Search form

Login - Register | FOLLOW US ON

Logo of Phnom Penh Post newspaper Phnom Penh Post - គម្រោង​មួយ​ឲ្យ​ខ្មែរ​គិត​ឲ្យ​បាន​ស៊ីជម្រៅ​ចំពោះ​ពលរដ្ឋ​វៀតណាម

Content image - Phnom Penh Post
ជនជាតិ​វៀតណាមកំពុង​លក់ដូរ​នៅ​ផ្សារ​មួយ​ក្នុង​រាជធានី​ភ្នំពេញ​។ ផា លីណា

គម្រោង​មួយ​ឲ្យ​ខ្មែរ​គិត​ឲ្យ​បាន​ស៊ីជម្រៅ​ចំពោះ​ពលរដ្ឋ​វៀតណាម

ភ្នំពេញៈ «​ចាប់ផ្តើម​ការ​ធ្វើ​ដំណើរ​ដោយ​ស្តាប់​ «​អ្នក​ដទៃ​» ​នេះ​ជា​ឃ្លា​មួយ ដែល​មាន​នៅ​លើ​គម្រប​ខាង​ក្រោយ​នៃ​សៀវភៅ​ថ្មី​មួយ​ដែល​ស្វែងយល់​អំពី​ទំនាក់​ទំនង​រវាង​ជនជាតិ​ខ្មែរ និង​ជនជាតិ​ភាគតិច​វៀតណាម​ដែល​វា​ស្រប​ទៅ​នឹង​ការ​ណែនាំ​ក្នុង​គម្រោង​មួយ​ធ្វើ​ឱ្យ​ប្រជាពលរដ្ឋ​គិត​ឲ្យ​បាន​ស៊ីជម្រៅ​អំពី​ការ​យល់​ឃើញ​របស់​ពួកគេ​ចំពោះ​ជនជាតិ​វៀតណាម​ដែល​កំពុង​រស់នៅ​ក្នុង​ប្រទេស​កម្ពុជា​។

សៀវភៅ​មាន​ចំណងជើង​ថា​៖ «​តើ​អ្នកណា​កំពុង​ស្ដាប់​?» ដោះស្រាយ​បញ្ហា​លំបាកៗ​ជាមួយ​ការ​យល់​ចិត្ត​គឺជា​លទ្ធផល​នៃ​ការ​សន្ទនា​ជាមួយ​ប្រជាជន​ខ្មែរ និង​ជនជាតិ​ភាគតិច​វៀតណាម​ដែល​រស់នៅ​សង្កាត់​ចំនួន​ ៣ ​ក្នុង​ក្រុង​ភ្នំពេញ ដែល​បាន​ធ្វើ​ឡើង​កាលពី​ដើម​ឆ្នាំ​នេះ​។ វា​បាន​បំភ្លឺ​ដល់​ការ​រើសអើង​ជាទូទៅ ចំពោះ​ជនជាតិ​វៀតណាម​ហើយ​អ្វី​ដែល​កាន់តែ​ធ្ងន់​ជាង​នេះ​ទៀត​គឺ​ការ​រៀបរាប់​អំពី​ប្រវត្តិសាស្ត្រ និង​ប្រព័ន្ធ​ផ្សព្វផ្សាយ​ក៏ដូចជា​ទំនាក់​ទំនង​វិជ្ជមាន​នៅ​ក្នុង​តំបន់​ខ្លះ​ដែល​ក្រុម​ទាំង​ ២ ​មាន​សកម្មភាព​ចំពោះ​គ្នា​ទៅវិញ​ទៅមក​ជា​រៀងរាល់​ថ្ងៃ​។

