Search form

Login - Register | FOLLOW US ON

Logo of Phnom Penh Post newspaper Phnom Penh Post - ឆេះ​រោងចក្រ​បង្ក​ការ​ខាតបង់​ប្រាក់​រាប់​លាន​ដុល្លារ

Content image - Phnom Penh Post
មន្ត្រី​ពន្លត់​អគ្គិភ័យ​ព្យាយាម​ពន្លត់​ភ្លើង​ដែល​កំពុង​ឆាបឆេះ​រោងចក្រ​កាត់ដេរ​ម៉ាកាឡូតហ្គាមេន​ដែល​ស្ថិត​នៅ​ក្នុង​សួន​ឧស្សាហកម្ម​វឌ្ឍនៈ ភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍សែនជ័យ​កាលពី​ព្រឹក​ថ្ងៃ​ម្សិលមិញ​។ រូប FN

ឆេះ​រោងចក្រ​បង្ក​ការ​ខាតបង់​ប្រាក់​រាប់​លាន​ដុល្លារ

ភ្នំពេញៈ ​រោងចក្រ​កាត់ដេរ​មួយ​ឈ្មោះ​ ម៉ាកាឡូតហ្គាមេន ត្រូវ​បាន​អគ្គិភ័យ​ឆេះ​ខ្ទេច​កាលពី​ព្រឹក​ម្សិលមិញ​បណ្ដាល​ឲ្យ​ខូចខាត​ទាំង​ស្រុង​ដោយ​មិន​ទាន់​ដឹង​ពី​មូលហេតុ​ច្បាស់ ប៉ុន្ដែ​មិន​បណ្ដាល​ឲ្យ​មនុស្ស​រងគ្រោះ​ទេ​។

រោងចក្រ​ដែល​ស្ថិត​ក្នុង​សួន​ឧស្សាហកម្ម​វឌ្ឍនៈ​ភូមិ​ត្រពាំងថ្លឹង សង្កាត់​ចោមចៅ ខណ្ឌ​ពោធិ៍សែនជ័យ​មួយ​នេះ​ត្រូវ​បាន​អគ្គិភ័យ​បំផ្លាញ​អគារ​ចំនួន​ ២ ​ដែល​នៅ​ជាប់​គ្នា​ចាប់ពី​ម៉ោង​ ៤ ​និង​ ៥០ ​នាទី​ទៀបភ្លឺ​រហូត​ដល់​ម៉ោង ៨ និង​ ៣០ ​នាទី​ព្រឹក​។

លោក អ៊ូ រតនា ប្រធាន​ក្រុម​អធិការកិច្ច​ការងារ​ទី​ ៣ ​នៃ​ក្រសួង​ការងារ​ដែល​ចុះ​ដល់​កន្លែង​កើត​ហេតុ​ថ្លែង​ថា បន្ទាប់ពី​អគ្គិភ័យ​រលត់​យើង​បាន​វិនិច្ឆ័យ​ជា​បឋម​ថា​អាច​ខាតបង់​សម្ភារ និង​ទំនិញ​​ក្នុង​រោងចក្រ បើ​គិត​ជា​ថវិកា​ប្រមាណ​ជាង​ ៥ ​លាន​ដុល្លារ​។

លោក​បន្ត​ថា​នៅ​ ២-៣ ​ថ្ងៃ​ខាង​មុខ​ក្រសួង​នឹង​កោះ​ហៅ​ភាគី​រោងចក្រ និង​តំណាង​កម្មករ​ដើម្បី​ពិភាក្សា​រក​ដំណោះស្រាយ​បញ្ហា​ក្នុង​អំឡុង​ពេល​សម្រាក​ជួសជុល​រោងចក្រ​។

​លោក​ថា​៖ «​ក្នុង​នាម​ខ្ញុំ​តំណាង​ក្រសួង​ការងារ​បាន​ពិភាក្សា​ជាមួយ​លោក​នាយក​ក្រុមហ៊ុន​អម្បាញ់​មិញ​ហើយ​»​។

លោក គង់ ថូ នាយរង​ការិយាល័យ​ពន្លត់​អគ្គិភ័យ​រាជធានី​ភ្នំពេញ​ដែល​ដឹកនាំ​កម្លាំង​អន្តរាគមន៍​បាន​ឲ្យ​ដឹង​ថា​សមត្ថកិច្ច​ប្រើ​​រថយន្ត​ពន្លត់​ជាង​ ៣០ ​គ្រឿង​។

