Search form

Login - Register | FOLLOW US ON

Logo of Phnom Penh Post newspaper Phnom Penh Post - គឹម សុខ មិន​ព្រម​ឈរ​ស្ដាប់​សាលក្រម​ដែល​ដាក់ទោស​ ១៨ ​ខែ

Content image - Phnom Penh Post
លោក គឹម សុខ ពេល​នាំ​មក​សាលាដំបូង​កន្លង​មក​។ ហុង មិនា

គឹម សុខ មិន​ព្រម​ឈរ​ស្ដាប់​សាលក្រម​ដែល​ដាក់ទោស​ ១៨ ​ខែ

ភ្នំពេញៈ បើ​ទោះ​ជា​អ្នក​វិភាគ​នយោបាយ​មិន​សំចៃមាត់​លោក គឹម សុខ មិន​ព្រម​ក្រោក​ឈរ​ស្ដាប់​សាលក្រម​រហូត​ប៉ូលិស​​ចូល​គ្រាហ៍​ក្ដី ក៏​កាលពី​ម្សិលមិញ​សាលា​ដំបូង​រាជធានី​ប្រកាស​ផ្តន្ទាទោស​លោក​ឲ្យ​ជាប់​ពន្ធនាគារ​ ១៨ ​ខែ​ និង​បង្គាប់​ឲ្យ​សង​សំណង​ ៨០០ ​លាន​រៀល​ទៅ​ឲ្យ​​ប្រធាន​គណបក្ស​ប្រជាជន​ពាក់ព័ន្ធ​នឹង​ការ​ចោទ​គណបក្ស​នេះ​​ថា​នៅ​ពី​ក្រោយ​ឃាតកម្ម​លោក បណ្ឌិត កែម ឡី​។

សាលក្រម​ដែល​ប្រកាស​ដោយ​​ចៅក្រម​សាលា​ដំបូង​រាជធានី​ភ្នំពេញ​លោក គី រិទ្ធី តាម​បណ្តឹង​របស់​មេធាវី គី តិច តំណាង​ដោយ​អាណត្តិ​របស់​លោក​នាយក​រដ្ឋមន្ត្រី ហ៊ុន សែន​សម្រេច​​ផ្តន្ទាទោស​លោក គឹម សុខ ដាក់​ពន្ធនាគារ​ ១៨ ខែ និង​ពិន័យ​ជា​ប្រាក់​ ៨ ​លាន​រៀល​ចូល​ថវិការដ្ឋ ខណៈ​ដើម​បណ្ដឹង​ទាមទារ​សំណង​ ២០០០ ​លាន​រៀល​។

លោក​ គី រិទ្ធី បាន​ថ្លែង​ក្នុង​បន្ទប់​សវនាការ​ថា​៖ «​តុលាការ​សម្រេច​ផ្ដន្ទាទោស​ជន​ជាប់ចោទ​ឈ្មោះ គឹម សុខ អាយុ​ ៣៦ ​ឆ្នាំ​ដាក់​ពន្ធនាគារ​កំណត់​ ១៨ ​ខែ និង​ពិន័យ​ជា​ប្រាក់​ ៨ ​លាន​រៀល​ចូល​ថវិការដ្ឋ​។ ​បង្គាប់​ឲ្យ​ជន​ជាប់ចោទ​បង់​សំណង​ជំងឺ​ចិត្ត​ ៨០០ ​លាន​រៀល​ទៅ​គណបក្ស​ប្រជាជន​កម្ពុជា​ដឹកនាំ​ដោយ​សម្តេច​នាយក​រដ្ឋមន្ត្រី​ ហ៊ុន សែន ដែល​តំណាង​ដោយ​អាណត្តិ​ដោយ​លោក​មេធាវី គី តិច និង​បើក​ផ្លូវ​ប្តឹង​ឧទ្ធរណ៍​តាម​កំណត់​ច្បាប់​»​។

លោក​ គឹម សុខ ​ត្រូវ​បាន​បញ្ជូន​ទៅ​ដាក់​ពន្ធនាគារ​ព្រៃស​កាលពី​ខែ​កុម្ភៈ​មួយ​សប្តាហ៍​ក្រោយ​លោក​ថ្លែង​ក្នុង​វេទិកា​អ្នក​ស្តាប់​វិទ្យុ​អាស៊ីសេរី​ថា​គណបក្ស​ប្រជាជន​មិន​បាន​ត្រៀម​ខ្លួន​ទៅ​កាន់​ការ​បោះឆ្នោត​ទេ តែ​ត្រៀម​ខ្លួន​ទៅ​ប្លន់​អំណាច​។

