Search form

Login - Register | FOLLOW US ON

Logo of Phnom Penh Post newspaper Phnom Penh Post - ចៅសង្កាត់​រង​ក្នុង​អាណត្តិ​ និង​បេក្ខជន​ឈរ​ឈ្មោះ​បក្ស​ប្រឆាំង​ពីរ​រូប​ត្រូវ​បាន​ឃុំ​ខ្លួន

Content image - Phnom Penh Post
កាលពី​ខែ​ឧសភា ឆ្នាំ ២០១៥ ក្រុម​កម្មករ​អូសរទេះ​ប្រមាណ​ជា ១០០ នាក់​បាន​ធ្វើ​បាតុកម្ម​នៅ​មុខ​ច្រក​ទ្វា​អន្តរជាតិ​ប៉ោយប៉ែត​ដែល​ក្រោយ​មក​បាន​ក្លាយ​ជា​ហិង្សា​ដោយ​មាន​គប់​ដុំ​ឥដ្ឋ​ចូល​ក្នុង​ស្នាក់ការ​គយ និង​មាន​ដុត​កង់ឡាន ចំណែក​កម្លាំង​កងរាជ​អាវុធហត្ថ​បាន​វាយ​បំបែក​កម្មករ និង​បាន​បាញ់​គំរាម​ផង។

ចៅសង្កាត់​រង​ក្នុង​អាណត្តិ​ និង​បេក្ខជន​ឈរ​ឈ្មោះ​បក្ស​ប្រឆាំង​ពីរ​រូប​ត្រូវ​បាន​ឃុំ​ខ្លួន

ភ្នំពេញ: ចៅសង្កាត់​រង​ពីរ​នាក់​នៅ​ក្នុង​កូតា​គណបក្ស​ប្រឆាំង​ត្រូវ​បាន​ឃុំ​ខ្លួន​កាលពី​ថ្ងៃ​ម្សិលមិញ​ដាច់​ដោយ​ឡែក​ពី​គ្នា​ដោយ​សាលា​ដំបូង​រាជធានី និង​តុលាការ​ខេត្ត​បន្ទាយមានជ័យ​ពាក់ព័ន្ធ​នឹង​បទ​ចោទប្រកាន់ ការ​ញុះញង់​ឲ្យ​មាន​អំពើ​ហិង្សា​ និង​ក្លែង​លិខិត​សាធារណៈ ខណៈ​សង្គម​ស៊ីវិល​ដែល​តាមដាន​ការ​បោះឆ្នោត​បាន​ចាត់​ទុក​ថា​ការ​ឃាត់​ខ្លួន​នេះ​នឹង​ធ្វើឲ្យ​ប៉ះពាល់​បរិយាកាស​មិន​ល្អ​មុន​ការ​បោះឆ្នោត​ក្រុម​ប្រឹក្សា​ឃុំ​សង្កាត់​ដែល​នឹង​ប្រព្រឹត្ត​ទៅ​ប៉ុន្មាន​ខែ​ខាង​មុខ​នេះ។

លោក ចៅ វាសនា ចៅសង្កាត់​រង​ទី​ពីរ​ក្នុង​សង្កាត់​ប៉ោយប៉ែត​មកពី​គណបក្ស​សមរង្ស៊ី​ត្រូវ​បាន​ចៅក្រម​ស៊ើបសួរ​សាលា​ដំបូង​ខេត្ត​បន្ទាយ​មានជ័យ​សម្រេច​ឃុំ​ខ្លួន​បណ្តោះអាសន្ន​ដោយ​ចោទ​ប្រកាន់​ពី​បទ​ញុះញង់​បង្ក​ឲ្យ​មាន​អំពើ​ហិង្សា​ក្នុង​បាតុកម្ម​របស់​កម្មករ​មួយ​កាលពី​ឆ្នាំ ២០១៥ បន្ទាប់ពី​មាន​ការ​សាកសួរ​អស់​រយៈពេល​ប្រមាណ​ជា ៤ ម៉ោង។

