.jpg)
លោក កើត វេហា ដែលជាប់សង្ស័យរឿងបាញ់មន្ត្រីស្លាប់។ រូប ហ្វេសប៊ុក
មណ្ឌលគិរីៈ មន្ត្រីតុលាការខេត្តមណ្ឌលគិរីបានថ្លែងប្រាប់កាសែតភ្នំពេញប៉ុស្តិ៍កាលពីព្រឹកថ្ងៃទី ១ ខែកុម្ភៈឆ្នាំ ២០១៨ ថា មន្ត្រីយោធាការពារព្រំដែនឈ្មោះ កើត វេហា ជាយោធានាយប៉ុស្តិ៍ការពារព្រំដែននៅវរៈ ១០៣ ដែលពាក់ព័ន្ធការបាញ់សម្លាប់មន្ត្រីអាវុធហត្ថ មន្ត្រីបរិស្ថាន និងបុគ្គលិកអង្គការ WCS នៅស្រុកអូររាំងបាននិងកំពុងឃុំខ្លួននៅកងរាជអាវុធហត្ថខេត្តមណ្ឌលគិរី។
អ្នកនាំពាក្យព្រះរាជអាជ្ញាខេត្តមណ្ឌលគិរីលោក ម៉ម វ៉ាន់ដា បានថ្លែងដែរថាតុលាការមិនទាន់ធ្វើការចោទប្រកាន់ ឈ្មោះ កើត វេហា នៅឡើយទេកាលពីម្សិលមិញជនសង្ស័យកំពុងត្រូវបានឃុំខ្លួននៅកងរាជអាវុធហត្ថខេត្តមណ្ឌលគិរីបន្ទាប់ពីចូលមកសារភាពដោយសារតែក្រុមការងារថ្នាក់ជាតិមិនទាន់បានបូកសរុបរបាយការណ៍។
លោក ម៉ម វ៉ាន់ដា បានបញ្ជាក់ដូច្នេះថា៖ «ករណីនេះយើងមិនអាចទាន់សរុបបានទេ។ ស្អែកគណៈកម្មាធិការថា្នក់ជាតិគាត់នឹងបញ្ចប់បូកសរុបរបាយការណ៍នេះ។ យើងមិនទាន់ចោទប្រកាន់ទេដោយសារសំណុំរឿងមិនទាន់សរុបរបាយការណ៍នៅឡើយ។ គាត់ត្រូវរក្សាទុកនៅទីនោះសិន។ គាត់បានចូលមកផ្តល់នូវចម្លើយយើងបានធ្វើការងារច្រើនមកហើយ»។ ប៉ុន្តែលោកបានបដិសេធប្រាប់ពីព័ត៌មានបន្ថែមដោយបញ្ជាក់ថាកំពុងស៊ើបអង្កេត។
លោក សូ សុវណ្ណ ស្នងការរងខេត្តមណ្ឌលគិរីបានប្រាប់ភ្នំពេញប៉ុស្តិ៍ថា កើត វេហា បានចូលសារភាពកាលយប់ថ្ងៃពុធហើយត្រូវបានយកទៅសាកសួរនៅការិយាល័យកងរាជអាវុធហត្ថខេត្តមណ្ឌលគិរី ខណៈពេលឈ្មោះ ផល ពេញ នាយនគរបាលប៉ុស្តិ៍អូរលែរ បាននិងកំពុងរត់គេចខ្លួន។
លោក សូ សុវណ្ណ បានបញ្ជាក់ដូច្នេះថា៖ «អាជ្ញាធរយើងកំពុងសាកសួរលោក កើត វេហា នៅខេត្ត។ ល្ងាចមិញគាត់ចូលមកម៉ោង ១១ យប់ហើយតាមពិតគាត់ចូលសារភាពខ្លួនគាត់ទេ។ គាត់បាននិងកំពុងសាកសួរនៅកងរាជអាវុធហត្ថខេត្ត មិនមែនយើងចាប់គាត់បានទេ។ យើងកំពុងស្វះស្វែងម្នាក់ទៀតឈ្មោះ ផល ពេញ»។
លោក សុវណ្ណ បានបញ្ជាក់បន្ថែមថាអ្នកពាក់ព័ន្ធមានតែ ២ នាក់ទេដែលសង្ស័យទាក់ទងនឹងការបាញ់ប្រហារនេះយោងតាមវីដេអូដែលផ្សព្វផ្សាយលើបណ្ដាញសង្គមហ្វេសប៊ុកដែលមន្ត្រីកងរាជអាវុធហត្ថម្នាក់បាននិយាយឲ្យដឹងថាផ្លូវនេះពីដើមគឺជាតំបន់ព្រៃក្រាស់ហើយថា វៀតណាមបានលួចធ្វើផ្លូវក្នុងរយៈពេលបួនដប់ថ្ងៃថ្មីនេះដើម្បីចូលដឹកឈើហើយនៅក្បែរនោះក៏មានទីស្នាក់ការបរិស្ថានផងដែរ ហើយបិទផ្លូវហើយផ្លូវនេះធ្វើដំណើរទៅវៀតណាម។នេះមានន័យថាវៀតណាមមកស៊ីរូងផ្ទៃក្នុងក្បែរប៉ុស្តិ៍វាហ្នឹងឯង (ឈើ) សុទ្ធតែរបស់វៀតណាមទាំងអស់ម្សិលមិញវាចេញអស់ច្រើនហើយ។
មន្ត្រីដដែលនេះបានថ្លែងបន្តថា៖ «ហើយយើងឃើញសុទ្ធតែជនជាតិវៀតណាមទាំងអស់ កងហ្នឹងហើយកន្លែងជំរំរបស់វាក៏បានមកដល់ដែរវាបានបោះចោលទាំងអង្រឹងមានគ្នា ៦ នាក់ហើយមានខ្មែរ ៣ នាក់»។
លោក អេង ហ៊ី អ្នកនាំពាក្យនៃកងរាជអាវុធហត្ថលើផ្ទៃប្រទេសបានថ្លែងថាគេកំពុងធ្វើការស៊ើបអង្កេត ហើយបានបដិសេធក្នុងការផ្តល់ព័ត៌មានលម្អិត។
ការបាញ់ប្រហារនេះបានកើតឡើងនៅចំណុចប៉ុស្ដិ៍អូររលែក្នុងភូមិសាស្ដ្រភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរីនៅចន្លោះម៉ោង ៤ ថ្ងៃទី ៣០ ខែមករា ឆ្នាំ ២០១៨ បានបណ្ដាលឲ្យស្លាប់មនុស្ស ៣ នាក់រួមមានមន្ដ្រីអាវុធហត្ថលើផ្ទៃប្រទេសម្នាក់ មន្ដ្រីឧទ្យានុរក្សនៃមន្ទីរបរិស្ថានខេត្តមណ្ឌលគិរី និងបុគ្គលិកអង្គការសមាគម អភិរក្សសត្វព្រៃ Wildlife Conservation Society (WCS) ហើយទាក់ទងនឹងការស្រាវជ្រាវករណីនេះលោក ប៊ុនឈាត បានថ្លែងថាសមត្ថកិច្ចបានរកឃើញគ្រាប់កាទូសកាំភ្លើង ៧ គ្រាប់សុទ្ធតែប្រភេទ AK និងថា ជនរងគ្រោះត្រូវគេពួនស្ទាក់បាញ់ពេលកំពុងល្បាត៕
