនាវដល់សហគមន៍អន្ដរជាតិឲ្យដាក់ទណ្ឌកម្មសេដ្ឋកិច្ចប្រឆាំងនឹងប្រទេសកម្ពុជា។
ការបង្ហាញនេះត្រូវបានអង្គការសង្គមស៊ីវិលសម្តែងការព្រួយបារម្ភដោយពួកគេបានជំរុញឱ្យរដ្ឋាភិបាលកម្ពុជាធ្វើការជាមួយអ្នកតំណាងសង្គមស៊ីវិលមុនពេលកែប្រែរដ្ឋធម្មនុញ្ញដ៏ច្រើនបែបនេះ។
លោកស្រី Naly Pilorge អនុប្រធានផ្នែកតស៊ូមតិនៃអង្គការសិទ្ធិមនុស្សលីកាដូបានថ្លែងថាមាត្រា៤២គឺជា «គ្រឹះរបស់សង្គមប្រជាធិបតេយ្យ»។
លោកស្រីបានជំរុញឱ្យស្ថាប័ននីតិប្បញ្ញត្តិបញ្ឈប់ការធ្វើឱ្យមានការផ្លាស់ប្តូរណាមួយចំពោះមាត្រាទាំងនោះរហូតទាល់តែប្រជាពលរដ្ឋអាចទទួលបានប្រយោជន៍ពីការកែប្រែទាំងនោះ។
លោក Phil Robertson អនុប្រធានអង្គការ ឃ្លាំមើលសិទិ្ធមនុស្ស Human Rights Watch ប្រចាំតំបន់អាស៊ីបានថ្លែងថា ក្រុមអ្នកការទូត«ឥឡូវនេះត្រូវតែសម្តែងការព្រួយបារម្ភ»។
លោកបានថ្លែងតាមអ៊ីមែលថា៖«សម្រាប់រដ្ឋាភិបាលកម្ពុជាដែលចាប់ផ្តើមធ្វើវិសោធនកម្ម រដ្ឋធម្មនុញ្ញជាសម្ងាត់ដោយគ្មានការពិគ្រោះយោបល់ ជាមួយសង្គមស៊ីវិលវាគឺជាក្តីព្រួយបារម្ភយ៉ាងខ្លាំងមួយដែលឥស្សរជនបក្សកាន់អំណាចកំពុងមានចេតនាបង្កើតការផ្លាស់ប្តូរជាអចិន្ត្រៃយ៍មួយដែលវានឹងបំផ្លាញដល់លទ្ធិប្រជាធិបតេយ្យ»៕NS