លោក ជូង ជូងី មេធាវី​ការពារ​ក្ដី​ឲ្យ​លោក វាសនា បាន​ថ្លែង​ប្រាប់​ភ្នំពេញ​ប៉ុស្តិ៍​តាម​ទូរស័ព្ទ​ថា៖ «ចៅក្រម​ស៊ើបសួរ​លោក ឯក ប៉ូលីហ្វីល បាន​សម្រេច​ឃុំ​ខ្លួន​កូនក្តី​ខ្ញុំ​បណ្តោះអាសន្ន​ហើយ​ក្រោយ​ពី​មាន​ការ​សាកសួរ​អស់​រយៈពេល​ជិត​បួន​ម៉ោង។ លោក​ចៅក្រម​ស៊ើបសួរ​បាន​ចោទប្រកាន់​កូនក្តី​ខ្ញុំ​ពី​បទ​ញុះញង់​ឲ្យ​ប្រព្រឹត្ត​អំពើ​ហិង្សា»។

លោក ជូងី បាន​ថ្លែង​ថា​ចៅក្រម​បាន​សាកសួរ​កូន​ក្តី​របស់​លោក​ជាច្រើន​សំណួរ​ទាក់ទង​នឹង​ហេតុការណ៍​ដែល​កើត​ឡើង​តាំងពី​ឆ្នាំ ២០១៥ ហើយ​កូនក្តី​របស់​លោក​បាន​ប្រាប់​ចៅក្រម​ដោយ​គេ​មិន​បាន​ធ្វើ​សកម្មភាព​ណា​មួយ​ដែល​ជា​ការ​ញុះញង់​ឲ្យ​មាន​អំពើ​ហិង្សា​នោះ​ទេ។

ទោះ​ជា​យ៉ាង​ណា​ក៏ដោយ​លោក វាសនា ធ្លាប់​បាន​បដិសេធ​រួច​មក​ហើយ​ថា​មិន​បាន​ប្រព្រឹត្ត​ដូច​ការ​ចោទប្រកាន់​នោះ​ទេ ដោយ​គ្រាន់​តែ​បាន​ចូលរួម​ឃ្លាំ​មើល​ក្នុង​នាម​ជា​អាជ្ញាធរ​ប៉ុណ្ណោះ។

កាលពី​ខែ​ឧសភា ឆ្នាំ ២០១៥ ក្រុម​កម្មករ​អូសរទេះ​ប្រមាណ​ជា ១០០ នាក់​បាន​ធ្វើ​បាតុកម្ម​នៅ​មុខ​ច្រក​ទ្វា​អន្តរជាតិ​ប៉ោយប៉ែត​ដែល​ក្រោយ​មក​បាន​ក្លាយ​ជា​ហិង្សា​ដោយ​មាន​គប់​ដុំ​ឥដ្ឋ​ចូល​ក្នុង​ស្នាក់ការ​គយ និង​មាន​ដុត​កង់ឡាន ចំណែក​កម្លាំង​កងរាជ​អាវុធហត្ថ​បាន​វាយ​បំបែក​កម្មករ និង​បាន​បាញ់​គំរាម​ផង។

លោក មេធាវី ថ្លែង​ថា៖ «ខ្ញុំ​នឹង​ដាក់​ពាក្យ​សុំ​ឲ្យ (តុលាការ) ដោះលែង​គាត់​ឲ្យ​នៅ​ក្រៅ​ឃុំ​វិញ​ប្រហែល​ជា​នៅ​ក្នុង​សប្តាហ៍​ក្រោយ​នេះ​ដោយសារ​គាត់​មាន​គ្រួសារ​មាន​លំនៅឋាន​ច្បាស់លាស់ គាត់​មិន​ដែល​គេច​ខ្លួន​ទេ​ ប៉ុន្តែ​តុលាការ​នៅ​តែ​ឃុំ​ខ្លួន​គាត់​កូនក្ដី​ខ្ញុំ​ដោយ​ចៅក្រម​គាត់​សំអាង​ថា​ដើម្បី​កុំ​ឲ្យ​រំខាន​សាក្សី​ដែល​ត្រូវ​កោះហៅ​មក​សួរ​បន្ថែម​ទៀត»។

