កំពង់ឆ្នាំង/ព្រះសីហនុ/កោះកុងៈ ករណីឃាតកម្មប្តីកាប់សម្លាប់ប្រពន្ធមាន ៣ ករណីដែលបានកើតឡើងក្នុងខេត្តចំនួន ៣ ផ្សេងគ្នា គ្រាន់តែក្នុងរយៈពេល ៤ ថ្ងៃប៉ុណ្ណោះ គឺខេត្តកំពង់ឆ្នាំង កោះកុង និងខេត្តព្រះសីហនុ។
ឃាតកម្មនៅខេត្តកំពង់ឆ្នាំងត្រូវបានបង្កឡើងដោយជនសង្ស័យជាប្តី មានឈ្មោះ ជី ឃឹមម៉ារ៉ាត់ អាយុ ២០ ឆ្នាំត្រូវបានសមត្ថកិច្ចចាប់ខ្លួនក្រោយពេលសង្ស័យថា បានសម្លាប់ប្រពន្ធអាយុ ២០ ឆ្នាំដូចគ្នា ដោយបន្សល់ទុកកូនអាយុ ៦ ខែ។ ហេតុការណ៍នេះកើតឡើងនៅក្នុងភូមិក្បាលកន្លង់ ឃុំពាមឆ្កោក ស្រុកជលគិរី កាលពីថ្ងៃទី ១២ ខែកុម្ភៈ។
លោក គង់ វុទ្ធី មេប៉ុស្តិ៍ឃុំពាមឆ្កោកបានឲ្យដឹងថា សាកសពប្រពន្ធឈ្មោះ ហ៊ន ណាវី អាយុ ២០ ឆ្នាំត្រូវបានរកឃើញនៅយប់ថ្ងៃទី ១២ ខែកុម្ភៈក្នុងព្រៃបន្លាយួន ឬព្រៃត្រែងនៅចម្ងាយពីផ្ទះជនរងគ្រោះប្រមាណ ៤០០ ម៉ែត្រ។ លោកថា ជនរងគ្រោះត្រូវបានអារកសម្លាប់ដោយកាំបិតតូចប្រើសម្រាប់ចិតបន្លែ ដោយជនសង្ស័យជាប្តី។
លោកនិយាយថា៖ «ឃាតកម្មកើតឡើងដោយសារប្តី។ ប្តីខឹងនាងនោះចេះតែរត់ទៅផ្ទះម្តាយ។ យើងចាប់បានហើយកាលពីព្រឹកថ្ងៃទី ១៣ វាសារភាពហើយ។ គាត់មានកូនម្នាក់អាយុ ៦ ខែ ហើយពួកគេបានស្គាល់គ្នាកាលនៅរៀនវិទ្យាល័យជាមួយគ្នា ពួកគេរៀបការបានជាង ១ ឆ្នាំ។ យើងមិនដឹងមូលហេតុច្បាស់ទេ តែក្រុមគ្រួសារនេះមានរឿងរកាំរកូសរហូត»។
លោក គង់ វុទ្ធី បានបន្តថា៖ «យើងសង្ស័យលើជនសង្ស័យជាប្តី ដោយសារតែក្មេងស្រីរងគ្រោះមិនដែលទៅណាជាមួយមនុស្សដែលគាត់មិនស្គាល់ច្បាស់ទេ។ ទី ២ កន្លែងកើតហេតុវាមិនសមទៅទេ បើសិនជាមិនស្គាល់គ្នា ហើយទី ៣ ពេលធ្វើបុណ្យប្រពន្ធ ជនសង្ស័យមិនសូវចូលរួមបុណ្យ វាចេះតែដើរគេច»។
លោក ប៉ុល វុទ្ធី ស្នងការរងផ្នែកព្រហ្មទណ្ឌនៃស្នងការខេត្តកំពង់ឆ្នាំងបានឲ្យដឹងថា ជនសង្ស័យត្រូវបានបញ្ជូនទៅដល់តុលាការហើយ។
ករណីមួយទៀតកើតនៅខេត្តកោះកុងកាលពីយប់ថ្ងៃទី ១៣ ខែកុម្ភៈនេះដោយប្តីចុងបានយកកាំភ្លើងអាកា ៤៧ បាញ់ទៅលើប្រពន្ធចំនួន ២ គ្រាប់បណ្តាលឲ្យប្រពន្ធស្លាប់នៅនឹងកន្លែងដោយសារភ្លើងប្រចណ្ឌនឹងប្តីដើម។