ជាមួយ​គ្នា​នោះ​ លោក​ក៏​បាន​ថ្លែង​ដែរ​ថា​ គណបក្ស​ប្រជាជន​ ជា​អ្នក​នៅ​ពី​ក្រោយ​ការ​សម្លាប់​លោក​បណ្ឌិត កែម ឡី​។ តុលាការ​បាន​ចោទ​លោក​ ២ ​បទល្មើស​គឺ​បទ​បរិហារកេរ្តិ៍​ជា​សាធារណៈ និង​បទ​ញុះញង់​ឲ្យ​ប្រព្រឹត្ត​បទល្មើស​ជា​អាទិ៍​។

កាលពី​សវនាការ​នៅ​ថ្ងៃ​ទី​ ២៦ ខែ​កក្កដា​លោក គឹម សុខ បាន​យក​ក្រដាស​បិទ​ត្រចៀក និង​មិន​ទទួល​ស្គាល់​លោក គី រិទ្ធី ជា​ចៅក្រម​ជំនុំជម្រះ​ទេ​។ ស្រដៀង​គ្នា​នេះ​ដែរ​កាលពី​ម្សិលមិញ​លោក​​បាន​បដិសេធ​មិន​ក្រោក​ឈរ​គោរព​ចៅក្រម​ស្ដាប់​សាលក្រម​ឡើយ​ដោយ​អះអាង​ថា​លោក​មិន​បាន​ទទួល​ស្គាល់​តាំងពី​ដំបូង​ និង​ទាមទារ​កាត់ក្តី​ឡើង​វិញ​។

យ៉ាង​ណា​ក្ដី​ព្រះរាជអាជ្ញា​លោក សៀង សុខ បាន​ប្រាប់​មន្ត្រី​ប៉ូលិស​ឲ្យ​ទៅ​លើក​គ្រាហ៍​លោក គឹម សុខ ឲ្យ​ក្រោកឈរ​ដើម្បី​ស្តាប់​សាលក្រម​។

លោក គី រិទ្ធី ថា​ការ​ថ្លែង​របស់​លោក គឹម សុខ ធ្វើឲ្យ​ប៉ះពាល់​កិត្តិយស កិត្តិសព្ទ​គណបក្ស​ប្រជាជន​ដោយ​លោក​បញ្ជាក់​​ថា​៖ «​តុលាការ​យល់​ឃើញ​ថា​ពិត​ជា​មាន​បទល្មើស​ដូច​ការ​ចោទប្រកាន់​ពី​បទ​បរិហារកេរ្តិ៍​ជា​សាធារណៈ និង​បទ​ញុះញង់​ឲ្យ​ប្រព្រឹត្ត​បទល្មើស​ជា​អាទិ៍ ... ការ​ចោទប្រកាន់​របស់​លោក គឹម សុខ គឺជា​ការ​អះអាង​បំភ្លៃ​ដើម្បី​ធ្វើឲ្យ​ប៉ះពាល់​ដល់​កិត្តិយស​​កិត្តិសព្ទ​របស់​គណបក្ស​ប្រជាជន​កម្ពុជា និង​បញ្ឆេះ​កំហឹង​មហាជន​»​។

ខណៈ​ចៅក្រម​អាន​សាលក្រម​លោក​ គឹម សុខ ​នៅ​តែ​រក្សា​ជំហរ​ដូច​មុន​ដោយ​ថ្លែង​ថា​៖ «​ខ្ញុំ​ថា​គណបក្ស​ប្រជាជន​ត្រៀម​ទៅ​ប្លន់​អំណាច បើ​មិន​ជឿ​ចាំ​តែ​មើល​ទៅ​»​។

លោក​ក៏​បាន​អះអាង​ដែរ​ថា​ គណបក្ស​ប្រជាជន​ជា​អ្នក​នៅ​ពី​ក្រោយ​ការ​សម្លាប់​លោក​បណ្ឌិត កែម ឡី​។

ប្រតិកម្ម​នឹង​ការ​កាត់ទោស​នេះ​លោក គឹម សុខ បាន​បញ្ជាក់​ថា​៖ «​បើ​គ្រាន់តែ​ខ្ញុំ​និយាយ​អ៊ីចឹង​ជាប់​គុក ហ៊ុន សែន ក៏​ត្រូវ​ជាប់គុក​ព្រៃស​ដែរ​ព្រោះ ហ៊ុន សែន ​ថា​នឹង​សម្លាប់​មនុស្ស​ពី​ ១០០ ​ទៅ​ ២០០ ​នាក់​។ តុលាការ​ទីងមោង​»​។

