Search form

Login - Register | FOLLOW US ON

Logo of Phnom Penh Post newspaper Phnom Penh Post - ចាប់​រថយន្ត​ដឹក​ឈើ​ ២ ​គ្រឿង​នៅ​រតនគិរី​ តែ​ម្ចាស់​រត់​រួច​ ឯ​នៅ​ស្ទឹងត្រែង​ចាប់​បាន​អ្នក​បើក​ និង​ព្រូឡាន

Content image - Phnom Penh Post
អ្នក​បើក​រថយន្ត​ដឹកឈើ​ និង​ព្រូឡាន​ពេល​សមត្ថកិច្ច​ចាប់​បាន​។ រូប អាវុធហត្ថ

ចាប់​រថយន្ត​ដឹក​ឈើ​ ២ ​គ្រឿង​នៅ​រតនគិរី​ តែ​ម្ចាស់​រត់​រួច​ ឯ​នៅ​ស្ទឹងត្រែង​ចាប់​បាន​អ្នក​បើក​ និង​ព្រូឡាន

រតនគិរី/ស្ទឹងត្រែងៈ កម្លាំង​អាវុធហត្ថ​ស្រុក​អូរយ៉ាដាវ ខេត្ត​រតនគិរី ស្ទាក់​ចាប់​បាន​រថយន្ត​ ២ ​គ្រឿង​ដែល​កំពុង​ដឹក​ឈើ​គ្រញូង​ និង​ឈើ​ប្រណីត​ផ្សេង​ទៀត​សរុប​ជាង​ ១ ​តោន​កន្លះ​ឆ្ពោះ​ទៅ​ប្រទេស​វៀតណាម ប៉ុន្តែ​អ្នក​​ដឹក​បាន​ដក​សោ​ឡាន​បោះចោល ហើយ​រត់​គេច​ខ្លួន​បាត់ ខណៈ​នៅ​ខេត្ត​ស្ទឹងត្រែង​​ក៏​មាន​ការ​បង្ក្រាប​ដូច​គ្នា តែ​ចាប់​បាន​អ្នក​បើកបរ និង​ព្រូឡាន​។

រថយន្ត​ ២ ​គ្រឿង​ប្រភេទ​កាមរី និង​បាឡែន​បាន​ដឹក​ឈើ​គ្រញូង​ និង​ធ្នង់​ពេញ​ចេញ​ពី​ភូមិ​ប៉ក់ធំ ឃុំ​ប៉ក់ញ៉ៃ ស្រុក​អូរយ៉ាដាវ​តាម​ផ្លូវ​ជាតិ​លេខ​ ៧៨A កាលពី​យប់​រំលង​អធ្រាត្រ​ឈាន​ចូល​ព្រឹក​ថ្ងៃ​ពុធ​ម្សិលម្ង៉ៃ​ក្នុង​បំណង​ឆ្លង​ដែន​តាម​ច្រក​អន្តរជាតិ​អូរយ៉ាដាវ ប៉ុន្តែ​ត្រូវ​កម្លាំង​អាវុធហត្ថ​ស្រុក​ដេញ​តាម​បង្ក្រាប​បាន​។ នេះ​បើ​យោង​តាម​លោក​ សុខ មីន មេបញ្ជាការ​អាវុធហត្ថ​ស្រុក​អូរយ៉ាដាវ និង​លោក ឡេង យុគ នាយ​ផ្នែក​រដ្ឋបាល​ព្រៃឈើ​បកែវ​។

លោក សុខ មីន បញ្ជាក់​ថា​៖ «​យើង​ដេញ​ពី​ក្រោយ​ទៅ​ជិត​ដល់​ព្រំដែន​​ [​ច្រក​អូរយ៉ាដាវ​ហើយ​] ​ក៏​ស្ទាក់​បាន​។ តែ​អ្នក​បើក​ឡាន​បាន​ដក​សោ​ឡាន​បោះចោល ហើយ​គេច​ខ្លួន​បាត់​ទៅ​»​។

លោក​បន្ត​ថា​រថយន្ត​ និង​ឈើ​ជា​វត្ថុតាង​ត្រូវ​បាន​ប្រគល់​ឲ្យ​មន្ត្រី​ជំនាញ​រដ្ឋបាល​ព្រៃឈើ​ដើម្បី​វាស់វែង​ឈើ ហើយ​ចាត់​ការ​បន្ត​តាម​នីតិវិធី​ច្បាប់​។

ចំណែក​លោក​ ឡេង យុគ ក៏​បាន​ឲ្យ​ដឹង​ផង​ដែរ​ថា​ឈើ​ទាំង​នោះ​មាន​គ្រញូង​ចំនួន​ ៥៦០ ​គីឡូក្រាម និង​ឈើ​ប្រណីត​ធ្នង់​ចំនួន​ ១០៥២ គីឡូក្រាម​។

ករណី​ដាច់​ដោយ​ឡែក​មួយ​ទៀត​កម្លាំង​​កងរាជ​អាវុធហត្ថ​ខេត្ត​ស្ទឹងត្រែង​ក៏​បាន​​បង្ក្រាប​រថយន្ត​ដឹក​ឈើ​ប្រណីត​ធ្នង់​គ្មាន​លិខិត​អនុញ្ញាត​ និង​ឃាត់​ខ្លួន​ជនសង្ស័យ​ជា​អ្នក​បើកបរ​ម្នាក់​ និង​ព្រូឡាន​ម្នាក់​ផង​ដែរ​កាលពី​យប់​ថ្ងៃ​អង្គារ នៅ​សង្កាត់​ស្ទឹងត្រែង ក្រុង​ស្ទឹងត្រែង​។ ​ឈើ​ទាំង​នោះ​ក៏​បម្រុង​ដឹក​ឆ្លង​កាត់​ទៅ​ប្រទេស​វៀតណាម​កាត់​តាម​ខេត្ត​រតនគិរី​ផង​ដែរ​។

ជនសង្ស័យ​ជា​បុរស​ទាំង​ ២ ​នាក់​នោះ​មាន​ឈ្មោះ​ រ៉ា រីន អាយុ​ ២៧ ​ឆ្នាំ​ជា​អ្នក​បើកបរ​រថយន្ត​រស់នៅ​ភូមិ ខ្នាយ​ក្រសាំង ឃុំ​ជីគរ ស្រុក​ត្បូងឃ្មុំ ខេត្ត​ត្បូងឃ្មុំ​ និង​ព្រូឡាន​ឈ្មោះ​ និល ណុល អាយុ​ ២៣ ​ឆ្នាំ​នៅ​ភូមិ​ជាមួយ​គ្នា​​នឹង​អ្នក​បើក​ឡាន​នោះ​។ នេះ​បើ​តាម​គេហទំព័រ​ផ្លូវការ​របស់​អាវុធហត្ថ​លើ​ផ្ទៃ​ប្រទេស​។

លោក គឹម ហុងសាន អ្នក​នាំពាក្យ​សាលា​ដំបូង​ខេត្ត​ស្ទឹងត្រែង​បាន​ឲ្យ​ដឹង​ថា រហូត​មក​ទល់​នឹង​ព្រឹក​ថ្ងៃ​ព្រហស្បតិ៍​ម្សិលមិញ​តុលាការ​នៅ​មិន​ទាន់​ឃើញ​ជនសង្ស័យ​ទាំង​ ២ ​នាក់​ត្រូវ​បាន​បញ្ជូន​មក​នោះ​ទេ​៕

0

Comments

Please, login or register to post a comment