.jpg)
ជនជាប់ចោទចំនួន៦នាក់ពាក់ព័ន្ធនឹងការបាញ់សម្លាប់អ្នកការពារព្រៃឈើ ៣ នាក់កាលពីថ្ងៃទី ៣០ ខែមករា។ រូបថត សហការី
មណ្ឌលគិរីៈ ជនសង្ស័យ ៦ នាក់ ដែលពាក់ព័ន្ធនឹងការពួនស្ទាក់បាញ់សម្លាប់អ្នកការពារ និងអភិរក្សព្រៃឈើ ចំនួន ៣នាក់នៅស្រុកអូររាំង ខេត្តមណ្ឌលគិរី ត្រូវបានបញ្ជូនទៅឃុំខ្លួន នៅពន្ធនាគារខេត្តមណ្ឌលគិរី កាលពីម្សិលមិញ បន្ទាប់ពីចៅក្រមស៊ើបសួរ បានសម្រេចធ្វើការចោទប្រកាន់ពីបទសមគំនិត និងពីបទឃាតកម្មគិតទុកជាមុន។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរី បានប្រាប់ភ្នំពេញប៉ុស្តិ៍ថា ឈ្មោះ ផល ពេញ មេប៉ុស្ដិ៍អូរលែ និងឈ្មោះ កើត វេហា ជាទាហានការពារព្រំដែន ត្រូវបានចោទពីបទឃាតកម្មគិតទុកជាមុន និងប្រើប្រាស់អាវុធខុសច្បាប់។ ឈ្មោះ កើត វេតា មេបញ្ជាការកងអនុសេនាតូចលេខ ៣ និងឈ្មោះ ណាង វ៉ាន់និតត្រូវបានចោទប្រកាន់ពីបទសមគំនិត ក្នុងបទល្មើសឃាតកម្មគិតទុកជាមុន និង ឈ្មោះ ទន ធារ៉ា នគរបាលប៉ុស្ដិ៍អូររលែ និងឈ្មោះ ឡាយ សាវី មេបញ្ជាការរងកងអនុសេនាតូចលេខ ៣ បទធ្វើអន្តរាគមន៍និងផ្តល់ការអនុញាតដោយផ្ទាល់ ក្នុងបទល្មើសព្រៃឈើ។
លោកបញ្ជាក់ដូច្នេះថា៖«តុលាការយើង បានសម្រេចឃុំខ្លួនទាំង ៦ នាក់។ ឈ្មោះ ផល ពេញ និង ឈ្មោះ កើត វេហា ត្រូវបានចោទពីបទឃាតកម្មគិតទុកជាមុននិងប្រើប្រាស់អាវុធខុសច្បាប់ ក្នុងមាត្រាទី ២០០ នៃក្រមព្រហ្មទណ្ឌនិងមាត្រាទី ២០ នៃច្បាប់ ការគ្រប់គ្រងអាវុធ ចំណែក ឈ្មោះ កើត វេតា និងណាង វ៉ាន់និត ផ្តល់ជំនួយដល់ចារី លុបបំបាត់វត្ថុតាង…ផល ពេញនិងឈ្មោះកើត វេហាបានប្រើប្រាស់អាវុធពីរដើម ដើម្បីបាញ់ប្រហារ»។
លោកបានបន្ថែមថា៖«ឈ្មោះ ទន ធារ៉ា និងឈ្មោះ ឡាយ សាវី ត្រូវចោទពីបទធ្វើអន្តរាគមន៍និងផ្តល់ការអនុញាតដោយផ្ទាល់ ឬដោយប្រយោល ក្នុងការជួយដល់អ្នកធ្វើអាជីវកម្មព្រៃឈើ ក្នុងមាត្រាទី ១០០ ក្នុងបទល្មើសព្រៃឈើ…គេបញ្ជូនទៅពន្ធនាគារ ហើយចៅក្រមស៊ើបសួរ សម្រេចឃុំខ្លួនហើយរង់ចាំស៊ើបអង្កេតនឹងសវនាការ»។
លោក យឺត កាន អាយុ ២៤ ឆ្នាំ ត្រូវជាប្អូនបង្កើតរបស់លោក តើន សុខណៃ ជនជាតិភាគតិច និងជាមន្ត្រីឧទ្យានុរក្សតំបន់ការពារដែនជម្រកសត្វព្រៃកែវសីមា បានថ្លែងថា លោកមានការសប្បាយរីករាយនៅពេលតុលាការ បានចោទប្រកាន់ជនដៃដល់ទាំង ៦ នាក់ ហើយលោកសុំឲ្យដាក់ទោសអ្នកទាំងនេះដាក់ពន្ធនាគារអស់មួយជីវិត។
លោកបញ្ជាក់ថា៖«ខ្ញុំពេញចិត្តនឹងចំណាត់ការរបស់អាជ្ញាធរដោយពួកគាត់បានចាប់ខ្លួនជនដៃដល់បានទាំងអស់។ យើងមិនជឿទេថា ពួកគាត់ (ជនរងគ្រោះ) បានទារលុយ…ហើយវាបានបាញ់ ដើម្បីបំបិទមាត់ទាំងអស់ តែដោយសារអំពើអាក្រក់របស់ពួកវា ត្រូវបានចាប់បាន។ វាដោះសារដើម្បីបានរួចខ្លួន។ យើងសុំឲ្យច្បាប់ដាក់គុកពួកវាអស់មួយជីវិត»។