ប៉ុន្តែ​លោក​មេធាវី គី តិច​បាន​ស្វាគមន៍​សាលក្រម​នេះ​ដោយ​​ថ្លែង​ថា​មាន​យុត្តិធម៌​។

លោក​បន្ត​ថា​៖ «​ការ​សម្រេច​របស់​តុលាការ​នេះ​គឺ​អាច​ទទួល​យក​បាន​គឺ​មាន​យុត្តិធម៌​សម្រាប់​ដើមបណ្តឹង​ក៏​ដូចជា​មាន​យុត្តិធម៌​សម្រាប់​ជនជាប់ចោទ​ព្រោះ​វា​សម​នឹង​អំពើ​ល្មើស​ដែល​គាត់​បាន​ធ្វើ​»​។

លោក​ថ្លែង​ថា​ យុត្តិធម៌​សម្រាប់​លោក កែម ឡី ត្រូវ​បាន​គេ​រកឃើញ​ហើយ​គឺ​ជនល្មើស​ត្រូវ​បាន​រកឃើញ និង​កាត់ទោស​រួច​ហើយ «​យុត្តិធម៌​យើង​ឃើញ​ហើយ​តើ​! គេ​ចាប់​បាន​ជនល្មើស គេ​ផ្តន្ទាទោស​ហើយ​គាត់​នៅ​តែ​និយាយ​អ៊ីចឹង​។ អ៊ីចឹង​ហើយ​បញ្ជាក់​ថា គឹម សុខ នេះ​ពិតជា​មាន​ចេតនា​បរិហារកេរ្តិ៍ និង​ទម្លាក់​កំហុស​ចោទប្រកាន់​លើ​ស្ថាប័ន​គណបក្ស​ប្រជាជន និង​ស្ថាប័ន​រដ្ឋាភិបាល​ដោយ​​ចេតនា​បំភ្លៃ​ការពិត​តែ​ម្តង​»​។

ទាក់ទង​នឹង​សំណង​ ៨០០ ​លាន​រៀល​លោក គី តិច ថ្លែង​ថា​ប្រសិន​បើ​លោក គឹម សុខ គ្មាន​ប្រាក់​សង​ទេ តុលាការ​មាន​នីតិវិធី​ពិនិត្យ​ទ្រព្យសម្បត្តិ​គាត់ និង​អាច​រឹបអូស​តាម​នីតិវិធី​។

ដោយ​មិន​មាន​វត្តមាន​ក្នុង​បន្ទប់​សវនាការ​លោក មេធាវី ជូង ជូងី ដែល​ការពារ​លោក​ គឹម សុខ បាន​ថ្លែង​តាម​ទូរស័ព្ទ​កាលពី​ម្សិលមិញ​ដោយ​ហៅ​សាលក្រម​នេះ​ថា​មិន​យុត្តិធម៌​ហើយ​ថា​លោក​មិន​ចូលរួម​ស្តាប់​សាលក្រម​នេះ​ដោយសារ​តែ​លោក គឹម សុខ បាន​បោះបង់​មិន​ទទួល​ស្គាល់​សវនាការ​នេះ​តាំង​ពី​ដំបូង​មក​។

លោក​​ ជូង ជូងី បាន​បញ្ជាក់​ថា​៖ «​កូនក្តី​ខ្ញុំ​បោះបង់​ចោល​សវនាការ អ៊ីចឹង​ខ្ញុំ​មិន​អាច​នៅ​ការពារ ហើយ​ការ​ស្តាប់​ប្រកាស​សាលក្រម​ក៏​ខ្ញុំ​អត់​ទៅ​ដែរ​។ អយុត្តិធម៌​បំផុត​សម្រាប់​លោក គឹម សុខ គាត់​អត់​មាន​ប្រព្រឹត្ត​បទល្មើស​ដូច​ការ​ចោទប្រកាន់​ទេ ហើយ​ក្នុង​សវនាការ​គាត់​ទាមទារ​ឲ្យ​កោះ​ហៅ​ដើម​បណ្តឹង​មក​តទល់​ជាមួយ​គាត់ ប៉ុន្តែ​បែរ​ជា​តុលាការ​បដិសេធ​ចោល​មិន​កោះ​ហៅ​បែរ​ជា​ដាក់ទោស​គាត់ អ៊ីចឹង​វា​ធ្ងន់​ខ្លាំង​ណាស់​សម្រាប់​លោក គឹម សុខ​»​។

យ៉ាង​ណា​​លោក​ថា​ នឹង​ពិចារណា​រឿង​ប្តឹង​ឧទ្ធរណ៍​ករណី​នេះ​៕

0

Comments

Please, login or register to post a comment