លោក សោ ចាន់ដេត សមាជិក​ព្រឹទ្ធសភា​គណបក្ស​ សម រង្ស៊ី ដែល​បាន​តាមដាន​ករណី​នេះ​ប្រាប់​ភ្នំពេញ​ប៉ុស្តិ៍​តាម​ទូរស័ព្ទ​កាលពី​ម្សិលមិញ​ដែរ​ថា​ចៅក្រម​ស៊ើបសួរ​មិន​ចាំបាច់​ឃុំ​ខ្លួន​ក៏​បាន​ដោយ​កន្លង​មក​លោក ចៅ វាសនា បាន​សហការ​ជាមួយ​តុលាការ​បាន​យ៉ាង​ល្អ​ និង​បាន​ចូល​ខ្លួន​តាមការ​កោះ​របស់​តុលាការ​រហូត​មក។

លោក ចាន់ដេត ថ្លែង​ថា៖ «ខ្ញុំ​ចាត់ទុក​ការ​ឃុំ​ខ្លួន​នេះ​ថា​ជា​រឿង​នយោបាយ​ព្រោះ​រឿងក្តី​ហ្នឹង​វា​ចប់​បាត់​ទៅ​ហើយ​តាំងពី​ឆ្នាំ ២០១៥ ព្រោះ​ពេល​ហ្នឹង​ខ្ញុំ​បាន​មក​ជួប​អភិបាល​ខេត្ត អភិបាល​ក្រុង ហើយ​បាន​ឯកភាព​គ្នា​ថា​រឿង​ហ្នឹង​ជា​រឿង​ពលករ​ផ្ទុះ​ហិង្សា​ដោយ​ខ្លួន​គាត់»។

អ្នក​នាំពាក្យ​សាលា​ដំបូង​ខេត្ត​បន្ទាយមានជ័យ​លោក សុខ កែវបណ្ឌិត កាលពី​ម្សិលមិញ​បាន​បញ្ជាក់​ពី​ការ​ឃុំ​ខ្លួន​ចៅសង្កាត់​រង​រូប​នេះ។

ដោយឡែក​ចៅសង្កាត់​រង​ទី ២ សង្កាត់​បឹងកក់​ទី ១ ខណ្ឌ​ទួលគោក​លោក លី សុគន្ធ ក៏​ត្រូវ​បាន​ចៅក្រម​ស៊ើបសួរ​សាលា​ដំបូង​រាជធានី​ភ្នំពេញ​សម្រេច​ឃុំ​ខ្លួន​បណ្តោះ​អាសន្ន​ដូចគ្នា​ដោយ​ចោទ​ពី​បទ​ក្លែង​លិខិត​សាធារណៈ​ដែល​កើត​មាន​ឡើង​កាលពី​អំឡុង​ពេល​ចុះ​ឈ្មោះ​បោះឆ្នោត​កាលពី​ឆ្នាំ​មុន។

លោកស្រី ម៉េង សុភារី មេធាវី​ការពារ​ឲ្យ​លោក លី សុគន្ធ បាន​ថ្លែង​ថា​បទ​ចោទ​នេះ​មាន​សភាព​ធ្ងន់ធ្ងរ​ណាស់​សម្រាប់​កូនក្តី​របស់​អ្នកស្រី​ដែល​ថា​អាច​ប្រឈម​នឹង​ការ​ចាប់​ដាក់​ពន្ធនាគារ​ពី​ ៥ ទៅ ១០ ឆ្នាំ។ ដោយ​លោកស្រី​អះអាង​ថា​ករណី​នេះ​គ្រាន់​តែ​ជា​ការ​ភាន់ច្រឡំ​លើ​លិខិត​ប៉ុណ្ណោះ ហើយ​លោក លី សុគន្ធ ក៏​មិន​បាន​ទាញ​ប្រយោជន៍​ណា​មួយ​ពី​ការ​ភ័ន្តច្រឡំ​នៃ​លិខិត​នេះ​ដែរ។