ជនសង្ស័យទាំង ៦ នាក់ ដែលត្រូវបានឃាត់ខ្លួនមានឈ្មោះ ១. ផល ពេញ ជានាយនគរបាលប៉ុស្ដិ៍អូររលែនៃវរការពារព្រំដែនលេខ ៦២១ នៃស្នងការដ្ឋាននគរបាលខេត្តមណ្ឌលគិរីត្រូវបានចាប់ខ្លួននៅព្រឹកថ្ងៃ ទី ២ ខែកុម្ភៈ នៅខេត្តត្បូងឃ្មុំ ២. កើត វេតា ជាទាហានការពារព្រំដែន ៣. ឡាយ សាវី ជាទាហានការពារព្រំដែន ៤. ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ ត្រូវបានចាប់ខ្លួននៅយប់ថ្ងៃទី ១ ខែកុម្ភៈ និង ៥. ឈាង វ៉ាន់និត ប្អូនថ្លៃ ផល ពេញ ត្រូវបានចាប់ខ្លួននៅរសៀលថ្ងៃទី ២ ខែកុម្ភៈ ឆ្នាំ ២០១៨។ ចំណែកទី ៦ កើត វេហា បានចូលខ្លួនមកសារភាពនៅថ្ងៃទី ១ ខែកុម្ភៈ។
កន្លងទៅជនសង្ស័យ ផល ពេញ បានឆ្លើយប្រាប់សមត្ថកិច្ចនៅក្រសួងមហាផ្ទៃថា ការកាប់ឈើនៅទីនោះគឺបានកើតឡើងជាធម្មតាទៅហើយ ទាំងពលរដ្ឋកម្ពុជា ទាំងវៀតណាម ហើយថា ថ្ងៃកើតហេតុ ថ្ងៃទី ៣០ ខែមករា មានកងរាជអាវុធហត្ថ និងបរិស្ថាន បានប្រទះឃើញរណារអារឈើជនជាតិវៀតណាមចំនួន ២ គ្រឿង ហើយបានសួរនាំពួកគេថា ហេតុអ្វីបានជាពួកគេចូលមកតំបន់ស ហើយថាក្រុមនេះ បានចូលជាច្រើនលើកមកហើយតែហាមពួកគេមិនស្តាប់ទេ។
ជនសង្ស័យបានថ្លែងថា កងរាជអាវុធហត្ថ និងមន្ត្រីបរិស្ថាន ដែលជាជនរងគ្រោះ បានថតរូបវៀតណាម និងចាប់រណារវៀតណាម ហើយបានសុំប្រាក់៥ លានរៀលជាថ្នូរនឹងការប្រគល់រណារឲ្យវៀតណាមវិញ ហើយឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ គឺជាអ្នកទាក់ទងជាមួយមន្ត្រីបរិស្ថាន តែដោយសារកងរាជអាវុធហត្ថ និងបរិស្ថានបានរាយការណ៍ទៅព្រះរាជអាជ្ញា ដែលធ្វើឲ្យលោក ផល ពេញដាច់ចិត្តបាញ់ទៅលើកងរាជអាវុធហត្ថ និងបរិស្ថាន។
គួរបញ្ជាក់ថា ករណីបាញ់ប្រហារនោះ បានបណ្តាលឲ្យមន្ត្រីការពារព្រៃឈើ ៣ រូបស្លាប់ នៅចំណុចអូរហ៊ុច ស្រុកអូររាំង ខេត្តមណ្ឌលគិរី ដែលបានកើតឡើងនៅចន្លោះម៉ោង ៤ រសៀល ថ្ងៃទី ៣០ ខែមករា ឆ្នាំ ២០១៨។
ជនរងគ្រោះទាំង៣នាក់ដែលត្រូវបានបាញ់ស្លាប់នោះ រួមមានមន្ដ្រីអាវុធហត្ថលើផ្ទៃប្រទេសម្នាក់ ឈ្មោះ សេក វឌ្ឍនា មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគមអភិរក្សសត្វព្រៃ Wildlife Conservation Society (WCS) ឈ្មោះ ថុល ខ្នា។
ទាក់ទងនឹងការស្រាវជ្រាវករណីនេះសមត្ថកិច្ចឲ្យដឹងថាគេបានរកឃើញសម្បកកាទូសចំនួន ៧ គ្រាប់សុទ្ធតែប្រភេទ AK និងថាជនរងគ្រោះត្រូវគេពួនស្ទាក់បាញ់ពេលកំពុងល្បាត។ អង្គការ WCS បានចេញសេចក្តីថ្លែងការណ៍កាលពីថ្ងៃទី ២ ខែកុម្ភៈ ដោយហៅជនរងគ្រោះទាំង ៣ ថាជា «វីរជនអភិរក្សព្រៃឈើ»។
ពាក់ព័ន្ធនឹងបញ្ហានេះ បន្ទាប់ពីពិធីបិទសន្និបាតស្តីពីលទ្ធផលការងារត្រួតពិនិត្យគ្រឿងញៀន ឆ្នាំ ២០១៧ និងលើកទិសដៅការងារឆ្នាំ ២០១៨ នៅថ្ងៃទី ៥ ខែកុម្ភៈ ឆ្នាំ ២០១៨ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានថ្លែងថា៖«យើងសោកស្តាយណាស់ព្រោះព្រៃនេះ ជាព្រៃលក់កាបោនទៅឲ្យក្រុមហ៊ុនអាមេរិកាំង ក្នុងព្រៃអភិរក្សហ្នឹង។ រឿងអីទៅឃុបឃិតគ្នាឲ្យអ្នកក្រៅ មកកាប់ឈើយកផលប្រយោជន៍។ តែរឿងរ៉ាវហ្នឹងបានចាប់អស់ហើយ ទាំងអស់៦នាក់»៕ រាយការណ៍បន្ថែមដោយ នៀម ឆេង
