.jpg)
លោក សម រង្ស៊ី ពេលប្រកាសចលនាសង្គ្រោះជាតិពីម្សិល។ រូប ហ្វេសប៊ុក
ភ្នំពេញៈ លោក សម រង្ស៊ី និងពលរដ្ឋខ្មែរនៅក្រៅប្រទេសប្រកាសបើកចលនាសង្គ្រោះជាតិជាផ្លូវការនៅរដ្ឋកាលីហ្វ័រនីញ៉ា សហរដ្ឋអាមេរិកដោយបង្ហាញយុទ្ធសាស្ត្រ ៥ ចំណុច។ ប៉ុន្តែអ្នកវិភាគហាក់ដូចមិនសូវមានសុទិដ្ឋិនិយមចំពោះចលនានេះខណៈអ្នកនាំពាក្យគណបក្សកាន់អំណាចថាមិនខ្វល់នឹងបញ្ហានេះ។
ចលនាសង្គ្រោះជាតិត្រូវបានប្រកាសចាប់ផ្តើមជាផ្លូវការហើយកាលពីម្សិលមិញដោយលោក សម រង្ស៊ី បានថ្លែងថាចលនានេះមានសកម្មភាព ៥ យ៉ាងរួមមាន ទី ១ ការងារតស៊ូមតិនៅលើឆាកអន្តរជាតិ ទី ២ ការងារលើវិស័យសេដ្ឋកិច្ច ហិរញ្ញវត្ថុ និងពាណិជ្ជកម្មដោយពន្យល់អ្នកវិនិយោគថារបបដឹកនាំរបស់លោកនាយករដ្ឋមន្ត្រី ហ៊ុន សែន បាត់បង់ភាពស្របច្បាប់ ការងារទី ៣ របស់ចលនានេះគឺបំផុសឲ្យពលរដ្ឋងើបឡើងតវ៉ា ឬធ្វើបាតុកម្មដោយសន្តិភាព ចំណែកការងារទី ៤ គឺអំពាវនាវឲ្យកងកម្លាំងប្រដាប់អាវុធកុំបាញ់ប្រហារទៅលើប្រជាពលរដ្ឋខ្មែរស្លូតត្រង់ដែលធ្វើបាតុកម្ម។
ចំណែកការងារទី ៥ របស់ចលនានេះលោក សមរង្ស៊ី ថ្លែងថាគឺការធ្វើចលនាក្នុងគណបក្សប្រជាជនកម្ពុជាជំរុញឲ្យសមាជិកគណបក្សកាន់អំណាចនេះចាកចេញពីលោកនាយករដ្ឋមន្ត្រី ហ៊ុន សែន។
លោក សម រង្ស៊ី ថ្លែងថា៖ «មេដឹកនាំគណបក្សប្រជាជនមួយចំនួនកំពុងតែរៀបចំខ្លួនចេញពីប្រទេសកម្ពុជាទៅរស់នៅប្រទេសក្រៅមួយចំនួនដែលគេបញ្ជូនលុយគេទៅដាក់នៅទីនោះហើយគេបានទិញប៉ាស្ព័រ។ ប្រទេសមួយចំនួនដែលគេលើកទឹកចិត្តអ្នកដែលមានលុយ គេឲ្យសញ្ជាតិគេ ឲ្យមករស់នៅលើទឹកដីគេ លុះត្រាតែបណ្ដាក់ទុនចំណាយលុយនៅលើទឹកដីគេ ទិញផ្ទះ បង្កើតការងារ រោងចក្រ ហើយយកលុយទៅតម្កល់នៅក្នុងធនាគារស្រុកគេប៉ុន្មានលានដុល្លារ ពួកពុករលួយនៅស្រុកខ្មែរអត់មានខ្វះលុយទេ»។