លោកស្រី ស៊ុយ ហេងគ្រី សហប្រធាន​គម្រោង និង​ជា​នាយិកា​ប្រតិបត្តិ​អង្គការ​នារី​ដើម្បី​សន្តិភាព​ថ្លែង​ថា​៖ «​មាន​តិចតួច​ដែល​ធ្វើ​បាន​ដើម្បី​និយាយ​អំពី​អ្វី​ដែល​កំពុង​កើតឡើង​ជាមួយ​សកម្មភាព​នានា​នៅ​មូលដ្ឋាន​»​។ «​ដូច្នេះ​ហើយ​បាន​ជា​យើង​សម្រេច​ចិត្ត​ថា​ដំបូង​ត្រូវ​ព្យាយាម​យល់​អំពី​ភាគី​ទាំង​ ២ ​ថា​តើ​ពួកគេ​មើល​គ្នា​ក្នុង​ផ្លូវ​បែប​ណា​?»​។

ដើម្បី​ចូល​ទៅ​ដល់​សំណួរ​នេះ​ក្រុម​ «​អ្នក​ស្តាប់​» ត្រូវ​ប្រមូលផ្តុំ​ជនជាតិ​ភាគតិច​វៀតណាម​ចម្រុះ និង​ក្រុម​អ្នក​ស្រាវជ្រាវ​ជនជាតិ​ខ្មែរ​។ ពួកគេ​បាន​ចូល​ទៅ​សង្កាត់​មួយ​ចំនួន​ក្នុង​ខណ្ឌ​សែនសុខ ទួលគោក និង​ច្បារអំពៅ​ដើម្បី​និយាយ​ជាមួយ​ប្រជាពលរដ្ឋ​ដែល​ជា​ជនជាតិ​ខ្មែរ និង​ជនជាតិ​ភាគ​តិច​វៀតណាម​អំពី​ការ​យល់​ឃើញ​របស់​ពួកគេ​ចំពោះ​គ្នា​ទៅវិញ​ទៅមក​។

ការ​រកឃើញ​គឺ​ប្រែប្រួល​អាស្រ័យ​ទៅ​លើ​តំបន់ និង​វាគ្មិន​ជាពិសេស​គឺ​រឿងរ៉ាវ​ជាក់លាក់​ដែល​បាន​លើក​ឡើង​។ អ្នក​ឆ្លើយ​សំណួរ​ដែល​ជា​ជនជាតិ​ខ្មែរ​ទំនង​ជា​ចង្អុល​បង្ហាញ​ទៅ​ដល់​អាកប្បកិរិយា​ដែល​ភាគច្រើន​ពួកគាត់​បាន​និយាយ​ថា ជនជាតិ​ភាគតិច​វៀតណាម​គឺ​ «​និយាយ​ឮ​ខ្លាំងៗ​» «​រញេរញ៉ៃ​» ​និង «​មាន​ល្បិចកល​ច្រើន​»​។ ជារឿយៗ​ពលរដ្ឋ​ខ្មែរ​តែងតែ​បាន​សម្តែង​នូវ​អារម្មណ៍​មិន​ស្រួល​ក្នុង​ចិត្ត​ជាមួយ​នឹង​វត្តមាន​របស់​ជនជាតិ​ភាគតិច​វៀតណាម​។

នៅ​ពេល​ស្នើឱ្យ​រៀបរាប់​អំពី​មូលហេតុ​រឿងរ៉ាវ​ប្រវត្តិសាស្ត្រ​ត្រូវ​បាន​ពួកគេ​លើក​ឡើង​ជា​ញឹកញាប់​រួម​ទាំង​ហេតុការណ៍​ដែល​កើតឡើង​នៅ​​សតវត្សរ៍​ទី ១៩ ដែល​អធិរាជ​វៀតណាម​បាន​ចាប់​បុរស​ជនជាតិ​ខ្មែរ​ ៣ ​នាក់​ដែល​ជាប់​ឃុំ​យក​ទៅ​កប់​ត្រឹម​ក​ធ្វើ​ជា​មុំ​ជើង​ក្រាន​ដើម្បី​ដាំ​ទឹក​តែ​។

