.jpg)
បុរសអូស្ដ្រាលីនៅតុលាការកំពូលកាលពីម្សិលមិញ។ ផា លីណា
ភ្នំពេញៈ បុរសវ័យចំណាស់ជាតិអូស្ត្រាលីម្នាក់កាលពីម្សិលមិញបានទទូចសុំចៅក្រមតុលាការកំពូលនៅក្រៅឃុំពាក់ព័ន្ធនឹងការបង្ហោះយន្តហោះដ្រូនកាលពីឆ្នាំមុនជាករណីដែលរងការចោទថាជាផ្នែកមួយនៃការចូលរួមធ្វើបដិវត្តន៍ពណ៌។
ក្នុងសវនាការដែលមានចៅក្រមជំនុំជម្រះ ៥ រូបដឹកនាំដោយលោកចៅក្រម ស៊ឹង បញ្ញាវុឌ្ឍ បានប្រាប់ជនត្រូវចោទតាមរយៈអ្នកបកប្រែថា៖ «តុលាការកំពូលបើកសវនាការជំនុំជម្រះថ្ងៃនេះគឺជាការជម្រះសំណុំរឿងមុនអង្គសេចក្តី ព្រោះជាការជម្រះបណ្តឹងសុំនៅក្រៅឃុំ»។
លោក JAMES STANIFORTH RICKETSON អាយុ ៦៨ ឆ្នាំដែលត្រូវបានផ្តល់សិទ្ធិឲ្យបំភ្លឺនោះបានឆ្លើយថានៅថ្ងៃទី ៣ ខែមិថុនាឆ្នាំមុនលោកបានបង្ហោះយន្តហោះដ្រូនហើយ ២ ថ្ងៃក្រោយមកក៏ត្រូវនគរបាលឃាត់ខ្លួន និងនាំទៅបន្ទប់ជួលហើយរឹបអូសសម្ភារលោកមានទូរស័ព្ទ ៤ គ្រឿង កុំព្យូទ័រ និងម៉ាស៊ីនថតអស់។ លុះដល់ថ្ងៃ ៥ មិថុនា សមត្ថកិច្ចប្រាប់លោកថាធ្វើខុសច្បាប់កម្ពុជា។
លោក RICKETSON បន្តថាក្នុងរឿងនេះលោកបានសួរចៅក្រមស៊ើបសួរសាលាដំបូងរាជធានីភ្នំពេញអំពីភ័ស្តុតាងដែរ ដែលលោកថាហោចណាស់ក៏ត្រូវយោងលើរដ្ឋធម្មនុញ្ញ ១ ឬនីតិវិធីព្រហ្មទណ្ឌដែរ តែនោះអត់ទេ ហើយលោកយល់ថាជាការចោទភាន់ច្រឡំ។
លោកបានបញ្ជាក់ថា៖ «ប៉ូលិសជឿថាខ្ញុំមានកំហុស តែខ្ញុំទាមទារបញ្ជាក់ពីភ័ស្តុតាងដល់ខ្ញុំ តែប៉ូលិសមិនបង្ហាញទេ។ បន្ទាប់មកក៏លេចមុខខ្ញុំតាមទូរទស្សន៍រដ្ឋាភិបាលចោទខ្ញុំទាក់ទងនឹងគណបក្សសង្គ្រោះជាតិ និងការធ្វើបដិវត្តន៍ពណ៌។ ត្រង់នេះឯងថាខ្ញុំខុសច្បាប់។ ខ្ញុំជឿថាកំហុសខ្ញុំគឺត្រង់ខ្ញុំបង្ហោះយន្តហោះដ្រូនមិនបានសុំច្បាប់ជាមុន។
លោក RICKETSON បន្តថា៖ «បើខាងចៅក្រមស៊ើបសួរចោទខ្ញុំសូមឲ្យធ្វើសវនាការជាសាធារណៈដោយមានអ្នកកាសែតចូលរួម ហើយខ្ញុំមានសិទ្ធិការពារខ្លួនហើយបើគ្មានភ័ស្តុតាងទេសូមដោះលែងខ្ញុំវិញ។ ខ្ញុំមិនអាចចេញពីកម្ពុជារួចទេ ព្រោះសម្ភារថតភាពយន្តខ្ញុំមានតម្លៃប្រហែល ៥ ម៉ឺនដុល្លារហើយខ្ញុំមានកូនធម៌ជាទីស្រឡាញ់ខ្ញុំនៅកម្ពុជាទៀត»។
លោកអគ្គព្រះរាជអាជ្ញារង ឈួន ចាន់ថា តំណាងមហាអយ្យការសន្និដ្ឋានថា ជនត្រូវចោទត្រូវតុលាការថ្នាក់ក្រោមចោទពីបទប្រមូលផ្តុំព័ត៌មានធ្វើឲ្យអន្តរាយដល់ការការពារជាតិតាមមាត្រា ៤៤៦ នៃក្រមព្រហ្មទណ្ឌ និងមាត្រា ២០៥ ហើយការសម្រេចមិនឲ្យជនត្រូវចោទនៅក្រៅឃុំជាការត្រឹមត្រូវហើយ។ កាលណាឲ្យនៅក្រៅឃុំអាចប៉ះពាល់ដល់នីតិវិធីស៊ើបអង្កេត»។
ទោះយ៉ាងណាលោកស្រី ពឹង យក់ហៀប មេធាវីការពារសិទ្ធិជនត្រូវចោទសន្និដ្ឋានថាកូនក្តីលោកស្រីពេលនគរបាលសួរគ្មានមេធាវីទេ។ លោកស្រីថា បើនៅក្រៅឃុំគាត់មិនបង្កបទល្មើស និងមិនធ្វើឲ្យប៉ះពាល់ដល់សន្តិសុខសង្គមទេ។ ដូច្នេះសូមតុលាការបង្វិលសំណុំរឿងទៅឧទ្ធរណ៍ជម្រះឡើងវិញ។
ប្រសិនបើរកឃើញកំហុសដូចការចោទមែននោះលោក JAMES STANIFORTH RICKETSON ប្រឈមនឹងការជាប់ពន្ធនាគារពី ៥ ទៅ ១០ ឆ្នាំ។
ក្រោយជំនុំជម្រះលោក ចៅក្រម ស៊ឹង បញ្ញាវុឌ្ឍ ថ្លែងថាសាលដីកានៃសំណុំរឿងសុំនៅក្រៅឃុំនេះនឹងប្រកាសនៅថ្ងៃទី ១៧ ខែមករា ខាងមុខ ៕
