ភ្នំពេញៈ សមត្ថកិច្ចឃាត់ខ្លួនកម្មករជាជនជាតិចិនចំនួន ១២ នាក់ក្នុងចំណោម ៧៤ នាក់ដែលរកឃើញថាបានលួចឆ្លងដែន និងកំពុងស្នាក់នៅក្នុងការដ្ឋានចិនមួយកន្លែងដោយគ្មានលិខិតឆ្លងដែន និងឯកសារពាក់ព័ន្ធ និងកំពុងធ្វើការងារខុសច្បាប់ស្ថិតនៅផ្លូវបេតុង ភូមិទួលសំពៅ សង្កាត់ទួលសង្កែ ខណ្ឌទួលគោក រាជធានីភ្នំពេញ។
លោក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍បានឲ្យដឹងថាក្នុងប្រតិបត្តិការនេះមានការអនុញ្ញាតពីលោកឧត្តមសេនីយ៍ទោស្នងការរងទទួលផែនអន្ដោប្រវេសន៍ ការិយាល័យស៊ើបអង្កេត និងអនុវត្តនីតិវិធី និងមន្ត្រីជំនាញពាក់ព័ន្ធផ្សេងទៀត ដោយបានចុះត្រួតពិនិត្យការដ្ឋានសំណង់ និងកន្លែងស្នាក់នៅរបស់ជនជាតិចិនដែលលួចឆ្លងដែន និងកំពុងស្នាក់នៅធ្វើការងារខុសច្បាប់នៅសង្កាត់ទួលសង្កែ ខណ្ឌឫស្សីកែវ។
លោកបញ្ជាក់ថា៖ «យើងបានចុះត្រួតពិនិត្យគោលដៅការដ្ឋានសំណង់ និងកន្លែងស្នាក់នៅ Nantong City Daxing Engineering Co.,Ltd បានពិនិត្យឃើញមានជនបរទេសចំនួន ៧៤ នាក់ស្រី ២ នាក់ជាជនជាតិចិនបានលួចចូលមកស្នាក់នៅ និងធ្វើការដោយខុសច្បាប់គ្មានលិខិតឆ្លងដែន និងប័ណ្ណការងារត្រឹមត្រូវ»។
លោកបន្តថាក្នុងចំណោម ៧៤ នាក់នោះគ្មានលិខិតឆ្លងដែនចំនួន ១២ នាក់ និងបានដកហូតលិខិតឆ្លងដែន ២២ ក្បាលគ្មានសៀវភៅការងារបញ្ជូនទៅអគ្គនាយកដ្ឋានអន្តោប្រវេសន៍ដើម្បីអនុវត្តនីតិវិធីបន្តទៅតាមច្បាប់។
លោក ទៀង ច័ន្ទសារ អធិការនគរបាលខណ្ឌឫស្សីកែវឲ្យដឹងថាលោកគ្រាន់តែបានទទួលព័ត៌មានប៉ុន្ដែសម្រាប់របាយការណ៍លម្អិតលោកមិនអាចបញ្ជាក់បានទេដោយបង្វែរឲ្យទៅសួរអគ្គនាយកដ្ឋានអន្តោប្រវេសន៍វិញ។
តាមរបាយការណ៍របស់អគ្គនាយកដ្ឋានអន្តោប្រវេសន៍បង្ហាញម្សិលមិញថា ក្រុមប្រតិបត្តិការចម្រុះនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ដោយបានការអនុញ្ញាតពីលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងស្នងការដ្ឋាននគរបាលរាជធានីភ្នំពេញសមត្ថកិច្ចមូលដ្ឋានបានចុះត្រួតពិនិត្យនៅគោលដៅការដ្ឋានសំណង់ និងកន្លែងស្នាក់នៅ Nantong City Daxing Engineering Co.,Ltd៕