រឿងរ៉ាវ​ដ៏យូរ​អង្វែង​បែប​នេះ​ត្រូវ​បាន​ពួកគេ​បង្ហាញ​ថា​វា​ជា​តំណាង​ឱ្យ​ការ​ព្រួយបារម្ភ​ក្នុង​សម័យ​ទំនើប​នេះ ដូច​ដែល​ពួកគេ​ចោទប្រកាន់​ថា​ជន​វៀតណាម​តែងតែ​បាន​រំលោភ​យក​ទឹក​ដី​កម្ពុជា​រឿងរ៉ាវ​អន្តោប្រវេសន៍​ខុស​ច្បាប់ និង​អត្រា​កំណើត​ខ្ពស់​នៃ​គ្រួសារ​ជនជាតិ​វៀតណាម​ជាដើម​។

ស្ត្រី​ជនជាតិ​ខ្មែរ​អាយុ​ ៤០ ឆ្នាំ​ម្នាក់​ដែល​រស់នៅ​សង្កាត់​និរោធ​ថ្លែង​ថា​៖ «​ខ្ញុំ​មាន​ការ​ព្រួយបារម្ភ​ចំពោះ​ចំនួន​ជនជាតិ​វៀតណាម​ដែល​កំពុង​បន្ត​កើនឡើង​នៅ​ក្នុង​ប្រទេស​របស់​យើង​នៅ​ថ្ងៃ​ណា​មួយ​យើង​នឹង​ធ្វើ​ប្រជាមតិ​ហើយ​ពេល​នោះ​សំឡេង​របស់​ជនជាតិ​វៀតណាម​នឹង​ឮ​ច្រើន​ជាង​ខ្មែរ​»​។

ប៉ុន្តែ​ទោះ​ជា​យ៉ាង​ណា​ក៏ដោយ​នៅ​តាម​មូលដ្ឋាន​មួយ​ចំនួន​ហាក់​ដូចជា​ត្រូវ​បាន​រកឃើញ​តាមរយៈ​ការ​ធ្វើ​ពាណិជ្ជកម្ម និង​អ្នក​រស់នៅ​ជិត​ខាង​គ្នា​។ ទោះបី​ជា​មាន​ការ​បង្ហាញ​ពី​ក្តីព្រួយបារម្ភ​ច្រើន​អំពី​ជនជាតិ​ភាគតិច​វៀតណាម​ក្តី​ក៏​អ្នក​ឆ្លើយ​សំណួរ​មួយ​ចំនួន​បាន​លើក​ឡើង​អំពី​ទំនាក់​ទំនង​ជា​វិជ្ជមាន​ជាមួយ​ជនជាតិ​វៀតណាម​ដែល​រស់នៅ​ជិត​ខាង​ខ្លួន​ផង​ដែរ​គឺ​អ្នក​ដែល​ធ្វើការ​ជាមួយ​គ្នា ឬ​អ្នក​ទិញ​ទំនិញ​។

លោកស្រី​ ហេងគ្រី ​ឲ្យ​ដឹង​ថា​៖ «​អ្វី​ដែល​យើង​បាន​រកឃើញ​នៅ​លើ​អារម្មណ៍​អវិជ្ជមាន​គឺជា​អ្វី​ដែល​យើង​ទាំងអស់​គ្នា​បាន​ដឹង​។ ប៉ុន្តែ​អ្វី​ដែល​គួរ​ឱ្យ​ចាប់​អារម្មណ៍​គឺជា​ឧទាហរណ៍​វិជ្ជមាន​ដែល​យើង​បាន​រកឃើញ​នៅ​ក្នុង​ទំនាក់​ទំនង​ក្នុង​នាម​ជា​មិត្តភាព និង​ការ​ឲ្យ​តម្លៃ​លើ​ភាគី​ទាំង​ ២ ចំពោះ​គ្នា​ទៅវិញ​ទៅមក​»​។

ក្នុង​ចំណោម​អ្នកឆ្លើយ​សំណួរ​ជា​ជនជាតិ​វៀតណាម​ការ​ឆ្លើយតប​ជា​វិជ្ជមាន​គឺ​មាន​ជាទូទៅ​។