លោកបន្តថា៖ «ដូច្នេះយើងនឹងធ្វើចលនាដែលពេលនេះខ្ញុំប្រកាស និងអំពាវនាវឲ្យបងប្អូនយើងក្នុងជួរគណបក្សប្រជាជនថា កុំតាម ហ៊ុន សែន ទៀត។ កុំស្លាប់ដោយសារ ហ៊ុន សែន កុំស្លាប់ជំនួស ហ៊ុន សែន មកចាប់ដៃជាមួយខ្មែរអ្នកស្នេហាជាតិបងប្អូនអើយ កសាងប្រទេសជាតិជាមួយគ្នា»។
លោក សម រង្ស៊ី និយាយថាចលនានេះមានតែស្មារតីទេ ហើយមិនមែនជាអង្គការដែលមានរចនាសម្ព័ន្ធមានសមាជិក ឬការចាត់តាំងចុះឈ្មោះ ឬការលើកស្លាកអ្វីទេ ហើយចលនានេះដើម្បីជំនួសឲ្យគណបក្សសង្គ្រោះជាតិដែលមិនអាចធ្វើអ្វីបាន។
ក្នុងវីដេអូផ្សាយផ្ទាល់របស់លោកតាមហ្វេសប៊ុកលោក សម រង្ស៊ី បានចោទប្រកាន់លោកនាយករដ្ឋមន្ត្រី ហ៊ុន សែន ថាជាឧក្រិដ្ឋជនដោយនិយាយថា៖ «លោក ហ៊ុន សែន មិនចង់ចុះចេញពីតំណែងព្រោះគាត់ដឹងខ្លួនគាត់បានប្រព្រឹត្តបទឧក្រិដ្ឋតាំងពីផែនការក ៥ ៣០ ឆ្នាំជាង គាត់កាន់អំណាច ៣៣ ឆ្នាំហើយ ហើយក្រោយៗនេះការសម្លាប់ កែម ឡី ការគប់គ្រាប់បែកនៅមុខមន្ទីររដ្ឋសភាឆ្នាំ ១៩៩៧ ការធ្វើរដ្ឋប្រហារខែកក្កដាឆ្នាំ ១៩៩៧ ការសម្លាប់មេទ័ពហ៊្វុនស៊ិនប៉ិចរាប់រយនាក់ការលួចសម្លាប់គេជាច្រើន ហ៊ុន សែន ជាជនឧក្រិដ្ឋ»។
មុនពេលលោកថ្លែងបើកចលនានេះលោក សម រង្ស៊ី បានបង្ហោះឯកសារបែកធ្លាយនៅលើហ្វេសប៊ុករបស់លោកដោយលោកចោទថាលោក នេត សាវឿន បានទិញសញ្ជាតិពីប្រទេសមួយចំនួនសម្រាប់លោក និងក្រុមគ្រួសារ។
ឯកសារនោះសរសេរថាលោក នេត សាវឿន ត្រូវបានចុះឈ្មោះជាពលរដ្ឋរបស់ប្រទេស Saint Christopher and Nevis នៅទ្វីបអាមេរិកកណ្តាលតំបន់ការ៉ាប៊ីន។ ប៉ុន្តែភ្នំពេញប៉ុស្តិ៍នៅមិនទាន់អាចបញ្ជាក់ថាឯកសារនេះជាឯកសារពិត ឬក្លែងក្លាយទេ ខណៈដែលលោក នេត សាវឿន មិនអាចទាក់ទងសុំការបំភ្លឺបានកាលពីម្សិលមិញហើយលោក សម រង្ស៊ី ក៏មិនបានបញ្ជាក់ថាលោកបានឯកសារនេះពីប្រភពណាមកដែរ។
លោក សួស យ៉ារ៉ា អ្នកនាំពាក្យគណបក្សប្រជាជនបានថ្លែងថាលោកមិនខ្វល់នឹងចលនារបស់លោក សម រង្ស៊ី ទេ ដោយលោកថ្លែងថាលោក សម រង្ស៊ី ជាមនុស្សវិកលចរិត។