តាមការចុះផ្សាយរបស់គេហទំព័រអគ្គស្នងការនគរបាលជាតិ ហេតុការណ៍បាញ់ប្រហារនេះកើតនៅភូមិ ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ ជនរងគ្រោះមានឈ្មោះ ហាន ធឿន ត្រូវបានជនសង្ស័យជាប្តីឈ្មោះ សេង វិបុល យកកាំភ្លើងអាកា ៤៧ បាញ់ចំដើមទ្រូងប្រពន្ធចំនួន ២ គ្រាប់រួចរត់គេចខ្លួន ដោយសារភ្លើងប្រចណ្ឌទៅលើប្រពន្ធ។ សមត្ថកិច្ចកំពុងតាមប្រមាញ់ជនសង្ស័យរូបនេះ។
ដោយឡែកករណីឃាតកម្មមួយទៀតបានកើតឡើងនៅខេត្តព្រះសីហនុ ក្នុងភូមិវាល ឃុំកំពង់សិលា ស្រុកកំពង់សិលា។ លោក ហេង ទូច មេប៉ុស្តិ៍នគរបាលឃុំកំពង់សិលាបានឲ្យដឹងថា មានករណីឃាតកម្មប្តីកាប់សម្លាប់ប្រពន្ធមួយកើតឡើងនៅភូមិវាល ឃុំកំពង់សិលា ស្រុកកំពង់សិលា កាលពីយប់ថ្ងៃទី ១៣។
លោក ហេង ទូច និយាយថា៖ «ជនសង្ស័យឈ្មោះ ជា នៅ អាយុ ៥២ ឆ្នាំត្រូវបានចាប់ខ្លួនភ្លាមៗនៅក្រោយពេលគាត់យកកាំបិតផ្គាក់កាប់ប្រពន្ធឈ្មោះ សាក់ ស្រី អាយុ ៥៣ ឆ្នាំនៅពេលកំពុងអង្គុយអាំងភ្លើងពេលព្រឹកនៅមុខផ្ទះ។
លោកបាននិយាយថា៖ «គ្រួសារនេះអត់ដែលឃើញឈ្លោះគ្នាទេ។ ខាងប្តីដូចជារាងវិកលចរិតបន្តិច។ មុនពេលកើតហេតុ គាត់បានចាកចោលផ្ទះប្រហែលកន្លះខែ ហើយចេះតែដើរផ្សងព្រេង។ យើងមិនដឹងមូលហេតុអ្វីទេ តែតាមថ្នាក់លើដាក់ថាមានសតិមិនប្រក្រតី។ នៅថ្ងៃកើតហេតុ គាត់ចុះទៅអាំងភ្លើង ហើយប្តីក៏ចុះមកអាំងភ្លើងជាមួយគ្នា ហើយប្តីងើបទៅយកកាំបិតមកកាប់តែម្តង»។
លោករៀបរាប់ថា៖ «គាត់កាប់ពីក្រោយមួយកាំបិតចំលលាដ៍ក្បាល ពេលផ្កាប់មុខហើយ គាត់កាប់មួយកាំបិតទៀតក្រោមត្រចៀកខាងឆ្វេង។ កាប់ហើយ គាត់លើកទៅដាក់លើគ្រែ គាត់អត់រត់គេចទេ។ សមត្ថកិច្ចមកឃាត់តែម្តង»។
លោក កុង គា មេឃុំកំពង់សិលានិយាយថា ក្រុមគ្រួសារនេះមិនដែលបានមកដល់សាលាឃុំដើម្បីសុំការសម្របសម្រួល ឬលែងលះទេ ប៉ុន្តែកាលពីប៉ុន្មានឆ្នាំមុន ប្រពន្ធធ្លាប់បានកាប់ទៅលើប្តីម្តងហើយ។ លោកនិយាយថា៖ «គាត់មានសតិមិនសូវស្រួល។ គ្រួសារនេះដូចមិនដែលដឹងរឿងដែរ ពីមុនមកឮថា ប្រពន្ធគាត់ធ្លាប់កាប់គាត់ម្តងដែរ តែយូរឆ្នាំមកហើយ តែមិនធ្ងន់ធ្ងរ»៕