ជនជាតិ​វៀតណាម​ដែល​រស់នៅ​ក្នុង​សង្កាត់​និរោធ​ម្នាក់​បាន​និយាយ​ថា​ពួកគេ​មាន​ទំនាក់​ទំនង​ល្អ​ជាមួយ​អ្នក​ជិត​ខាង​ដែល​ជា​ជនជាតិ​ខ្មែរ​គឺ​ដូចជា​បងប្អូន​អ៊ីចឹង​។ ពួកគេ​បាន​ស្តីបន្ទោស​អំពី​ភាព​តានតឹង​រវាង​សហគមន៍​ទាំង​ពីរ​លើ​បញ្ហា​សង្គម​មិនមែន​បញ្ហា​ជនជាតិ​ភាគ​តិច​ទេ បញ្ហា​ដែល​គេ​ស្តីបន្ទោស​មាន​ដូចជា​បញ្ហា​គ្រឿងញៀន គ្រឿង​ស្រវឹង និង​បទឧក្រិដ្ឋ​ជាដើម​។ នៅ​ពេល​មាន​ការ​ផឹកស៊ី​ការ​លេង​ល្បែង​ស៊ីសង​ និង​សូម្បី​សេចក្ដី​ស្រឡាញ់​ពេល​កើតឡើង​វា​តែងតែ​បង្ក​ជា​បញ្ហា និង​មាន​ការ​ប៉ះទង្គិច​ជាមួយ​ជនជាតិ​វៀតណាម​។

ចំពោះ​ក្រុម​ទាំង​ពីរ​អន្តោប្រវេសន៍​ខុស​ច្បាប់​គឺជា​ការ​ព្រួយបារម្ភ​ដ៏ធំ​មួយ ជាមួយ​ជនជាតិ​ភាគតិច​វៀតណាម ​ដែល​ត្រូវ​បាន​ស្នើសុំ​ឱ្យ​មាន​ឯកសារ និង​លិខិត​ស្នាម​ច្បាស់លាស់​ក្នុង​នាម​ជា​ពលរដ្ឋ​។ សូម្បី​តែ​ជនជាតិ​វៀតណាម ដែល​កើត​នៅ​ក្នុង​ប្រទេស​កម្ពុជា​ការ​ទទួល​បាន​លិខិត​ស្នាម​គឺ​វា​តែងតែ​ជា​រឿង​មួយ​ដ៏ពិបាក​ជាពិសេស​ការ​ទទួល​បាន​សញ្ជាតិ​។

បើ​គ្មាន​អត្តសញ្ញាណប័ណ្ណ​គ្មាន​សំបុត្រ​កំណើត ឬ​សៀវភៅ​គ្រួសារ​ទេ​នោះ​ពួកគេ​ត្រូវ​ពឹង​លើ​សេចក្ដី​អាណិត​អាសូរ​របស់​ប៉ូលិស​ហើយ​បើ​តាម​អ្នក​ឆ្លើយ​សំណួរ​ថ្លែង​ថា​ពេល​ខ្លះ​ពួកគេ​ទាមទារ​សំណូក​ពី​ពលរដ្ឋ​ដែល​គ្មាន​លិខិត​ស្នាម​ទាំង​នោះ​។

ក្រសួង​មហាផ្ទៃ​បាន​ប្រកាស​កាលពី​ដើម​ឆ្នាំ​នេះ​ថា​ខ្លួន​នឹង​ដកហូត​ឯកសារ​ដែល​ «​មិន​ត្រឹមត្រូវ​» ដែល​ជា​កម្មសិទ្ធិ​របស់​ប្រជាពលរដ្ឋ​វៀតណាម​ប្រមាណ ៧ ​ម៉ឺន​នាក់​នៅ​ប៉ុន្មាន​ខែ​ខាង​មុខ​។

លោកស្រី ហេងគ្រី បន្ត​ថា​៖ «​ជនជាតិ​ភាគតិច​វៀតណាម​ដែល​រស់នៅ​រយៈពេល​វែង​បាន​ថ្លែង​ថា​ពួកគេ​ក៏​មាន​ក្តី​ព្រួយបារម្ភ​ដូច​គ្នា​អំពី​បញ្ហា​អន្តោប្រវេសន៍​នេះ​ដែរ​ហើយ​ពួកគេ​ពិត​ជា​សូម​ឱ្យ​ភាគី​ដែល​ពាក់ព័ន្ធ​ធ្វើ​ឱ្យ​ប្រសើរ​ឡើង​នូវ​ច្បាប់​នេះ​»​។