លោកស្រី​រំឭក​ថា​កាលពី​ថ្ងែ​ទី ១ ខែ​កញ្ញា ឆ្នាំ ២០១៦ លោក លី សុគន្ធ បាន​ទទួល​បន្ទុក​ធ្វើ​ប័ណ្ណ​សម្គាល់​ខ្លួន​ភ្នាក់ងារ​សង្កេតការណ៍​ចុះ​ឈ្មោះ​បោះឆ្នោត​ហើយ​ថា​លោក លី សុគន្ធ បាន​ច្រឡំ​រូបថត​ភ្នាក់ងារ​សង្កេតការណ៍។ ការ​ច្រឡំ​នេះ​កើតឡើង​ដោយសារ​លោក លី សុគន្ធ មិន​បាន​ស្គាល់​មុខ​ភ្នាក់ងារ​ម្នាក់​របស់​គាត់​ហើយ​ថា​ស្មៀន​ក៏​បាន​ពិនិត្យ និង​ចៅសង្កាត់​ក៏​បាន​ចុះ​ហត្ថលេខា​លើ​ប័ណ្ណ​នោះ​ផង​ដែរ។

លោកស្រី​ថ្លែង​ថា៖ «ការ​ដោះស្រាយ​គ្នា​ប្តឹង​គ្នា​រឿង​ច្រឡំ​ឈ្មោះ​ហ្នឹង​ក៏​ដោះស្រាយ​គ្នា​ចប់​សព្វ​គ្រប់​នៅ​សង្កាត់​ហ្នឹង​ហើយ​ដែរ ហើយ​យើង​មិន​នឹក​ស្មាន​ថា​ករណី​ហ្នឹង​ត្រូវ​បាន​បញ្ជូន​តាំងពី​ខណ្ឌ​អធិការដ្ឋាន​រហូត​ដល់​ព្រះរាជអាជ្ញា ចៅក្រម​ស៊ើបសួរ​អ៊ីចឹង​ទេ គាត់​គ្មាន​ចេតនា​ទុច្ចរិត​ទៅ​បន្លំ​ធ្វើអី​បើ​ភ្នាក់ងារ​មួយ​អវត្តមាន​ភ្នាក់ងារ​ម្នាក់​ទៀត​អាច​សុំ​ចុះ​បញ្ជី​ធ្វើ​ជា​ភ្នាក់ងារ​បាន​ទៀត​តើ​ដោយ គ.ជ.ប មាន​ហាមឃាត់​ឯណា ត្រង់​ចំណុច​ហ្នឹង​ហើយ​ដែល​បញ្ជាក់​ថា​គាត់​អត់​មាន​ចេតនា​ទៅ​បន្លែ​បន្លំ​ដោះដូរ​រូបថត​ដើម្បី​ប្រយោជន៍​អី​ណា​មួយ​គឺ​អត់​មាន​ទេ»។

អ្នកស្រី​ថ្លែង​ថា៖ «ខ្ញុំ​ជា​មេធាវី​នឹង​ស្នើ​ឲ្យ​ចៅក្រម​ស៊ើបសួរ​កោះ​ហៅ​ស្មៀន និង​ចៅសង្កាត់​មក​សាកសួរ​ផង​ដែរ​ក្នុង​សំណុំ​រឿង​នេះ​ហើយ​ក៏​នឹង​ពិនិត្យ​លទ្ធភាព​ក្នុង​ការ​ដាក់​ពាក្យ​សុំ​ឲ្យ​កូនក្តី​បាន​នៅ​ក្រៅ​ឃុំ​បាន​ផង​ដែរ»។ លោក​ចៅសង្កាត់​រង​ទាំង​ពីរ​រូប​នេះ​ត្រូវ​បាន​ឈរ​ឈ្មោះ​ជា​បេក្ខជន​នៅ​ក្នុង​គណបក្ស​សង្គ្រោះជាតិ​សម្រាប់​ការ​បោះឆ្នោត​ក្រុម​ប្រឹក្សា​ឃុំ​សង្កាត់​នៅ​ថ្ងៃ​ទី ៤ ខែ​មិថុនា​ឆ្នាំ ២០១៧ ខាង​មុខ​នេះ។