លោក​ថា​៖ «​យើង​ប្រើ​បច្ចេកទេស​អស់​ពី​សមត្ថភាព​ហើយ ប៉ុន្ដែ​យើង​នៅ​តែ​ជួយ​គាត់​មិន​ទាន់​ពេល​ទៀត ហើយ​ក៏​ព្យាយាម​ជួយ​ទប់ស្កាត់​វា​រាលដាល​ទៅ​ដល់​កន្លែង​ផ្សេង​»​។

Content image - Phnom Penh Post
ទិដ្ឋភាព​នៅ​រោងចក្រ​ក្រោយ​ភ្លើង​ឆេះ​កាលពី​ម្សិលមិញ​។ ហុង មិនា

ទោះ​យ៉ាង​ណា​ស្ត្រី​ជនបរទេស​ម្នាក់​ដែល​បម្រើការ​នៅ​រោងចក្រ​នោះ​សុំ​មិន​បញ្ចេញ​ឈ្មោះ​បាន​ថ្លែង​ថា​យើង​បាន​ទូរស័ព្ទ​ទៅ​ផ្នែក​ពន្លត់​អគ្គិភ័យ​ភ្លាមៗ​ខណៈ​ភ្លើង​កំពុង​ឆេះ​តិចតួច ប៉ុន្ដែ​គេ​ហាក់​យឺតយ៉ាវ និង​មិន​សូវ​យក​ចិត្ត​ទុក​ដាក់​។

អ្នកស្រី​ថា​៖ «​ពេល​​កើត​ភ្លាមៗ​ថៅកែ​ខ្ញុំ​បាន​ខល​ហៅ​រថយន្ត​ទឹក​នេះ​ភ្លាមៗ​ដែរ ប៉ុន្ដែ​ពួកគាត់​យឺត​ណាស់​គឺ​ខល​ទៅ​ភ្លាម​កន្លះ​ម៉ោង​ទើប​មក​ដល់​»​។

តំណាង​រោងចក្រ​នេះ​បាន​ឲ្យ​ដឹង​ថា​រោងចក្រ​នេះ​មាន​កម្មករ​ជាង​ ២ ​ពាន់​នាក់​ ប៉ុន្តែ​បាន​បដិសេធ​​មិន​បកស្រាយ​យ៉ាង​ណា​ទេ ទាក់ទង​នឹង​អនាគត​ក្រុម​កម្មករ​ក្រោយ​ពី​ការ​មហន្តរាយ​នេះ​។

អ្នកស្រី​ថា​៖ «​យើង​កំពុង​ប្រជុំ​រក​ដំណោះស្រាយ​ជាមួយ​កម្មករ​»​។

តំណាង​កម្មករ​ផ្នែក​ដេរ​ម្នាក់​អ្នកស្រី សេង សារិទ្ធ រៀបរាប់​ថា​ប្រសិន​បើ​ថៅកែ​កាត់​បុគ្គលិក​ចោល​ខ្លះ​នឹង​ធ្វើឲ្យ​ប៉ះពាល់​ដល់​កម្មករ​។ អ្នកស្រី​បន្ថែម​ថា​ភ្លាមៗ​ចំពោះ​មុខ​នេះ​ពួកគាត់​មិន​អាច​រក​ការងារ​បាន​ទេ​។

អ្នកស្រី​ថា​៖ «​យើង​សុំ​ឲ្យ​ថៅកែ​រោងចក្រ និង​ភាគី​ពាក់ព័ន្ធ​ជួយ​ដោះស្រាយ​ធ្វើ​យ៉ាង​ណា​សម្រួល​ឲ្យ​កម្មករ​បាន​បន្ត​ការងារ​ដោយ​​មិន​កាត់​បន្ថយ​កម្មករ​ចេញ​»​។

របាយការណ៍​សមត្ថកិច្ច​ឲ្យ​ដឹង​ថា​គិត​ត្រឹម​ថ្ងៃ​ទី​ ១៤ ខែ​វិច្ឆិកា​នេះ​អគ្គិភ័យ​ ៧៦ ​ករណី​បាន​កើតឡើង​ទូទាំង​ប្រទេស​។ ក្នុង​នោះ​ករណី​អគ្គិភ័យ​ធំៗ​មាន​ ១០ ​លើក​ដោយ​បណ្តាល​ឲ្យ​មនុស្ស​ស្លាប់​ ៧ ​នាក់​ក្នុង​នោះ​មាន​ស្ត្រី​ម្នាក់ និង​របួស​ ១២ ​នាក់​ក្នុង​នោះ​មាន​ស្ត្រី​ ៤ ​នាក់​ផង​ដែរ​៕

0

Comments

Please, login or register to post a comment