ភ្នំពេញ/បាត់ដំបងៈ នគរបាលខណ្ឌដង្កោបានឃាត់ខ្លួនបុរស ២ នាក់ និងឆែកឆេរក្នុងកែបម៉ូតូឃើញថ្នាំញៀន ៥ កញ្ចប់ធំស្មើនឹងទម្ងន់ប្រហែល ១ គីឡូក្រាមកាលពីព្រឹកម្សិលមិញ នៅផ្លូវសេនទ្រី ភូមិម័ល សង្កាត់-ខណ្ឌដង្កោ រាជធានីភ្នំពេញ ខណៈដែលនៅខេត្តបាត់ដំបងក៏មានឃាត់ខ្លួនបុរស ២ នាក់ដែរពាក់ព័ន្ធនឹងករណីដូចគ្នា។
លោក ជឹម ស៊ីថា អធិការនគរបាលខណ្ឌដង្កោបានប្រាប់ថាជនសង្ស័យពាក់ព័ន្ធករណីនេះឈ្មោះ យឹម ប៉ុនឆៃ អាយុ ២៨ ឆ្នាំមានលំនៅសង្កាត់បឹងសាឡាង ខណ្ឌទួលគោក ជិះម៉ូតូម៉ាកហុងដ្រាឌីមសេ ១២៥ ឆ្នាំ ២០១៧ ពាក់ស្លាកលេខភ្នំពេញ 1GM-2632 និងឈ្មោះ នុត លីណា អាយុ ៣០ ឆ្នាំមានលំនៅភូមិទួលពង្រ សង្កាត់ចោមចៅ។
លោកបានបញ្ជាក់ថាមុនពេលឃាត់ខ្លួនគឺនគរបាលខណ្ឌដង្កោបានក្តាប់មុខសញ្ញាដឹងមុន ហើយក៏បានចាត់កម្លាំងចាំឃ្លាំមើលនៅហាងកាហ្វេមួយនៅផ្លូវសេនទ្រី ភូមិម័ល។ ពេលនោះជនសង្ស័យបានមកណាត់ជួបគ្នាបម្រុងនឹងដោះដូរគ្រឿងញៀនក៏ត្រូវសមត្ថកិច្ចលោកឃាត់ខ្លួនបានតែម្តង។
លោកថា៖ «យើងចាប់បាន ៥ កញ្ចប់ធំ ប៉ុន្តែមិនដឹងចំនួនប៉ុន្មានទេ ហើយក៏មិនដឹងថាជាប្រភេទថ្នាំញៀនអ្វីដែរ ព្រោះមិនទាន់ពិសោធ»។
ករណីដូចគ្នានេះដែរ នៅខេត្តបាត់ដំបងកាលពីថ្ងៃ ៧ ខែកុម្ភៈនគរបាលប្រឆាំងបទល្មើសគ្រឿងញៀនក៏បានឃាត់ខ្លួនបុរសសង្ស័យ ២ នាក់ផងដែរជាមួយថ្នាំញៀនមេតំហ្វេតាមីន ៩៩៤,៨០ ក្រាម។
លោកឧត្តមសេនីយ៍ កុយ ហៀង ស្នងការរងខេត្តនេះបានប្រាប់ថា៖ «ករណីនេះសមត្ថកិច្ចបានឃាត់ខ្លួនជនសង្ស័យ ២ នាក់មែន តែមិនទាន់ប្រាប់បានទេ ព្រោះកំពុងស្រាវជ្រាវបន្តសិន»។
ទោះយ៉ាងណា មន្ត្រីការិយាល័យប្រឆាំងបទល្មើសគ្រឿងញៀនខេត្តនេះម្នាក់បានប្រាប់ថា ជនសង្ស័យទាំងនោះមានម្នាក់ឈ្មោះ សាំង សេរី ហៅ រ៉ាភ អាយុ ៣៨ ឆ្នាំ មានលំនៅភូមិកំពង់យាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង និងឈ្មោះ លាង ដឿន អាយុ ៣៨ ឆ្នាំមានលំនៅភូមិពោធិ ឃុំភ្នំ-កុងស្រុកអង្គរជ័យ ខេត្តកំពត។
បើតាមមន្ត្រីដដែលប្រាប់ថាប្រតិបត្តិការនោះគឺធ្វើឡើងនៅផ្ទះសំណាក់ដែលមានយីហោឈ្មោះ «គានថៃ» បន្ទប់លេខ ២០២ ក្នុងក្រុមទី ០៣ ភូមិកម្មករសង្កាត់ស្វាយប៉ោ ក្រុងបាត់ដំបង។ ឯវត្ថុតាងផ្សេងទៀតដែលរឹបអូសបានមានទូរស័ព្ទដៃចំនួន ២ គ្រឿងកាបូបលុយ ២-ប្រាក់រៀល ១៦៦០០ រៀល លោហធាតុពណ៌លឿង ១ វង់មានដាំត្បូង និងរថយន្ត Lexus (RX-300) ពណ៌សម្បកឪឡឹក ១ គ្រឿង ផងដែរ៕