លោក គល់ បញ្ញា នាយក​ប្រតិបត្តិ​អង្គការ​ខុមហ្វ្រែល​ដែល​បាន​ធ្វើ​កាងារ​លើ​ការ​បោះឆ្នោត​យ៉ាង​យូរ​នៅ​ក្នុង​ប្រទេស​កម្ពុជា​បាន​ថ្លែង​ថា​ការ​ឃុំ​ខ្លួន​បេក្ខជន​ឃុំ សង្កាត់​របស់​គណបក្ស​ប្រឆាំង​នៅ​ពេល​នេះ​អាច​ថា​ធ្វើ​ឲ្យ​មាន​រូបភាព​មិន​ល្អ​មុន​ពេល​បោះឆ្នោត។

លោក បញ្ញា ថ្លែង​ថា៖ «វា​បង្ហាញ​ពី​រូបភាព​អត់​ល្អ​ណា​មុន​ពេល​បោះឆ្នោត អត់​ល្អ​ត្រង់​ថា​ក្រុម​ប្រឹក្សា​ឃុំ​សង្កាត់ និង​ជា​បេក្ខជន​ប្រកួត​ប្រជែង​ការ​បោះឆ្នោត គេ​ត្រូវ​ឲ្យ​ឱកាស​ប្រកួតប្រជែង​ការ​បោះឆ្នោត យើង​មិន​អាច​ទោស​ប៉ុណ្ណឹង​ដាក់​ទោស​គេ​ដាក់​ពន្ធនាគារ​គេ​អ៊ីចឹង​ទេ គេ​ដាក់​ពន្ធនាគារ​ទៅ​លើ​អ្នក​នយោបាយ​ណា​ម្នាក់​គេ​ប្រុង​ប្រយ័ត្ន​ណាស់ គេ​មិន​ដាក់​ទោស​គ្រាន់​តែ​រឿង​ដែល​គេ​ធ្វើការ​ទាក់ទិន​នឹង​កិច្ចការ​នយោបាយ​ណា​វា​អត់​ត្រឹមត្រូវ»។

ប៉ុន្តែ​លោក សុខ ឥសាន អ្នក​នាំពាក្យ​គណបក្ស​ប្រជាជន​លោក​បាន​ចាត់​ទុក​ថា​ការ​ឃុំ​ខ្លួន​ចៅ​សង្កាត់​រង​ទាំង​ពីរ​នាក់​នេះ​មិន​ប៉ះពាល់​ដល់​ដំណើរការ​ល្អ​សម្រាប់​ការ​បោះឆ្នោត​នា​ពេល​ខាង​មុខ​នោះ​ទេ​ព្រោះ​នេះ​គ្រាន់​តែ​ជា​ការ​អនុវត្ត​ច្បាប់​ចំពោះ​អ្នក​ប្រព្រឹត្ត​ខុស​តែ​ប៉ុណ្ណោះ។

លោក ឥសាន បាន​ថ្លែង​ថា៖​ «ទោះបី​ជា​ធ្វើ​ដំណើរ​ទៅ​រក​ការ​បោះឆ្នោត​ក្តី តែ​ការ​អនុវត្ត​ច្បាប់​មិន​បាន​ផ្អាក​ទេ តែ​អ្នក​ណា​ប្រព្រឹត្ត​ខុស​ច្បាប់​ត្រូវ​តែ​ធ្វើ​តាម​ច្បាប់​ហ្នឹង​ហើយ»៕

0

Comments

Please, login or register to post a comment