លោកថា៖ «លោក សម រង្ស៊ី ទី ១ ជាទណ្ឌិត ទី ២ គាត់កំពុងវិកលចរិត ទី ៣ គាត់កំពុងលក់ជាតិឯងឲ្យវិនាសកម្មហើយ។ ដូច្នេះអ្វីដែលជាសម្តីរបស់ សម រង្ស៊ី មិនយកជាការទេ»។
លោក ឡៅ ម៉ុងហៃ អ្នកវិភាគនយោបាយកម្ពុជាមិនមានសុទិដ្ឋិនិយមអំពីចលនាសង្គ្រោះជាតិនេះទេដោយលោកថ្លែងថាស្ថិតក្នុងស្ថានភាពប្រទេសកម្ពុជាបច្ចុប្បន្ន និងស្របពេលដែលលោក សម រង្ស៊ី កំពុងស្ថិតនៅក្រៅប្រទេសនោះចលនានេះប្រហែលមិនទទួលបានជោគជ័យឡើយ។
លោក បាន ថ្លែងថា៖ «កាលពីនៅក្នុងប្រទេសហើយលំហប្រជាធិបតេយ្យពេលនោះមានទូលាយជាងសព្វថ្ងៃហើយគាត់នៅក្នុងប្រទេសទៀត គណបក្សរបស់គាត់មិនបានធំធាត់ណាស់ណាទេ ហើយដល់មកបក្សសង្គ្រោះជាតិក៏គាត់នៅក្នុងប្រទេសដែរហើយជាមួយឯកឧត្តម កឹម សុខា ទៀត។ ទាំង ២ នាក់ក៏មិនបានជោគជ័យក្នុងការកសាងគណបក្សសង្គ្រោះជាតិឲ្យទៅជាគណបក្សមានឯកភាពគ្នាពេញលេញទេ»។
លោកបានបញ្ជាក់ថា៖ «សព្វថ្ងៃនេះគាត់នៅក្រៅហើយស្ថានភាពក្នុងប្រទេស លំហប្រជាធិបតេយ្យកាន់តែរួញតូចស្របពេលដែលគណបក្សប្រជាជនពង្រឹងកម្លាំងសន្តិសុខ បង្ក្រាបតំណាងរាស្ត្រ សកម្មភាពនយោបាយណាដែលធ្វើឲ្យប៉ះពាល់ដល់គណបក្សប្រជាជនហ្នឹង ដូច្នេះសកម្មភាពរបស់ចលនាហ្នឹងពិបាកនឹងមានជោគជ័យដូចដែលបានគ្រោង»។ លោកថ្លែងថាចលនាមួយអាចជោគជ័យបានទាល់តែមានបណ្ដាញ និងសកម្មជននៅក្នុងប្រទេសដែលអាចធ្វើសកម្មភាពបាន។
ក្រោយពេលមានការបង្កើតចលនាសង្គ្រោះជាតិភ្លាមមានប្រតិកម្មគាំទ្រអ្នកដែលមានប្រវត្តិតស៊ូជាមួយគណបក្ស សម រង្ស៊ី ប៉ុន្តែអ្នកស្មោះស្ម័គ្រជាមួយលោក កឹម សុខា មួយចំនួនបដិសេធមិនចូលរួមចលនានេះទេ។
លោក ឡៅ ម៉ុងហៃ ដែលជាអតីតជំនួយការលោក កឹម សុខា បានថ្លែងថា គណបក្សសង្គ្រោះជាតិមិនសូវមានឯកភាពផ្ទៃក្នុងតាំងពីដំបូងដោយសារតែអ្នកស្មោះត្រង់ជាមួយលោក កឹម សុខា និងអ្នកស្មោះត្រង់ជាមួយលោក សម រង្ស៊ី ស្មោះត្រង់ទៅមេដឹកនាំរបស់ពួកគេរៀងៗខ្លួន។
លោកថា៖ «ការបែកបាក់យើងឃើញច្បាស់ហើយគឺលោក កឹម សុខា គាត់អត់គាំទ្រចលនានេះទេ»៕