សម្រាប់​អ្នក​ស្តាប់​ជាច្រើន​ដែល​បាន​ចូលរួម​ក្នុង​គម្រោង​នេះ​ពួកគេ​មាន​ការ​ព្រួយបារម្ភ​ជា​ខ្លាំង​អំពី​ប្រធានបទ​នេះ​ហើយ​ជា​រឿយៗ​ចំពោះ​ការ​ប្រកាន់​ពូជសាសន៍​។

អ្នក​ចូលរួម​ម្នាក់​ដែល​ជា​ជនជាតិ​ភាគតិច​វៀតណាម​បាន​បោះបង់​ចោល​ការ​ចូលរួម​កម្មវិធី​នេះ​ដោយសារ​តែ​សម្ពាធ​គ្រួសារ​ហើយ​ម្នាក់​ទៀត​មួយ​រយៈ​ធំ​ទើប​គាត់​សារភាព​ប្រាប់​ក្រុម​ការងារ​ថា​គាត់​មាន​សែស្រឡាយ​វៀតណាម​។ ក្នុង​អំឡុង​ពេល​ប្រជុំ​ជា​ក្រុម​អ្នក​ស្តាប់​ដែល​ជា​ជនជាតិ​ខ្មែរ​មួយ​ចំនួន​បាន​សារភាព​ថា​ពួកគេ​បាន​ចូល​មក​ក្នុង​គម្រោង​នេះ​ជាមួយ​នឹង​អារម្មណ៍​អវិជ្ជមាន​របស់​ពួកគេ​អំពី​ជនជាតិ​ភាគតិច​វៀតណាម​ហើយ​ហាក់​មាន​អារម្មណ៍​មិល​ល្អ​នៅ​ពេល​ស្តាប់ឮ​ភាសា​វៀតណាម​។

អ្នក​ស្តាប់​ជា​ជនជាតិ​ខ្មែរ​ម្នាក់​អាយុ ២៣ ឆ្នាំ​ឈ្មោះ​ អ៊ុយ សុខលីន នៅ​ក្នុង​បទសម្ភាស​មួយ​នៅឯ​សង្កាត់​ច្បារអំពៅ​បាន​និយាយ​ថា​គាត់​អាច​មើល​ឃើញ​ពី​ភាព​ភ័យខ្លាច​ទាំង​សង​ខាង​លើ​ឥទ្ធិពល​នៃ​ទំនាក់​ទំនង​សហគមន៍​។

អ្នកនាង​និយាយ​ថា​៖ «​ខ្ញុំ​បាន​កត់សម្គាល់​ឃើញ​ថា​ប្រជាជន​ខ្មែរ​ភាគច្រើន​មិន​ស្អប់​ជនជាតិ​វៀតណាម​ទេ ប៉ុន្តែ​ពួកគេ​ហាក់បី​ដូចជា​ភ័យខ្លាច​បាត់បង់​អ្វី​ម្យ៉ាង​ទៅ​ឲ្យ​ជនជាតិ​វៀតណាម​ហើយ​ពួកគេ​បាន​សម្តែង​កំហឹង​ជុំវិញ​ប្រវិត្តិសាស្ត្រ​នៃ​អំពើ​ហិង្សា​រវាង​ប្រទេស​ទាំង​ពីរ​។ ចំណែក​ជនជាតិ​វៀតណាម​វិញ​ភាគច្រើន ពួកគេ​មាន​ការ​ព្រួយបារម្ភ​អំពី​អាជីវកម្ម​របស់​ពួកគេ​ដោយសារ​តែ​ពួកគេ​ងាយ​រងគ្រោះ​ជាមួយ​នឹង​ការ​រើស​អើង​»៕ NS

James Reddick

0

Comments

Please, login or register to post a comment